إخواتك عايزين يضربوا أبوك والجيران واقفة تتفرج تعمل إيه؟

Observer · #1 23-12-2011, 02:55 PM

اللى حصل إن أبويا فى لحظة غضب وانفعال زعق فى وش أختى الصغيرة وضربها ضربتين فالبت زعلت وفضلت تشتم وتزعق فيه وهو ساكت، بعد كدة حس بغلطه وقالها متزعليش يا بنتى أنا آسف سامحينى، طلعوا اخواتى من أوضهم وراسهم وألف جزمة قديمة انهم يضربوا الراجل ويطردوه برة البيت عشان موقف أختى الصغيرة وبحجة أنه اصبح شيطان بيضرب ويشتم ومش بيتفاهم

- ياجماعة دا أبونا
- يقولوا لازم يمشى
- الناس بتتفرج علينا
- ملناش دعوة لازم يمشى
- طب الجيران واقفين عالباب وسامعين أسرارنا مينفعش كدة
- برضه مفيش فايدة لازم يطلع بره البيت دلوقت
- طب لما نطرده بره البيت مين هيبقى كبيرنا هنتحامى فى مين وهنسمع كلام مين
- ملناش دعوة يمشى وبعدين نتفاهم
- يا جماعة الراجل كدة كدة مسافر بعد شهر وهيسبلنا البيت كله نعمل فيه كل اللى عايزينه ايه لازمة اللى بتعملوه ده
- يطلع برة البيت دلوقت
- يا اخوانا الراجل ده هو اللى حامينا دلوقت وبيدافع عنا من بعض جيران السوء ولو طردناه دلوقت تبقى فرصة عمرهم عشان يشفوا غليلهم فينا خصوصاً إن احنا فى فترة امتحانات ومش مستعدين نسيب المذاكرة لحظة واحدة عشان ندافع ونتفاهم مع الناس دى، يعنى نخلص امتحاناتنا ونتخرج، وطبيعى ان احنا هنمسك البيت بعد كدة وتبقى لينا السيطرة الكاملة عليه
- لا لازم يمشى الراجل الـ ............ ده !!

المشكلة ان الحوار ده كله كان أمام الأب وباب البيت كان اتفتح واحنا بنتخانق واحنا مش حاسين والجيران عمالة تتفرج والمفاجأة ان اعمامى وخلانى كانوا واقفين معاهم بيتفرجوا عالخناقة وهما مستمتعين ومستنيين يشوفوا الموضوع هيخلص ازاى، الموقف كان صعب عليا وجراءة إخواتى على الأب وقلة أدبهم عليه عملى صدمة وخلانى مش قادر أفكر....