استفسارات بخصوص كليات علوم الحاسب ..

[mg_net55]

السلام عليكم

انا لسه مخلص امتحانات ثانوية عامة وناوى تخصص فمجال البرمجة لكن المجموع اللى متوقعه لنفسى مش هيخلينى ادخل حاسبات ومعلومات حكومى بالتالى لجأت لحل الخاصة .. لكن قابلتنى اسئلة كتير

هل علوم حاسب "خاص" شهادتها تعادل حاسبات ومعلومات "حكومى" ؟ وهل بيكونوا بنفس الكفائة من ناحية المنهج وفرص الشغل ؟

وازاى اعرف اذا كان دا نظم ادارية ولا علوم حاسب ؟
انا من خلال بحثى لقيت جامعتين اللى هما 6 اكتوبر و msa والاتنين فيهم علوم حاسب وتقريبا نفس مستوى المجموع 80% حسب ما قريت فموضوعات قبل كدا وهى بتقبل من شعبة رياضة فقط .. وايه الفرق بينها وبين المعاهد المعتمدة ؟

والجامعتين دول كويسين ولا لا ؟ انا كنت ناوى على 6 اكتوبر لكن عرفت ان msa بتدى شهادتين واحدة من بريطانيا والتانية من مصر ومفيش فرق كبير فالمصاريف

وايه المستوى المطلوب فالانجليزى عشان ادرس صح ؟ وايه لغات البرمجة اللى اكون على علم مسبق بيها بحيث انى اتعلمها فالاجازة دلوقتى ؟

اسألتى كتير معلش بس انا احترت جداً من الموضوع دا وكل ما الاقى اجابة بعدها بيوم اكتشف حاجة تخلينى اشك فالمعلومات اللى عندى .. وياريت اي حد عنده معلومات تخص الموضوع يضيفها اكون شاكر ليه
.....

[kh4led]

انا كمان نفس النظام بس اعتقد ممكن الحق حكومه ان شاء الله وانت كمان ربنا يوفقك وتلحق حكومه ..
بس وانا بدور في الخاصه من الكم موضوع الي شفتهم msa و6 اكتوبر جامعات كويسه وفي الجامعه الالمانيه بس علوم حاسب فيها مش تبع حاسبات تبع هندسه ودي ميزه علشان النقابه وغير كدا الالمانيه بعد الامريكيه افضل الجامعات الخاصه يعني لو امكانياتك تتحملهم متدورش في غيرهم و وبردو ميزة الشهاده البريطانيه من msa معرفش عنها كتير بس عجباني الصراحه وفي ناس كتير بيشكروا في معهد العاشر والشروق بس المشكله ان كل الي بيتكلم علي الخاص بيتكلم في الهندسه يعني كل المواضيع الي بشوفها بتبقي اراء في الهندسه مبيتكلموش عن علوم حاسب .. والفرق بين الجامعات الخاصه والمعاهد ان الجامعات بتحتوي علي 5 كليات لكن المعهد مش بيكمل 5 كليات الي زي الشروق والعاشر كدا والشهاده مفيش فرق بينهم وبين بعض ولا بينها وبين الحكومي المفروض (الا ان بشوف ناس من الحكومي بتقلل من شهاده الخاص . وبتوع الخاص بيردوا ان مفيش فرق ) وبالنسبه لموضوع مستواك في الانجليزي معرفش والله دي
ولغات البرمجه في شبه اتفاق علي C++ وفيه قناه علي اليوتيوب واحد اسمه محمد الدسوقي بيشرح الاساسيات فيها بصراحه عالمي ربنا يباركله تابعه وشرحه بسيط وعربي

وربنا يسهل وحد عنده معلومات عن علوم حاسب خاص يدخل يقول لنا