حقــا .. بدأت أسخط على أنظمة التعليم ببلادى

[Mai Yasser]

سلام عليكم

اولا انا طالبة فى 2 ثانوى
زى اى حد نفسى احصد ثمرة تعبى طول السنة
واحقق طموحى

بس فعلا بدأ اليأس يتملكنى
بدأت أشك ان اى حلم فى بلدى ممكن احققه
دى سلبية وانا اعترف
بس مصدرها مش راسخ جوايا وماتخلقتش بيها
بل ان هى اللى اوجدت نفسها فى كيانى

معظمنا كطلبة ثانوى بيشتغل جامد من اول السنة
بييجى على نفسه كتير ويقاوم حاجات بيحبها
ومش مستنى مقابل غير ان تعبه مايروحش عالفاضى
غير انه يحل كويس فى الامتحانات مهما كانت صعوبتها
وياسلام لو لقى نفسه من الاوائل يبقى الحلم المثالى
وماهوش مستحيل عاللى بيتعب

لكن بعد نظام الامتحانات الفاشل دا
أكاد أشك أن تعبى كله ضاع هبــــاء

امتحاناتنا ياجماعة رغم تفاهتها الا انها خادعة
المفروض ان دى مرحلة تحديد مصير
والامتحان يقيس القدرات العقلية
بس فين ؟

للاسف اللى بيحط الامتحان من الواضح انه غير ملم بالمنهج
وبالأسئلة اللى عليه وتناسبه
مايعرفش الطلبة تعبانين فى ايه طول السنه وبيذاكروه
بيعمد الى الاشياء عديمة الاهمية والفائدة
بل واحيانا اشياء لم ندرسها واكبر دليل امتحان ال English

احنا وان اثبتنا اننا شعب قوى بالثورة اللى رحلنا بيها رئيس دولة
لسه مش قادرين نثبت لنفسنا اننا شعب العلم
وان بلدنا منارة الثقافة والتعليم

بصراحة بعد ان كان املى فى الاصلاح زاد
دلوقتى يكاد ينعدم

ده طبعا فضلا عن المناهج فى حد ذاتها
واللى زى مابيقولوا - حشو دماغ -
وليس منها فائدة فى الحياة العملية
وليس بشئ خفى ان الطالب بينساها بمجرد خروجه من لجنة الامتحان

وكمان نظام التصحيح
فى اسئلة خبيثة تجعل الطالب يذهب فى فهمها كل مذهب
وتختلف اجابتها حسب فهم الطالب لان السؤال يحتمل ان يكون على اكثر من موقف
ورغم كدا نموذج الاجابة لا يحتوى سوى على اجابة واحدة !

أى عقل يحتمل هذا !!

يدفعنى يأسى انى ماحضرش الامتحانات الجاية
ولكنى بقاوم الشيطان الرجيم
واقول اصبر على نفسى شوية ونتيجتى هتثبت صحة او خطأ أفكارى

مش هطول فى كلامى
ولكن لكم ان تتصوروا شخص يرى احلامه تتساقط واحدة تلو الاخرى وعلى مرأى منه ومسمع
فما يكون حاله !!!

[Asa7be Wawa]

الثوره قامت علشان تغير النظام السياسى و تغير نظام التعليم لسه مجاش الدور عليه لكن قريب اوى ان شاء الله

خلى بالك انك لسه فى نظام التعلم القديم لسه مفيش اى حاجه جديده و للأسف بتوقع ان التعليم حيفضل كده مده

لغايه لما يتغير نظام التعليم كله او بالأدق تحصل ثوره فى التعليم

[طالبة المعالى]

ربنا يوفقك وتحققى حلمك والمهم ان اللى يكتبه الله لنا نرضى به

[عاشقه الاقصى2]

السلام عليكم
انا طالبه ثانويه عامه زيك برده فى تانيه
وتقريبا نفس الياس
ولكن
ان كانت المناهج اللى علينا حشو دماغ فللنظر الى التغيير
فى المناهج اللى الجيه مش حشو دماغ
اما ان الواحد ينسى المناهج اللى اخدها
فعفوا
هذا خطا من الطالب
انا مش فاكره ابدا انى لما كنت بذاكر
كنت بذاكر علشان الامتحان
لكن كنت بذاكر للاستفاده
لانى لو ذاكرت للامتحان كانت كل حاجه هضيع
اما الامتحانات ومستواياتها فهنعمل ايه يعنى
اهم حاجه بتحلى كويس وده هيقربك من حلمك اكتر
لان كل اللى انتى قولتيه كلام حلو ومشاكل وواقع
لكن ماينفعش تضيعى مجهود سنه كامله بالياس ده كده حرام
ربنا يوفقك وتدخلى الكليه اللى نفسك فيها
وساعتها ولما تبقى دكتوره فى الكليه ديه
ابقا غيرى زى ما انتى عاوزه اهم حاجه دلوقتى الامتحاناااااااااااااااااااااااات

[عاشقه الاقصى2]

والتصحيح
فماذا سنقول
غير
لنا الله