لو ناوي تدخل طب

[مرام احمد]

السلام عليكم ورحمة الله وبركاته انا زميلتكم في اولي طب قنا
طبعا طلبة ثانوية عامة ربنا يكون في عونكم ركزوا كويس في مذاكرتكم انا بس حبيت اكلمكم شوية عن كلية طب لو حد حابب يدخلها بإذن الله
لما ربنا يكرمك وتقرر تدخل طب لازم تكون حابب الكلية ماينفعش تدخل طلية طب وانت مش حاببها علشان مثلا هي احلي من صيدلة او علشان مستخسر مجموعك الكبير او علشان اهلك نفسهم يشوفوك دكتور كل ده اسباب كويسة بس لو دخلت طب لاي سبب من الاسباب لازم تقنع نفسك انك بتحبها ولا هتتعب جدا خاصة في الاول زي ماانا تعبت انا دخلت طب لاني كنت شايفة انها مناسبة ليا اكتر من ضمن الخيارات اللي كانت متاحة بس مش لاني بحب الطب
وعلي فكرة لما هتدخل الكلية وتمشي فيها شوية هتحبها جدا ولما هتشوف اصحابك اللي دخلوا كليات تانية هتعرف قيمة كليتك
دراسة الطب مش صعبة ومش معقدة وطويلة بالعكس دراسة الطب ممتعة جدا بس المطلوب انك تبقي هادي وتساعد نفسك انك تستوعب وده اهمية مقولة حب ما تعمل
كفاية كدة ممكن في نهاية العام الدراسي هكلمكم بإذن الله علي المواد وازاي تذاكرها وايه الحجات المطلوبة في كل مادة مش لازم تعرفوا الكلام ده دلوقتي ركزوا في الثانوية الاول نعدي مرحلة مرحلة وعلي فكرة الثانوية العامة سهلة جدا وسهل انك تجيب فيها مجموع حلو ولو محتاجين نصايح في المواد اسألوا وبإذن الله اجاوبكم انا الحمد لله ربنا كرمني بمجموع 100.6% 412.5 بالمستوي

[Nourhan_nono]

طيب انا فى اولى ثانوى
و محتارة بين علمى و ادبى
و خايفة اووووى من المواد العلمية بالذات الكيمياء
فى ناس كثير بتنقص فيها و دى يمكن اكثر مادة بتوقع الطلاب
و يمكن كمان فى ناس بتحول ادبى بسببها
بس انا النظام الجديد فحكاية التحويل دى ماينفعشى
حتى لو تنفع سمعت انها خلال اول اسبوع بسسس
لكن بعد كدة ماينفعشى
و كل اما اقرر فى الموضوع دة اخاف اوووى و اتردد
انا الترم دة بدرس كيمياء و تاريخ و احياء
و خايفة...... لحد دلوقت كل المواد سهلة و حباها
و الكيمياء السنادى كويسة
بس انا خايفة من كمياء الثانوية تكون اصعب من اولى
انا دماغى حلوة و شاطرة و حاسة انى مايله للعلمى علوم
بس خايفة مش اعرف امشى فيها
و خايفة ادخل ادبى اندم بعد كدة انى مدخلتيش علمى
حتى لو مشيت حلو فى الادبى هحس انى ممكن اندم انى مدخلتيش علمى
دى حاجة
تانى حاجة بقى ياريت تقوليلى على نصائح اعملها تفيدنى فى المذاكرة
و اية المواد اللى اسس نفسى فيها من السنادى و اركز عليها اووووووى
و المواد اللى هتنفعنى بعد كدة ؟؟؟؟؟؟
معلشى طولت عليكى .....

[soosoo_kotp2000]

نفسى أدخلها وليا فيها هدف واحمد لله جبت مجموع حلو ف تانيه بس تالته ربنا يستر وان شاء الله اجيب مجموع يدخلنى طب

[ahmed.yahia]

طب انا جبت فى تانية 94.1 وخايف اوى لان مجموعى ضعيف وعاوز ادخل هندسة ياريت يا دكتور تنصحينى فى المواد دى
فيزياء بزاكرها من كتاب المعلم والامتحان
رياضة 2 بحل كتاب المدرسة واسئلة الثانوية ومسائل من الدليل
عربى مش بزاكره الصراحة
انجليزى من سلاح سنيور بس خايف منه اوى
فلسفة مش بزاكرها اوى
بس انا خايف اوى لانى اخرى فى اليوم بزاكر 5_4 ساعات دى اقصى حاجة وحاسس ان كدا مش تعتبر مزاكرة ثانوية
انتى اية رايك ازاكر كل مادة كام ساعة فى اليوم من المواد دى وياريت تنصحينى لكل مادة لان انا متوتر اوى علشان نفسى ادخل هندسة

[Marry Sam]

ممكن تنصحيني ي دكتورة لاني بجد يعني حاسة لني مقصرة

و خايفة من الفيزياء دي اوي

و الاحياء مذاكرتها يعني مش صعبه اوي الحمد لله بس نسيانها سهل جداااااااااا و حلها صعب مش عارفة ليه

و الانجلش الكلمات بتتنسي سريعا

[مرام احمد]

بصي يانورهان موضوع علمي وادبي ده انتي اللي تحدديه اولا شوفي انتي حابة ايه اكتر يعني مثلا في 3 اعدادي كنتي شاطرة اكتر في العلوم ولا الدراسات وشوفي كمان كليات العلمي وكليات الادبي هل انتي احسن ليكي لو دخلتي طب مثلا او صيدلة او هندسة او علوم ولا لو دخلتي سياسة واقتصاد /اعلام /السن كدة يعني
انتي دلوقتي في اولي بتاخدي العلمي والادبي شوفي مين افضل بالنسبة لك وفكري كويس في الكلية زي ماقولتلك
ثانيا حكاية الكيماء صعبة ولا الفيزياء صعبة انا مش بقتنع بموضوع صعبة ده طيب ماهي لو صعبة ماهي صعبة علي الكل ليه بقي في ناس بتجيب50 بصي الموضوع كله في التوكل علي الله وهو 3 خطوات 1/حسن الظن بالله ربنا هيساعدني وهيخليني اتفوق خلاص الموضوع انتهي انا متأكدة انه هيساعدني
2/الدعاء ثم الدعاء ثم الدعاء في كل وقت في كل صلاة الصبح وبالليل
3/الاخذ بالاسباب وهو انك تعملي اقصي حاجة ممكن تتعمل بس انتي هتاخدي بالاسباب وانتي موقنة ان الاسباب مش هي اللي بتجيب النتائج النتائج ربنا هيجبهالي بس انا باخد بالاسباب علشان انفذ امر ربي مش انك تيجيبي اخرك وتفرق كتير يعني مثلا انتي اخرك ساعتين مذاكرة في اليوم بس اقصي عدد مذاكرة ممكن يذاكرها طالب 8 ساعات يبقي انتي المفروض تذاكري 8 ساعات ذاكري كتير واشتري ملخصات وحلي اسئلة كتير ومافيش حاجة هتبقي صعبة بإذن الله واسالي المدرس علي اللي مش عارفاه يعني عارفة انا مدرس الفيزياء بتاعي طلعت روحه في الاسئلة وافضل وراه لغاية لما افهم خالص ويشرح واقوله مش فاهمة ويعيد تاني عادي ماتتكسفيش انا رأيي ان مافيش طالب شاطر وحد مش شاطر بس فيه واحد متوكل علي ربه ومجتهد وواحد لا واحتسبي تعبك عند ربك

soosoo ربنا يكرمك بمجموع اكبر في 3 وتدخلي طب

بص يااحمد اولا ماتتوترش خالص ولا تدايق التوتر ده بيضيع كل حاجة
ثانيا بالنسبة للمواد الفيزياء تقرأ الموضوع من كتاب المدرسة الاول بعد كدة تذاكر من ورق المدرس اما الاسئلة تحل من كتاب الامتحان وكتاب المدرسة ودليل التقويم بس دلوقتي سيب المعلم خلاص وماتضغتش علي نفسك دلوقتي في حل حاجات كتير اما بقي لما تخلص المنهج خالص تجيب الامتحان بتاعك ده اللي انت حليته وتجمع المسائل والاسئلة اللي فيها فكرة والحجات اللي وقفت معاك وتجيب كشكول سلك طويل وتكتب السؤال والاجابة وتجيب المعلم بتاعك ده اللي احنا سيبناه في الاول وتحله وبردو تشوف الاسئلة اللي ليها فكرة وتكتبها في الكشكول اللي قولتلك عليه وهتجيب كتاب اسمه الماسي هو امتحانات ثانوية وازهر وكل حاجة وتحل فيه وبردو تاخد الاسئلة المهمة بس ده في ايام المراجعة زي ماقولتلك مش دلوقتي وماتجيبش كتب تاني انا جبت كتب كتير بس دول هما اللي فادوني حتي المعلم مش مهم بس طالما جبته يبقي نستفاد بيه
الرياضة 2 بقي انا طبعا مادرستهاش فمش عارفة ايه الكتب المفيدة فيها بس هقلك نظامي في رياضة 1 اسئلة كتاب المدرسة +دليل التقويم +المعاصر شرح واسئلة بس كدة دلوقتي تحل وفي ايام المراجعة تجمع الاسئلة اللي فيها فكرة بالحل النموذجي ليها في كشكول زي بتاع الفيزياء علي فكرة الكشكول ده هينفعك جدا
اما العربي مافيش حاجة اسمها مش بذاكره لازم تذاكره العربي سهل وبسيط جدا كتاب المدرسة تذاكر منه +ورق المدرس +الامتحان اسئلة بس كدة باقي الملخصات مالهاش اي لازمة والعربي مش محتاج لكشكول زي بتاع الفيزياء لانه مافهوش اسئلة صعبة واخر السنة تبقي تدرب علي التعبير احنا مش عايزين نضيع ولا درجة
نسيت اقول ماتشتريش اي ملخصات شرح في اي مادة مالهاش لازمة هات اسئلة بس
وبرده الفلسفة سهلة بس لازم تتذاكر من الكتاب+ورق المدرس بس واخر السنة تجيب كتاب امتحانات
اما بالنسبة لمجموعك في 2 فهو كويس بس محتاجين نزود جدا في 3 لان التنسيق عالي
بس انسي 2 خالص خلينا في 3 انت باذن الله تقدر تجيب فيها 99% بجد مجموع2 يبقوا مع بعض حوالي 97 % قول بالقليل 96% وبكدة تقدر باذن الله تدخل هندسة بس شد حيلك جدا في 3
اما عدد ساعات المذاكرة مش مهم قد ما مهم القدر اللي بتخلصو في اليوم يعني حدد مثلا انهردة هخلص كزا وكزا وكزا بس لو انت بتروح المدرسة يبقي 5 ساعات كويس بس لو مش بتروح يبقي خليهم 7 او 8 وايام المراجعة هيبقوا 10
اما الانجليزي فسنيور ممتاز بس مش دلوقتي خليه في المراجعة دلوقتي ذاكر من سيربرايز حلو جدا شرح وفي المراجعة حل من سنيور وذابست شرح ومراجعة

بصي ياماري الفيزياء اعملي زي ماقولت لاحمد اما الاحياء السؤال الصعب وريه للمدرس وايام المراجعة جمعي الاسئلة دي باجابتها النموذجية في كشكول كونك تلاقي اسئلة صعبة ده طبيعي يعني لو شوفتي كم الاسئلة اللي انا مكنتش بعرف احله كنتي قولتي دي عمرها ماهتتفوق بس عادي جمعي الاسئلة خلي المدرس يحلها احفظي الحل وافهميه بس
اما النسيان فده هيتحل في المراجعة لما هتكرري الحاجة اكتر من مرة لسة فاضل كتير قوي في الامتحان الوقت ده كفيل انك تحفظي كويس
بلاش تحسي انك مقصرة علشان ماتديقيش افرحي باي حاجة تحفظيها وتذاكريها واحساسك بالتقصير ده علامة انك بتذاكري كويس علي فكرة
اسفة طولت عليكم بس يارب اكون قدرت افيدكم

[ahmed.yahia]

انا بشكرك بجد يا دكتور ومش عارف اقولك اية بجد شكرا جداااااااااا

[Marry Sam]

شكرا ليك .. ان شاء الله

انا بذاكر الاحياء من كتاب المدرسة و الامتحان

و الفيزياء من المذكرة و كتاب االمدرسة و احل من الامتحان و عندي المثالي كمان و المعلم

بس مبحلش منهم علي طول يعني الامتحان بس و الباقي سعات

[طالبة الجنة 2012]

الموضوع حلوى اوى يا مرام .............جزاكى الله خيرا على مساعدتك واستماعك لزمايلنا واخوانتا الاصغر طلبة الثانوية..............بس انا قريت فى كلامك انك بتقولى ان الطالب بيدخل طب لانها احلى من صيدلةدا من ضمن الاسباب يعنى.............بس هو انتى دخلتى صيدلة عشان تقولى ان طب احسن من صيدلة ولو احسن منها والصيدلة كلية عادية يبقى ايه فايدتها.......................مينفعش نصنف الكليات بالطريقة دى وايه احسن من ايه وانا الحمد لله بحب كليتى جدا وحاسة اننا بنعمل حاجه بجد لان اى مريض مش محتاج حد يقولة انت عندك ايه .لكن مجتاج الى يقوله دواك ايه ويكتشف له ادوية جديدة وبديلة . ومحتاجين الى يقضى عى اكبر هموم االعالم السرطان والامراض الفيروسية ومتنسيش ان دى اسمها فى الولايات المتحدة كلية العلماء ..........................فطبعا كلية الطب لها وضعها وكلية الصيدبة لها وضعها ومكانتها واهميتها وهى الوجه الاخر من الطب ..........يعنى كلية الطب بتدرس المشكلة وكلية الصيدلة بتدرس وتجيب حل المشكلة دى وطبعا العالم كله بيستنى الحل..............اكيد عرفتى اهمية الصيدلة..............بالتوفيق لنا كلنا يا مرام وارجو مش تزعى من كلامى لان ده توضيح مش اكتر

[مرام احمد]

لا انتي فهمتيني غلط انا كنت بدي أمثلة بس للاسباب اللي ممكن الطالب يكون دخل طب علشانها انا اكيد مدرستش صيدلة انا بس كنت بحاول اوضح فكرة انه لازم يبقي حابب الطب في حد ذاته مش لاي سبب تاني مش بقول ان صيدلة مالهاش لازمة ممكن تقرأي كلامي تاني وتفهمي قصدي

[مرام احمد]

طالبة الجنة انا كمان بعتذرلك لو حصل سوء تفاهم بس انا مكنش قصدي حاجة غلط

[طالبة الجنة 2012]

المشاركة الأصلية كتبت بواسطة مرام احمد

طالبة الجنة انا كمان بعتذرلك لو حصل سوء تفاهم بس انا مكنش قصدي حاجة غلط

لا بلاش تعتذرى يا حبيبتى انا اكيد اللى فهمت غلط وانا اسفة بس انا والله كنت بوضح مش اكتر

[HhhhhOmar khaled]

انا نفسي ادخل اسنان ادعولي وادعولي اطلع من الاوائل علي الجمهوريه السنه الجايه انشاء الله

[Duke Tefa]

انا نفسي في هندسة دعواتكم معانا لنا جميعا

[nasr mahmoud abdoll]

من فضلك أنا عايز جدول مذاكرة جاهز لعلمي علوم