المشاكل العاطفيه وتعارضها مع التفوّق الدراسي [نقاش]

[The.Hero]

السلام عليكم ..

كتير من طلاب المرحله الثانويه ما تقابلهم مشاعر ..
بيحس انه عايش ف حاله من الحب ..

للأسف أغلب علاقات الحب بتشغل الواحد عن حاجات كتيره مهمه
أبسطها وهي تفوّقك الدراسي خصوصاً انك ف مرحله تحديد مستقبل ومصير ..

طب الحل ايه ؟
كتير بعد ما بيدركوا النقطه دي .. او مش بيدركوها بردو
بيوصلوا لنقطة إنفصال وقطع العلاقه دي

بسسسس كده .. تمام انا دلوقتي هركز بقي وابدأ اذاكر
هي دي الجمله اللي بتجيلك في حاله تفاؤل بعد انقطاع العلاقه

تيجي تفتح الكتاب تفتكر أيام ماضي مؤلمه .. او سعيده
بتشغلك بردو عن المذاكره .. سواء فرّحتك او زعلّتك
بتتوجه للشعر او لسماع أغاني ك محاوله للخروج من الحاله دي

كده العلاقه دي أثرت عليك وانت فيها .. حتي لما قطعتها

طب الحل ايه ؟ ازاي اذاكر وأنسى الهموم والمشاكل الي مش هجني منها غير تعب وبس ؟

الحل من وجهه نظري ..

• حاول تقسم وقتك كويس اوي

•متقعدش لوحدك أبدا لان ده اكتر شئ وحش ..
الشعور بالوحده قاتل وبيسمحلك انك تسترجع ذكريات وحشه

• الصلاه والقُرب من ربنا أهم من كل شئ

• الصحاب والمشاكل .. ابعد ع اي مشاكل والباب اللي يجيلك منه الريح سده وإستريح ..
مش بقولك اقطع مع صحابك بس حدد واختار الصاحب اللي ميشدكش لورا

• خلي مقولة : « حب ما تعمل .. حتي تعمل ما تحب » دايماً قدامك

• خلي المنهج قدامك كأنة شريط وعباره عن اجزاء في ال %
وانك كل ما بتقعد تزاكر أكتر كل ما الاجزاء اللي بتخلصها بتزيد
كأنك بتعمل Download بالظبط .. وكتر المذاكره هيزوّد سرعة التحميل عندك



وأخيرا ..
أتمني من كل واحد يشارك يقول بطريقته الخاصه ووجهة نظره
طرق حل المشكله دي لإنها عائق كبير لطلبه كتير للمذاكره

تحياتي ..

[smsmzeros]

شكرا إالموضوع الجميل دا
وفعلا الحب اايام الدراسه مشكله كبيره جدا
وحلها هوا اتباع تعاليم الدين وتشغيل العقل كويس
الاسلام أمرنا بغض البصر .. وعدم اتباع خطوات الشيطان .. و الزواج مبكرا قدر المستطاع
والعزم على الزواج واللى مش معاه او غير قادر
يستعين بالله ويصوم
وبعدين لازم يحط فاعتباره اللى هيترتب عالحب دا
طبعا لو بيفكر كويس هيقدر يلجم آهوآه وشهواته
بدل ما يتعب بعدين
ومفيش حب فالمراهقه لانها مرحله متقلبه التفكير
لاننا فالغالب بنبقى مش عارفين عاوزين ايه
وتجد المراهق/ه بيحب بسرعه وبيكره بسرعه
وبيتمسك وبيتخلا بسرعه ودا طبيعى فالمرحله دى
أسأل الله السلامه
يا رب اكون افدتكم ووصلت اللى عندى

[The.Hero]

شكرا للمشاركه الجميله ..

وعندك حق يكاد يكون نسبه في مجتمعنا الشرقي اكبر من 95% حب سن المراهقه بيفشل
اكيد المشاعر مادام كانت حلوة وبريئه ومفهاش حاجه حرام مش مشكله لكن المشكله ف حد ذاتها
بتكمن في ان الانسان ضعيف وفي السن ده بيكون ضعيف اكتر
ف مش بيقدر يوازن بين الحب والدراسه .. مش بس في ده
في حاجات كتيره .. بس لازم يخلي الاهتمام الاكبر للدراسه ومن ثم يهتم ب اي حاجه تانيه