مستقبلي بيضيع قدام عيني

[jasminfarouk]

ياجماعة ارجوكم حل بس حل ينفع معايا بجد لاني تعبت
انا بنت في ثالثة ثانوي السنة اللي فاتت ذاكرت بس ربنا مكرمنيش بمجموع وقلت الحمدلله لا اعتراض
السنة دي اقسم بالله انا لغاية دلوقتي مفتحت مادة طبعا كل يوم مشاكل مع اهلي بس اول مفكر في المذاكرة بحس اني مخنوقة اوي
مش عارفة اذاكر حاولت وعملت اكثر من جدول رقلت لاهلي خدو فوني وافصلوا النت لو مذاكرتش بردو مش عارفة
انا مستقبلي بيضيع فدامي وانا مش قادرة اعمل حاجة
ديما افضل اعيط بليل لوحدي وادعي ربنا اني اعرف اذاكر بس مفيش فايدة
انا حلم حياتي ضاع بسبب مجموع سنة تانية قلت مش هستسلم هدخل الكلية واحقف نجاح في المجال ده وهتحدي الدنيا عشان مستقبلي
بس عندي حالة غريبة من المذاكرة ارجو الحل
مع العلم اني مش انسانة مستسلمة وديما لو فشلت بجرب مليون مرة لغاية منجح

[Yes We Can]

عاوز اقولك حاجه فـ الاول
انا بقالى فتره مش برد على مشاكل او آى توبيكات
لانى كنت فـ نفس الفتره دى و كنت زيك بـ ظبط
مفتحتش آى ماده قبل كده .. بين قوسين فااااشل مـ الاخر
انا مش اهل للنصيحه انى انصح حد يدخل يذاكر
بس هقولك كام كلمه مش هقولك نصيحه بس اسمعيهم و خلاص
انتِ لو عاوزه تنجحى .. هتنجحى
لو عاوزه تسافرى .. هتسافرى
لان عندك اراده .. و مع الاراده فيه حاجه صغيره اسمها الكسل
الكسل بيكبر يوم عن يوم و بيجيب احباط و مشاكل تانيه
مش مهم المصطلحات ايه
ابدأى و لو حاجه صغيره .. حتى لو درس
احسن من مفيش
حاجه فـ حاجه هتقدرى تلمى
معلش اعذرينى انا اشتكيت قبل كده كتير عشان حالتى دى
بس صدقى ان مفيش حد هيشجعك غير نفسك
محدش هيمتحن غير نفسك .. محدش هيفهم غير نفسك
محدش هيحل مشكلته غير نفسك
مش هقولك اقفلى النت دلوقتى و افتحى الكتاب و ذاكرى
يبقى اكون بكدب عليكِ
وفرى الاول العوامل اللى تشجعكِ ف اوضتك او ف كتبك و كده يعنى
رتبى الاول ازاى تذاكرى
و بلاش ف الاول تحطى جدول .. عشان مش هاتمشى عليه
ابدأى ب حاجه بسيطه
اقولك اشتغلى ب التقسيط .. بينفع باردو
حاجه حاجه عشان لو خدناها كلها .. مش هنقدر
اهم حاجه ابدأى ثم ابدأى ثم ابدأى
يمكن كلامى ملوش آى لازمه لانى مش اهل للنصيحه لانى زيى زيك
انا مش متفوق و مش ممتاز
بس انا عندى امل ان فيه وقت .. عندى ثقه ان الانسان يقدر يعمل آى حاجه
بس يبدأ الاول و يقول يارب

" بدلا من ان تلعن الظلام .. خيرا لك ان تضىء شمعه "

ربنـا يوفقكِ . . .

[KhaleD Moustafa]

بسم الله الرحمن الرحيم

أنا عرفت إيه سبب المشگلة أو أسباب المشگلة دي

السبب الرئيسي إنّنا عايزين نتفوق عشان دنيا ف ربّنا مش بيوفقنا عشان إحنا مش همّنا الآخرة

والسبب التاني إن إحنا مقصرين مع ربّنا كتير

بصي حضرتگ دلوقتي تحافظ ع الصلاة ف وقتها اوعي تأخري صلاة عن وقتها .. ومش تهتمي بالمجموع وأي حاجة ف الدنيا إنتِ إعلمي اللي عليگي بإتقان بس ودعي الخالق يدّبر أمركِ

بخصوص المذاكرة حضرتگ من بكرة تصحي الساعة 5 تصلي الفجر وتدعي ربنا بالتّيسير .. وتبتدي مذاكرة .. بس خدي ف الأول صفحة من كل مادة ده ف الأول بعدين صفحة ونص اليوم التاني واليوم التالت صفحتين وبس اثبتي ع كده وبعد م تخلصي فصل تحلي عليه كل الأسئلة خصوصا أسئلة الامتحانات بتاعت السنين اللي فاتت .. والأنجليزي والعربي خلي يوم إنجلش مع مادتين تاني ين ويوم عربي مع مادتين تانين واحفظ كلمات إنجلش فالأول عشر كلمات وتاني يوم 15 وتالت يوم 20 وبس اثبتي ع كده

ومتأسيش أنا والله الإنجلش مفتحتوش من أول السنة لغاية م بقينا ف شهر 2 ابتديت اذاكره كل يوم واحفظ بالتدرج دلوقتي قربت أنا ف الوحدة ال 11 وشابتر 4 ف القصة ... أوعي تأيسي


أسأل اللهَ مفهّم سليمان أن يفهِّمَكِ ومعلّمَ داوود أن يعلّمكِ

وبالتوفيق

[_Haneen_]

بصى رغم ان كلنا بنعدى بالفتره دى انما لازم ننصح بعض ونقوى ببعض
فكرى دايما فى يوم النتيجه وانتى واهلك طايرين من الفرحه فكرى فى فرحتك وانتى داخله كليه كويسه فكرى فى نفسك وانتى انسانه ناجحه ومتفوقه
بلاش تضيعى الاحاسيس الجميله دى من ايدك
وربنا معانا ان شاء الله نعدى السنادى على خير ونبتدى مرحله جديده فى حياتنا بنجاح ان شاء الله