كيف حصلوا على 205

[حبيب لله]

طبعا احنا شوفنا المجاميع السنادى مرتفعة لكن الغريب ان فيه اكتر من عشر طلاب حصلوا على 205 حتى دون ما ينقصوا فى التعبير ودا اقل شئ .ياريت لو فيه حد عارف كيف حصلوا على هذه الدرجة؟؟!!!يقولنا ويفدنا وخصوصا المدرسين الأفاضل اصحاب الاراء السديدة وخصوصا ان فيه كتير داخل ثانوية عامة وعايز يستفيد

[islamhasan]

توفيق ربنا والاجتهاد(كل واحد بيجتهد بطريقته)

[tweetyy]

هما اكيد كانوا بيذاكروا

[سارة عطالله]

التوفيق من عند الله
والاجتهاد المطلوب من الطالب
ومساعدة المصحح للطالب فى الحصول على الدرجة النهائية

[مناجاةُ النجاةَََِ]

انا اعرف ناس منهم.الصراحة كانوا واثقين من نفسهم والمدرسين كانوا مهتمين بيهم اوي وهما كانوا متفوقين عشان كانوا بيذاكروا جامد وبياخدوا اكتر من مدرس ف المادة_مع ان واحدة جيراني كانت بتذاكر ع طول ـزيهم كداـوبتاخد 3 دروس ف المادة الواحدة او اكتر بس للاسف والله ما حصلت 80%.وكمان المتفوقين دول اهلهم بيشجعوهم بس انا كنت اشوفهم خارجين من الامتحان مكشرين فكنت اقول شكلهم حلو غلط ولا ايه..وف الاخر يطلعو 205 و204،5

[مناجاةُ النجاةَََِ]

بس برضو في ناس بجد مش تستاهل اللي جايباه

[hala azzam]

انا اعرف واحد جايب 204 عارفين الزاي؟ بالغش....مش هقدر اقول اكتر من كده

[مناجاةُ النجاةَََِ]

"من يتوكل علي الله فهو حسبه"انت اتوكل ع ربنا و خليك واثق انه مش هيضيعك وادعيه كتير وطبعا لازم تدي ربنا حقوقه عشان يديك حقوقك وكمان لازم تتقي ربنا عشان يجعل لك مخرجا .وبعدين تعالي ع نفسك وذاكر واتقن المذاكرة عشان ربنا بيحب اللي بيتقن عمله وانت مش وراك غيرها ولو حد كان عايز منك معلومة وانت عارفة قولها وتخبيهاش ...اهم حاجة خلي عندك عزيمة جامدة وهمة وارادة انك تجيب 205وان شاء الله هيديك اللي فيه الخير...وبالتوفيق

[tweetyy]

هما ممكن يكونوا بيركزوا على جانب انهم يذاكروا بفهم اكتر من انهم يحفظوا يعنى مثلا 2 ساعه يفهموا اكتر من 18 ساعه حفظ دا رائي وكمان منظمين وقتهم والله اعلم

[karimadel7]

المشاركة الأصلية كتبت بواسطة hala azzam

انا اعرف واحد جايب 204 عارفين الزاي؟ بالغش....مش هقدر اقول اكتر من كده

مستحيييييييييييل

هو مستواه كان يجيب 96٪ او 97٪. من غير غش
لما غش شويه جاب المجموع ده

انما عايزه تقنعيني ان واحد ضايع يجيب 204 بالغش ده مستحيل

أنا كان معايا ناس في اللجنة غشت جابت 85٪ و كده انما المجاميع ديه ميجباش غير واحد مذاكر اصلا

[karimadel7]

المشاركة الأصلية كتبت بواسطة tweetyy

هما ممكن يكونوا بيركزوا على جانب انهم يذاكروا بفهم اكتر من انهم يحفظوا يعنى مثلا 2 ساعه يفهموا اكتر من 18 ساعه حفظ دا رائي وكمان منظمين وقتهم والله اعلم

أنا هقولك اصل الحكاية كلها

علي فكرة أنا جايب 204 و ليا صحاب جايبين زيي و 204.5

الحكاية زي مقولتي فهم مش حفظ و خلاص

نقطة تانية انهم في مادة زي العربي لو مقفله الورقة كلها من غير هفوة واحدة هتقفلي
لانه عشان ينقصك محتاج يشيل درجة كاملة في التعبير و ده كتير لو موضوعك مظبوط

أنا مثلا كان عندي غلطة صغيرة بنص فقام نقصني نص في التعبير بقت درجة و بعد القسمة اخدت29.5

أنا ليا صاحبي جاب204.5

قفل العربي و النص نقصه في الكيمياء

حاجة مهمة جداً و هي التوفيق من عند ربنا و المصحح

كتير من اللي جابوا204.5 كانوا ممكن يجيبوا 205 مع مصحح تاني و العكس صحيح

اخر نقطة بس ديه مش أساسية بس ساعات بتحصل

ان ممكن طالب شاطر جداً مجهوده الفردي يجيبله 203 مثلا
لو معاه واحد شاطر في اللجنة حتي لو اقل منه ممكن يساعدوا بعض بنقط صغيرة ممكن كان يتلغبط فيها فيقلل كله

*

[sasooo soft]

توفيق من ربنا.............مذاكرة.............تصحيح

[the matrex]

الناس دي جابت 205 عشان هما ذاكروا كويس اه بس الامتحانات كانت سهله أوي والتصحيح كان كوسه

أنا جبت 204.5 والنقص كان بسبب العربي لأني بكره الماده دي أوي ومش بحب أذاكرها

[o.p.i]

طيب يا جماعة حد يفهمنى؟؟؟؟
يعنى ايه توفيق ربنا؟؟؟؟؟؟؟؟؟؟؟؟؟
اقصد ان ممكن واحد يذاكر ويعمل اللى عليه على الاخر وفى الاخر ربنا ميوفقهش؟؟؟ يخليه ينقص ؟؟؟
طيب ربنا هيوزع رزقنا على حسب المذاكرة ولا على حسب مسلم ومسيحى وكافر؟؟؟؟؟
ايه الحاجات اللى ممكن تخلى ربنا ميوفقناش فى الدراسه؟؟؟؟؟
واحد ذاكر وعمل اللى عليه وزياده هل هياخد نصيبه؟؟؟
سؤال بقى للى جايبين مجاميع عاليه ما شاء الله زى الدكتور كريم عادل والدكتورة زاماتريكس
انتوا فى الدراسه كانت بتواجهكوا مشاكل وتبقوا خايفين؟؟
كنتوا بتذاكروا وتمتحنوا وتنقصوا مرة وتجيبوا اللفولمارك مرة تانيه؟؟ تغلطوا كده عادى يعنى
ولا كنتوا واثقين من نفسكوا انكوا 100% و 99.5
يا رييت توضحوا للناس اللى اصغر منكوا كنتوا بتذاكروا ازاى وايه المشاكل اللى واجهتكوا
والكتب اللى كنتوا بتذاكروا منها وكده يعنى
حتى لو موضوع غير ده
ومبروووووووووووك لكل المتفوقين

[the matrex]

طول السنه بكاء وعويل وكوابيس مرعبه وخوف وقلق ولكن الثقه مطلوبه في لحظه دخولك اللجنه فقط وطول السنه فكر في حاجه واحده "لازم أشد حيلي عن كدا ". أما بالنسبه للامتحانات في الدروس بفرح لما أغلط عشان أخد معلومه جديده .
وكل اللي بيذاكر من أول السنه لاخر يوم فيها ربنا هيكرمه" ان الله لا يضيع أجر من أحسن عملا" مهما كانت ديانته