ممكن حد يدلنى

[جمــ الروح ـال]

السلام عليكم ورحمة الله

انا معاكم هنا من زمان بس نظرا لظروف خاصه مبقتش بدل ودلوقتى جايه ومحتاجه مساعده من اى حد ممكن يقدر يساعدنى

قبل ما اطلب مساعده هقولكم ايه مشكلتى

انا طالبه فى ثالثه ثانوى الحمد لله فى تانيه جبت 97.7 وفى ثالثه كل حاجه كانت تمام خالص

جيت يوم امتحان الانجليزى نظارتى اتكسرت وأنا مش بشوف من غيرها كلمت اهلى وبعتوا لى نظاره تانيه كان فات ساعه ونص وانا محلتش حاجه خالص وكانت صدمتى ان النظاره التانيه مشفتش بها

جالى انهيار عصبى فى اللجنه وتشنجات والدكتور اللى مع اللجنه فوقنى واعطانى مهدئات
بس الورقه بتاعتى كانت فاضيه خالص عليها الاسم بس

ولما خرجت توقعت انى هدخل دور تانى لكن اكتشفت انهم خلوا زميله لى حلت لى سؤالين فى الورقة

زعلت ولما سالت موجهين وناس كتير قالوا معتش ينفع تعمل اى حاجه لان لكى ورقه باسمك محلول فيها

وقالو ان ذنبى فى رقبة المراقبين لان الاجراء القانونى انهم يبلغوا الاسعاف وبكدا هيتاجلى الامتحان
ودى راحت عليا

المهم

النتيجه ظهرت زى ما انتم عارفين

ولقيت درجتى فيه 11 من 25 يعنى نجحت بالعافيه

ومجموعى الكلى 94.5 %

مع العلم انه لوحده نزلنى 3.5%

وانا كمستوى كويسه الحمد لله

قليت فى العربى زياده عن ما توقعت بس مش مهم انا لو كنت جبت فى الانجلش 20 كنت وصلت لل 97

انا والله راضيه بس انتوا عارفين التنسيق وانا كان لى حلم وضاع حتى احتمالاتى الاقل راحت عليا
انا علمى علوم وبكدا مفيش قدامى حاجه


الاهم من كل ده ان مدرس لى قالى قدمى تظلم
واطعنى فى الورقه وقولى انها مش بتاعتك وسهل تثبتى لانهم هيقارنوا الخط وهيتاكدوا لانها فعلا مش خطى

وبكدا أضمن انى ادخل دور تانى لجنة خاصه او يشوفوا لى حل
بسدل ما اضيع طبعا متخيلين صدمة زى دى عليا وعلى اهلى
اللى بطلبه منكم اى مدرس هنا او اى حد عنده فكره عن الموضوع ده يدلنى

اعمل كدا ولا ارضى بقدرى واسكت وخلاص
وهل ده هينفع وهستفيد ولا تضييع وقت

ولو ينفع ازاى اعمل تظلم واروح فين علشان اعمله
وامتى اعمله امتى بيبتدى تقديم التظلمات دى



ارجوكم انا محتاجه فعلا اى كلمة تطمن قلبى وقلب اهلى


واكون شاكره لكم لو حد فادنى بحاجه


وجزاكم الله خيرا

[Mmsaad]

السلام عليكم
طبعاً تعملى تظلم طالما انو مش خطك إن شاء الله لازم تاخدى حقك واكيد هيقارنوا خطك

[جمــ الروح ـال]

طيب ده مش هيكون فيه ضرر على المراقبين ؟

طيب فين يتعمل ؟

[soosoo_kotp2000]

بصى اهم حاجه دلوقتى مصلحتك النص درجة هتفرق معاكى اعملى تظلم .. اسألى المدرسين اللى قالولك كدا تعملى تظلم فين ... فى خط ساخن لوزارة التربيه والتعليم ممكن تتصلى تقوليلهم الحكاية دى وهما يقولولك تعملى ايه لو عرفت رقمه كام هقولك

[جمــ الروح ـال]

ايوه بس انا مش حابه اضر حد ومعرفش ده صح ولا غلط محتاجه يقولى انه ده صح ولا لا وحقى ولا لا وفى اذيه ولا لا ؟
ايه الخط الساخن ده ؟

[جمــ الروح ـال]

ياجماعه مفيش اى مدرس يد عليا هنا

[Mmsaad]

اسأل مدرسينك فى المدرسة

[نهى شاهين]

بصي يابنتي انا اتاثرت بقصتك جدا وربنا يكون في عونك وفي عون اهلك

انا من رايي تقدمي تظلم كان فيه واحد من تلت سنين جه في البيت بيتك لانه كان ناقص في الرياضه كتير جدا ولما كشف ع الورقه لقاها مش خطه يعني تم تبديل الورق وقدم تظلم بس معرفش ازاي وهما في التظلم ده بيجيبو خبير خطوط ولو ليكي حق هتاخديه ان شاء الله
ثانيا بقا انا مش عايزاكي تزعلي لان ده قضاء ربنا وربنا ده مبيجيبش الا الخير ودي ازمه وهتعدي وهتاخدي حقك وحتي فرضا يعني لو مخدتيهوش يبقا ربنا هيعوض عليكي ازاي متعرفيش لان زي مالحاجه اتاخدت منك من حيث لا تدري هتجيلك برده حاجات كتير من حيث لا تدري
انا كنت زيك بالضبط بس انا كنت مظلومه في التصحيح وكشفت وكنت بعيط في الكشف لان الاجابه قدامه ومش مصححها والكلام ده في مادتين يعني درجات بالهبل
بس زعلت شوية وقولت انا لازم افوق واركز في حاجه تانيه وبدات اركز اني ابقا معيده في اي كلية تتناسب مع ميولي
وفعلا ده اللي حصل وبقيت معيده دلوقتي ولو انا كنت دخلت الكلية اللي انا كنت عايزاها كنت هتخرج دلوقتي و ادور ع شغل انما دلوقتي انا معايا وظيفه وكمان برسيتج عالي استاذه في الجامعه وكده
فمتزعليش خالص وكل ما تزعلي افتكري ان ربنا كان عايز كده وان دي رحمه عطاؤه رحمه ومنعه رحمه
ربنا معاكي ياحبيبتي

[نهى شاهين]

انا دخلت ع بروفايلك ولقيتك دقهلية
دي نمرة المديرية 2222894
وفي النتيجه بتاعتك هتلاقي نمرة الكنترول بتاع العسكرية اتصلي بيهم او روحي هناك هما اكتر ناس هتفيدك
وممكن كمان تروحي مدرسه اسمها مدرسه الشهيد جواد حسني الابتدائيه في شارع المديرية القديمه امام جزارة شلبي فيها الاداره المتخصصه في الحاجات اللي زي دي
اسالي في التلت اماكن دول وربنا يوفقك يارب

[rana salem]

لا حول ولا قوة الا بالله
والله انا مضايقة عشانك جدا
يعنى مجموعك ما شاء الله عالى
بجد اعملى المستحيل
لان دة مستقبلك

[princess nona95]

لا طبعا اعملى كل حاجة فى ايدك عشان تجيبى حتى لو نص درجة بتفرق كتييييير فى الثانوى وربنا معاكى ياااااااااااااااااارب وتجيبى درجات وتدخلى طب وتفرحينا

[gehad mahmood]

يارب يعينك وتدخلى اللى بتحبيه

[lamiaa10005]

ربنا يوفقك يا رب