الشتيمه تلف تلف وترجع لصاحبها

[mony_love2211]

الشتيمة تلف تلف وترجع لصاحبها !

كنت فاكرة العبارة دي مجرد حاجة بنقولها لبعض واحنا أطفال

ده لما يكون طفل مؤدب

و زمانها دلوقتي بقت من التراث

بس عرفت بعد كده أن العبارة دي فعلا لها أصل من الدين...

قال رسول الله صلى الله عليه وسلم:
" المستبان ما قالا . فعلى البادئ ، ما لم يعتد المظلوم "
صحيح مسلم

معناه
إن إثم السب بتاع الاتنين (الساب البادئ=الظالم والمسبوب=المظلوم) بيتحمله كله اللي بدأ الشتيمة
وده في حالة أن المظلوم ماتعداش في الانتصار لنفسه

يعني مثلا واحد شتم واحد والتاني رد عليه
فلو التاني ده رد الشتيمة أدها بالظبط خلاص كده انتصر لنفسه واستوفى حقه
والأولاني هيشيل الوزر كامل
أما لو تعدى في الانتصار بأنه مثلا شتمه شتيمة أفحش أو ضرب كده انقلب وبقى هو الظالم

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــ

آداب الشتيمة

امتى ترد؟
امتى تعفو وتصفح وماتردش؟
ازاي تتغافل؟

امتى ترد؟ وازاي ترد؟
لو واحد مثلا شتمك شتيمة قبيحة جدا
من الحكمة أنك ترد عليه
لكن حذار أنك تتعدى!
قال تعالى:
"وَإِنۡ عَاقَبۡتُمۡ فَعَاقِبُوا۟ بِمِثۡلِ مَا عُوقِبۡتُم بِهِ وَلَئِن صَبَرۡتُمۡ لَهُوَ خَيۡرٌ لِّلصَّابِرينَ "
ودايما نؤكد أن مقام الصبر وكظم الغيظ أعلى

ايه الدليل أنك ترد؟
الآية السابقة

وكمان قول من شعر المتنبي
وضعُ الندى في موضع السيفِ بالعلا ** مضرٌّ كوضع السيفِ في موضع الندى

معناه
الكلام اللين في موقف يتطلب الحمية والغيرة والانتقام مضر وغلط
زي ما الكلام الفظ والشديد غلط ومضر في موقف يتطلب الرفق واللين

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــ

امتى تعفو وتصفح وماتردش؟
المفروض ده يكون ديدن الإنسان
أنه يعدي لله
ويعفو لله
ده لو عايز تاخد أجرك كامل في الآخرة
وتعمل بعزم الأمور
" وَلَمَن صَبَرَ وَغَفَرَ إِنَّ ذَٰلِكَ لَمِنۡ عَزۡمِ الۡأُمُورِ "

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــ

ازاي تتغافل ؟
أنك تعمل نفسك ماسمعتهاش أصلا أو ماسمعتهاش صح أو كأن الأمر لايعنيك
بالذات لو تعاملت مع واحد جاهل أو سليط اللسان
الأسلم والحكمة في التعامل معاه أنك تعدي وماتردش


وأسوتنا في كده رسول الله صلى الله عليه وسلم صاحب الخلق العظيم
كان لما قريش يسبوه ويقلبوا اسمه وينادوه مذمم (عكس محمد)
كان يقول صلى الله عليه وسلم:
" ألا تعجبون كيف يصرف الله عني شتم قريش ولعنهم ، يشتمون مذمما ويلعنون مذمما ، وأنا محمد "
صحيح البخارى

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــ

ومن أخلاق الصحابة هذا الخلق الرفيع من الصحابية أم الدرداء رضي الله عنها

عن أم الدرداء (وهي الصغرى الفقيهة) :أن رجلا أتاها فقال :إن رجلا نال منكِ عند عبدالملك.
فقالت:
"أنْ نُؤْبَنَ بما ليس فينا ، فطالما زُكينا بما ليس فينا."

قالت:

معلش نتحمل اللي بيوصفوني به من أخلاق ذميمة مش فيّ

ما أنا ياما اتوصفت كتيـــــــــر بأخلاق حميدة مش فيّ

كأن مدح الناس و ذمهم استوى عندها ... سبحان الله !

ّبالذات لو كان اللي بيؤذيه شخص جاهل أو سليط اللسان ويعلم أنه لو رد إساءته التاني هيزيد في التطاول والتفحش أكتر وأكتر

" وَعِبَادُ الرَّحْمَنِ الَّذِينَ يَمْشُونَ عَلَى الْأَرْضِ هَوْناً وَإِذَا خَاطَبَهُمُ الْجَاهِلُونَ قَالُوا سَلَاماً "

[الفرقان:63]

كان عمر بن الخطاب رضي الله عنه قال:

" إذا سمعت الكلمة تؤذيك ، فطأطئ لها حتى تتخطاك . "

بارك الله فيكم جميعا