عايز تتخلص من القلق أيام الامتحانات؟

[mosama osama]

بسم الله الرحمن الرحيم

نبدأ باذن الله

1

قلق قلق قلق
أوعوا سيبوني أنا قلقان
ما حدش يندهلي ولا يكلمني عشان أنا قلقان
بقوللك ايه… دي أيام امتحانات وأنا قلقان

كل دي عبارات بنسمعها من نفسنا أو من غيرنا أيام الامتحانات…
طلبة كتير جدا بيحسوا بالقلق الشديد أيام الامتحانات


لا شك القلق ليه أكتر من مصدر في الأيام الجميلة دي
لكن أنا المرة دي هتكلم عن مصدر واحد وهو من أكبر المصادر

أحب أقدم بمقدمة سريعة
السنة اللي فاتت والحمد لله على كل حال كنت بعيد السنة…
أثناء إعادة السنة دي كنت تعبان نفسيا جدا جدا جدا
عارفين ليه؟
في أثناء حالتي النفسية السيئة دي جربت طرق كتير في علاج الموضوع ده
وبحثت كتير في الموضوع وسألت متخصصين وكل حاجة
وكنت في كل علاج أكتشفه وأطبقه أقول خلاص أنا بقيت كويس
وأقعد يومين تلاتة حالتي النفسية كويسة وبعدين أرجع تاني في الحالة إياها

يعني انت مازلت في حالتك دي؟
لأ والحمد لله
عارفين الموضوع ده اتحل ازاي؟
في أثناء الفترة دي اكتشفت إني أهملت التخطيط والخطط اللي أنا كنت عاملها..
علماء التخطيط بيقولوا إن الشخص اللي عنده رسالة وخطط أقل عرضة للاهتزازات النفسية والعصبية
وده أنا لمسته بنفسي في التجربة اللي قولتلكم عليها

فلما أعلنت عن دورة التخطيط الأولى وبدأت أعد المادة بتاعت الدورة وقفت مع نفسي شوية
وبدأت أعمل الخطط من أول وجديد…
خططت كل حاجة تاني
وبمجرد ما انتهيت من الخطط لقيت نفسي رجعت لحالتي الطبيعية والحمد لله

طبعا مش هتكلم عن التخطيط في مدونة … دي لازم تكون دورة تفاعلية أون لاين
لكن المرة دي هتكلم عن حاجة تخدمنا في فترة الامتحانات

التخطيط أو الخطط بتنقسم لتلات أنواع
1- خطط بعيدة المدى … من سنتين لآخر العمر
2- خطط متوسطة المدى … من شهر لسنة
3- خطط قصيرة المدى … يومية وأسبوعية وكده
صحيح ما كملتش كلامي
أنا قولت بعد ما خططت من أول وجديد حالتي النفسية اتحسنت جدا والحمد لله
لكن كان فيه تحدي تاعبني أوي
وهو إني مش عارف أعمل حاجة خالص
يعني مثلا أقعد أقرأ كتاب ألاقي نفسي بتقوللي: المذاكرة… الكلية… شوف نفسك
أقعد على الكمبيوتر شوية ألاقي نفسي بتقوللي: المذاكرة… الكلية… شوف نفسك
أي حاجة أعملها ألاقي نفسي بتقوللي: المذاكرة… الكلية… شوف نفسك

وهكذا
كنت قرفان جدا الحقيقة
مش عارف أعمل حاجة خالص لدرجة إني مش عارف أذاكر حتى……


كده الموضوع شكله هيطول
نكمل المرة الجاية أحسن
ما تخافوش مش هطول عليكم إن شاء الله عشان دي حاجة خاصة بالامتحانات


2


المهم
قولت إني بعد ما حالتي النفسية اتحسنت والحمد لله لقيت حاجة قارفاني
وهي إني مش عارف أعمل حاجة
كل ما آجي أعمل حاجة ألاقي نفسي قلقان بسبب المذاكرة

عارفين الحالة دي عاملة زي ايه؟
أخوك الصغير: يا محمد، تعالى اشرحلي الدرس ده عشان مش فاهم
انت: حاضر يا حبيبي أخلص اللي في إيدي وأشرحلك
أخوك: ماشي



وأنت ما خلصتش اللي في إيدك
أخوك الصغير: يا محمد، الدرس
انت: قولت حاضر يا حبيبي
أخوك: حاضر، لما نشوف

وأنت ما خلصتش إللي في إيدك
أخوك الصغير: يا محمد، الدررررررسسسس ، يا ماما محمد مش راضي يشرحلي الدرس
انت: يوووووووه ، يابني سيبني بقى هو أنا ناقصك ، قولتلك لما أخلص اللي في ايدي
أخوك: مليش دعوة، لازم تشرحلي دلوقتي

قومت ضربت الواد يا عيني

قام الوالد جه…

أخوك الصغير: يابابا ، محمد مش راضي يشرحلي الدرس
بابا: أنت يا ولد يا محمد، وبعدين معاك، قوم اشرحله الدرس وإلا…..
انت: حححاضر يا بابا

قومت كروتت الواد يا عيني والواد ما فهمش حاجة
أخوك: يابابا ما فهمتش حاجة

طبعا يقوم بابا ضاربك في الآخر …
بعد كده قومت اتعلمت الحاجة اللي هنتعلمها في الموضوع ده فحصل الآتي
أخوك الصغير: محمد، اشرحلي الدرس ده عشان مش فاهمه
انت: حاضر يا حبيبي
أخوك الصغير: تاني؟ يا بابااااا…
انت: لأ لأ خخخلاص خلاص، حاضر، بص .. أنا قدامي بالظبط ساعة وأخلص تعالالي بعد ساعة بالظبط وأنا أشرحلك إن شاء الله

وبعد ساعة وكنت انت خلصت
أخوك الصغير: يا محمد، الدرس
انت: ماشي يا حبيبي تعالى أشرحلك

وقومت شرحت الدرس
وطبعا بابا لما جه انبسط أوي إنك شرحت لأخوك الصغير الدرس وكان راضي عنك

3
عايز تتخلص من القلق أيام الامتحانات؟ الجزء الثالث

برمجة مصطفى حسان
في القرن العشرين…
واحد اكتشف نظرية عجيبة جدا…
لما اكتشفها، عدد قليل جدا من العلماء فهموها

النظرية دي قلبت موازين كتيرة جدا اتبنى عليها كلام كتير أوي
أكيد واحد زي ده كان عبقري

يا ترى مين العبقري ده؟

ألبرت آينشتاين كان من عبقرياته إنه كان عنده حاجة اسمها دفتر خواطر

ايه دفتر الخواطر ده؟
كان وهو شغال مثلا أو بيقرأ في حاجة كانت بتجيله خواطر ممكن تخليه يسرح زي أي واحد فينا

أي واحد فينا وهو بيذاكر مثلا بتجيله خواطر تخليه يسرح

آينشتاين كان بيعمل ايه بقى؟
كان بيكتب الخواطر دي في دفتر الخواطر
أولما يجيله خاطرة يقوم كاتبها وبمجرد ما يكتبها الخاطرة دي تروح من دماغهويرجع للي هو كان بيعمله، وبعد ما يخلص اللي في ايده يروح يشوف الخاطرة ديكانت عايزة منه ايه
عارفين الخاطرة دي عاملة زي ايه؟
زي أخوك الصغير اللي في القصة اللي فاتت بالظبط

الخاطرة بتقعد تزنننن تزنننننن تزننننننن في دماغك
وعشان تتخلص منها لازم تسكتها

طب تسكتها ازاي؟
إنك تكتبها في الدفتر زي ما آينشتاين كان بيعمل
ايه جاب الكلام ده في القلق؟
ما هو هو ده القلق
القلق عبارة عن خاطرة بتزن في دماغك بس خاطرة سلبية تخليك ما تعرفش تعمل حاجة وتخليك مذبذب
من الآخر بتبقى قلقان

أخوك الصغير لما قولتله لما أخلص اللي في ايدي عمل ايه؟
راح شوية ورجع تاني عشان تشرحله الدرس
وكل شوية يروح ويرجعلك عشان تشرحله الدرس وانت ما خلصتش اللي في ايدك
طب والحل ايه؟
الحل إنك تعرف هتخلص اللي في ايدك امتى وتقول له إنك هتخلص بعد ساعة مثلا بحيث تكون خلصت وتفضاله.

وايه جاب الكلام ده في الامتحانات؟
شوف يا سيدي
المطلوب منك إنك تجيب ورقة وقلم، وتكتب الحاجات اللي باقيالك في المنهج
وتشوف كل حاجة هتاخد منك وقت قد ايه تقريبا
وبعدين تحطها في جدول وتشوف هتعمل ايه على مدار الأيام اللي باقية بالتفصيل لكل يوم من الأيام
وبكدة تكون عاملت القلق نفس معاملة أخوك الصغير بالظبط

وبكده هتلاقي نفسك مرتاح جدا جدا
ببساطة لما حاجة من المذاكرة تقلقك هتقول لها: تعاليلي في معادك يا شاطرة

وطبعا عشان الموضوع ده يتنفذ بالطريقة السليمة وتكون مرتاح نفسيا لازم تكون بتنفذ اللي في الجدول اللي انت عامله وإلا الحاجات دي هترجع تزن في دماغك تاني

وشكرا والسلام عليكم

ارجو الدعاء لي ولوالدي واريد الرد لاني تعبت كثير .

[love story 2010]

بجد والله جزاااك الله كل خيييييييييييييييييير ربنا يبارك لك ويبارك لوالديك فيك ....انا ففعلا جربت موضوع التخطيط ده وهو مريح جدااا ولما ببطله مش بزاكر خااااااااالص

[Mr. Medhat Salah]

بارك الله فيك

[mosama osama]

شكرا يا استاذ حسن حسن خضر علي اخلاقك

شكرا علي كرمك الاخلاقي

هذه هي الاخوة

مكنتش اتوقع الالفاظ دي

( شكرا )