خبر سار للمعلمين المساعدين بالقاهرة " الحمد لله "

[إسماعيل قناوى]

أتصلت بى زميلة تعمل معلم مساعد ويعمل أخوها بوظيفة إدارية فى وزارة التربية والتعليم بالقاهرة ( بالعقد ) وأخبرتنى أن الوزارة سوف تبدأ بتعيين موظفى العقود بالوزارة الذين مضى على شغلهم وظائفهم 3 سنوات على درجات فعلية وليست وهمية وذلك خلال أسبوعين أما بالنسبة للمعلمين المساعدين فسوف يتم أرسال القرار التنفيذى موجه من المديرية التعليمية للإدارات يوم الثلاثاء القادم إن شاء الله تعالى لاتخاذ اللازم من اجراءات بشأن البدء فى تعيين المعلم المساعد على الدرجة الثالثة التخصصية وألف مبروك للزملاء.

ملحوظة 1 : الدرجات فعلية غير وهمية يعنى لينا الحق فى الأجازة بدون مرتب و السفر وغير ذلك من امتيازات

ملحوظة2 : << خاص بإدارة عين شمس >>

لن يتم العمل فى موضوع الزيادة المقررة بنسبة 75% هذا الشهر نظرا لانهالم يتم العمل فيها حتى الان وسيتم صرف المرتبات هذا الشهر بدون زيادة على أن يتم صرفها الشهر التالى بأثر رجعى ( ده كلام موظفى الحسابات بالإدارة للأسف).

عموما: النشرة بتاعة الصرف موجودة فى الادارة وعايزة صبر عقبال ما الناس الموظفين اللى واخدين اجازات يرجعوا يشتغلوا و ينتظموا والله الموفق.

[marwa elminia]

خبر سعيد جدا والف مبروك لكل المعلمين المساعدين

[marwa elminia]

بس حضرتك تقصد اى معلمين مساعدين اللى امتحنوه الكادر 1/4 ولا اللى لسه مامتحنوش الكادر

[إسماعيل قناوى]

أهم حاجة عرفتها أن الدرجات فعلية مش وهمية سواء للمعلم المساعد أو عقود الوزارة وقد يعود ذلك للترقية التى وصلت للمعلمين الموجودين بالدرجة الثالثة وتحويلهم للثانية كما حدث مع معلمين كثيرين فى مدرستى و تم بذلك توفير درجات والحمد لله.

[مى الامورة]

يعنى حضرتك وضح اللى امتحنوا ولا لا

[Amr 82]

طيب احنا هنعرف ازاى على درجه حقيقية مش وهميه لانها كلها عقود بدون درجه اصلا سواء مميز او عادى

[أحمد على فارس]

خبر جميل بس المهم التنفيذ الفعلى وتقبض فلوس بإيدك
شبعنا كلام ووعود

[misdodo]

يارب يكون الخبر ده اكيد فعلا بس بالنسه للدرجات الماليه احنا مش عارفين هى نزلت فعلا للناس اللى تعينوا فى 1/3 لما هتنزل لينا ده غير مؤكد مع ان بتمنى تنزل مع التعين
اما بالنسبه لنسبه ال75% انا عندى السكرتير قال انه عمل الكشوف خلاص وعملنا الفرق بتاع شهر 7 و8 بس لسه ماخدناش حاجه وقال ان مرتب شهر 9 هيكون 525 مش عارفه بقى ده معنه ايه

[nnoorrmm]

طيب اللي ما دخلوا امتحان الكادر ايش مسيرهم في التعيين ( تعاقد بتاريخ 12/8/2008)

ولكم جزيل الشكر والتقدير ( بس انا من محافظة شمال سيناء )

[meslmat]

مصر مصر
مصر مصر

[كريم222]

المعينين بالقرار 53 فى 1/3 الدرجات المالية لهم وهمية وغير حقيقية بالمرة وانا اتاكدت من كدا بنفسى عندما ذهبت للادراة عشان اخد مفردات مرتب علشان اجيب قرض من احد البنوك قالى الموظف ان درجاتنا وهمية وليست فعلية مش اكتر من حبر على ورق اللهم الهمنا الصبرررررررررررررررررررررررررررررررر

[Amr 82]

الدرجات بتختلف من محافظه لى محافظه بمعنى ممكن تلاقى معلم على درجه فى محافظه ومعلم ليس على درجه فى اخرى

[إسماعيل قناوى]

بصراحة كمية التعيينات اللى الدولة منحتها الفترة السابقة غير معقولة ولا تتم حتى فى أمريكا تلك الدولة المتقدمة وهى بذلك أشبه بالبطالة المقنعة من أين للدولة بكل هذه الدرجات الخالية فى حين كانت حكومات نظيف بتقطر علينا ومش موريانا الا الوش الخشب و سلبية درويش وعدم تقديمه حتى وعود .

بس والله الناس اللى وصلتلى الخبر مش بتاعة اشاعات خالص لانها فى أماكن مؤثرة ومش هترمى كلام وخلاص وربنا ييسر يا جماعة وكما قال الرسول الكريم بشروا ولا تنفروا والسلام.

[0109089014]

الحمد لله وانشاء الله ربنا هيكرمنا كمان وكمان علشان احنا تعبنا وربنا ما بيضيعش حق من احسن عملا ، وشكرا علي الخبر السار

[إسماعيل قناوى]

إن شاء الله ربنا ييسر و نبدأ الاجراءات الخاصة بالتعيين فكل من يتصل بى يؤكد ما قلته سالفا و الله إنى لأعلم أن الله لن يضيع من أحسن عملا ولا أجد من هو فى مصر الان يستحق التعيين قبلنا لاننا امتحنا كتير قوى وتعبنا كتير ولازم بعد كده نشوف خير والله المستعان.