الحقوووووووووونى بسرعة

[d00ry]

اخش كلية علوم ولا لا ؟؟
كله عمال يقول انها مش ليها مستقبل
و بيقولوا انها صعبة و اصعب من البشرى وان منهج الثانوى ده مايجيش واحد على عشرة من اللى بيتاخد فى علوم وانها كلية المظلومين بتوع الثانوية العامة
و بيقولوا انها قطم وسط ع الفاضى و هتعب اربع سن و مش هلاقى حاجة فى الاخر
و بيقولولى ان مفيش حد هيفتح معمل تحاليل من علوم بعد كده عشان ده هيبقى تبع طب بشرى
انا بجد حاسة انى هعيط
خلاص التنسيق كمان يومين و مش عارفة اعمل ايه ؟؟
لحد دلوقتى مش اخترت كلية و بجد ناس كتير قوى بيقولولى استسهلى وخشى اى كلية سهلة و خلاص و انا بقيت مشتتة و مش عارفة اعمل ايه

[scrubs]

لو سمحتى اهدى شوية

واقرأى كلامى وبعدين ردى عليا

مفيش شك ان 98% من اللى داخلين علوم هيدخلوها نظرا لظروف خارجه عن ارادتهم اللى كان نفسه فى طب او صيدلة واللى كان نفسه فى هندسة او حاسبات ومعلومات كـــــــــل الشريحة ديه هتخش علوم وفى منهم اللى هيخش خاص
انا شايف ان كلية علوم من اعلى الكليات كقيمة علمية وده مش مجرد كلام ده واقع
بس النقطة ان الكل بيقول عليها صعبة ...... مفيش شىء اسمه صعب انت هتخش الكلية هتجتهد وتذاكر وتدى الكلية حقها ربنا هيكرمك وتطلع بتقدير كويس ولازم نكون عارفين ان التقدير مهم جدا ..... هتخش ارفان ومخنوق ومش عايز تذاكر وعمال بينك وبين نفسك تقول ياااااااااه بقى اخرتها علــــوم سدأنى هتفضل محلك سر وهيبقى هو ده بداية طريق الفشل ..........الكلية فيها اقسام كتيير ومليانة تخصصات بلهبل وهيبقى عندك فرصة سنة كاملة تتعرف عليهم كلهم........

تعالوا بقى لنقطة مهمه جداً.....اللى هى الشغل ...... ديه بقى بأيد ربنا .... بس فى اسباب لازم تاخد بيها وتعمل اللى عليك خريج علوم راجل عنده من القدرة على الاستيعاب والفهم والتعلم كبيرة جدا نظراً لكمية العلم اللى درسه فى الكلية (كماً وكيفاً)عشان كده تلاقى خريج كلية علوم يقدر يشتغل اكثر من وظيفة وفى اكتر من تخصص غير بتاع هندسة قسم مدنى مثلا فده راجل هيشتغل مدنى بس اما انت يا خريج علوم ادامك مجالات كتير جدا على حسب قسمك فده ميزة كبيرة جدا الناس مش واخده بالها منها

انت هتبقى انسان مرن تقدر تتكيف وتتأقلم على حسب السوق ... وده لأنك خريج كلية علوم فهتلاقى خريج علوم ممكن يتشغل فى مجال الصيدلى او الدكتور او مهندس البترول وفى شركات البناء والتشييد وفى المصانع ومجالات لا حصر لها .........

بس انت لازم تحب الكلية وتبقى من جواك مقتنع انت داخل بحر من العلوم وانك انسان محظوظ جداً لأنك هتاخد تعليم مميز الى حد ما عن اى كلية تانية فى مصر كلها ...... بعد سنة اولى اختار تخصص تكون ميال ليه وحاول على قد ما تقدر انك تجيب تقدير... ويا سلام لو تبطل كسل بعد ما تتخرج وقدم على دراسات عليا وخد ماجيستر فى خلال سنتين ......
يعنى هيكون عندك 24 سنة ومعاك ماجيستر فى تخصصك ... زائد الخبرة اللى هتاخدها من الشغل حتى لو اشتغلت شغل صغير فى الاول المهم انك تشتغل وتشوف وتحتك بالسوق

خليك انسان مؤمن بالله وعندك ثقة فى نفسك وقدر قيمة الحاجة فى ايدك ,,,, بأذن الله ربنا هيكرمك

[d00ry]

و الله انا ليا طموحات كتيرة فى الكلية دى بس اللى حواليا بيقولولى استسهل و بيقولولى ان سنتين ثانوية عامة خلونى تعبت جامد فما بالى ب4 يعنى هيبقوا سته ورا بعض
و انا والله تعبت

[كيميائي طبي2011]

المشاركة الأصلية كتبت بواسطة d00ry

و الله انا ليا طموحات كتيرة فى الكلية دى بس اللى حواليا بيقولولى استسهل و بيقولولى ان سنتين ثانوية عامة خلونى تعبت جامد فما بالى ب4 يعنى هيبقوا سته ورا بعض
و انا والله تعبت

شوفي انتي بتحبي ايه ونفسك في اية وادخلية وكلية علوم كلية كويسه
انا بقلك افضل من البيطري وناس كتير بتحول من بيطري لعلوم

[scrubs]

المشاركة الأصلية كتبت بواسطة d00ry

و الله انا ليا طموحات كتيرة فى الكلية دى بس اللى حواليا بيقولولى استسهل و بيقولولى ان سنتين ثانوية عامة خلونى تعبت جامد فما بالى ب4 يعنى هيبقوا سته ورا بعض
و انا والله تعبت

والله كلنا تعبانين بس ما ادام ليكى طموحات اوعى تتخلى عنها ولازم تتعبى عشان تلاقى

المفروض انك تبقى فخورة بالكلية بتاعتك

اما بالنسبة للناس اللى بتقولك صعبة ومش عارف ايه الموضوع كله متعلق بيكى انتى
يعنى انتى الوحيده اللى تقدرى تثبتيلهم العكس ..... وبالتوفيق ليكى ولو فى اى استفسار احنا كلنا موجودين

[d00ry]

المشاركة الأصلية كتبت بواسطة كيميائي طبي2011

شوفي انتي بتحبي ايه ونفسك في اية وادخلية وكلية علوم كلية كويسه
انا بقلك افضل من البيطري وناس كتير بتحول من بيطري لعلوم

هما حتى ياريت الناس دى عاوزانى اخش بيطرى دول بيقولولى تربية و اداب و طفولة و بيقولولى اى حاجة من دول بييجى فيها تقديرات بسهولة و الماجستير بييجى فيها برده بسهولة
مع ان انا بحب الكيميا جدا

[كيميائي طبي2011]

المشاركة الأصلية كتبت بواسطة d00ry

هما حتى ياريت الناس دى عاوزانى اخش بيطرى دول بيقولولى تربية و اداب و طفولة و بيقولولى اى حاجة من دول بييجى فيها تقديرات بسهولة و الماجستير بييجى فيها برده بسهولة
مع ان انا بحب الكيميا جدا

مادام بتحبيها يبقي ادخليها والكيميائي ادامه السكه مفتوجه اينعم بنتنافس من الكليات التانية منافسه شديده جدا لكن انتي ممكن تشتغلي في اي مجال في الكيميا و الكيميا دي واسعه جدااااااااااااا

[scrubs]

من كلامك فهمت ان الناس ديه عايزة اى حاجة سهلة وخلاص بغض النظر عن ميولك انتى وطموحك

على فكره مفيش حاجة سهلة بدون بذل مجهود وهى ديه ُسنة الحياه


انتى ليكى شخصية وكيان واحلام وطموح وادامك اختيارات

تأنى واقرى كتير واوعى تتسرعى واستعينى بالله وبعدين قررى .... وبالتوفيق

[lamis11]

أنا كل اللي أعرفه إن كتير من كليات العلوم والهندسة والطب بتحقد على علوم لإن أخوية في هندسة وهو اللي قاللي كده لإنك بتخلص بعد أربع سنين وبتقدر تشتغل في مجالات مختلفة خاصة لو تقديرك كويس وبعدين متنسيش إن زويل وعلماء كتيييير اتخرجو من الكلية دي صدقيني ربنا بيقدملنا اللي فيه الخير وأنا كمان خايفة والله لإني خلاص تنسيق مرحلة أولى وجالي علوم عين شمس وأنا متوكلة على ربنا يقدمللي اللي فيه الخير

[scrubs]

المشاركة الأصلية كتبت بواسطة lamis11

أنا كل اللي أعرفه إن كتير من كليات العلوم والهندسة والطب بتحقد على علوم لإن أخوية في هندسة وهو اللي قاللي كده لإنك بتخلص بعد أربع سنين وبتقدر تشتغل في مجالات مختلفة خاصة لو تقديرك كويس وبعدين متنسيش إن زويل وعلماء كتيييير اتخرجو من الكلية دي صدقيني ربنا بيقدملنا اللي فيه الخير وأنا كمان خايفة والله لإني خلاص تنسيق مرحلة أولى وجالي علوم عين شمس وأنا متوكلة على ربنا يقدمللي اللي فيه الخير

ربنا يبارك فيكى .... كلامك مظبوط 100 % .... اهم حاجة التوكل على الله والايمان بقدرة ربنا فى تحقيق الخير لينا حتى لو احنا مش عارفين بس اكيد هنعرف بعد كده ان اللى حصل ده هو الخير ... بالتوفيق للجميع

[d00ry]

جزاكم الله خيرا كلكو
و انا خلاص عملت الرغبات وحطيت علوم فى كل المحافظات بس هو احنا لازم نطبع الاستمارة و الايصال ولا ايه؟؟

[Hossam Eldean]

و الله العظيم اللي هيتخصص في حاجة هو بيحبها و الله في سماه لو صعبة و معقدة و رخمة و ملهاش شغل و بتبهدل هتبقي علي قلبة زي العسل و لذيذة.