نصيجة لكل طلبة مصر لا تختاروا اللغة الايطالية

[sallam2u]

السلام عليكم ورحمة الله وبركاته

أنصح أبنائى الطلبة بالابتعاد عن اللغة الايطالية - واختيار أى لغة أخرى بدلا منها من أولى ثانوى
واليكم الأسباب:
بالرغم من أن اللغة الايطالية لغة سهلة ولذيذة - لكنها لغة مهملة تماما فى مصر - ومدرسيها قليلين جدا - وكتبها الخارجية رديئة وتخلو من أى اجابات - فالاسئلة والتدريبات ونماذج الامتحانات كلها بدون اجابات
أما كتاب الوزارة فكل درس فيه عبارة عن مجموعة من الأسئلة!!! وأيضا الاسئلة والتدريبات بدون اجابات
وكتاب الوزارة يعتمد على سماع المحادثات من على سى دى مرفق - لكن الوزارة لا توزع هذا السى دى وهو لا وجود له على الاطلاق - وبالتالى فلا يمكن الاجابة عن أى اسئلة بدون سماع السى دى - منتهى التخلف من الوزارة العجيبة - حتى المركز الثقافى الايطالى موقع لا يذكر منهج مدارس ثانوى من قريب أو بعيد - وكأن اللغة الايطالية ونشرها فى مصر ليس من ضمن اولوياته ولا اهتماماته! شئ عجيب فعلاً

خذ مثال على اهمال اللغة الايطالية وندرة مصادرها: نفس هذا القسم - فتجد الاهتمام به قليل والمذكرات المتاحة للرفع تعد على اصابع اليد الواحدة - ولو سألت سؤال ممكن الترم يخلص قبل ما حد يرد عليك - بينما نظرة سريعة الى قسم الالمانى تجده عامر بالمواضيع والمذكرات والسىديهات - يكفى ان عدد المواضيع هناك 3 أضعاف المواضيع هنا فى قسم الايطالى

باختصار اللى حيختار ايطالى حيظلم نفسه لأنه حيلاقى انه كإنه بيبحث عن ابرة فى بحر - أما الالمانى فمنتشر ومخدوم تماما فى كل مكان تقريبا - مدرسين ودروس وكتب خارجية ومذكرات وسىيدهات وكل اللى الطالب محتاجه حيلاقيه متوفر

كل من أعرفهم ممن اختاروا اللغة الالمانية قفلوا الدرجة يعنى جابوا 100% او نقصوا درجة واحدة - أما طلبة الايطالى فكل من أعرفهم جابوا درجات فى حدود 50% - 60%

انا ابنى دخل ايطالى - وانا ندمان جدا انه مدخلش المانى - بلاش حد يقع فى نفس الغلطة دى
خسارة مع ان الايطالى لغة جميلة ودمها خفيف لكن للأسف مهملة من جميع الأطراف فى مصر - بدئا بالوزارة ومرورا بكل شئ فى مصر

[SuperMemo]

حضرتك جى تكتتب الموضوع بعد ما الترم بدأ

[sallam2u]

معلش يا ابنى والله - بس انا مش مدرس ولا اعمل فى مجال التعليم - انا ولى أمر ومكنتش عارف كل دة الا بعد ما ابنى اتدبس واختار ايطالى للأسف الشديد - فحبيت أفيدكم - ولو فات الأوان السنة دى فعلى الأقل يستفيد اللى حيدخلو السنة الجاية

[MAGEDGAD]

انت مش ولى امر انت مدرس المانى فاشل بتنش يعنى ومش لاقى حد يعبرك
الايطالى اسهل بكتير من الالمانى حتى شوف النحو بس انا مش هعمل زبك
لازم الطالب هو الى يختار بحسب رغبتة وحبة للغة
بلاش اسلوب الشائعات دة

[sallam2u]

طب على فرض ان كلامك صح وانا مدرس المانى - سيادتك متعود تشتم زملاءك فى مهنة التدريس؟
أنا قرأت لك موضوعات كتير هنا وفى قسم ثانية ثانوى خلال بحثى عن مذكرات ايطالى لإبنى - وكمان زرت صفحنك على الفيس بوك - ومستغرب واحد محترم زيك ومشهور بين طلبته ازاى يردح لواحد هو شايف انه مدرس زميل له فى المهنة؟
هى العلاقات بين المدرسين عندكم وصلت لهذا المستوى؟
وللا سعار الفلوس واستغلال اولياء الأمور باستنزاف مرتباتهم خلاكم تنسوا الاخلاق والتربية؟
ازاى حضرتك ممكن تكون قدوة لطلبتك وانت مش بتحترم اللى معتقد انهم زملاءك فى المهنة؟

فعلاً الايطالى أسهل من الالمانى وانا قلت كدة فى بداية موضوعى - وكمان لغة دمها خفيف ونطقها مجبب وقريب لقلوب المصريين - بينما الالمانى عبارة عن دبش ولما حد يكلمك كانه بيحدفك بالطوب - لكنها اللغة الآكثر انتشارا بين طلبة ثانوى ومخدومة فى كل شئ

وبدل الشتيمة والاتهامات - ياريت حضرتك تفيدنا وتفيد كل الطلبة و واولياء الأمور - يعنى مثلا ممكن تعطينا أى رابط ننزل منه السى دى المرافق لكتاب الوزارة - انا لم أجد لهذا السى دى أى وجود فى مصر - لا أولى ثانوى ولا تانية ثانوى
أو توفر لنا مذكرة بها اجابات اسئلة وتدريبات كتاب الوزارة - لإن الاجابات ليس لها وجود لا فى كتاب الوزارة ولا فى كتاب البريمو ولا فى كتاب ايطاليانو - كلهم مليانين اسئلة وتدريبات ونماذج امتحانات بدون أى اجابات من أى نوع

لو حضرتك مش استغلالى وما يهمكش غير الفلوس ونهب اموال اولياء الأمور - لو حضرتك فعلاً بتحب عمل الخير وتكسب ثواب فينا كلنا - ياريت تعمل لنا مذكرة اسئلة وأجوبة للصف الأول والثانى الثانوى وتوفرها لنا فى المرفقات - هنا وفى قسم ثانية ثانوى - بس تكون من اعداد سيادتك مش المذكرة اليتيمة اللى منتشرة فى كل النت واللى مفيش غيرها - لإنها غير موضح بها هل هى عن التوزيع القديم للمنهج ام التوزيع الجديد اللى قسموا فيه دروس الكتابين على السنوات الثلاث - اللى من تأليف سنيور "حسام ايطاليانو"

لو وفرت لنا مذكرات من اعدادك للصف الآول والثانى الثانوى حأقبل اعتذارك عن اهانتى واتهامى بالكذب - وحأشكرك كمان انا وكل أولياء الأمور الغلابة اللى زييى

[SuperMemo]

علفكرة الراجل بيتكلم صح انا فى مدرسة كويسة جدا ومفهاش غير مدرس ايطالى واحد بس !!!!!
وفيها مدرسين المانى كثير يعنى من الصعب اوى تلاقى مدرس ايطالى

الايطالى احسن من الالمانى مختلفناش ايه الفرق لما الحاجة السهلة ميبقاش ليها اى حاجة لا اجابات وبالتالى محدش هيحل اسئلة اصلا وغير منتشرة

لكن الالمانى مهتم بيه جدا مدرسين موجودين والاسئلة والاجابات موجودة و مادة لذيذة تشد الطالب ليها


وعلفكرة انا ايطالى بس عاجبنى الالمانى اكتر وندمان انى اخترت ايطالى

[MAGEDGAD]

موتوا بغيظكم
الايطالى اسهل
يا حبيبتى يا لغتى يا ايطالى

[sallam2u]

يعنى ايه نموت بغيظنا؟ حضرتك مدرس محترم - هو احنا بنلعب استغماية مع بعض؟
هو حضرتك شغال مدرس عشان تغيظ الناس وتفرسهم؟ هى دى مهمتك الجليلة؟

سيادتك تجاهلت الرد عليا
مازلت أوجه لك التحدى: عشان تثبت لنا ان حضرتك مش مادى واستغلالى وهدفك نشر العلم والثواب وليس استغلال اولياء الأمور وان الموضوع مش حب اللغة ولكن الاستحواذ على أكبر قدر من جيوب أولياء الأمور الغلابة - عشان تنفى كل دة أنا طلبت منك مذكرة أسئلة وأجوبة للغة الايطالية من اعدادك شخصياً لكل من الصف الأول والصف الثانى الثانوى
ليه سيادتك بتهرب من الاجابة؟ ليه بتهرب من التحدى؟ اثبت لنا انك فعلا غيور على الايطالى مش الموضوع خناقة على الفلوس مين يكوش أكتر - اثبت يا بطل

[عمادعبداللطيف]

للاسف الشائعات اول طريق الفشل وبما ان ابن حضرتك اختار ايطالي واتدبس بعد اختياره للايطالي سؤال واحد هو بن حضرتك اختار الايطالي علي اي اساس ؟؟يعني معرفة خاصة بالايطالي مثلا ؟!؟طيب مصادر حضرتك الاساسية مدرس المدرس هو فين طيب ؟؟؟حضرتك انا مدرس فرنسي وبعشق الايطالي وبصراحة اسهل بكتير جداااا من الالماني والفرنساوي بالرغم من التشابه الكبير جداااا بينهم ولو حضرتك محتاج اي حاجة خاصة بالايطالي تحت امرك

[sallam2u]

اشكر سيادتك على الرد
انا مش فاهم حضرتك تقصد ايه بالشائعات - انا قلت فوق ان الايطالى اسهل بكتير فعلا ودة سبب اختيار ابنى للايطالى - زى أى طالب قبل ما يختار اللغة التانية بيسأل عن الأسهل - لكن لا يخطر على بال الكثيرين أن يسأل ان كانت اللغة مخدومة أم مهملة
لو حضرتك تقدر تقول لنا أى رابط نقدر نحصل منه على السى دى الخاص بكتاب الايطالى لاولى ثانوى وثانية ثانوى - وياريت كمان مذكرات بها اجابات اسئلة كتاب الوزارة - او مذكرات اسئلة وأجوبة - لإن فيما يبدو مدرسين الايطالى عددهم قليل فقرروا انهم يحجبوا أى أجوبة للأسئلة عشان يجبروا اولياء الامور على الدروس الخصوصية - فلو حضرتك تقدر تخدمنا فى الحاجات دى بأى روابط او مرفقات نكون شاكرين جداً

[MAGEDGAD]

الاستاذ المحترم جدااااا sallam2u

انا مش مدرس خصوصى عشان استغل اولياء الامور ذى ما بتقول بالدروس الخصوصية
انا دكتور جامعى وواضح انك فاضى كفاية رغى

[sallam2u]

طب مش كنت تقول كدة من الاول؟
دة يستوجب انى اقدم لك اعتذارى - وأرجو انك تقبله
مع تحياتى واحترامى لحضرتك

[hamada_97]

انتم فتحتوها شات هنا ولا ايه ؟

مالوه يعني الايطالي ... الواحد بكتاب خارجي واحد ممكن يقفّل المنهج و عليه بوسة
و كمان عندنا مدرسين الايطالي حوالي 3 اضعاف الالماني
و عندنا مدرسيين مشهورين و كله تمام و زي الفل