مساعده من كل مدرسي حاسب لغات

مدرس_حاسب · #1 20-02-2015, 08:06 PM

سلام عليكم
لو سمحت عايزه مدرسي حاسب الي في مدارس لغات سواء تجريبي او لغات خاص
يقولي نظام العمل في اللغات ايه علشان انا مدرسه في مدرسه حكومي وعايزة اروح لغات بس ما اعرفش ايه نظام اللغات
1- هل الشرح كله بالانجلش ومافيش عربي خاص و لا ايه النظام داخل الكلاس بالضبط
2- طيب علشان اروح اقدم في لغات الانترفيو بيكون ازاي
مع العلم اني كويسه في اللغه ودراستي كلها في الكليه كانت انجلش (حاسبات ومعلومات)
وعندي حبره 10 سنوات (4 خارج مصر - 6 داخل مصر)
ارجو الرد

مدرس_حاسب · #2 21-02-2015, 10:16 AM

177 مشاهده مفيش و لا رد
مفيش مدرسين حاسب شغالين في لغات

مدرس_حاسب · #3 21-02-2015, 06:28 PM

يارب يكون في مدرسين في لغات يقدروا يفدوني
يـــــــــــــــــارب

مدرس_حاسب · #4 23-02-2015, 06:58 PM

لا حول و لا قوة الا بالله العلي العظيم

محمود عباس حلمي · #5 23-02-2015, 08:54 PM

الاستاذ / الاستاذة مدرس حاسب
ده رد من مدرسة زميلة لعله قد يفيدك
بما اني اشتغلت كمدربة للحاسب من يوم ماتخرجت لغايه النهرده يعني بتاع 15 سنة كده وطول عمري بحط المناهج بل والملخصات الي متخرش المية فاعتقد اقدر افيدك في الحكاية دي وهحاول اختصر قدر الامكان ..

اولا طالما المدرسة مسلمتكيش اي منهج يبقى هم في الباي باي يعني مش باصين للماده انها حاجة مهمه وده يتأكد من انهم عينوكي برغم عدم وجود سابقة خبرة.. دي نقطه كويسه جدا استغليها في انك تبقي واثقة من نفسك وانتي بتشرحي لاول مرة لان اي حاجة هتطلع منك هتبقى حلوة .. واطمنك تدريس الحاسب من اسهل مايكون ولو حباه هتبدعي فيه وهتسيبي فيه بصمتك ..

ثانيا مفيش فرق تقريبا مابين الدراسة بالعربي او الانجليزي .. في كل الاحوال انتي مضطرة تحفظي مصطلحات سواء عربي او انجليزي مش هتفرق معاكي .. يعني بدال ماتقولي شاشة هتقولي مونيتور بدال ماتقولي ماوس تقولي فأرة مش هتفرق وعلى فكره انا شخصيا بحب التدريس بالانجليزي اكتر بكتير من العربي وبيفيدني كمدربة اني ادرس بالانجليزي لاني بعد كده بقدر اذاكر من على النت في المراجع الاجنبية خاصة لو بدرس برمجه صعب تلاقي لها مراجع عربي كويسه ..

لو بتدري ماده غريبة عليكي لاول مرة بالانجليزي اقري عنها الاول ملخص بالعربي وهتلاقي الملخصات مالية النت .. فهمتي الفكرة وفهمتي الموضوع بيدور حول ايه خشي على الجوجل على طول وهاتي مرجع اجنبي واقري فيه والي متعرفيهوش عليكي وعلى جوجل ترجمه نسخ ولصق وهيترجم لك بس متخليهوش يترجم لك نص كامل خذي كلمه كلمه وحاولي تفهمي بنفسك الاول بعد كده مش هتحتاجي ترجمه وهتمشي لوحدك ..

هتفصلي في كل معلومه وتتكلمي فيها كتير عشان تركز في الذهن ولا تستهيني باي معلومه او تعتبريها تافهة .. وهقولك مثال ..
البدايه بتكون غالبا نظرية .. هتتكلمي عن تاريخ الحاسب وكيف نشأ .. هتتكلمي عن وحدات الادخال والاخراج .. هتمسكي كل واحده وتشرحي بشكل مفصل يعني مثلا الماوس هتتكلمي ازاي نمسكها مسكه صح وتقعدي تدربيهم يجي خمس دقائق كده على المسكه .. بعدين هتتكلمي عن الزر الايمن والايسر والفرق بينهم .. ثم كليك واحده ولا اثنين كليك وامتى بنعمل دي وامتى دي .. بعدين شكل مؤشرات الماوس وامتى يبقى انتظار وامتى الجهاز متوقف وامتى شكل رابط نت ... ألخ

اقري كتير في مجال الكمبيوتر عشان تكثري معلوماتك العامة لانها هتستخدم في ( حشو) الدرس بحيث ميبقاش ممل وتقدري تغطي وقت الحصة في موضوع او اثنين بالكتير عشان المنهج يكفي لآخر السنة ..ومفيش مانع من وقت للتاني تحكي قصة في الحصة ولو ملهاش علاقه بالكمبيوتر بس تخلي التلاميذ تنصت لك وتنجذب لحصتك.. نادي التلاميذ باسمائهم المجرده واجتهدي في حفظها وعدم الخلط بينها عشان ينشأ ود بينكم .. ابتسمي في وجوههم دائما

بالنسبة لظبط الحصة وازاي تحكمي الفصل ..

اولا ممنوع نهائيا ينادوكي باسمك المجرد .. ارسمي نفسك وشخصيتك من اول دقيقة تدخلي فيها الفصل استاذة فلانة او الباشمنهدسة فلانة على حسب المكان الي بتدرسي فيه مابينادي المدرسين ..

متتكلميش عن حياتك الخاصة مع التلاميذ نهائيا ويفضل تبقي كائن غامض بالنسبة لهم له هيبته ..

اوعي تقولي نكته في الحصة لمجرد انها خطرت لك وانتي بتشرحي لكن مفيش مانع ابدا تقولي نكته سبق وجهزتيها اثناء تحضير الدرس وتعتقدي انها هتفيد في الشرح ..

لما تشرحي متركزيش على طالب واحد وانما وزعي نظرك على كل الجالسين بالتساوي قدر الامكان ..

متخليش حد ينام منك في الحصة وحاولي تلعبي بنبرة صوتك بحيث تكون حيوية وجذابة مش مملة ورتيبه ولا منخفضة اوي ولا عالية اوي ..

لو حد بيتشاقى او بيحاول يستظرف دمه عندك عده بدائل .. انك تطنشيه احيانا وكأنك مش شيفاه من اساسه او كانه مش في الفصل اصلا .. انك تحرجيه وتضحكي الفصل عليه .. انك تتعمدي تسأليه حاجة بسيطه ولو جاوب عليها تشيدي بيه وتقولي برافوا وتحوليه من طالب مشاغب فاقد الامل الى شخص متجاوب وعاوز يبقى من الاوائل في مادتك على الاقل..

البدائل السابقةبتستخدميها كلها او بعضها حسب الموقف نفسه وانتي تقرري بما تسعفك به بديهتك ..

وعاده بيكون في اثنين ثلاثه في الفصل على الاكثر هم الي عاملين الدوشة حاولي تعرفيهم من الاول وتحجميهم ..

متشتميش ومتصرخيش كتير وكوني حاسمه في قراراتك يعني لو حد بيستهبل على برا الفصل على طول او تذنبيه لو هو صغير ..

واخيرا بالنسبة للتحضير انتي هتجيبي الكتاب وتقريه وتكتبي بالعربي كده في كراستك هبدأ الحصة بكذا وهشرح النقاط التالية وحاولي تفصلي قدر ماتقدري في النقاط زي ماسبق وقلت لك بعدين هتقولي هنتقل للنقطه الفلانية وهكذا .. عن نفسي كنت بعمل حركة طول عمري وريحتني جدا اني بعد مااقرأ الدرس واشوف هدي ايه بكرا بجيب ورقة دفتر واكتب فيها النقاط الي هتكلم فيها كل نقطه في كلمتين تلاته مثلا لو هشرح طريقة رسم الجدول في الوورد مثلا .. هكتب رسم جدول .. حدود .. دمج.. الغاء سطر . .. الخ يعني بكتب رؤوس المواضيع فقط وانا فاهمه الاختصارات دي معناها ايه .. لما بدخل المحاضرة بكون شايلة كتبي وطبعا راسمه نفسي وانا داخلة ومعايا كتاب طخين كمرجع وكشكول بتاع 200 ورقة .. حاجتي نظيفة ومنظمة وبحطها قدامي وبسلم على الطلبة بـ ( تناكه ) ومرح في نفس الوقت .. بفتح الكراسة على الصفحه الي ملخصة فيها هقول ايه وانا بشرح بضرب بعيني بس على السطر الي قدامي من غير ماياخذوا بالهم عشان افتكر هنقول ايه ومتضيعش مني الافكار .. طبعا بحب اعمل كده بدون ماالفت انتباهم لان المدرس الي عارف بيقول ايه غير الي بيقرأ ده مش زي ده في الاحترام اكيد . . برضه بكون حاطه قدامي الموبايل سايلنت وببص فيه بطرف عيني او ابص على ساعه الكمبيوترالي قدامي عشان اعرف فاضل قد ايه على الحصة وهل اجري شويه في الشرح ولا ابطأ بحيث الوقت يكفي بالظبط ..

ودائما وابدا بكون محضرة حصتين ورا بعض على الاقل لانك متضمنيش ممكن الجزئية دي تمر بسرعه ويفهموها فتضطري تدخل في الي بعدها فتكوني عامله حسابك ..

وعامة اصعب فترة بتكون السنة الاولى بعدها الامور بتتكرر وبتبقى اسهل من السهولة وبتكتسبي خبرة في وضع المناهج وبتعرفي من نفسك الجزء ده هيحتاج كام حصة ويخلص في قد ايه وكمان بتعرفي اقصر الطرق لايصال المعلومه بدون لف ولا دوران فتريحي وتستريحي ..

اتمنى اكون افدتك وموفقة باذن الله ..

محمود عباس حلمي · #6 23-02-2015, 09:13 PM

رأى المتواضع ان معظم مدارس مصر التجريبية او اللغات تعتمد على المدرس داخل الفصل ورؤيته للتلاميذ
مستوى التلاميذ هو الذى يحدد كيفية الشرح ولكن لابد ان يكون نطق الانجليزى للمدرس صحيح ده اهم شئ فى الموضوع
لأن الاولاد بتدرس مستوى رفيع والاولاد المتميزة ستتابع طريقة النطق وده اللى يجعلك متميزة
بالنسبة للمادة اكيد حضرتك ملمة بها
تبقى نقطة اخيرة وهى ان مدارس التجريبى مفتوحة الى اعدادى لازم تكونى ملمة بمناهج اعدادى باتقان
يسر الله لك الامور وجزاك الله خيرا

مدرس_حاسب · #7 28-02-2015, 06:40 PM

جزاك الله خيرا علي الرد

ENGLISH TEACHER DEGLA · #8 04-05-2015, 11:15 PM

ولو حضرتك بتبحثي عن وظيفة مدرسة كمبيوتر للغات في مدرسة للعات انا عندي وظيفة للحضرتك في مدرسة الي اعمل بها في المعادي