تعبان ومضايق وزعلان اوى ومش عارف افكر ...

[المصمم محمد]

السلام عليكم ورحمة الله وبركاته

يا جماعة انا مش لاقى حد اتكلم معاها , عشان كدة والله معتبركم اخواتى (ة) كلامكم اخواتى والمصحف

ويمكن بحكى معاكم وبتكلم معاكم اكتر ما بتكلم مع اهلى وكدة , مشكلتى يا جماعة هى الانجليزى

واحد يقولى صعب عليك ( لا مش حكاية كدة ) انا مش متاسس فى خالص وبفهم بالعافية

وكانت نصيحة الاستاذا ان احول من عام الى اى حاجة تانيه ( برغم انى متفوق فى كل المواد )

والمشكلة التانيه انى ميوله ادبى يعنى ممتاز فى المواد الادبى وغير كدة نفسى اكوان صحفى

لاكن الكل معتبرنى فاشل عشان انى اخترات ادبى بيقولى على ان ضعيف ومش هقدر اصد فى الرياض والفيزياء وكدة, فلو واحد فيكم عندو حل يقولى وتساعدونى بليز

انا اولة

[ahmed doula]

حول صناعى وريح واستريح احسن

بص حط فى دماغك انك مش اول واحد هياخد المواد دى ولا حتى اخر واحد واللى جابو الدرجات النهائيه فيها احسن منك (فى العزيمه والاصرار يعنى)

ولو مش عارف تحط كده فى دماغك ويبقى قدامك هدف معين فى حياتك يتجتهد وتعمل المستحيل عشانه يبقى اعمل زى ماقلتلك فى الاول لان الثانوى العام مش عايز لعب ولا هزار الهدف منه اصلا انه يحطك فى اصعب المواقف ويزنقك فى الامتحانات وكده لو مش عاجبك النظام ده يبقى تحول من دلوقتى احسن

[highlight]

سبحان الله
عشان مادة تضيع اعلى شهادة فى مصر!!!
استاذ محمد انا من راى تفضل فى العام زى ما انت
انت بتقول انت متفوق فى كل المواد الحمد لله
ولو زى ما بتقول انك مش متاسس فى الانجليش صح
ولو الانجليش عاملك مشكلة لمجرد انك مش متاسس فيه
يببقى خليها مادة حفظ ودش
دى الثانوية العامة للدش بعينه
مش تضيع من ايدك تفوقك فى كل المواد فى الثانوية العامة عشان مادة
حاول تضمن بقيت المواد
الانجليش مادة من 50
الامتحان طويل و كل سؤال عليه درجات قليلة جدا جدا
اعلاها البراجراف اللى عليه 6 ويتقسم على 2 فا بيبقى 3
يعنى لو الغلط كتير بس الدرجات قليلة
ومش عشان دخلت ادبى يبقى اسفة انك فاشل وغبى
ومعلش مع احترامى للى قالك انك فاشل لانك اخترت ادبى
فهو اللى عقله على قده.......
فى ناس فى العلمى متقدرش تمشى فى الادبى ابدا
فى ناس معندهاش القدرة اللى عندك الحمد لله

انا بعتبر منهج 2 ثانوى ده الا حد ما فيه درجة عالية من بدائيات اللغة
القواعد اللى فيه بسطة المتسقبل بانواعه و المضارع البسيط.......كله كلام سهل ان شاء الله

بس انا مش عايزة اخوفك
امتحان الانجليش فى 2010 و 2011 لتانية وتالتة ثانوى كان نار بمعنى الكلمة ولا يطابق اى معاير نهائى
ودا على عكس اللى المفروض امتحان مشترك بين العلمى والادبى يكون عليه

استاذ احمد....الانجليزى مادة سهلة والله مش صعبة ابدا
متضيعش الثانوية العامة عشان مادة
مع التدريب هتبقى ممتاز فيها بس خليك واثق فى نفسك وربنا يوفقك

[المصمم محمد]

مش حكاية كدة وربنا انا امتحانات فى المركز كل المواد وقفلت الحمد لله كل المواد وطلعت فيها الاول بتفوق فى امتحانات اول فصل لاكن الانجليزى جبت فيها مجموع وحش اوى ( + ما احترامى الى الاستاذا الا بيقول لى لعب وهزار انا الحمد لله ) عارف نفسى كويس
سعت الجد جد ( وهدفى محدود وهوصله ان شاء الله ) بالتوافيق وشكرا لردكم اسعدانى كتير ,,

[bassam.neno]

استعين بالله والصبر والصلاة ودبر شؤنك

[Dr.Nariman]

معلش خليك وراه لحد ماتفهم وتحفظ وربنا معاك

بس بلاش كلمة والمصحف دي عشان حرام

[المصمم محمد]

مرسى ع الكلام + يعنى الانجليزى ممكن احفظوا بس مش لزم افهموا ؟ احفظ واخش احل ع طول

[مدرس اللغة]

طيب أصعب الإنجليزي ولا العربي أنا بالنسبة لي العربي أصعب لأنه كله تطبيقات

[highlight]

مفيش حل للاسف غير كده
لازم تحفظ جامد وتدش وتخلص نفسك
حل كتير و السنة لسه قدامنا طويلة و هتلاقى نفسك بقيت كويس باذن الله
بس اهتم بردو كويس اوى بالمواد التانية
وربنا يوفقك يا رب