علم نفس ولا اقتصاد واحصاء

[Haneen_Riri]

ياجماعه انا فى اولى واستلمت الاستماره امبارح عارفه انه متأخر اوووووى بس اعمل ايه مدرستى متخلفه
المهم يعنى انا ان شاء الله نفسى ادخل علمى رياضه هو مش قرار نهائى بس احتمال كبير بس المشكله دلوقتى فى الماده الادبيه فى ناس بتقولى اقتصاد واحصاء عشان يبقى المنهج كله رياضه فى رياضه بس انا خايفه ازهق فقولت خلينى فى علم النفس لقيت ناس بتقول انه شبه الفلسفه وانا بقى فى الفلسفه دى معرفش ولا كلمه لحد دلوقتى ومش عارفه هعمل فى الامتحان
المهم يعنى عشان انا عارفه انى رغايه ياريت تقولولى رأيكم علم نفس ولا اقتصاد واحصاء

[..: Pink rose :..]

علم نفس...........

[Asa7be Wawa]

رأى اقتصاد و احصاء

[ranmory]

علم نفس لان احتمال وجود اسئلة لافة صفر اما بخصوص الفلسفة فانا درجتي كانت فلة الترم الاول بس اكيد ف ثانوية هنذاكر . لموأخذة يعني انتي لو حفظتي الكتاب زي البقره هتقفليها اما الاحصاء ممكن علي حظنا النحس تيجي صعبه بس بردوا الاحصاء ناس كتير بيقفلوها خخخخ حاسة اني وجعت دماغك بالكلام التهييس ده لو حد جرب يقول لنا احسن... عن نفسي هاخد علم نفس

[Haneen_Riri]

والله ياجماعه انا لسه محتاره واصلا المفروض انى اسلم الاستماره للمدرسه يوم التلات ولحد دلوقتى مكتبتش فيها حتى اسمى

[toly1997]

ما افتنعتيش بكلام ندى التهييس ده


انا هاخد جغرافيا

[Haneen_Riri]

المشاركة الأصلية كتبت بواسطة toly1997

انا هاخد جغرافيا

يااااااااه دى ارخم ماده فى الدنيا
انتى هتاخديها ماده اساسيه ولا مستوى رفيع ؟

[toly1997]

ماده اساسيه اصلى علمى رياضه

[MOSTAFA093]

نصيحة خدى علم نفس من أجمل المواد
الحمد لله أنا فى تالتة دلوقتى وخدتها فى تانية وجبت فيها 49 من 50 ( أدبى )
بصراحة مضمونة 100 % وبعيدة كل البعد عن الفلسفة لأنى درست الاثنين والفلسفة رخمة أوى السنة دى وملهاش دعوة خالص بعلم النفس
لو عايزة تجيبى النهائية خدى علم نفس
بالتوفيق

[sad nono]

انا كنت في نفس الحيرة اللي انتي فيها بس خلاص سلمت الورقة عشان ابطل تفكير وارتاح ..
بصي انا هختار علم نفس وان شاء الله هيبقا خير ليا لاني استخرت لككن ممكن يبقا ليكي مثلا الخير في اقتصادد واحصاء بيختلف من شخص لشخص .. عشان كدا بقولك بعد ما تسمعي كل الآراء في الاول وفي الآخر دا قرارك انتي .. صلي ركعتين استخارة لله عشان ييسرلك الخير ان شاء الله ..
صلاة الاستخارة بتكون عبارة عن ركعتين وبعدين بتقولي الدعاء دا بعد التشهد او بعد ما تخلصي الصلاة (( وانا عن نفسي بقوله في الاتنين ))
ودا الدعاء

اللّهم أني أستخيرُك بعلمك وأستقدرك بقدرتك وأسألك من فضلك العظيم فإنك تَقْدِرُ ولا أَقَدِْر وتعلَمْ ولا أَعْلَمْ وأنت علاَّمُ الغيوب .

اللّهم إن كنت تعلمُ (( ذكر المسألة )) خيرٌ لي في ديني ومعاشي وعاقبة أمري فاقْدُرْه لي ويسِّرْه لي .

وإن كان هذا الأمرُ شراً لي في ديني ومعاشي وعاقبة أمري فاصرفّهُ عني وأصرفني عنه واقْدِرْ لي الخير حيث كان ، ثم رَضّتَيِ به .

قراءة الفاتحة ، والصلاة والسلام على سيّدنا مُحَمّد وعلى آل بيته وأصحابه أجمعين

وطبعا طبعا اللي بيستخير ربنا ويتوكل عليه خلاص مش بيبقا قلقان لان هو وكل امره لربه اللي عمره ما هيعمل الا الخير وكمان هيرضيه بيه ان شاء الله (( يعني مفيش قلق الحمد الله ))
ويارب اكون افدتك ونسمع ان شاء الله انك حققتي كل احلامكـ ..

[Haneen_Riri]

الحمد لله سلمت الاستماره النهارده وارتحت دخلت علمى رياضه واخدت علم نفس والمستوى انجليزى ادعولى بقى احقق حلمى وامسك مسطره حرف التى هههههههههههههه
يارب اخد لقب طالبه هندسه

[ahmedosamanassar]

انا كمان محتار

[abdoali]

يا حنان علم نفس علم نفس علم نفس

ليه بقى يا جميل

3 ثانوى علمى رياضة على حسب كلامك هتبقى مليانه مواد علميه يكفيك رياضة 2 + الفزياء وكل منهما اسئلة بتلف ودور وممكن توقعك فى درجة او ثلاث درجات فيجب تلاشى الصعوبات وعدم اختيارها

اختارى المضمون يعنى الدرجة النهائية

والقرار ليك طبعا . تحياتىـ

[abdoali]

ادا ان جيت متأخر قوى


طيب كويس انك اخترتى الصح