Your Guide

[Dr.Mohamed Sabry]

السلام عليكم ورحمة الله وبركاته


إن شاء الله الموضوع دا هيبقي مرجع لطلبة الثانوية العامة وعون ليهم بداية من دخول 3 ثانوي إلي النتيجة إن شاء الله ـ هنتكلم فيه عن المشاكل اللي ممكن تقابلك و إزاي تتخلص منها و إزاي تمشي صح و إزاي تتهيأ نفسيا للسنة الجاية و إزاي تعدي آخر شهر قبل الإمتحان بخير و إزاي تراجع ، إن شاء الله الموضوع هيبقي أكتر من مشاركة ..

القصد من وراء هذا الموضوع ـ مفيش طالب يقع ف الأخطاء اللي بتخلي ناس كانت الأوائل تنزل للصفر ، وناس كانت في الصفر وتفضل في الصفر ، الموضوع دا خلاصة تجربة بل تجارب والله من وراء القصد والسبيل ...

[Dr.Mohamed Sabry]

إيه الفرق بين علمي علوم وعلمي رياضة ؟

قبل ما تحدد هتدخل إيه لازم تعرف كل حاجة عن الفرع اللي انت داخله باختصار شديد :

علمي علوم
المواد : ( عربي - انجليزي - لغة أجنبية ثانية - كيمياء - فيزياء - أحياء - جيلوجيا )
مميزاته :
- امتحانات مضمونة نسبيا ـ معتمدة علي حفظك للمنهج ( بخصوص الجيلوجيا والاحياء ) .
- فرصة في الكليات العالية كويسة .
عيوبه :
- مش مناسب للي مبيعرفوش يحفظوا .
كلياته :
- كلية الطب البشري ( حد أدني 97.8 ) .
- كلية طب أسنان ( حد ادني 97.3 ) .
- كلية صيدلة ( حد أدني 96.5 ) .
- كلية علاج طبيعي ( حد أدني 96 ) .
- كلية طب بيطري ( حد أدني 95 ) .
- كلية علوم ( حد أدني 94 ) .
- كلية تمريض ( حد أدني 93 ) .

علمي رياضة
المواد : عربي - انجليزي - لغة اجنبية ثانية - كيمياء - فيزياء - رياضة 2 بفروعها .
مميزاته :
- تحدي كويس جدا ومغامرة رائعة لراغبي هندسة بترول .
- معتمد علي الفهم ( الرياضة ) .
-فرصة كويسة لراغبي كلية هندسة ومستواهم وسط .
عيوبه :
- إمتحانات مش مضمونة نسبيا ( ممكن تحل أكتر من ملخص و تلاقي فكرة جديدة في الإمتحان، لكن عموما بتبقي صعبة علي الكل ) .
- فرق شاسع بين كلية هندسة بترول و كلية هندسة .
كلياته :
- هندسة بترول السويس ( حد أدني 98.3 ) .
- هندسة ( حد أدني 93 ) .

إزاي تختار علمي علوم أم علمي رياضة ؟

أولا : علي حسب رغبتك انت ، و سيبك من سهل أو صعب ، مفيش حاجة سهلة ، كله صعب بطريقة معينة ، وكله مع المذاكرة بيبقي سهل ، وسيبك من خوفك من تدخل كذا يمكن متلحقش كذا ، قبل ما تسأل واحد ويقولك دا سهل أو دا صعب ـ اسأل حد نجح في المجال دا ـ يعني لو نفسك تدخل ، هندسة بترول وخايف متلحقش ، اسأل واحد في هندسة بترول وشوفه هيقولك إيه ، متسألش واحد فشل ف حاجة زي كدا لأنه هيقنعك بصعوبة الموضوع .. دي حياتك انت وانت اللي بتبنيها وانت أكتر واحد هتجازف و تعمل المستحيل عشان تبنيها صح ، انت أول مرة يتحط علي عاتقك مسئولية ، و هي أهم مسئولية ، مسئولية مستقبلك ... عندك حلم دافع عنه .. نفسك تبقي دكتور أو مهندس يبقي تقدر .. مادام توفرت الرغبة ستتولد الإرادة ويتحقق الحلم .
ثانيا : لو فيه اعتراض بين رغبتك ورغبة اهلك ، أكيد هما شايفين الموضوع من زاوية تانية ـ اتحاور معاهم ولو أقنعوك برأيهم و اقتنعت ، كان بها ، و لو أقنعتهم انت ، كان بها ، ولو لم تصلوا إلي نقطة لقاء .. هنا تصلي استخارة .
ثالثا : صلاة الإستخارة

• تبدأ صلاة الاستخارة كباقي الصلوات بالنيّة؛ حيث على الإنسان أن ينوي للصّلاة قبل أن يشرع بها.
• الوضوء المشابه لأيّ صلاةٍ عاديّة.
• البدء بصلاة ركعتين، ومن السنّة بعد قراءة الفاتحة بالركعة الأولى تلاوة سورة (قل يا أيّها الكافرون)، وبعد قراءة الفاتحة في الركعة الثانية تلاوة سورة (قل هو اللّه أحدٌ).
• التسليم آخر الصلاة كما يحدث في أيّ صلاةٍ عاديّة.
• رفع اليدين للدّعاء بتضرّع بعد التسليم، واستحضار عظمة الله وقدرته أثناء الدعاء.
• حمد الله والثّناء عليه عزّ وجل، والصّلاة على النبيّ محمد صلّى الله عليه وسلّم، ويُفضل التلفّظ بالصّلاة الإبراهيميّة الّتي تُقال عادةً عند التشهّد وهي: (اللّهمّ صلّ على محمّدٍ وعلى آل محمّدٍ كما صلّيت على إبراهيم وعلى آل إبراهيم، وبارك على محمّدٍ وعلى آل محمّدٍ كما باركت على إبراهيم وعلى آل إبراهيم في العالمين إنّك حميدٌ مجيدٌ).
• قراءة دعاء الاستخارة كما ورد عن رسولنا الكريم. وسيتمّ ذكره آخر مقالنا هذا.
• تسمية الحاجة المراد الاستخارة بها أثناء الدعاء وذلك بعد قول (اللهمّ إن كنت تعلم أنّ هذا الأمر...)؛ حيث يتمّ تسمية الأمر.
• تكرار ذكر الحاجة مرّتين، وذلك كما ورد في الحديث الشريف مرّةً في الخير ومرّةً في الشر.
• الصلاة على النبيّ محمّد صلّى الله عليه وسلّم بعد الانتهاء من الدعاء، ثمّ ترديد الصلاة الإبراهيميّة.
• الرّاحة والتوكّل على الله تعالى في جميع الأمور، والتيقّن بشكلٍ تام أنّ الله تعالى لا يتخلّى عن عبده المؤمن.
• السعي وراء الأمر إن كان طيّباً وحلالاً، والابتعاد عنه إن كان فيه أيّ شرٍّ للعباد أو ظلمٍ لهم، والإيمان الحقيقي بأنّ الله تعالى سيدبّر الطريق الصحيح بعد الاعتماد عليه.

دعاء صلاة الاستخارة

عن جابرٍ رضي الله عنه قال: قال رسول اللّه صلّى الله عليه وسلّم : إذا همّ أحدكم بالأمر فليركع ركعتين من غير الفريضة ثمّ ليقل: ( اللّهمّ إنّي أستخيرك بعلمك، وأستقدرك بقدرتك، وأسألك من فضلك العظيم فإنّك تقدر ولا أقدر، وتعلم ولا أعلم، وأنت علّام الغيوب، اللّهمّ إن كنت تعلم أنّ هذا الأمر (هنا تسمّي حاجتك ) خيرٌ لي في ديني ومعاشي وعاقبة أمري أو قال: عاجل أمري وآجله، فاقدره لي ويسّره لي ثمّ بارك لي فيه، اللّهمّ وإن كنت تعلم أنّ هذا الأمر (هنا تسمّي حاجتك ) شرٌّ لي في ديني ومعاشي وعاقبة أمري أو قال: عاجل أمري وآجله، فاصرفه عنّي واصرفني عنه واقدر لي الخير حيث كان ثمّ ارضني به،.( رواه البخاري )

.
.
.

يُستَكمل إن شاء الله

[Dr.Mohamed Sabry]

إزاي تتهيأ نفسياً لـــ 3 ثانوي ؟

مبدئياً .. طلبة تانية ثانوي اللي رايحين تالتة إن شاء الله في أجازة 3 شهور تقريباً و تبدأ الدروس في الشهر الأخير ، أجازة شهرين إن شاء الله .

أولا تبطل كل حاجة غلط بتعملها من دلوقتي و يكون هنا الفاصل بين حياتك اللي فاتت وحياتك الجاية ، انت هتبني مستقبلك ، هتحدد حياتك الجاية بل و حياة أولادك إن شاء الله بَعد عُمر ، بمعني انك كبرت علي أي حاجة غلط بتتعمل و أخص بالذكر الشباب .. ( نور الله لا يُهدي لعاصي ) .

ثانياً ، تجدد حياتك كلها وتجدد قلبك وتفتح صفحة جديدة مع نفسك ومع الناس اللي حواليك ، يعني لو مخاصم حد أو غلط في حد ، صالحه مش عيب ، العيب انك تستمر علي غلطك .

ثالثا ، تجدد علاقتك مع ربنا بمعني انك تبدأ تقرأ قرآن كتير و تحفظ فيه ، أنا ليا واحد صاحبي حفظ القرآن كامل من شهر 8 إلي شهر 5 و احنا في تالتة ثانوي ودخل هندسة بترول والله .. وتتأمل في الصلاة ـ تتأمل معني كل كلمة بتتنطق .. ومعني كلمة الحمد لله رب العالمين اللي بتتقال في كل صلاة فوق الــ 5 مرات والكلمة اللي بعدها ( الرحمن الرحيم ) .. وتصلي الفجر ـ، لا يكتئب شخص يصلي الفجر ـ الإمام أبو جعفر في أحد كتبه ربط بين بداية السور ونهاياتها .. في بداية سورة الفجر .. ( أقسم الله بالفجر ) وفي النهاية قال " يا ايتها النفس المطمئنة ، ارجعي إلي ربك راضية مرضية ، فادخلي في عبادي و ادخلي جنتي "
إضافة لأنه من البردين .. وادعي في كل صلاة فجر ، طالما لك مطلب فادعو به .

مش معني إنك هتعمل دول عشان ثانوية عامة بس .. دول أساسيات أصلا في حياتك بس كتير بيتجاهلهم .


يُستَكمل إن شاء الله

[Mahmoud3129]

موضوع مميز فعلا رائع جدا جدا أرجو الإكمال ربنا معاكم

[Dr.Mohamed Sabry]

المشاركة الأصلية كتبت بواسطة medowebhost.com

موضوع مميز فعلا رائع جدا جدا أرجو الإكمال ربنا معاكم

شكرا لمرورك .. جزاك الله خيرا

[Dr.Mohamed Sabry]

المطلوب منك تعمله في أول شهر أجازه ؟

كتير جدا بيغلط وياخد الموضوع جد من بداية الأجازه ويشوف ملخصات الفيزياء ويسمع شرح ويذاكر بجد ويتهيأ له إنه ماشي صح .
لكنه مبيكونش استفاد أي حاجة لأن الي اتذاكر دا هيتنسي بمرور الوقت ( السنة 11 شهر ) ومش مذاكرتك في الفترة دي الي هتدخل بيها الامتحان إضافة إنك هتوصل لمرحلة ملل مش كويسة في نص السنة و يا عالم هتقدر تفوق منها ولا لأ ....
عن تجربة ؛ زميل ليا كان بيذاكر 11ساعة كل يوم في بداية السنة و لما وصل لشهر 1 أهمل المذاكرة وبدأ يمل منها ...
الخلاصة (( العبرة مش إنك تبدأ م الأجازه ، السنة فيها وقت يكفيها وزيادة بس تستغله صح )) .

تعمل إيه في أول شهر أجازه ؛

قضيه استجمام ؛ وتخلص بس من كل حاجة سلبية في حياتك ؛ و وقت فراغك قضيه إما في حفظ القرآن ولو تخصص كل يوم ساعة من ال 24 ساعة تبقي كويس جدا
وممكن تقضي وقت علي النت تتكلم مع صحابك ، وممكن تخرج مع صحابك ، وممكن تتثقف ثقافة عامة زي إنك ممكن تقرأ في كتب علمية أو تقرأ رواية ..
ولو كان ضروري تدخل نفسك في جو الثانوية .. يبقي تقرأ ، تقرأ مش تحفظ القصة بتاع العربي ؛ ممكن تسمع فيلم وثائقي لفارادي و أينشتين بخصوص الكهربية والحديثة .. ممكن تفهم ال dna في الأحياء وتسمع عنه أفﻷم وثائقية ؛ صدقني هتستمتع جدا ولما تدخل السنة نفسها هتحب تذاكر الحجات دي .. بكدا هتكون استفادت من أول شهر بكل الأشكال .
.
.
.


يُستكمل إن شاء الله

[رفيقة الامل]

موضوع جميل
موفق ان شاء الله

[Dr.Mohamed Sabry]

المشاركة الأصلية كتبت بواسطة رفيقة الامل

موضوع جميل
موفق ان شاء الله

شكرا علي مرورك
جزاك الله خيرا

[رفيقة الامل]

المشاركة الأصلية كتبت بواسطة dr.mohamed sabry

شكرا علي مرورك
جزاك الله خيرا

ياريت حضرتك تكمل ومتسبناش احنا محتاجين حد يساعدنا خصوصا لو واحده اكبر وحده ف اخواتها زى ومعندهاش اى تجربة ولا حد

[Dr.Mohamed Sabry]

المشاركة الأصلية كتبت بواسطة رفيقة الامل

ياريت حضرتك تكمل ومتسبناش احنا محتاجين حد يساعدنا خصوصا لو واحده اكبر وحده ف اخواتها زى ومعندهاش اى تجربة ولا حد

إن شاء الله أكمل الموضوع ، الامتحانات هي بس سبب التأخير .
ثانيا مش أنا اللي بساعد .. أتمني ربنا يجعلني سبب في تقديم المساعدة
إن شاء الله توصلي للي نفسك توصلي له

[Dr.Mohamed Sabry]

تاني شهر أجازة

هقول نفس البداية ، اتخلص من كل حاجة سلبية في حياتك وصدقني لو معملتش كدا هيجيلك وقت في السنة نفسها تندم جدا إنك متوقفتش كل حاجة غلط بتعملها ، ممكن عموما في الأجازة تقعد مع نفسك ساعة يوميا - بدون موبايل ولا نت ولا غيره .. صفي حساباتك مع نفسك ، صدقني لو عملتها أكتر من مرة هيبقي عندك صفاء ذهني عالي وقوة تركيز وذكاء ممتاز ..

بخصوص الدراسة ؛ انت مش مجبر إنك تذاكر ، لكن لو مُصِّر قدامك الآتي :
- راجع النحو اللي انت أخدته كل اللي فات ولو كل يوم 3 دروس ( مش هيستغرقوا ساعة ) .
- اقرأ في قصة الإنجليزي كل يوم فصل ( مش هيستغرق ساعة ) .
- احفظ كلمات انجليزي كل يوم 60 كلمة ( مش هيستغرقوا ساعة ، في خلال الشهر هتكون خلصت 1800 كلمة ) .
- اسمع أفلام وثائقية عن الفيزياء وقوانين فاراداي .
- اقرأ كل يوم فصلين قصة عربي ، قراءة عابرة هدفها الفهم بس ( مش هيستغرق نص ساعة ) .

إن شاء الله إن عملت الحاجات دي هتدخل السنة مطمئن جدا ، وحالتك النفسية كويسة وإن شاء الله معنوياتك مرتفعة ..



يُستكمل إن شاء الله

[رفيقة الامل]

المشاركة الأصلية كتبت بواسطة dr.mohamed sabry

إن شاء الله أكمل الموضوع ، الامتحانات هي بس سبب التأخير .
ثانيا مش أنا اللي بساعد .. أتمني ربنا يجعلني سبب في تقديم المساعدة
إن شاء الله توصلي للي نفسك توصلي له

ان شاء الله ربنا يكرمك ويكرمنا
ويجعله ف ميزان حسناتك
وجزاك الله كل خير

[amen.soft]

موضوع جامد جدا واستفدت كتير
بس ممكن مذكرة نحو لما سبق كله ومذكرة ترجمة انجليزى ومذكرة ترجمة فرنساوى

[Dr.Mohamed Sabry]

أفلام وثائقية عن الفيزياء


وثائقي كامل ومترجم عن الكهرباء



https://www.youtube.com/watch?v=9Dua_1GruxU


الكهرباء والمغناطيسية .. الدكتور مصطفى محمود




https://www.youtube.com/watch?v=M1Esdrf6BsI

مصطفى محمود الليزر الجزء1




https://www.youtube.com/watch?v=Zw2BHODZBjE

مصطفى محمود الليزر الجزء 2




https://www.youtube.com/watch?v=1M74imE2oc8


أسرار فيزياء الكم (1): كابوس أينشتين




https://www.youtube.com/watch?v=vMdyyugw3mE


أسرار فيزياء الكم (2): لتكن هناك حياة




https://www.youtube.com/watch?v=UiKQDGwPmN0

[Dr.Mohamed Sabry]

أفلام وثائقية عن الأحياء


DNA

https://www.youtube.com/watch?v=bIlVd5Ca8MQ


التكاثر عند الإنسان




https://www.youtube.com/watch?v=mGGL-sr1q2Q



مذكرة نحو كاملة

http://www.thanwya.com/vb/showthread.php?t=249610

كلمات انجليزي

http://www.thanwya.com/vb/showthread.php?t=234845

مذكرة فرنساوي

http://www.thanwya.com/vb/showthread.php?t=543422

.
.
.

يُستكمل إن شاء الله