معلم مساعد ... ج2

[aladdin027]

مقدمة لابد منها
الي كل من يبحث عن الأخبار الأكيدة
و المعلومات الموثقة العتيدة
و حتي لاتضيع أوقاتك الثمينة
ارحل
فلن تجد ما تريده هنا

الجزء الثاني

أخذت طريقي للدور الثاني ، و مشيت في الممر متوجها لادارة التعيينات ، و فجأة انفجر صوت أنثوي :
- علاااااااااااااااااااااااء
- أهلاااااااا .... أخبارك يا ( ص )

ملاحظة لابد منها : ( ص ) هي موظفة بقسم التطوير ، و معينة حديثا ، و هي من أصحابنا البعدا بتوع الوسايط ، لكنها من النوع الواصل جدا جدا .

- الحمد لله ، و انت أخبارك ايه ؟
- بخير ، أنا كنت جاي أسأل عن أخبار التعيين
- هههههههه ، يا عم ما حدش يعرف الأخبار دي هنا ، بس عشان خاطرك حاتصلك بواحد قريب بابا في الوزارة ، و أعرفلك الأخبار
- همممم .. قريب بابا ، طاب ما تخليه يعيني أحسن
- هههههه ، يا بني ما حدش بيخدم حد في الزمن دا كدا ، لازم تكون خدمة قصاد خدمة
- ماشي ، ع العموم كلميه .
فندخل المكتب ، و تتناول (ص) الموبايل ، فتطلب رقم و تنتظر قليلا .... ثم


بعد السلامات التي استغرقت ربع ساعة
و التحيات التي استغرقت ساعة
و السؤال عن أخبار الأهل و الأحباب و الذي استغرق قرنا كاملا
أخيرا دخلت ف الموضوع :
ص : ما فيش عند حضرتك أخبار جديدة عن تعيين المعلمين المتعاقدين اللي دخلوا امتحان الكادر
الطرف الأخر : ........................................
ص : يااااااااااااااااااااااه ، و الله العظيييييييييييييم
الطرف الأخر: .........................................
ص : لأ لأ ، معقول كدا
الطرف الأخر : ............................................
ص : متشكره أوي يا عمو ، حاضر حبلغ سلامك لبابا ، مع السلامة


طبعا أنا كنت استويت خالص ، فصرخت فيها
- هااااااا . . . ايه الأخبار ؟ طمنيني و حياة بابا
- الراجل بيقول ميعرفش حاجة
- نعممممممممممممممممممممممممممممم
- ههههههه ، يا خي بهزر معاك ، الراجل بيقول ان الأسماء بتاعتكم تم حصرها ، و اتراجعت ذيادة عن عشر مرات ، و خلاص الوزارة كانت حاتبعتها لوزارة المالية و جهاز التنظيم و الادارة لعمل اللازم ، بس اللي معطل الموضوع ان فيه قضايا في المحكمة لمدرسين ما كانوش يستحقوا يدخلوا الامتحان و دخلوه ، و لسه المحكمة ما فصلتش في القضية
- يا نهار اسود ، يعني ايه الكلام دا ؟
- ههههههه ، يعني قدامك بتاع 10 سنين كمان
- لأ مستحيل ، لأأأأأأأأأأأأأأأأأأأأأأأأأأأأأأأأأأأأأأأأأأأأأأأأأ أأأأأأأأأأأأأ

تركتها و جريت لأحدف نفسي من أي شباك
و لكن
كل الشبابيك عليها قضبان حديد

اترميت ع الأرض
و رفعت ايدي للسما و قلت
يااااااااا رب ، افرجها من عندك

و

و صحيت من النوم

[kholio_]

ههههههههههههههه هههههههه هههههههه

جميل اسلوبك بجد
كل عام وانتم بخير

[مسيو محمود طلعت]

الحمد لله ان انت صحيت من النوم

[MISS.DINA]

ههههههههههههه متبقاش تتقل فى الاكل قبل النوم

[جارةالوادى]

هههههههههههههههههه خير اللهم اجعله خير دا مش حلم دا كابوس عموما اهى خطوة ايجابية وكويس انك فكرت فى حاجة زى دى ومفردتش اديك وقعدت تصدعنا بكلام ملوش لازمة واخبار عمرها ماكانت ولاهتكون اكيدة

[aladdin027]

شكرا لكل الأخوة الأفاضل المشاركون برأيهم
و أعتذر لكل من يري الموضوع بايخ و رخم
لكن علي رأي اعلان المشروب اياه في التليفزيون

أهي حاجة بتغطي علي المر اللي بندوئه

[بحر العرب]

أهى حاجة جديدة تسلينا لحد المدار س ما تفتح .........مشكور على الفكرة

[جارةالوادى]

ههههههههههه حلوة جدا بس المشكلة فعلا ان دا كابوس مش حلم يعنى يستعيذ ربنا من الشيطان الرجيم وتقوم تتوضى وتصلى ركعتين وتدعى لنا دعوة جماعية بالتثبيت وصلاح البال
واجمل مافيه انه خطوة ايجابية واستفسار حقيقى من الناس اللى بجد تعرف مش فرد الايدين عالكيبورد والمشاكة والاستماع لاخبار عمرها ماكانت ولاهتكون اكيدة

[elmister]

احييك على هذا الاسلوب الجذاب والجميل
موفقين ان شاء الله تعالى

[hassan43]

جميل جداً اسلوبك
انت لو اشتغلت مؤلف قصص هتكسب أكتر من شغلانة التدريس دى
نصيحة لوجه الله انت عندك موهبة و حرام تضيعها
و على العموم
شكراً على محاولتك
و اتمنى لك كل خير
لى طلب عندك : يا ريت تكمل و تكتب لنا جزء ثالث

[ghoneem84]

يا عم إيه الروقان اللى أنت فيه دة

[mratwa7]

قلتلك فى الجزء الاول انك موهبه ادبيه مش بطاله
بس المره دي المستوى اعلى

[علي جاد الكريم]

يا عم اتغطي كويس

[مستر هيثم المحروقى]

اللهم اجعله خير

[soher.t.m]

لا خير ..خير ات شاء الله شوف يابنى ص الى انت قابلتها دا صبرك الطويل ...ولو كانت فى الحلم جميلة يبقى صبرك فى امل....وعمو الى كلمته دا عمرك الى كان نفسك يبقى فيه فائدة....وهو كدا بكلام عمو مش فى فائدة.....ومن الاخر كدا الشباك فى الحلم كان فى حديد .....بس الشباك فى بيتكم اكيد مش فيه حديد......يا له يا عم اتكل على الله......ولا عزاء للتعاقدين........