الحاجة «محاسن» الفلاحة التي أبكت الثوار

[طارق69]

في ميدان التحرير تجد مصر حاضرة بكل طوائفها.. لكن كانت مفاجأة أن سيدة مصرية فلاحة بسيطة تخطب علي إحدي المنصات الخمس بالميدان بفصاحة تفوق كل السياسيين، وصدق عميق يشع نوراً يصل إلي قلوب المتلقين، فإذا بعيونهم تفيض دمعاً من وقع كلماتها، قالت الأم محاسن المحمدي حسين:" كل أسبوع آجي ميدان التحرير أبكي شهداء الثورة، لم أترك جمعة واحدة منذ قتل الشهداء، ولازم يتحاسب اللي قتلوا شبابنا، الشهداء دمهم غالي مش رخيص أبداً" وبحرقة بالغة هتفت الأم المصرية التي يناهز عمرها الـ60 عاماً: "يخرب بيتك يا حسني مبارك.. يخرب بيتك يا أحمد عز.. يخرب بيتك يا يوسف والي.. ربنا ينتقم منك "باكية" كان عندي بنت عروسة شقيت أنا وأبوها عشان نربيها هي وأخواتها ونعلمهم أحسن تعليم، خلصت الجامعة، وحالها سرطان، جريت علي الدكاترة، مفيش علاج بالمستشفيات، عذبوني وفي النهاية، جابلها دكتور لسة متعين عملها عملية غلط في المستشفي وماتت، وبعدها بسنة، تعب ابني الوحيد بالسرطان جريت بيه علي الدكاترة، المرضي كتير والمستشفيات مفهاش علاج ولا اهتمام.. الحرامية سرقوا البلد وسابوا الغلابة بدون علاج، والأدوية المتسرطنة اللي جابها يوسف والي وبوظت الزراعة جابت الامراض للناس، ابني مات وبنتي ماتت، والحرامية سرقوا البلد يخرب بيوتهم حسني مبارك وعز ووالي.. منهم لله.. مكتفوش بقتل المرضي.. دم الشهداء غالي.. لازم يتحاسبوا".

روزاليوسف التقت الأم محاسن حيث جلست تبكي وهي تروي قصتها قالت أنا من قرية بشبيش بالمحلة الكبري مديرية طنطا غربية، ربنا رزقني بـ3 بنات وولد وزوجي كان محفظ قرآن كريم كنت بشتغل اخيط هدوم اساعد زوجي في تربية ولادي وربناهم بالحلال أحسن تربية من عرق جبيننا، وتخرجوا من الكليات وكان ابني امام وخطيب وحافظ القرآن، زوجي وولادي عندهم تقوي وبيصلوا الفرض بفرضه حتي صلاة الفجر بيصلوها جماعة، تعبت بنتي بعد ما حصلت علي ليسانس الآداب رحت بيها مستشفي جامعة المنصورة، الممرضات لازم تاخد مني فلوس علشان يجبولها الترللي ويعذبني الدكاترة علشان حد منهم ييجي يكشف عليها، بقيت اجري زي المجنونة في المستشفي علشان حد ينقذ بنتي ومفيش فايدة وفي النهاية خلوا دكتور لسة متعين يتعلم فيها وعملها عملية غلط والدكاترة في مصر قالوا العملية متعملتش صح وقطعوا حتة من جسمها وماتت، في يوم قالتلي وهي بتبكي شفتي ياما الممرضة بتقول إيه؟ سمعتها بتقول لممرضة زميلتها جايبين البلوة دي لينا منين.. السيدة تضيف بحرقة" منهم لله دا أنا كنت بهرب تحت السرير علشان يسبوني ابات مع بنتي في المستشفي".

وتستطرد الحاجة محاسن: ابني الوحيد كان لسه عريس، وبعد فرحه بـ5 أشهر كان بيخطب الجمعة وتعب جابوه مسندينة من الجامع لفيت بيه علي الدكاترة والدكتور اللي ماتروحش له العيادة ما يسألش عنك في المستشفي مات، زوجي ما استحملش مات بعد ابنه.

قالت الحاجة محاسن كل اسبوع باجي وهاجي الميدان، لحد ما الظلمة يتحاسبوا علي اللي عملوه فينا وفي الغلابة وفي الشهداء، وفلوس البلد لازم ترجع وتروح للمستشفيات لعلاج الناس الغلابة المرضي كتير ومش قادرين يدفعوا ثمن العلاج ولازم الحكومة تحاسب الدكاترة والممرضات علشان يحترموا المرضي.
http://www.rosaonline.net/Daily/News.asp?id=113404

[العروبة2]

ربنا يعوض عليها و يجزيها خيرا ويبرد نارها
إن شاء الله تلاقهم فى الفردوس الاعلى
حسبنا الله ونعم الوكيل فى كل ظالم

[هويدااحمد76]

حسبنا الله ونعم الوكيل فى كل ظالم

[راجى طاعة الرحمن]

حسبى الله ونعم الوكيل فى كل ظالم سواء كان رئيس أو وزير أو دكتور رفض يؤدى عمله

بس ماتزعليش ياحاجة محاسن يابختك عندك شهيدين هايدخلوك الجنة من أوسع أبوابها إن شاء الله

وربنا يصبرك ويصبر كل أم أو أب حس بمرارة فقد الابن والضنى

وإن القضاء مخدش للمظلومين الغلابة حقهم ربنا هايخده ومش هايسيبه

إن الله ليملى للظالم حتى إذا أخذه لم يفلته

وشكراً على الموضوع المؤثر

[أم إسلام]

هذه القصة مهداه لفريد الديب محامي مبارك اللي بيقول عنه معندوش غير 6 مليون جنيه من عمله خلال 62 سنة ومريض ومحتاج اللي يسنده
لو حسني مبارك وزبانيته نفدوا من عمايلهم يبقى نستاهل كل اللي جرا لنا واللي هيجرا لنا

[ayid]

وما اكثر من فى مصر له حكاية مثل حكاية الحاجة محاسن ولكن هيهات هيهات لم يكن لهم غير الله يشكو له نتمنى من الله ان يكون هذا التغيير الذى حدث فى البلد خيرا لنا جميعا

[جهاد2000]

حسبى الله ونعم الوكيل فى كل إنسان لا يراعى ربنا فى عمله بدء من الرئيس حتى الغفير .

[داعيه الى الخير]

يمهل ولا يهمل