فكرة صناديق أمام كل عمارة يوضع فيها الطعام الزائد لدى السكان لسد حاجة المحتاجين

[حـHoSaMـسام]

بسم الله الرحمن الرحيم
الأول وقبل الدخول في الموضوع خلونا نصلي على الحبيب محمد صلى الله عليه وسلم رسولنا وقائدنا وقدوتنا وشفيعنا يوم القيامة جميعا إن شاء الله.
هكلمكم النهارده عن فكرة إنتشرت مؤخرا في طنطا عاصمة محافظة الغربية إبتكرها مجموعة من الشباب والحمد لله إنتشرت بشكل كبير جدا فقررت أعمل الموضوع ده وأشرحها عشان توصل لأكبر قدر ممكن ولو حتى لشخص واحد.
ببساطة أكيد كلنا بيفيض عندنا أكل في البيت وبيترمى أو بيتركن ويتنسي لغاية ما يعفن وبعدين يترمى برضه.
او ساعات ناس بتكون عايزة تعمل اكلة جديده وفاضل عندها بواقي أكلة قديمة فبترميها عشان تطبخ الجديده وهكذا.
طبعا كل ده يا جماعه بيحصل وفي ناس مش لاقية حتى ربع رغيف ناشف تاكله وفرمضان والصيام أنتو أكيد عارفين وحاسين يعني اي حد فينا ممكن يكون تلاجته فيها اكل فرمضان وبالرغم من كدا بيتعذب فالصيام فما بالكم بقه بالفقرا والمساكين وهما ماشيين فالشوارع فرمضان وطبعا الشوارع وقتها بتكون فاضية تماما ومحدش بيحس بيهم .
الموضوع مش موضوع فقرا وبس ممكن يكون حد مسافر بلد غير بلده وصايم والادان اذن عليه ومفيش معاه فلوس يشتري حاجة ياكلها .
اكيد هتكون لفته حلوة وثواب عظيم كمان لو انت كنت سبب في افطاره.
انا طولت عليكو معلش الفكرة هي عبارة عن صناديق للطعاه الزائد تتحط قدام كل عمارة او لكل حي او لكل حارة او شارع
يعني اي حد عنده فبيته أكل نضيف فايض او زياده او ملوش حاجة بيحطه في الصندوق ده للي محتاج بدل ما يرميه في الزباله أو يسيبه يعفن
وكمان ممكن لو عاوز تعمل خير أكتر تجمع مجموعه من أصحابك وتلف على البيوت تاخد الاكل اللي مش محتاجاه وتحطه إنت في الصناديق دي والله هتنفع ناس كتير أوي أكتر مما تتصور وفيها معاني كتير حلوة من صدقة جارية لتكافل إجتماعي لإفطار صائم وممكن على فكرة تستمر لبعد رمضان يكون أحسن وأحسن وكدا كدا انت مش خسران حاجة بالعكس ده انت خدت ثواب كبير لان الاكل ده كدا كدا كنت هترميه بس لما نفذت الفكرة مرمتش نعمة ربنا عالارض ووصلتها للي محتاجها.
أنا حبيت أنقل لكم الفكرة عشان عجبتني أتمنى تكون عجبتكو إنتو كمان ومتنسوش الدال على الخيير كفاعله إنشروها على اد ما تقدرو ان شاء الله حتى واحد بس اللي ينفذها برضه هيكون نفع ناس.
ودي صورة بعد التنفيذ في بعض الشوارع فطنطا

[Eng-Ahmed Salem Nassar]

ربنا يجعله في ميزان حسناتك وبجد ياريت كل الناس تعمل كده ده ثواب عظيم فعلا شكرا علي الفكره

[smsmzeros]

فكره رائعه جدا
..
ربنا يثبت الاجر
..
جزاكم الله خيرا

[Ameramero909]

بسم الله ما شاء الله فكرة جميلة اوي يا حسام ربنا يجزيك الاجر والثواب
انت مسافر ولا ايه ليه مردتش على سؤالي في قسم كلية تجارة ؟؟؟؟ شكلك مسافر عالعموم لما ترجع طمنا عليك

[حـHoSaMـسام]

المشاركة الأصلية كتبت بواسطة حماده سالم نصار1

ربنا يجعله في ميزان حسناتك وبجد ياريت كل الناس تعمل كده ده ثواب عظيم فعلا شكرا علي الفكره

عفـــوا بس الشكر الحقيقي هو نشر الفكرة وتنفيذها

المشاركة الأصلية كتبت بواسطة smsmzeros

فكره رائعه جدا
..
ربنا يثبت الاجر
..
جزاكم الله خيرا

جزانا وإياكم

المشاركة الأصلية كتبت بواسطة ameramero909

بسم الله ما شاء الله فكرة جميلة اوي يا حسام ربنا يجزيك الاجر والثواب
انت مسافر ولا ايه ليه مردتش على سؤالي في قسم كلية تجارة ؟؟؟؟ شكلك مسافر عالعموم لما ترجع طمنا عليك

يجزينا ويجزيكي بالمثل ان شاء الله
معلش كنت مسافر فعلا وهرد عليكي دلوقتي فالموضوع

[Ameramero909]

اها ميرسي انا شفت الرد دلوقتي

[عزتى في دينى]

مشروع رائع جدا
خاصتا ان من اسباب بطلان الصيام او نقص اجر الصيام عند بعض الافراد هو التبزير واهدار الطعام بكميات كبيره والله المستعان
فكره جميله وياريت كل المسلمين يطبقهوها وحيكونوا مأجورين بأذن الله

[العشرى1020]

فكرة رائعة جداجدا وجزاكم الله خيرا