كنت فين لحد دلوقتى

[m.hazz]

كنت فين يا صايع لحد دلوقت ؟


هى مش كلمة صايع ديه كانت شتيمة زمان !




عندما تتأخر فى العودة إلى المنزل بعد المدرسة يتم أستقبالك بسؤال
( كنت فين يا صايع لحد دلوقتى ؟ )

وعندما يكون الزرار العلوى للقميص مفتوحاً
( ماتفتحش صدرك زى العيال الصايعة )



وكان هناك ارتباطاً وثيقاً بين الصياعة والتدخين والوقوف على النواصى ومعاكسة البنات
ووضع الايدى فى الجيوب أثناء الكلام مع الاب وشرب القهوة ومتابعة المشاهد الساخنة فى الافلام
والكلام فى التليفون بالساعات والرد على الكبار بأسلوب غير مهذب والتزويغ من المدرسة
والرسوب فى نهاية العام وأرتداء القميص على اللحم .



وكأن لقب صايع لقباً مخيفاً نهرب منه
( وهو الواحد اية غير سمعة وشوية حاجات فوق بعض )


وكنا نحرص على الابتعاد عن أى شخص يحمل لقب صايع علشان الواحد
( ميتشبهش )



ولكن بمرور الوقت حدثت طفرة لم تعد كلمة صايع شتيمة
بل اصبحت وساماً يضعه الاخرون على صدر كل من يحوز إعجابه ولم يعد الصايع هو الشخص
( اللى مش متربى قليل الادب اللى بيسقط دايماً وقاعد طول النهار على القهوة
وبيعلى صوتة على أهلة وبيسرق فلوس من ورا أهله علشان يجيب سجاير )
هذا الشخص مابقاش أسمة صايع بقى اسمة
(( مغفل ))



وأصبح الشخص الصايع هو الشخص الناجح القادر على أثارة إعجاب الناس من حوله
والشخص القادر على أنتزاع تصفيقهم وأصبح الصايع هو النموذج والقدوة والمثل الاعلى أحيانا .



ولقب صايع لم يعد أيضاً مقصوراً على الاشخاص فقط فهناك أشياء كثيرة ممكن تقول عليها صايعة

- يعني جهاز الموبايل اللى فية كل الامكانيات اللى محتاجها واللى بتحلم بيها يبقى موبايل صايع .

- ممكن تلاقى جون صايع عبارة عن جمله بين 3 لاعبين سريعة ورشيقة وغير متوقعة .

- ممكن تلاقى بوستر لألبوم لمطرب متصمم بطريقة صايعة ومحطوط فى حتة صايعة .

- ممكن تشوف فيلم نهايته غير متوقعة ولما تمر فى خيالك تبقى نهاية صايعة

- والسيناريست اللى كتب الفيلم سيناريست صايع .

- وممكن تلاقى بلد يتقال عليها بلد صايعة زى الصين اللى قدرت إنها تخترق مصر بمنتجاتها
ويبقالها فى كل بيت مصرى 20 منتجاً على الاقل وبالتالى يمكنك أن تقول
( الصين دوله صايعيين قوى )



لم يعد لقب صايع مزعجاً مثل لقب عنده إيدز ولكن صايع أصبح وسام شرف مساوي فى قوتة لوسام الـ " iso 9001 "
ولا اعرف ماذا حدث بالضبط وغير سمعة الكلمة 180 درجة
غالباً هى دى الصياعة !




أستطيع الان وأنا ضميرى مستريح أن أشجعك على أن تكون صايع بالمعنى الجديد للكلمة .
للصياعة بمفهومها الجديد أداب يجب الالتزام بها حتى تستحق اللقب

- الصايع عمره مايقول على نفسة انا صايع عمرك شفت واحد ذكى ماشى يقول للناس ( انا ذكى يا جماعة ) .

- الصايع يكرة الفهلوة لان الفهلوة سرقة ومجرد استغفال للناس ( الصايع يحترم ذكاء الاخرين ) .

- الصياعة تعتمد على الثقافة العامة فى كل المجالات يكفيك انك تعرف حاجة عن كل حاجة .

- الصياعة ان بالك يبقى طويل وماتبدأش بالغلط وماتردش على اللى بيستفزك انك تسامح الشخص اللى تقدر تنتقم منه بسهولة .

- الصياعة انك تبقى فاهم كويس إنه مش مهم إنك تغير الكون .. المهم إنك تخلى الكون ما يغيركش .



- حياتك فيلم واللى حواليك بيلعبوا أدوار الأب والأم والجار والصديق بس انت بطل الفيلم .. حاول دايماً تتصرف زى الابطال .

- الصديق الجيد هو الهدية الوحيدة اللى الواحد بيقدمها لنفسه بنفسه .

- مش مهم أن الناس بتحبك المهم أنك تحب كل الناس .

- عمرك ما هتعرف قيمة الميه من غير ما تعطش وعمرك ما هتعرف الصح من غير ما تغلط .

- مش أى هدية ينفع تقبلها .

- ماتسيبش الريموت كنترول فى إيد حد إلا لو كنت بتثق فيه .

- ماتصدقش اللى يقولك ( هى كده ) او ( هى ما تتعملش غير كده ) كل الحاجات ينفع تفكر فيها من اول وجديد

حتى لو قالولك دى ثوابت .. وخليك فاكر أن السباحة لو كانت بتخسس – زى ما بيقولوا – كان الحوت بقى سمكة زينة من زمااااان .


- أوحش حاجة إنك تكون مابتعملش حاجة لأنة هيبقى صعب تعرف هتخلص امتى .

- الخبرة هى الحاجة الوحيدة المفيدة فى الفشل .

- العقل زى الباراشوت .. مابيشتغلشى غير لما يتفتح .



ياريت بقي تكونوا استافادتوا ازاى تكونوا صايعين

[بورسعيدى]

الحقيقة ان ده مش موضوع

ده درس ومش عيب لما اقول ان ده درس منك

وبكل فخر اقول لك انت انسان صايع جدا

بس حبيت اوضح نقطه

اى كلمه معناها الحقيقى فيما نتفق عليه

يعنى اذا اتفقنا جميعا على معنى كلمة معينة مثل كلمة ( صايع)

اصبحت الكلمة حوار بيننا جميعا

وهذا ماحدث مع كلمة صايع

زمان كنا نعتبر لفظ صايع يعتبر عيب وكلنا متفقين على هذا
والان لفظ صايع ممكن يطلق على لاعب كرة محترف احرز هدف مثلا من زاوية صعبة نطلق عليه لعيب صايع اوى اعجابا منا بطريقة احرازه للهدف وكأن كلمة صايع اصبحت مديح
واذا فرضنا ان الحارس ابرع وتصدى لها نقول عليه حارس صايع لانه ابرع فى مسك او صد الكرة الصعبة وهكذا
ليه؟؟؟
لاننا اتفقنا جميعا على معنى الكلمة
ولكن لا ننكر انك اثرت موضوع مهم جدا
شكرا لك

[مروه]

موضوع تحفه بمعنى الكلمه بجد
وكلمة صايع دى يمكن بقت اكتر كلمه بتتقال اليومين دول
اى حاجه حلوه وحشه ملخبطه تبقى صايع
معرفش ازاى
والموضوع بجد عجبنى اوى
مشكووووووور

[nahoous]

ده لأن الموازين اختلت بين الشباب

أصبحت لغة الشباب عكسية

الغلط أصبح لديهم صح

والصح أصبح عنهم غلط

أتقوا الله ايها الشباب وعودا إلى صوابكم

لأن أول الخاسرين هو أنتم

وعندما تفوقون من الغفلة

ستندموا على ما فعلتم

الله الهادى الى سواء السبيل

[ymymym]

والله عندك حق الكلمه دي بقت منتشره ومبحبهاش ابدا الكلمه دي بس خلاص فعلا كل حاجه اتغيرت

[hazem_ayman]

كده بقا الواحد يتمنى يبقا صايع

كنت فين يا صايييييييع من زمان بالمواضيع الجامدة دى

لا بجد الموضوع جامد

وبيحصل حقيقيـــــى

وبنلاقيـــــى شباب كتير بتبقى مبسوطه لما بتنده ليـهم بالاسم دا

مش نقدر نقول الا ربنا يشفيـــهم


.. زمان اللي كان يتقاله صايع ..

كان كـانه انضرب بالنار .. دلوقتي دي علامة الجوده للشباب المثري .

[Hamset_Etab]

هو المعنى الجديد بتعها بصراحه رائع وكله نفسه يبقى كده اكيد
بس برده الكلمه معرفش ملها يمكن نطقها وحش حروفها والله ما انا عارفه بس هى فيها حاجه مش متظبظه وخلاص...... ثانكس على التوبيك

[عبقرينومان]

الصياعة أدب

وبجد انا برشح الموضوع ده للنشر في عدد المجلة القادم

[يوسف الشوري]

دا علي كدا الواحد صايع اخر حاجه