شيخ المعهد بيهددنى علشان اغشش

[عاطفا]

شيخ المعهد بيهددنى علشان اغشش وبيقولى لو ماتعاونتش معايا انا هديلك تقرير جيد جدا و احرمك من الحافز وعاوزنى ادى درجات اعمال سنه للطلاب اللى ماجوش طول الترم الاول وانا ضميرى غير راضى تماما وعملت معاه مشكله قولولى اعمل ايه؟

[mohameddiaa20122]

والله يا اخي الفاضل كلنا نعاني من نفس المشكلة اصبح الغش حق مكتسب لا نستطيع ايقافه,
اسال الله ان يصلح التعليم في مصر عامة والازهر خاصة.

[mr.ahmed mostafa]

يا باشا ميقدرش يديلك اقل من التقدير السابق إلا في حالة حصولك علي جزاء و إن عمل زي مابيقول إشتكيه في النيابه الإداريه

[عاطفا]

انا مثبت جديد وماكناش بناخد تقارير

[Observer]

كده هو بيحاول يكسر شوكتك ويدخلك الحظيرة مع باقى الزملاء الغشاشين، وده اول اختبار حقيقى بعد التثبيت يا اما تنجح فيه وتحتفظ بشخصيتك ومبادئك وقيمك يا اما تكون احد افراد القطيع. المهمة مش سهلة يا زميل!

[ابوعرابى75]

اكتب مذكرة للمنطقة ومكتب شيخ الازهر وهات شهود من زملاوئك على ذلك وان لم يوجد خليه يحلف اليمين ان ده ما حصلش علشان يبقى عبرة لغيره من المشايخ وما يهمكش خليك على موقفك ما يقدرش يعملك حاجة ولا يؤذيك

[أزهرى وأفتخر]

الكل بيتكلم عن الغش
وحرام ومش حرام
طيب الاول حضرتك وزملائك فى ايام الدراسه بتلتزموا بالدراسه والتلاميذ اللى فى المعهد
اشك فى ذلك
لان لو كل واحد عنده ضمير وبيعمل اللى عليه
ولا تلميذ هيحتاج للغش
وهيعتمد على نفسه
لكن للاسف كل واحد عامل لى فيها عنده ضمير وبيشتغل نفسه
وهو للاسف معندوش ريحة الضمير
ملحوظه :: الكلام دا مش موجه لحد معين
الكلام موجه للكل وانا اول الموجه اليه هذا الكلام
تانى حاجه ياريت الكل يعمل اللى عليه وبعدها اتكلموا عن الغش انه حرام وشكرا لحضراتكم

[Observer]

هتكلم عن نفسى فقط
انا بعمل اللى يمليه عليا ضميرى واعلم ان الله يراقبنى
واعلم جيدا ان اى تقصير فى العمل معناه انى باكل حرام والعياذ بالله
بشرح بضمير
بحاول توصيل المعلومة بشتى السبل
بصور ورق وامتحانات على حسابى وبوزعه على الطلبة
تقريبا مفيش طالب فى الفصل بيحضر من غير كتبه والكشكول وكل شئ
ده غير المسابقات اللى بعملها بين الفصول لرفع المستوى وبث الحماسة بين الطلاب
وبدور دايما على جوانب القصور وبحاول اصلحها سواء فيا او فى التلاميذ
وفى نفس الوقت بحارب الغش بشدة
وبحتقر اى حد بيغشش من قلبى وابغضه فى الله
ــــــــــــــــــــــــــــــــــــــــــــــــــ ـــــــــــــــــــــــــــــــــــــــــ
واكتر شئ بيحزننى لما اشوف واحد خبيث بيهد كل اللى عملته وبنيته طول السنة فى نص ساعة
وفاكر نفسه بيخدم الطلبة واولياء الامور وهو فى الحقيقة بيغطى فشله وخيبته القوية
وعلى فكرة معظم او كل اللى بيمنعوا الغش وبيحاربوه ده لانهم تعبوا واشتغلوا بجد طول السنة
اما اللى بيغشش فده العكس بيبقى مرعوب وخايف وحاسس انه مذنب وخايف من الفضيحة
وعلى راسه بطحة (اسف على اللفظ) وبيحاول يدارى عجزه وفشله فى ستارة الغش
عشان تطلع النتيجة تمام ويا دار ما دخلك شر وتستمر المهزلة
وفى نفس الوقت نفضل نشتم فى الازهر وفى اللى بوظوه واحنا فى الحقيقة اللى خربناه بجهلنا
ــــــــــــــــــــــــــــــــــــــــــــــــــ ـــــــــــــــــــــــــــــــــــــــــ
ياريت قبل ما نتهم الناس بالباطل ندور على عيوبنا ونحاول نصلحها
لان الطالب اول واحد بيتريق عليه بعد ما يطلع من اللجنة هو اللى كان بيغششه
وبعينى شفت الدعاء عليهم والحسبنة عليهم مش من طلبة شطار ولكن من طلبة مستواها ضايع بجد
وده بعد ما فشلوا فى كلياتهم وقعدوا فى البيت
وانا كمان بقول حسبى الله ونعم الوكيل فى كل من غشش حرف فى الامتحان
حسبى الله فى كل شيطان خبيث يتلف الزرع الاخضر ويخرب العقول
حسبى الله ونعم الوكيل

وكلامى عام مش موجه لحد

[حازم محمد اسماعيل محمد]

حسبى الله ونعم الوكيل انا مدرس تربية رياضية وممكن اضربة لو طول معايا

[mfakhrdeen]

على فكره كل شيوخ المعاهد كده الا ما ندر
وده لان الناس دى اللى هما فى الاصل مدرسين عربى وشرعى يعنى حاصل على 50 % فى الثانويه ومش بمجهوده كمان دول بالغش يعنى كان اصلا هيخش دبلوم زراعه عرفت بيقوللك كده ليه يا محترم؟؟؟؟؟؟؟؟؟؟؟؟؟؟؟؟؟؟؟؟؟؟
ربنا ينجينا منهم انا فى معهدى نفس الطاقم اللى موجود فى كل معهد
اشتغل وادى عملك وخلاص

[a7medmath]

يجماعة الخير ياذن قادم على ايدينا
فلنتق الله اولا فى عملنا وتعطى الطالب حقه ثم تأخذ حقك بعدم الغش او المساعدة
والاخ صاحب المشاركة تمسك بالمبادء التى انت عليها
باذن الله سيكون الله عونا لك

[عاطفا]

اولا اشكر جميع الذين شاركوا فى هذا النقاش سواء اللى انتقدونى او اللى نصحونى
ثانيا احب ان اوضح شىء للجميع اننى والحمد لله اقوم بعملى بما يرضى الله ورسوله ثم يرضى ضميرى لأننى اخشى واخاف من ان يدخل بيتى اى قرش حرام حتى اننى لم اتغيب عن المدرسه طوال الفصل الدراسى الاول الا يومان واصريت ان اعملهم عارضه بالرغم ان شيخ المعهد طلب منى ان امضيهم
ثالثا هناك تطور فى مشكلتى حدثت معى بالامس وهى اننى رفضت ان اعطى اى درجه من اعمال السنه للطلاب الذين لم يحضروا طوال الفصل الدراسى الاول وهم يتعدوا نصف عدد الطلاب فوجدت معارضه شديده من شيخ المعهد واخبرت مدير الاداره فى ذلك فقال لى معك حق وعلمت انه تمت مشاده بين شيخ المعهد واحد الموجهين الشرفاء عندما رأنى اخبر مدير الاداره بمشكلتى وغضب عليه الموجه غضبا شديدا لأن شيخ المعهد كان بيتكلم بصوت عالى ولكن شيخ المعهد اخذ يعتذر للموجه و جاءنى الموجه والكثير من الزملاء المحترمين والذين اثق فيهم و قالوا لى بأننى على حق ولكن عدى موضوع اعمال السنه ولا تغشش وانهم توسطوا مع شيخ المعهد واتفقوا معه على ذلك و انه لن يضرنى فى اى شىء ووافقت على ان انجح الطلاب فى اعمال السنه على مضض ولا اقوم بالغش وهكذا انتهت هذه المشكله بسلام على الغم من عدم رضائى التام على موضوع اعمال السنه
رابعا واخيرا اقول لكل زملائ(من يتقى الله يجعل له مخرجا ويرزقه من حيث لا يحتسب ) فلا تعتقدوا ان الارزاق بيد العباد ولكنها بيد الله وحده واجعلوا تكالكم على الله واسف جدا على الاطاله عليكم

[BORHAN]

اخى حاول على قدر الامكان الاصلاح لانى وجد بالفعل مدرسين على قدر المسئولية بمنعون الغش قى معهد دسوق مع وجود بغض المدرسين ماشين بمبدا الامبالاة و شكرا

[مستر/ عبدالكريم على]

المشاركة الأصلية كتبت بواسطة أ/مصطفى محمود

للاخ صاحب المشاركة

تقول لشيخ معهدك هذه العبارة أمام زملائك ولا تزد عليها.
ّ أن الكراسي والمناصب زائلة و أنه لن ينفع الانسان في قبره الا عمله الصالح ، وبالتالي أشهد الله و اشهد زملائي أنني غير راض على ما أقوم به ، و أنني ما قمت بهذا الا رغبة منك وبالتالي انت مسؤول أمام الله على ما اقوم به من هذا العمل ، والله خير الشاهدين "

ولتتركه يفكر في المقوله ، عسى ان ترتد اليه بصيرته ، وبصيرة زملائك
ولا تفكر كثيرا في هذا الامر لكن ثق بأن الخير قادم على ايدي الشباب الواعي و الذين سيصبحون قادة الازهر و ستكون انت من هؤلاء بإذن الله وحينها سيكون الازهر بفضل الله افضل كثيرا كثيرا كثيرا مما كان
واستمر على ما انت عليه
الف تحية

يا استاذ مطفى ازاى تقول كده احنا بندم جيل باكمله حام عليك احنا عاوزين بعد الثورة الاجيال تطلع صح



يا استاذ عاطف قدامك حلول كتير واياك تتنازل لانى الغش حرام بالاجماع


قدامك تعمل مذكرة تبعتها بالفاكس لديوان الظالم ومدير مكتب شيخ الازهر وئيس قطاع المعاهد الازهرية

ولمدير المنطقة والله الازهرية بيخافوا لما يعرفوا انى انت ليك انياب ومخالب وهيحترموك ومحدش يدوس لك على طرف

لو عاوز اى مساعدة اى صيغة اى ارقام تليفونات او فاكسات انا معاك

[ابوعرابى75]

المشاركة الأصلية كتبت بواسطة أزهرى وأفتخر

الكل بيتكلم عن الغش
وحرام ومش حرام
طيب الاول حضرتك وزملائك فى ايام الدراسه بتلتزموا بالدراسه والتلاميذ اللى فى المعهد
اشك فى ذلك
لان لو كل واحد عنده ضمير وبيعمل اللى عليه
ولا تلميذ هيحتاج للغش
وهيعتمد على نفسه
لكن للاسف كل واحد عامل لى فيها عنده ضمير وبيشتغل نفسه
وهو للاسف معندوش ريحة الضمير
ملحوظه :: الكلام دا مش موجه لحد معين
الكلام موجه للكل وانا اول الموجه اليه هذا الكلام
تانى حاجه ياريت الكل يعمل اللى عليه وبعدها اتكلموا عن الغش انه حرام وشكرا لحضراتكم

لو منعنا الغش هينتهى الاهمال والتسيب فى المعاهد لان المشكلة ان الطالب وولى الامر مش بيدورا على حقهم لان الطالب بينجح والمدرس المقصر محدش بيحاسبه لان النتيجة بتطلع 100% بسبب الغش فلما نمنع الغش كل طالب هيذاكر ويهتم بالدراسة والمنهج وكل معلم مقصر هيلتزم