مدرس مصرى بالسعوديه

[ali manzalawy]

السلام عليكم ورحمة الله وبركاته فى البدايه احب اطلب من كل المدرسين ان يحمدو ربهم على نعمة العيش داخل بلدكم اول سنه اتغرب عن بلدى وفعلا هناك فرق كبير هنا فى السعوديه احنا شغاليين عند الطلبه ومفيش اى كرامه للمدرس طبعا كل هايقول لجانب المادى انا شارى العقد من مصر ب9 الاف جنيه وطبعا سالفهم من عندكم وجيت هنا وجدت كلام المكتب كله كذب فى كذب ان شاء الله اخر مره اخرج من بلدى ال 700 جنيه احسن من 3000 هنا فى السعوديه راتبنا هنا 2000ريال بيضيع نصهم فى المصاريف الاتصالات حتى الدروس المدرسه بتاخد نصها اجبارى

[كمال عزت]

والله انت مش لواحدك يا استاذ ما عليك من الفلوس المصيبة في كرامة المصريين معدومه ولازم حد يقف ويجيبلنا حقنا نحن مصريين بلا كرامه وفين ف السعودية اللي هيا بيقولو عليها شقيقة

[a_awady]

اللي رماك علي المر قال الللي أمر منه

حضرتك برده في نعمه لان احنا هنا برده عايشين بال 700 جنيه و مش بيكفوا لنصف الشهر في كلا الحالتين المعلمين في مصر حالتهم صعبه جدا
عليك بالصبر لان المعروف ان اول سنه غربه بتبقي اهم سنه في حياتك كلها لانها بتعلمك حاجات كتير ثانيا اصبر و اعمل لنفسك اسم كويس في البلد اللي انت فيها هتلاقي تاني سنه ان شاء الله ربنا كارمك اخر كرم

[جوجو***]

ربنا يوفقك بس اصبر شوية وبعدين لو اعتمدت علي الراتب بس من غير دروس يبقي لازم تشعر بالاحباط
بس انت حاول تحسن وضعك وربنا معاك

[alqadhi]

استعن بالله واصبر............حاول تغير المرحلة التي تعمل بها خاصة حاول تنتقل الى المرحلة الابتدائية فذاك افضل والح على ادارة المدرسة في ذلك...........ثم اصبر والحج جاي ان شاء الله وروح حج........وربنا يتقبل منك ان شاء الله........وعليك الحكم على تجربتك باخر العام لا باوله...........الكل........واحسبها هنا وهنا......وقاارن وشوف الفرق والتضحياااااات ..........وحاول تشغل نفسك بره بالشغل الخارجي حتى لا تنهمك في التفكير الكثير وتتعب نفسيا................
استعن بالله وعلى الاقل كمل السنة وبعدين تتحل ان شاء الله............وربنا يوفقك ويكرمك وما تنساش تدعيلنا هنااااااااك.....تفائل......

[محمدطعيمة]

لا يوجد مبرر لأي معلم مصري يعمل بالحكومة أن يسافر ليعمل بمدرسة خاصة خارج مصر لأن الأستاذ واضح جدا أنه يعمل بمدرسة خاصة وهي دائما تسخر العباد وتستعبدهم سواء بالداخل أو بالخارج .(( أي المدارس الخاصة ))
لا تسافر إلي الخارج إلا إذا كان مكانا حكوميا وعملا لائقا ،وعموما العقود المحترمة والأماكن التي تصون الناس لا تطلب مقابل لثمن العقد قبل السفر .

[ali manzalawy]

الى الاخ المحترم محمد طعيمه فعلا اللى على البر شاطر حاولنا السفر عن طريق الحكومه فى عمان وطلبوا 25 الف جنيه بس هذا مبلغ ليس ساهل وكمان مفيش فى السعوديه مدرس مصرى فى الحومه السعوديه لانها تحولت كلها الى عماله سعوديه فقط صدقنى لو تعرف قيمة بلدك كنت علمت عيالها صح

[حمادة المصرى2]

الحمد لله رب العالمين

[محمدطعيمة]

المشاركة الأصلية كتبت بواسطة ali manzalawy

الى الاخ المحترم محمد طعيمه فعلا اللى على البر شاطر حاولنا السفر عن طريق الحكومه فى عمان وطلبوا 25 الف جنيه بس هذا مبلغ ليس ساهل وكمان مفيش فى السعوديه مدرس مصرى فى الحومه السعوديه لانها تحولت كلها الى عماله سعوديه فقط صدقنى لو تعرف قيمة بلدك كنت علمت عيالها صح

أنا أنصح الناس فقط لا أكثر ولا أقل
من واقع تجربتي بالعمل في المدارس الخاصة بالداخل قبل أن أعمل بالحكومة ،ومن واقع ما يراسلني به الزملاء الذين مازلوا يعملون بالقطاع الخاص حتي الآن ،بل يوجد منهم من سافر للعمل بالخارج في مدارس خاصة ويحكي ما لا يصدقه عقل ،لكل ذلك أردت أن أنصح الناس فقط بألا يخدع أي معلم بكلمة السفر للخارج قبل أن يفكر جيدا ويعقد مقارنة بين حاله وبين ما سيكون عليه .
ونهاية جميعكم سادة أفاضل ومحترمون وتقدرون لكل أمر قدره وتعرفون مصلحة أنفسكم جيدا فحنانيك أخي الفاضل .

[صائد الفراشات]

استاذ على انت مدارس اية بالظبط وفى اى مكان بالسعودية

[mr.ragab2010]

شوفو يا اساتذة لو بلدنا بتحترم التعليم مكنش ده بقا حالنا تعالو شوفو المدرس السعودي بياخد كام فى بداية تعينه 7500 ريال كبداية واحنا عندنا الناس شغالة بخمسين جنيه بس انا بعترض على الاستاذ فى حاجة وهو التفريط فى الكرامة انت بذكائك تقدر تحافظ على شغلك ومتهنش نفسك انا مدرس فى السعودية ودى تانى سنة ليا واستحمل شويا هى اول سنة كده وبعدين العملية بتتحسن بس انا بصراحة بش وف كل احترام من اولياء الأمور والأمهات المشكلة بتبقى فى ادارة المدارس اللى اغلبها بيكونو مصريين وبينقلو كل كبيرة وصغيرة للكفيل وبيعلمو الخصائل ؟؟؟؟؟؟؟؟؟؟؟ واللى بلاش احنا فى منتدى محترم لو حبيت تتواصل معايا تحت امرك انا فى جده على فكرة انت فين امال؟؟؟؟؟؟؟؟؟؟؟؟؟

[ali manzalawy]

انا مدرس لغه انجليزيه واعمل فى ابقيق بلد قريبه من الاحساء