إيه الذُل والمَهَانَة اللي إحنا فيها دي....... !!

القلب التائه · #1 24-02-2012, 07:42 PM

فاكْرين عصام شرف ، لما عَمَل لَفَة على الدول العربية

( الشقيقة ) .. وبعض الدول الأوربية ، وأمريكا ، لِمُعَاونة مِصر فى الخرُوج من أزمتها الإقتصادية ..

وَقتَها أتمَطّع قوى الحُكام العرب .. وحتى الأوربيين .. ومَددوا إيديهم ، ورِجْليهم ، وقالوا :

أحنا حَانِدِيكم 25 مليار دولار ، تِدَبَرُوا بِيهَا نَفسُكم ،

و خللي بَالكم دُول فَتْح نِِفس بَسْ !!

لَكِن مَغارِة على بابا حاتتفِتح عليكُم زَي المَطر .. وأوعُوا تقلقوا ، ولا تِشِيلوا هَمّ ..

دِي مِِصر ( الشقيقة الكبرى ).. ومُسَاعَدِتَها وَاجِب علينا !!

ويَمُر يوم ، وَرَا يوم . وشهر ، وَرَا شهر .. وأتغيَرَت وزارة عصام شرف .. وجاءت وِزارة الجنزورى ..

وبِمُجَرد إستلامه الوزارة ، الراجل عمل إتصالاته مع الأشقاء ..

لأن المَوقِف المَالي للشقيقة الكُبرى ، يُهدد بِمُصِيبة سُودَة ، ولا يَسُرّ عَدِو ، ولا حَبيب !!

ولِغَاية يناير 2012 ـ يَعْنِى بعد سنة ـ كل اللي وَصَل الشقيقة الكبرى .. من شقيقاتها الأصغر عِبَارَة عن نُص مليار دولار من السعودية على هَيئِة سلع مِش كَاش .. ومن الشقيقة الأصغر الدَلُوعَة قَطَر نُص مليار دولار ، بَسْ دُول كَاش ( كَتَّر خِيرْهَا )

وإحنا نَسِينا ، أو تَنَاسِينا حاجة مهمة جدا .. وهى أن كل اللى كان بيعطى مصر هبات ، أو معونات ، أو قروض .. ماكانش بيعطيها علشان سواد عيونها . لأ طبعا .. كانوا بيعطوا إما علشان تسمع كلامهم ، وتحافظ على مصالحهم وتوجهاتهم .. أو للضغط عليها وإجبارها لإتخاذ مواقف حلوة ، وطرية ، وكلها حنيّة ، مع الشقيقة الأم (إسرائيل ) ..

أو للإستيراد بكل مبالغ المعونة ، أو القرض من الدولة اللى دفعته ، علشان تشغّل مصانعها ، وعِمَالتها ، وترتفع بإقتصادها ..

وفيه سبب تانى أهم هو إذلال مصر .. ووضعها تحت سِنَانهُم .. ويبقى عندهم الفرصة ، والمبرر إنهم يَقولوها كل شوية إحنا مَنحْناكم .. إحنا أعْطَيناكم .. أحنا بِنسَاعِدكم .. !!

وده فكّرنى بحكاية ظريفة بتاعة الراجل اللى شَحّت واحد غلبان جزمة نص عُمر .. وصمم إنه يتمشى معاه وهو لابسها .. وفضل يقوله وسط الناس فى الشارع : ياعمّ دوس على الأرض براحتك .. أنت خايف كده ليه ؟ .. ياأخى أعتبرها جزمتك ومايهمكش .. دوسّ ياعمّ !!

وخُلاصِة الكلام .. أنه لو فيه حد فاكر أنه حَاتِجينا إعانات ، أو قروض ، أو هبات فى الأيام اللي جاية يبقى غلطان .. لسبب بسيط جدا .. أن الأشقاء أو ولاد العم ، أو غيرهم علشان يدفعوا لنا أى فلوس ، لازم يكون عندنا رئيس وحكومة علشان يزلّوهم ، ويقولولهم إحنا أعْطيْناكم .. ودُوسُوا على الأرض ولايَهمُكم .. كأنها جَزمِتكُم .. لكن دلوقت مصر بدون رئيس .. والحكومة مؤقتة .. والصورة لسه ماكملتش .. يبقى عايزينهم يدفعوا لمِين .. ويذلوا مِين ؟ ويُعَايرُوا مِين ؟

يبقى المطلوب دلوقت إننا نَعْتمِد على نَفْسِنا .. ونَعِيش بِمَوَارِدنا .. أو نَجُوع أشرف لنا .. ومش بأتكلم على دلوقت .. لأ ، أنا بأقصد على طول .. لاعايزين معونة من العر ب .. ولا من أوروبا .. ولا من أمريكا اللي بتعطينا القمح اللى بترميه فى البحر علشان تكسر عينينا .. وتتحكم فى لُقمِتنا !! مع أننا بِنَسْتورِد منها سَئَويا بــ 55 مليار دولار .. ونُصَدِر لَها بـ 7 مليار دولار .. وكل إعاناتها لنا اللي قَرَفُونا بيها ، ليل ونهار هى 1.3 مليار دولار معونات عسكرية ومش فلوس .. علشان يبقى همه اللى يتحكموا فى سِلاحِنا ، وقُوتَنا ، وعارفين كويس قوى إيه اللي عَندِنا .. ونِقاط ضَعْفِنا وقوَتِنا .. وبيدفعوا كمان 815 مليون دولار معونات إقتصادية بَرضُه بَعْضَها سلع ومنتجات .. وبيتخصم منها المِنَح اللي بيدفعُوها لِمُنظمَات المُجتمع المَدنى الغير حكومية ..

إيه القرّف ده ؟ إيه الذُل والمَهَانَة اللي إحنا فيها دي !!

مُبَارك وعِصَابَته خلّونا لُقمَة سهلة وطَرية للى يسَوَى .. واللي مايسْوَاش !!

ولَو مَاحَررنَاش أنفسْنَا من الوَحْل اللي إحنا فِيه ده .. يبْقَى المَوت أهْوَن علينا كُلنا !!

(( مَنْ لايَملُك خُبْزَه .. لايَمْلُك حُرِيّتَه ))

*****