آآآه يا قسوة قلبى :((

رآجيه رضآ الله · #1 04-02-2014, 05:29 PM

يعنى إيه واحد قلبه قاسى ؟؟

يعنى عمره ما بكى من خشية الله !

علطول متكاسل عن فعل الطاعات وبالذات العبادات !

عمره ما بيصلى الفجر حاضر !

لو سمع القرآن مش بيتأثر بيه !

غـــــآفل بمعنى الكلمة .. الآخرة مش فى باله إطلاقاً وهمه الوحيد هو الدنيـا !

بيحضر جنازات بس مش بيتعظ برضو !!

بيشوف ويقرأ ويسمع حاجات كتيرة عن الموت بس مش بيتعظ ولا بيتأثر !

رسايل ربنا كتيييرة أوووى ليه بس هو مش فاهم أى حاجة منها !

الدنيا واخداه أووى ولهياه عن ربنا ومنسياه حبيبه (

لو عمل معاصى وذنوب فى حق ربنا نلاقيه عنده لا مبالاة !!

ومش خايف من عقوبة ربنا ولا أن ربنا يختم على قلبه اكثر واكثر !!

علطول قلقان ومتوتر وشايل الهم .. أصل هو ده حال البعيد عن ربنا

عايش حياته كلها فى الذنوب وفى شهواته .. بيعمل كل ما يخطر على باله

ومش حاطط قيود لنفسه ... نفسه الأمارة بالسوء هى اللى مسيطرة عليه

وجيباه لورا .. والذنب على الذنب حتى يسود القلب ولعياذ بالله !

هو ده صـــاحب القلب القاسى ... ياريت نفتش فى قلوبنا عن الصفات دى ..

لو فينا صفة واحدة بس أو حتى جزء صغير اوووى منها .. يبقى لو معالجتهاش

هتزيد أكتر وأكتر لأن قسوة القلب ده عامل زى الفيروس بينتشر فى قلبك

كله لو ملحقتهوش وطهرت قلبك من الأول

لأن وجود صفة وحدة من دول فيك وفى قلبك .. يبقى معناها عقوبة من

عقوبات ربنا ليك ..

أحد السلف كان بيقول " إن لله عقوبات فى القلب , ضنك فى المعيشة ,

ووهن فى العبادة , وما ضرب عبد بعقوبة الأبدان أسوأ من قسوة القلب "

وابن القيم كان بيقول " وأبعد القلوب عن الله القلب القاسى "

أبعد قلب عن ربنا !!! ياااااااه ده الموضوع خطييييير فعلاً (

صاحب القلب القاسى ربنا توعد له بالعقوبة فى الدنيا وفى الآخرة

قال تعالى " فويل للقاسية قلوبهم من ذكر الله .. "

صاحب القلب القاسى هو الشقى فى الدنيا وفى الآخرة ..

ابن القيم كان بيقول " وعلامة الشقاء .. قسوة القلب , جمود العينين , طول الأمل , الحرص على الدنيا "

الأربع حاجات دول لو فينا واحدة منهم يبقى احنا فينا علامة من علامات

الأشقاء !!!!! ربنا يعافينا يارب ويعفو عنا ..

حسيتوا قد إيييه الموضوع خطير يا جماعة ؟؟؟

طيب ليه قلوبنا بتقسى ؟؟ إيه اللى بيخلى الداء ده يوصل لقلوبنا ؟؟

1_ تتابع الذنوب ..

حمد بن واسع كان بيقول " الذنب على الذنب يميت القلب "

قال تعالى " بلى من كسب سيئة وأحاطت به خطئيته .. "

الذنوب بتحوط على

قلبك وبتعمل عليه غشاء من الران وبتمنع وصول نور الإيمان ليه وكل ما

الذنوب دى بتكتر كل ما نور الإيمان مش هيوصل لقلبك اكتر !

طيب نلاقى صاحبنا ده أول ما كسب ذنب من الذنوب .. بكى وتألم وزعل

على حاله اوووى واتحرق قلبه عشان عصى ربه حبيبه !

وبعدين يتوب من الذنب ده ... شوية ويقع فيه تانى أو فى ذنب غيره .. يتوب

منه ... ويقع تانى وتالت ورابع ... بس المشكلة إنه " متابش " من الذنوب

دى !!

طب ليه متابش بقى ؟

أصل الشيطان جه يقول له " ده الناس كلها بتعمل كده هى جت عليك يعنى

؟؟ الناس كلها بتسمع أغانى يا أخى إيه اللى حصلهم يعنى ؟؟ .. "

لحد اما يتمادى فى الذنب ويعتاده ويبقى بالنسبة له شيئ عادى جدااا وهنا

بقى يتمكن الران من قلبه ويبقى قلبه قاسى ..

أحد السلف كان بيقول " القلب بمنزلة الكف فإذا أذنب ذنباً انقبض إصبع "

يعنى القلب عامل زى كف إيدينا وهو مفتوح .. يقدر يدخله أى حاجة ..

قرآن .. مواعظ .. حب ربنا ..

لكن لما بنذنب ذنب معين ... إصبع من أصابع الكف ده بينقبض فتلاقى كل

مادا القلب بيتغطى ومفيش حاجة بتوصل له ...

وهو ده " الـران "

قال تعالى " كلا بل ران على قلوبهم ما كانوا يكسبون "

2_ التهاون فى آداء الصلوات فى أول وقتها ..

وربنا بيقول " فخلف من بعدهم خلف أضاعوا الصلاة واتبعوا الشهوات فسوف يلقون غياً "

والسيدة عائشة رضى الله عنها قالت " غياً " ده وادى فى جهنم ولعياذ بالله !

وده تانى سبب لقسوة القلب هو التهاون فى الجماعة بالنسة للرجال وتأخير

الصلاة عن أول وقتها بالنسبة للنساء ...

3_ تعمد ترك السنن والنوافل

أصل السنن والنوافل دول يا جماعة عاملين زى السور اللى بيحفظ صلاتنا

والخشوع اللى فيها .. لما السور ده يتهد اعرف ان الصلاة المفروضة فى

خطررررر .. لما تكون متعود على تأدية 12 ركعة فى اليوم والليلة وتسبهم

فجأة .. متتوقعش بقى ان صلاتك المفروضة هتفضل زى ما هى ومش هتتأثر

!! لأ طبعااا .. شوية بشوية الخشوع هيقل ,,, شوية بشوية هتلاقى نفسك

أخرتها عن معادها ... هتلاقيك بعد كده جمعت الصلوات مع بعض بدون

عذر .. لحد ما تترك الصلاة نفسها !!

وده بسبب انك هديت السور الحامى والحافظ لصلاتك وهو السنن والنوافل !

أحد السلف كان بيقول " فإذا انتهك السنن وقع فى انتهاك الفرائض "

4_ هجر القرآن ..

كان ليك ورد من القرآن .. كان هو مصدر إحياء قلبك ,, فلما تركته وهجرت

القرآن قلبك أكيد اتأثر وكلما بعدت عن القرآن اكتر قلبك هيقسى اكتر واكتر!

5_ إدمان النظر إلى المحرمات والعورات ..

لأن النظرة سهم مسموم من سهام إبليس .. ممكن نظرة واحدة تضيع قلبك !!

متستهونش بالنظرة أبدااا

6_ سماع الأغانى والمعازف ..

لأن الأغانى دى مزمار من مزامير الشياطين ,, لما يدخل قلبك أكيد هيضيعه !

7_ إطلاق اللسان ,,

الغيبة والنميمة والخوض فى أعراض الناس دى كلها حاجات بتاكل من

حسناتك وبتقسى القلب وبتخليك تعتاد على الذنب !

احنا فى الحملة دى هنعرف أسباب قسوة قلوبنا .. عشان نتجنب الوقوع فيها

بعد كده للى وقع فيها ,, واللى بفضل الله موقعش فيها يحتاط ويعرف

خطورتها ويحذر الناس منها .. هنعرف برضو ازاى نعالج قسوة قلوبنا ونذيب

الجليد اللى عليها ونقرب من ربنا تانى .. هناخد خطوات عملية وهنبدأ فعلياً

فى تطهير " ♥ "

الفترة اللى فاتت والأحداث اللى بتحصل فى البلد واللى بنشوفه يومياً أكيد

شغلتنا عن حاجات كتير كنا بنعملها ,, الفترة دى فعلاً محتاجين نطهر قلوبنا

ونقرب من ربنا بجد .. لأن الحياة مع ربنا هتغير كل حاجة فى حياتنا

هاااااا مين هيكون معانا ؟؟؟؟

لسة هنكمل المرة الجاية باقى الأسباب ان شاء الله

رآق لي