ناوي على طب يبقى تعالى هنا

[كاريمان]

السلام عليكم

فى الوقت دا السنه اللى فاتت كنا معاكم هنا برضه
مستنين معاكم نتيجه الثانويه
مستنين نتعرف على زمايل واصحابنا الجدد اللى هيشرفونا كمان حبه صغيرين اوى

احنا مين ؟ وجينا هنا نعمل ايه ؟ هاقولكم

احنا من كام سنه كده كنا هنا فى بوابه الثانويه العامه برضه ..
بس وقتها كنا مستنين النتيجه زينا زيكم
ونتيجه الامتحان طلعت ...ونتيجه التنسيق كمان طلعت وكنا مجموعه كبيره دخلنا سوا طب القاهره " القصر العينى "
وبدانا سوا طريقنا مع بعض جوا الكليه
ولاننا من وقت ما كنا هنا عايزين نساعد
كملنا مشوارنا فى القصر وساعدنا
صورنا ملازم ورفعناها
جمعنا واشترينا كاميرا وبدأنا نصور محاضرات فيديو
لكننا منسيناش المكان اللى كان سبب لمتنا
وبقينا نيجى هنا بعد امتحانات الثانويه العامه
نتكلم معاكم عن الكليه
عن المواد
ازاى تذاكر
ايه الكتب اللى تشتريها
الامتحانات عامله ازاى وتحلها ازاى
بنحكى لكم عننا وعن الكليه وقصص الدكاتره والمغامرات اللى مبتخلصش
وبنحدد مع بعض يوم نتقابل فيه نعملكم جوله فى الكليه
نعرفكم على كل شبر فيها


احنا فرسان القصر وهنكون معاكم لحظه ب لحظه من دلوقتى
نجاوب على اى استفسار ليكم
استنوننا فى الكومنت الجاى نبدا نعرفكم على " القصر العينى "

[كاريمان]

الحقيقه احترنا فى البدايه نكلمكم عن القصر ..اهل القصر ..ولا عن المواد
وقررنا نبتدى بالمواد
لان حكاوى القصر مبتخلصش ..وعشان يكون ختامها مسك


فى طب بتدرس 6 سنين + سنه امتياز
3 سنين مواد اكاديميه
3 سنين مواد كلينيك

فى اولى وتانيه بتدرس ازاى جسمك بيشتغل
بتاخد نفس المواد فى اولى وتانيه
وهما 4

فسيولوجى pysiology
علم وظائف الاعضاء ودا ب 250 درجه
اناتومى :anatomy
التشريح ودا ب 250 درجه
بيوكميسترى :biochemistry
الكيمياء الحيوية ب 150 درجه
هستولوجى :histology
علم دراسه الانسجه ب 150 درجه

كله على بعضه ب 800 درجه ..اه زى ما سمعت 800
حضرتك يومك العادى بيكون كالتالى
سكشن من 8 ل 11
" السكشن هو الدرس العملى للماده وبيكون ليه غياب وحضور ..بمعنى مثلا فى ماده زى الهستولوجى بتروج المعمل تتفرج على صور و تشوف شرائح الميكرسكوب ...هنتكلم عن سكشن كل ماده فى وقتها "

3 محاضرات كل محاضره ساعه
من 12لــ3
ودول بيكونوا فى المدرجات اللى هنكلمكم عنها واحنا بنعرفكم على القصر العينى كمان شويه

مبدئيا احنا عندنا مدرج أ و مدرج ب ومبنى فيه 12 مدرج هو مبنى المدرجات
استنونا الكومنت القادم هنكلمكم عن اول ماده
الفسيولوجى

فرسان القصر

[كاريمان]

قبل ما نبدأ احب اقولكم هنمشى ازاى
هنتكلم فى كل ماده عن الحاجات دى
الماده وعليها كام درجه
الكتب والحاجات اللى هتدرسها
اشهر الدكاتره
ازاى تذاكرها
نظام السكشن
نظام الامتحان

الماده الاولى الفسيولوجى
وزى ما قلنا عليها 250 درجه
وهى اختصارا بنقول عليها " فسيو "

الكتب

كتب القسم اساسى طبعا
ودول بيكونوا كتابين
كتاب 1 :

1) مقدمة Introduction to Physiology

2) الجهاز العصبي اللاإرادي Autonomic Nervous System

3) الأعصاب والعضلات Nerve and Muscle

4) الدم Blood


كتاب 2 :

5) التنفس Respiration

6) الدورة الدموية Circulation

فى كتب تانيه موجوده بس المصدر الاساسى هو كتاب االقسم

اشهر الدكاتره

احب اقولك ان اول معرفتك " فى الغالب ان شاء الله " مع دكاتره الفسيو هى د/ هدى
ودى اكتر دكتوره هتحب شرحها
هتستمتع وهى بتناديكم ب اوائل الثانويه العامه

فى بقى
د/ مها
د/ عاكف
د/ هانى جمال
ودول دكاتره الكليه

فى بقى الراعى الرسمى للفسيو
تسجيلات دكتور ناجى والبرت

اه تسجيلات ...لانهم بيشرحوا فى الكورس مش فى مدرجات الكليه

احب افهمك حاجه
الفرق بين المحاضره والكورس
المحاضره هو الفصل فى المدرسه
الكورس هو الدرس الخصوصىى

طب ليه بناخد كورسات ؟
لاسباب كتير اهم اتنين منهم
ان النظام الشرح فى الكليه بيكون دكتور لكل جزئيه فى المنهج
يعنى مفيش دكتور بينزل يشرح المنهج كله من اوله لاخره
وطبعا مش كل الدكاتره ليهم نفس القدره على الشرح
ثانيا ان العدد فى المدرج " على الاقل فى البدايه " بيكون كبير

طب دا معناه انى لازم اخد كورس ؟
لا ..اطلاقا
لان بجانب المحاضرات ممكن تسمع تسجيلات دكتور ناجى
اللى سبق وقلنا هو الراعى الرسمى للفسيو
طب اجيب التسجيلات منين ؟
اولا هيكون فى جروب على الفيس للدفعه بتاعتك هتقدر تحمل منه كل الداتا من محاضرات وملازم وتسجيلات اللى ممكن تحتاجها طول السنه
جروب الفيس ان شاء الله تابعوا معانا لانه هينزل بمجرد ما نتيجتكم تطلع

ثانيا احنا بنقابلكم فى اول سبوع دراسه وبنسلمكم الداتا دى

[كاريمان]

ازاى تذاكر ؟

الحقيقه انسى خالص مذاكره ثانوى مش مطلوب منك تحفظ كل كلمه ف كل سطر فى المنهج

والحقيقه برضه انك هتسمع كلام كتير اوى عن المذاكره والكتب والتسجيلات
لان زى ما بيقولوا كل شيخ وليه طريقه
كل واحد وليه الطريقه اللى ارتاح بيها فى المذاكره
والطريقه دى مجتش بالساهل كده
انت بتسمع تجارب اللى حواليك واللى اكبر منك وتحاول وتجرب لحد ما تلاقى نفسك فى اسلوب مذاكره هيريحك ..هيخليك تستفيد وفى نفس الوقت تعيش تجارب وخبرات الكليه بكل ما فيها
لان الحاجه اللى بتغيب عننا اننا مش بنتعلم هنا ازاى نبقى دكاتره وبس ..لا انت بتبنى شخصيتك ..صدقنى انت هتلاحظ ازاى انت بتتغير وبتنضج وبتتطور كل يوم عن اللى قبله
بالنسبه للخبرات الناس اللى قبلك فهتكون سهل ..اسال واتعرف وصاحب
وغير دا احنا مجمعين الخبرات اللى اتقالت للدفعات اللى قبلكم وهتستلموها بمجرد ما تشرفونا ان شاء الله



نظام السكشن
سبق وقلنا ان السكشن هو المكان اللى بتشتغل فيه عملى تمام كده
طيب دا بيبقى عامل ازاى
بص يا سيدى
الدفعه بتتقسم لمجموعات والتقسيمه دى بتنزلكم مع جدول المحاضرات بتاعكم
كل مجموعه او اتنين بيكونوا فى سكشن واحد

سكشن الفسيو العدد بيكون معقول ..بحيث انكم تعرفوا تشوفوا التجارب اللى الدكتور هيعملها وانتم كمان تعملوها بعد ما الدكتور يخلص شرح

درستم انتم فى الاحياء فصائل الدم فاكرينها
اهو انت بقى هنا هتتعلم ازاى تعرف فصيله دمك بنفسك
هتعمل التجربه بايدك
وهتعرف عنك انيميا ولا لأ


وعلى فكره هتلبس البالطو
وهتفرح بيه فى الاول كده وهتتصور بيه فى السكشن وهتصور سيلفى مع صحابك وهتلاقى الفيس كله عندك اتحول لاشباح بيضا لفتره معينه لحد ما تخشوا على الاناتومى او البيو والصور هتتغير
طبعا دا بعد مرحله دكتور هاوس ودكتور ربيع برضه ميضرش

نظام الامتحان




وبكده نبقى خلصنا من اول ماده الفسيو
استنونا
فرسان القصر

[chalijaly]

للاسف كان نفسى ادخلها ولكن ضاعت منى...انتى كده بتحطمينى اكتر منا متحطم

[كاريمان]

المشاركة الأصلية كتبت بواسطة chalijaly

للاسف كان نفسى ادخلها ولكن ضاعت منى...انتى كده بتحطمينى اكتر منا متحطم

انت ليه بتقول كده سيبها على ربنا
محدش عارف بكره فيه ايه ولا عارف الخير فين
مين مننا معكش فى الامتحانات وحل وحش وربنا هو اللى سترها معاه
وكتير جدا يحلو حلو لكن ربنا رايد لهم الخير فى مكان تانى
ادعى انت بس ان ربنا يسترها معاك ويكتبلك الخير وهى هتروق وتحلى

[ابورضوان]

احسنت يابنتى
وعقبال اللّى فى بالى يشوف الحاجة دى ع الطبيعة يارب

[chalijaly]

شكرا ليكى يا دكتورة ..ربنا يوفقك الجميع

[Asmaa Soliman]

موضوع مفيد يا كاريمان

انتى فى سنة 3 صح
فاكرة اسمك من 3 سنين لما كنت بدخل المنتدى هنا

جزيتى خيرا

[كاريمان]

المشاركة الأصلية كتبت بواسطة Asmaa Soliman

موضوع مفيد يا كاريمان

انتى فى سنة 3 صح
فاكرة اسمك من 3 سنين لما كنت بدخل المنتدى هنا

جزيتى خيرا

ربنا يكرمك

[soskadoll]

انا زميلتكم اسراء فى سنة رابعة..
دكتورة كاريمان بتعتذر انها مش عارفة تكمل الموضوع لان الموقع مشغول فى الوقت الحالى..

https://www.facebook.com/groups/274163019446892/?fref=nf
ده لينك الجروووووووووووب للطلبة الجداد اللى هينورونا , كل حاجة هتلاقوووها عليه ان شاء الله

أسرة فرساااان القصر

[abdelhady okely]

يا دكتورة كاريمان

انا محتار بين طب اسنان وطب بشري ومش عارف اخد قرار

ازاي اعرف اننا بحب اسنان ولا بشري

[momomomommo]

هو لما اخلص الامتياز والتكليف المفروض اية اللي يحصل ؟؟
+ هو طب القاهرة ولا عين شمس الاحلي ؟

[كاريمان]

المشاركة الأصلية كتبت بواسطة abdelhady okely

يا دكتورة كاريمان

انا محتار بين طب اسنان وطب بشري ومش عارف اخد قرار

ازاي اعرف اننا بحب اسنان ولا بشري

هو انا اكيد هاكون متحيزة لطب بشرى

لكن ببساطه
اسنان مجالها واضح "دكتور اسنان "
دراسه اكيد تقيله برضه لكنها اسهل من طب
5 سنين ف دا لو عايز تاخد اللقب بسرعه وبمجهود اقل
وفلوسها حلوة اوى
وشغلها سريع سواء هنا او بره

الطب بقى
مجالاته واسعه
ف لو انت لسه مش محدد هدف واضح وصريح دا بيديك فرصه واسعه اوى انك تجرب حاجات كتير وتعرف مجالات كتير لحد ما تلاقى اللى يشدك وتحب تعمله
والطب البشرى مش مقتصر بس على دكتور تخصص معين
لا
فى مجالات تانيه كتير منها البحث العلمى اللى بدا يظهر بصورة واضحه وكبيرة فى الدفعات الجديده عندنا فى القصر والدكاتره بداوا يهتموا بالاتجاه دا اوى عندنا
هتتعب صحيح بس قصاد كل ثانيه تعب هتلاقى قصادها نتيجه ..واحنا بدانا نلاحظ دا بجد

لو بتدور على اللقب ..ف الاتنين هتاخد اللقب فيهم ..لكن بعد فتره سنين الخبره دكتور البشرى لقبه بيكون اكثر " فخامه "

لو بتدور على الفلوس ..اسنان سبق وقلنا فلوسها حلوة وسريعه
فى المقابل وبصراحه انت فى بدايه حياتك كطبيب بشرى مش هتقبض كويس ..لكن بعد كده وبعد ما يكون ليك اسمك ومكانتك الوضع بيتغير 180 درجه

لو بتدور على العلم ..ف الطب البشرى هو اللى هيفيدك لانك تقريبا بتدرس كل حاجه مهمه ممكن تتخيلها
والحاجات اللى بتدرسها دى بتفيدك لو حبيت تبدا تتعلم ذاتى عن طريقات كورسات او عن طريق النت اى مجال علمى تانى انت حابب تتعلمه
فى زمايل لينا بداو يعملوا ابحاث خاصه بيهم وهتتنشر قريب ان شاء الله وهم لسه ف سنه 3
وفى ناس تانيه بدات تاخد كورسات فى الهندسه الطبيه وهما ف سنه تانيه

اقرا دا كده وفكر وقرر
ولو لسه محتار اسال تانى وتالت ورابع متزهقش ولا تتحرج دا مستقبلك

10 اسباب لتكون طبيباً

[كاريمان]

المشاركة الأصلية كتبت بواسطة momomomommo

هو لما اخلص الامتياز والتكليف المفروض اية اللي يحصل ؟؟
+ هو طب القاهرة ولا عين شمس الاحلي ؟

طب الاول انت عارف ايه هى سنه الامتياز ؟
بص الامتياز بتكون 12 شهر متواصل بتكون فيهم فى المستشفى طبيب "تحت التمرين "
كل شهرين بتروح قسم تتدرب فيه تحت اشراف الدكتور النائب المسئول عنك


بعد ما تخلصهم بقى بيكون ليك تكليف
التكليف دا معناه انك بتروح تشتغل سنتين فى وحد صحيه جوه او بره المحافظه ودا بيكون عامل زى تنسيق الثانويه كده بتتوزع على حسب مجموعك


بعد التكليف بقى بيكون فى حاجه اسمها نيابه ..ايه النيابه بقى ؟
النيابه انك خلاص بقيت دكتور متخصص وتتعين فى مستشفى حكومى او تعليمى
ودا برضه بيكون عن طريق تنسيق زى الثانويه العامه
على حسب مجموعك بتروح مكان معين لتخصص معين

وعلى فكره كل دا السكه الطبيعيه الحكوميه
فى سكك وطرق كتير جدا تانيه

اللينك دا هيفيدك اوى

دخلنا كليه طب ..وماذا بعد ؟