خربـــــــــانة...خربـــــــــــانة

[وردة جهينة]

عندما تشعر أنها خربانة خربانة

الشعور بان العملية خربانة خربانة شعور تقليدي عند البشر
لكنه مقدس نوعا ما عند المصريين

هل تذكر متى آخر مرة شعرت أنها خربانة خربانة

هل حدث مرة أن احتكمت على خمسين جنيه ت*** رقبة الكتكوت
ومن فرط سعادتك قرت أن تتعشى وتعزم واحد معاك ثم فوجئت انك تدفع وبمنتهى البساطة 15 جنيه
لكن لا تزال نشوة الفرحة بالخمسين تغمرك فتقرر شحن الموبايل بتاعك بعشرة جنية (علشان تفرح الحتة الحلوة اللي في حياتك باس ام اس بدل البليز كول مي اللي قارفها بيها
بينما تجد انك تاخرت ومضطر لركوب تاكسي بخمسة جنية
وفجأة ومرة واحدة تفيق من نشوتك لنكتشف أن الخمسين أهيف اللي كنت متصور انهم هيمشوك لاخر الشهر مفضلش فيهم غير عشرين جنيه

هنا ينتابك الشعور بأنها خربانة وتقرر صرف باقي الخمسين فى اى داهية وتضربها في رجل كلب لان ببساطة العملية خربانةخربانة

هل استنفذت رصيد إجازاتك من المؤسسة التي تعمل بها ومديرك مستنيلك يوم تغيبه علشان يطير الحوافز وبرغم احتياجك الشديد للمال وديونك الشهرية المعتادة علما أن الحافز جه ولا راح مش هيعمل حاجة ومع استيقاظك يوما من النوم متعبا ومنهكا قررت الغياب عن العمل وتسعد وتهنا لك بنومة محترمة وفى نفس الوقت تسعد وتقر عين مديرك وهو يطير حافزك من باب ديون بديون واهى خربانة خربانة


هل مر يوم عليك وأنت طالب وبرغم انك لا تزال توصي نفسك خمستاشر مرة فى الاجازة بالالتزام بالمذاكرة من أول يوم في التيرم مع العلم إن ده سادس ولا سابع تيرم تعاهد نفسك على المذاكرة من أول السنة ثم تستيقظ من غفلتك على زنقة آخر السنة والأيام معدودة تقريبا كل مادة ليها يوم وربع
يعنى مش هتخلص مش هتخلص ومع الإحساس الرهيب باليأس والإحباط تقرر الدخل ولمدة ساعتين على النت او البلاي ستيشن اوحتى تشوف فيلم كركرللمرة الرابعة (وكل مرة في نهاية الفيلم تقول ايه القرف ده) من باب اهى خربانة خربانة

هل استيقظت مرة من نومك وبرغم ضبط القنبلة الزمنية التي تحت المخدة أو ما يسميه البعض منبه الموبايل
تستيقظ وقد أشرقت شمس الشموسة على الجاموسة النائمة اقصد عليك يا بطل وقد أدركت أن صلاة الفجر قد فاتتك بكل المقاييس والنهاردة هتعلم على ورد المحاسبة كحكة حمرا على الفجر ثم تقرر انك بمنتهى التباتة واللامبالاه تكمل نومك انشلله لحد الضهر واهى خربانة خربانة




اعتقد أيضا أن الحكومة في مصر تتعامل معنا من هذا المنطلق
يعنى إذا كان الناس هتموت وهتولع والبطالة على ودنه وموارد البلد في الكازوزة والتعليم فى الباىباى والناس كارهه أم الحكومة وأم الحزب وأم اليوم اللي قامت فيه الثورة
وإذا كان سندوتش الفول بخمسة وسبعين قرش وكيلو العدس بتسعة جنيه وكيلو اللحمة ( يعنى ايه لحمة )
فايه المانع ان الحديد يغلى ولا يولع حتى ولا يوصل لسبعة الاف ولا سبعين الف
أهي كده الناس مش راضية وكده الناس مش راضية
يبقى نخلى الراجل يسترزق
وهى خربانة خربانة

مش بعيد برضه ان (....)
لما حس ان البلد خربانة خربانة قال اهو ابنى يبقى الريس من بعدى واهى خربانة خربانة

سؤال
متى اخر مرة شعرت بالإحساس البشرى المصري الأصيل ان العملية خربانه خربانة

[a7mad 3abdo]

علي طول بنحس بالاحساس دا
لما نمشي في الشارع , ونلاقي جدار مكتوب عليه ممنوع القاء القمامة
وتلاقي امامه كوم ( زبالة ) , وانت معاك اي حاجة عايز ترميها
تقعد تفكر كدا شوية , وبعدين ترميها علي كوم الزبالة , وتقول : خربانة خربانة !
لما تجيب مجموع مش حلو في المرحلة الاولي في الثانوية , تبقي عايز تنجح بس في المرحلة الثانية
خربانة خربانة !!!
لو مطلوب منك حاجة , وانت لسه لحد دلوقتي معملتهاش
مفيش وقت !! اعملها ليه ؟! خربانة خربانة ~
لما تمشي في طريق سريع , وتلاقي الناس كلها ماشية علي 140
واقصي سرعة 90
الله ؟! هو انا اقل منهم في ايه ؟! دا انا معايا حتة عربية !!
دوس بنزين يا راجل !! خربانة خربانة ...
لما تصحي الصبح ومش ناوي تكذب علي حد ,
وتيجي تلاقي نفسك كدبت مرة من غير ما تحس
خربانة خربانة !!
الدنيا كلها خربانة

شكرا علي الموضوع ,

[elmosskhmb]

كلامك لو اي حد غيري حيقولك معقول
ولكن خد رايي بصراحة ومن غير زعل
انا لو صحيت الصبح اديت فرض ربنا وتوكلت علي الله ورحت شغلي عمرها ما هتخرب ( من توكل علي الله فهو حسبه )
لو ركبت العربية وانا ماشي في الطريق غضيت بصري وعفيت لساني عمرها ماهتخرب ( وعينك ان ابدتك مساوءا .... ولسانك لاتذكر به عوري امرئ)
لو وصلت شغلي وراعيت ربنا في عملي علي اكمل وجه عمرها ماهتخرب ( وقل اعملو فسيري الله عملكم ورسوله والمؤمنون)
لو خلصت شغلي في ميعاده وما زوغتش من الشغل بدري عمرها ماهتخرب ( وادوا الامانات الي اهلها .....والعمل امانة )
لو انته هترمي الزبالة وسبت كوم الزبالة ورميتها في مكانها الصحيح عمرها ما هتخرب )

يعني لو كل واحد مننا عمل المطلوب منه حتلاقي الدنيا اتعدلت
ما هو العيب مش فيها العيب فينا احنا وفي الاخر نرمي العيب عليها
( وابدأ بنفسك فانهها عن غيها /***** / فاذا انتهيت عنه فانت حكيم )

وشكرا

[أ/رضا عطيه]

شكرا علي الموضوع