مــش بــنــاااام !

[Mohamed Nada*]

بسم الله الرحمن الرحيم .. السلام عليكم
ده موضوع خاص بيا انا وحابب اتناقش فيه معاكم طبعا .. انا خلصت 2 ثانوي وداخل 3
الحمد لله جبت في 2 مجموع كويس 97%
وانا الان متحير ادخل رياضة ولا احياء .. اصل الحكاية هى ان انا كنت جاي من السعودية في الثانوية والناس كانت تقعد تقولي خليك هناك احسن وجالي احباط وكده ودرجاتي في اولى ثانوي مكنتش قد كده فكت انا متوتر ومش عارف هجيب كام في 2 ولكن الحمد لله اثبت نفسي وجبت 97% وكنت انا ناوى من البداية اني هكون رياضة لان التوتر والقلق والجو الجديد اللي انا كنت عايش فيه مش بيدني تفكير اني افكر اني اكون عاوز ابقى دكتور مثلا ففكرت في هندسة لعلي الحقها لان كلنا عارفين ان تنسيق الهندسة اقل من كليات الطب وكده وان انا كنت متوتر وكده فاما جبت المجموع ده خلاني متحير ليه بقى لان انا والدي طبيب فموضوع الاحياء فكرت فيه عشان لو بقيت دكتور
هكون شايل اسم والدي وكده واكمل مشواره .. ولكن الان امامي طريقين الاحياء والرياضة لو اخذت احياء ممكن يكون مجازفة شوية لان لو قدر الله ونقصت ابقى خسرت كل حاجة خصوصا ان تنسيق السنة دي عالى جدا وتقارير المرحلة الاولى قريبة من تقارير المرحلة الاولى للسنة اللي فاتت فممكن التنسيق يبقى زيه مثلا اصل الواحد برضو لازم يفكر في الموضوع من جميع الاتجاهات اما لو اخذت رياضة ممكن يكون ده مجموع مستريح بالنسبة للهندسة فانا دماغي وقفت وصليت استخارة اكتر من مرة ولكن الحيرة مش سيباني بس كل الناس نصحتني اكمل رياضة اضمن .. ومعوتش عارف اعمل ايه..عايش في حيرة بجد
والدروس بدأت في رمضان اهو وروحت رياضة ومروحتش احياء بس حاسس اني مش مرتاح مش عارف بسبب الموضوع ده ولا عشان احنا في رمضان والواحد مش بيكون ليه نفس يذاكر وكده .. كمان شايف ان اللي واخدين احياء في 3 جايب اعلى مني سواء بنص او واحد في ال100
والله الموضوع تعبني جدا فعلا لدرجة انه مش بيجيلي نوم وعلى طول سرحان حتى في الصلاة
ارجو الافادة وجزاكم الله كل خير

[sameh mostafa]

طب عايز تدخل كلية ايه ؟؟؟؟؟؟

[Dr. Hoda Ahmed]

بص هقولك على حاجة قبل ما تقرر تكمل مشوار والدك او تدخل اى كلية فكر الاول انت هدفك ايه وعاوز توصل لايه

وميولك لاى كلية وحاسس انك لو دخلتها هتأدى فيها كويس ولا لا

لان ناس كتير بتوصل بس مش بتعرف تكمل

ومجموع 97 محتاج منك عشان تدخل طب مجهود مضاعف مضاعف لان التنسيق عالى والمجاميع كلها عالية جدا

اما هندسة فانا مش فاهمه ليه الناس بتخليها لو مش لحقت طب ادخل او علشان اضمن

هندسة كارير كبير اوى ومختلف جدا واساس المستقبل بس مش لاى حد للى عاوز فعلا يوصل ويعمل حاجة مفيدة لبلده او فى عمله

هندسه مجالاتها كتير اوى وصعبه برضو مش سهله

ونصيحتى ليك جرب الاول انت لو بتحب الحفظ ادخل احياء وكمل علمى علوم بس تخلى عندك الارادة انك هتكمل على نفس الطريق



لكن لو شاطر رياضة وتفكير ومستمتع بيها كمل رياضة

[aleman]

المشاركة الأصلية كتبت بواسطة mohamed nada*

بسم الله الرحمن الرحيم .. السلام عليكم
ده موضوع خاص بيا انا وحابب اتناقش فيه معاكم طبعا .. انا خلصت 2 ثانوي وداخل 3
الحمد لله جبت في 2 مجموع كويس 97%
وانا الان متحير ادخل رياضة ولا احياء .. اصل الحكاية هى ان انا كنت جاي من السعودية في الثانوية والناس كانت تقعد تقولي خليك هناك احسن وجالي احباط وكده ودرجاتي في اولى ثانوي مكنتش قد كده فكت انا متوتر ومش عارف هجيب كام في 2 ولكن الحمد لله اثبت نفسي وجبت 97% وكنت انا ناوى من البداية اني هكون رياضة لان التوتر والقلق والجو الجديد اللي انا كنت عايش فيه مش بيدني تفكير اني افكر اني اكون عاوز ابقى دكتور مثلا ففكرت في هندسة لعلي الحقها لان كلنا عارفين ان تنسيق الهندسة اقل من كليات الطب وكده وان انا كنت متوتر وكده فاما جبت المجموع ده خلاني متحير ليه بقى لان انا والدي طبيب فموضوع الاحياء فكرت فيه عشان لو بقيت دكتور
هكون شايل اسم والدي وكده واكمل مشواره .. ولكن الان امامي طريقين الاحياء والرياضة لو اخذت احياء ممكن يكون مجازفة شوية لان لو قدر الله ونقصت ابقى خسرت كل حاجة خصوصا ان تنسيق السنة دي عالى جدا وتقارير المرحلة الاولى قريبة من تقارير المرحلة الاولى للسنة اللي فاتت فممكن التنسيق يبقى زيه مثلا اصل الواحد برضو لازم يفكر في الموضوع من جميع الاتجاهات اما لو اخذت رياضة ممكن يكون ده مجموع مستريح بالنسبة للهندسة فانا دماغي وقفت وصليت استخارة اكتر من مرة ولكن الحيرة مش سيباني بس كل الناس نصحتني اكمل رياضة اضمن .. ومعوتش عارف اعمل ايه..عايش في حيرة بجد
والدروس بدأت في رمضان اهو وروحت رياضة ومروحتش احياء بس حاسس اني مش مرتاح مش عارف بسبب الموضوع ده ولا عشان احنا في رمضان والواحد مش بيكون ليه نفس يذاكر وكده .. كمان شايف ان اللي واخدين احياء في 3 جايب اعلى مني سواء بنص او واحد في ال100
والله الموضوع تعبني جدا فعلا لدرجة انه مش بيجيلي نوم وعلى طول سرحان حتى في الصلاة
ارجو الافادة وجزاكم الله كل خير

تلميذى الفاضل:
جرب روح دروس احياء وشوف هتحبها او لا
وقارن بين الاحياء والرياضيات
وباذن الله ربنا هييسرك الامر
واعلم ان هذا مكتوب عند الله من قبل ان نولد
يعنى ده قدر ومكتوب
بالتوفيق باذن الله

[To Be Is To Do]

نصيحه أخ كبير مجرب الموضوع والحيره دى
إدخل رياضه 2 أضمن وأأمن والله
أنا كنت جايب 98 % ف 2
والبيت كان حيبوس رجلى عشان أدخل أحياء لكن أنا مردتش خشيه أنأضع نفسى موضع الحيره بعد النتيجه وأيام التنسيق
فنصيحتى ليك إنك تكمل رياضه 2 أضمن
عشان تبقى ف السليم
ومتحترش

[Bahy_Ahmed]

من كلامك انا حاسس انك عايز رياضة ومرتاح فيها فانتا كملل رياضة احسن وانا برضو جبت 97 ونص وحكمل احياء لاني انا بحبها وعايز اكمل فيها

[تغريد الطيور]

و الله انا حاسة ان دى حكايتى .. انا جبت برده 99.3 و اهلى ماكانوش عايزين يدخلونى علمى رياضة لان هندسة ماتنفعش للبنات و كدا و انا اساسا امل حياتى ادخل هندسة و نفسى فيها و عايزة اثبت نفسى فيها و بحب جدااااا الرياضة و بكره الاحيااء .. لكنى اقنعتهم الحمد لله و اقتنعوا بيا

انا من رايى .. ادخل اللى بتحبه و شايف نفسك فييه .. يعنى حاسس ان كلية الطب او طب اسنان او صيدلة مصيرك فيها و نفسك بقى ف مهنة الطبيب و كدا و العيادة و الكلام دا .. خلاص توكل على الله و اعلم ان مرحلة الثانوية دى مرحلة اتنقالية يعنى مش العمر كله يعنى ااه هى اللى هاتحدد مصيرك لكن برده الشغل اهم بكتيير لانه حيــــــــــــااة


لكن لو بقى شايف نفسك ف هندسة و عايز بقى تدخلها و ليك ف البنا و الرياضة و الدماغ دا خلاص توكل على ربنا و ادخلها و شوف حد يفهمك ايه هى اقسام هندسة و شغلها ازااى و كدا ..

المهم لازم التفكيير ف الشغل برده لان دا هو الحياة .. لكن موضوع التنسيق دا اكيد حضرتك قدها اذا كنت متعلم ف السعودية و ما شاء الله جبت 97 يبقى تقدر تحصل اى كلية ومافيش حاجة اسمها مستحييل

توكل على ربنا و اكيد ربنا هايوقفك

و اتمنى اكون افدت حضرتك ..

و ااسفة ع الاطالة ..

[MARRON-5]

والله يا محمد انت محير نفسك ع الفاضى مادام بتحب الرياضة ادخلها وبلاش تدخل احياء بس كده

[إليزابيث]

انا اصغر منكو بسنة يعني نصيحتي على أدي
بص للموضوع من ناحية قلبك مش من عقلك يعني اللي انت بتحبو ايه لو بتحب تبأى شايل لقب مهندس يبأى رياضة لو بتحب تبأى دكتور يبأى عليك وعالأحياء
على فكرة املك انك تدخل طب مش صغير بالعكس ده كبير انا اختي السنة اللي فاتت كانت ف تانية فإيه جابت 8ز97 عملنا اعادة تصحيح وجابت 98 كنا خايفين جدا من مجموعها فدخلت علمي علوم و بص ذاكرت مذاكرة عادية والله أصلها ذكية قوي عكسي يعني بس اهتمت بالمستوى و جابت الخمس درجات فيه ف تالتة بأى جابت 17ز98 بس بالمستوى جابت 4ز99 والحمد لله حصلت طب وزيادة كمان مع ان المجاميع كانت عالية جدا ومخادوش غير نسبة قليلة
على فكرة تالتة اصعب من تانية يعني ان كنت شديت حيلك ف تانية شدو و بزيادة كمان ف تالتة و متقلقش من ناحية التنسيق لو انت عملت اللي عليك ربنا مش هيسيبك واهم حاجة التوفيق وتبأى علاقتك بربنا كويسة و اهم حاجة دعاء الوالدين وخاصة الأم
و إن شاء الله تنــــام
وربنا يوفقـــــــك يارب

[د/نداء الجنة المصرية]

لو هتادى كويس ومش هيكون فى ضغط عصبى هتجيب الدرجة اللى انت عاوزها فى اى ماده سواء رياضة او احياء لكن لو هتفكر فى المجموع كتير اثناء الدراسة يبقى الاحياء مش هتنفع لانها عاوزة مذاكرة وتركيز عشان كمان بتتنسى وحتى الناس اللى كانوا بيحبوا الاحياء وذاكروها نقصوا فيها عشان كانوا مشغولين بالمجموع وانا واحدة من الناس بصراحة ماكانش فارق معايا رياضة او علوم انا جبت مجموع كويس فدخلت علمى علوم وخلاص بصراحة الاحياء تعبتنى طول السنة عشان ماكنتش واخداها من حيث حبى للمادة او كده انا تقريبا اصلا كنت داخلة علوم عشان عندنا فى البيت عاوزين انى اكون دكتورة وانا اللى فضلت احبب نفسى فى المادة وفى الطب طول السنة الحمدلله فى الاخر جبت مجموع بس كان ممكن جدا انقص كتير فى الاحياء وبعدين انا كنت طول السنة مهتمة بالاحياء والفيزيا بس كنت بغيب من دروس العربى والانجليزى بالاسابيع وماكنتش بروح درس احصا وكل مذاكرتى كانت فيزيا واحياء لدرجة انى دخلت امتحان الانجليزى من غير مااكون عارفة المنهج فى ايه لانى طول السنة ماحفظتش كلمات ولاحضرت شرح قواعد وحتى العربى كتبت فى فرع الادب اى كلام فى الامتحان لانى ماذاكرتوش الحمدلله نقصت فى الانجليزى درجتين مع انى عمرى مانقصت فيه وفى العربى درجة ونص والاقتصاد والاحصا الامتحانات كانت سهلة ومانقصتش انا قلت الكلام ده كله لانى فاهمة ان حضرتك فى نفس الموقف اللى انا كنت فيه ماكانش فارق معايا رياضة ولاعلوم فلو فعلا كده يبقى لو اخترت رياضة ماتفكرش فى اختيارك كتير اثناء الدراسة عشان تركز ولو اختيارك كان احياء يبقى لازم تضاعف جهدك وتركيزك اكتر من مرة وتحاول تقنع نفسك انك بتحب الاحياء وتقنع نفسك برسالة الطبيب وطبعا بما ان والدك طبيب هو ممكن يساعدك بس لازم تخلى بالك كويس طول السنة هتيجى اوقات كتير وهتلاقى نفسك مش عاوز تذاكر حاول ترتب طريقة مذاكرتك من دلوقت ولازم تدى كل المواد حقها وبرده تدى الاحياء والفيزيا حقهم بزيادة لكن تخصص وقت ولو صغير للمواد التانية لو حاسس انك مجهودك هيكون عالى وهتقدر تحقق نتيجة عالية فى الاحياء اخترها وانا صاحبتى على فكرة كانت جايبة 200 السنة اللى فاتت وركزت السنة دى بس ماكانتش متوترة اوى كانت بتقول لو صيدلة مش مشكلة وبرده كان موقفها من الاحياء زى موقفى وكانت مدايقة منها طول السنة وجت السنة دى لانها كانت هادية جابت204ونص يعنى مانقصتش غير نص درجة فى العربى ومجموعها بالمستوى بقى409ونص ودخلت طب مستريحة خالص فكل ده بيتوقف عليك لو هتقدر تقضى السنة كلها مذاكرة اختار احياء لو مش كده يبقى رياضة افضل

[د/نداء الجنة المصرية]

بس بجد لو هتكسل او هتقلق على المجموع بلاش احياء لان فى واحدة صاحبتى تانية كانت جايبة 197ونص وفضلت احياء وكسلت فى تالتة وبرده باباها دكتور ونقصت مع انها لو كانت دخلت رياضة كانت هتدخل هندسة وهى كانت فى الرياضة احسن

[Mohamed Nada*]

سلام عليكم

أولا انا بشكر كل واحد قام بالرد على الموضوع ووالله كلامكم جميل جدا وبيدي للواحد تفاؤل
سواء كان رياضة أو أحياء
و والله كل الحكاية هو انا فعلا ممكن اكون حابب هندسة أكثر ولكن موضوع الأحياء وكده زي ما قولت هو عشان يعني ولدي وكده يعني .. يعني هو دكتور وكده وبيخدم الناس في بلدنا والناس حباه وكده فلقيت الموضوع ممكن يبقى احسن لو انا فعلا كملت احياء بس عارف فعلا برضو انه مش شرط ان الواحد لازم يكون زي والده وكده وده كله بأيد ربنا طبعا وطبعا الاحياء هيبقى فيها توتر اكثر لان الواحد هيكون خايف على النص درجة طول السنة
واذا كان على المذاكرة فالواحد طبعا هيعمل اللي عليه والكل في ايد ربنا لان ضياع الدرجات امر سهل
فمش عارف بقى ممكن اصلي استخارة كمان مره واشوف وربنا يسهل ودعواتكم

وبشكركم مرة تانية على الردود

[إليزابيث]

انت شكلك عايز تروح هندسة روح اللي انت عايزه والناس هتحبك ف الوظيفة اللي انت هتحبها و هتبدع فيها مش اللي باباك بيحبها يعني انا مثلا بابايا مهندس وشاطر اوي كمان عمري ما هفكر اني اروح هندسة لاني عايزة طب ........... فكر ف اللي انت عايزه وهتلاقيها اتحلت واعمل استخارة وخليها على ربنا

[THE CodeR]

هدفك
لازم يكون محدد و واضح
و سكته اوضح
و ساعتها هتلاقي ان اختيار التخصص سهل جداً
مشكلتك مشكلة هدف
ده اللي لازم يؤرقك و تسرح فيه...

[Mohamed Nada*]

المشاركة الأصلية كتبت بواسطة THE CodeR

هدفك
لازم يكون محدد و واضح
و سكته اوضح
و ساعتها هتلاقي ان اختيار التخصص سهل جداً
مشكلتك مشكلة هدف
ده اللي لازم يؤرقك و تسرح فيه...

شكرا لكلامك الجميل