طلب صغنوووووووووووووون

[طالبة تربية]

السلام عليكم ورحمة الله وبركاته
معلش ممكن اطلب طلب؟؟
انا طالبة في كلية تربية وداخلة تالتة يعني عندي تربية عملي السنة ديه
وبصراحة محتارة اول حصة هبدأها ازاي؟؟؟
وهشرح ازاي؟؟؟؟
وخايفة جدا بالرغم اني بحب التدريس جدا
ممكن ترفعوا طريقة شرح مثلا فيديو على اساس اني احاول اعمل زيها مبدئيا وياريت تفيدوني ازاي ابدأ اول حصة تربية عملي؟؟

[Mr...Ahmed]

مقولتيش حتبقى مدرسة ابتدائى ولا اعدادى ...ف كلتا الحالتين الموضوع سهل وعادى جدا ما تخوفيش نفسك من حاجة الموضوع من ناحية الشرح بسيط وحيمشى بسلاسة بس اهم حاجة هى السيطـــــــــــــــــــرة ع الفصل عشان العيال بتاعة الابتدائى مش بتبطل لكلك لو عينك غفلت عنهم لحظة ممكن يقلبوا الفصل سيرك وبتوع الاعدادى لازم يتشدوا من البداية خوفيهم واعمليلهم عصف ذهنى عشان تشديهم للمادة وابدئى بحاجة سهلة انتى متمكنة منها وربنا يوفقك

[miss_ganah]

كلام مستر أحمد مفيد جدا
بس عايزة اقولك كمان متحطيش آمال كبيرة على الحصص الأولى .. انا نفسى اما بفتكر الحصص الاولى بضحك كتير بس الانسان بيتعلم كل حصة عن اللى قبلها .. حتى بعد الشغل .. فمحدش منتظر منك كتير . المفروض انتى فى وضع متدرب ، يعنى انتى فى الاساس رايحة علشان تغلطى و تتعلمى من أخطاءك و تتفاديها .. متهربيش من دخول الحصص بالعكس فى الاخر كتر دخول الفصول بيقلل عندك جدا رهبه الموقف

اول ما تدخلى الفصل ما تتكلميش خااااااااالص بس بصى فى كل انحاء الفصل مش فى جهة واحدة لغاية ما تحسى ان مفيش اى صوت بدون اى تعبير على وشك اول ما يسكتوا خالص قوليلهم ازيكوا يا سنة ... انا مس .....و ان شاء الله هدخلكم كل يوم وليكن خميس و هناخد مادة كذا يلا طلعوا الادوات و اكتبوا ورايا

اهم حاجة يمكن الموجه بيبص عليها التاريخ و العنوان و اما تيجى تكتبى تقفى بميل بحيث الطلاب يقدروا يشوفوا اللى مكتوب .. و اربطى المعلومات الجديدة بحاجات سهلة هم اصلا عارفينها علشان يكونوا متجاوبين معاكى و قدمى درس سهل مش شرط يكون معقد يعنى و لو شرحتى قواعد حطى عليها تمرينات سهلة جدا علشان الطالب معنوياته ترتفع و يحس انه فهم الموضوع عن ايه و بعدين صعبى الاسئلة بالتدريج و انتى بتشرحى تخلى نظرك يدور فى الفصل كله متبصيش مثلا للى بيجاوب معاكى بس لا اجذبى الكل

و ربنا يوفقك