الفرنساوى ..عقدتى

[That Moment]

اهلا بكم اخوتى الاعضاء

انا طالب فى 2 ثانوى و بواجه مشاكل كتير فى مادة الفرنساوى والصراحة ابتديت احس انها صعبة على الرغم من انى فى سنة اولى كنت متفوق فيها فى التيرم الاول وبعدين حسيت انها بقت اصعب فى التيرم التانى لكن فى تانية ثانوى حسيت انى ضايع فيها...... فيه افعال كتير مش عارفها وكلمات كتير بقابلها مش عارف معناها والقواعد محتاجة شوية تظبيط والصراحة ده بسبب تقصير منى وانا مستعد انى اعمل بجد وضمير فيها انا مش خايف من السنة دى انا خايف من السنة اللى جاية (3ثانوى) وخايف الفرنساوى يكون سبب فى تدمير حلمى خصوصا انه تراكمى
والقديم تقريبا انا فيه ضايع والجديد محتاج تقوية فيه

اعمل ايه علشان اتقوى من جديد فى الفرنساوى؟

[SwOrD OF JusTice]

هقولك حاجتين

1- انا لحد شهر 4 السنه الى فاتت مكنتش اعرف ولا كلمه فى الفرنساوى خلال شهرين اخدتهم درس بقيت تمام وجبت 49

2- عليك وكتاب ميرسى مراجعه اكثر من رااااااااائع


اوعى تحفظ جمل .. كمان مره اوعى تحفظ جمل


انت تحفظ الكلمات حفظ تاااااااااااااااااااااااام بعدين تدخل على القواعد زى البرنس فى كتاب ميرسى هتبقى عالى اوى


3- متتعبش نفسك وتقعد تقرى الفرنساوى بكلام غريب .. اقراه زى الانجليزى هيسهلك الحفظ بكتييييير
بالطريقه دى كنت بخلص كل يوم وحده

[amothman123]

أنا هافترض إن الفرنساوى لسة ماتغيرش
و الله و الله و الله
امتحان الفرنساوى كله بييجى من كلمات شائعة و متعارف عليها و هى اتفه الكلمات و اكثرها تداولاً
المدرسين بيحفظوك كلمات كتير بس علشان عدد الكلمات الغريبة الى هاتخمنها فى الامتحان يقل و بالتالى تفهم الجمل بشكل أوضح
إنما 99 % من الكلمات دى و الله و الله و الله ما هاتضطر تكتبها خالص ولا تقرب منها حتى
و الامتحان بييجى متوقع بطريقة رهيبة أسئلة كلها معادة و مكررة و الامتحان فيه حوالى 30 درجة مالهمش دعوة بالـ 16 درس و كلها حاجات من بتاعت مين قال لمين و أبواب الجريدة و مش عارف اية و كلها حاجات تافهة باستثناء سؤال عما تعبر الى غالباً بيتلغى غير كدة الـ 15 درجة بتوع الشخصيات و الاماكن دول انت داخل الامتحان حايطهم فى جيبك
و القواعد أسئلتها بتييجى مباشرة جداً جداً جداً انت بس تحفظ الأفعال الشاذة كويس أوى أوى أوى و تفهم بتغير اية فى الجملة و هاتحل ألف قطعة قواعد مية مية .. نادراً أوى ما بييجى سؤال فى القواعد جديد أو فكرته غريبة و أغلب أفكارها مباشرة و تطبيق مباشر للقاعدة
و المواقف و المواضيع لو كتبتهم كلهم مع الاختيارى هاتضمنهم بعون الله
و دول ماتحفظش مواقف أو مواضيع تعبانة من الكتب الخارجية أو من المدرسين لأنك لو فاهم بتكون الجملة أزاى هاتكتب احسن منهم ألف مرة
الى لازم تركز عليه أوى أوى أوى أوى أوى أوى هى الوثيقة دى الى بيبقى فيها كل الغلط فى الامتحان و دى الى بتوقع فعلاً .. تقريباً 98 % من امتحانات الفرنساوى فى الدروس الى كنت بقع فيها هى القطعة لأنها مش مضمونة دة غير اللعب فى سؤال الاختيار من متعدد و الصواب و الخطأ
علشان كدة محتاجة تركيز منك جامد جداً و انت بتحلها علشان ماتقعش فيها .. و دائماً تسيبها للآخر علشان تقدر تاخد وقتك فيها بكل حرية و تفكر فيها كويس
إنما باقى الامتحان لو مذاكر بجد و الله تخلصه فى ربع ساعة و أنا بحلف بالله

[شذى العطر]

اهم حاجة الكلمات احفظ الكلمات بعديها ذاكر القواعد
كل يوم 20 كلمة مثلا واخر الاسبوع تراجع الكلمات إلي حفظتها عشان بردوه متسهاش وتكون حفظت على الفاضي وهكذا