ماهى افضل طريقه

[engi11]

ما هى افضل طريقه للمزاكره انا فى الصف الثانى الثانوى وعايزه اجيب مجموع انا علمى اخترت كيمياء
ونفسى فى صيدله
ولاتنسونى بالدعاء لى ومن مثلى

[Heartbeat]

أولا:ربنا يوفقك وتجيبى مجموع عالى وتدخلى صيدلة

بالنسبة لافضل طريقة للمذاكرة..

اهم شئ هو انك تعملى لنفسك جدول ممكن يكون كل اسبوع اوحتى كل يومين
بس المهم يكون فيه خطة تمشى عليهاا
لانك لو سبتيها كدا من غير جدول هتحسى انك مش وراكى حاجة والدنيا طراوة

عملتى الجدول مع مراعاة مواعيد دروسك وعدد ساعات نومك ومواعيد المدرسة
اعتقد مش بتروحى المدرسة كل يوم
وكمان كام ساعة اكل بس مش كتير يعنى

بصى بقا طبعا افضل وقت للمذاكرة هو وقت الفجر
الكلام دا لو انتى اجازة ومفيش مدرسة
الوقت دا بيبقا طويل وجميل جداا

ابدأى يومك بقراءة ورد من القراّن خصصيه لنفسك
وبعدين دعاء المذاكرة ((عارفاه اكيد))
وتبدأى بدعاء تجديد النية للمذاكرة

"اللهم اجعل نيتى فى مذاكرتى رضاك ورضا الوالدين ونصرة هذا الدين"

مثلا هتذاكرى فى اليوم مادتين او تلاته
وحاولى مش تذاكرى مادتين علميتين ورا بعض
يعنى لو ذاكرتى كيميا بعدها ممكن انجلش
رياضة مثلا وبعدها عربى
وطبعا مش تذاكرى انجلش وفرنساوى او ايا كانت اللغة التانية ورا بعض
لان كدا الدنيا هتسيح ع بعض
..
كمان فيه حاجة..
لو انتى مثلا عندك درس وخلصتى اول ما ترجعى تذاكرى المادة اللى خدتيهاا
او حتى ع الاقل تقريها سريعا
علشان يثبت فى ذهنك الشرح
يعنى مش تركنيها قبل الحصة اللى بعدها
لان المذاكرة اول باول هتوفر عليكى مجهود كبير ووقت كمان
تيجى بقا قبل المادة دى بساعة ونص مثلا تراجعى اللى ذاكرتيه هتلاقى الموضوع سهل مش هياخد ساعة
ولو تحبى تحلى عليهاا لو فضل وقت يكون احسن علشان يثبت اللى ذاكرتيه
..
بصى دا اللى على بالى حالياا بس لو عندك اى اسئلة اتفضلى

اه فيه كمان حاجة..

طبعا مش ينفع طول الوقت مذاكرة بدون ترفيه
دا حتى الواحد يتخنق من المذاكرة
انتى بتذاكرى حسيتى انك مخنوقة ودا العادى
ممكن تقومى تتفرجى ع برنامج لذيذ او فيلم كارتون
اهو يرجعك لايام الطفولة وينسيكى شوية هم الثانوية
بس مش تسرحى وتقعدى طول اليوم ع التليفزيون

ياريت كمان متدخليش النت خالص خليها تليفزيون ولعب مع اخواتك

..
يارب اكون قدرت افيدك ولو بسيط
وان شاء الله اعضاء تانية يدخلوا يفيدوكى
بس الموضوع مكانه اجتماعيات طالب

ولو احتاجتى اى حاجة انجى اتفضلى



..

[engi11]

بجد شكرااا جدا جدا على الرد العظيم

[" محمد "]

....................