مشكلتي اثناء المذاكرة ... هام و عاجل و لذوي الخبرة فقط

[a7mad 3abdo]

السلام عليكم و رحمة الله و بركاته ,
بدون مقدمات طويلة :
ليست مشكلتي هي النسيان او طرق الحفظ و الاستذكار و غيرها
و لكن المشكلة هي الملل و الشعور بالنفور و عدم الراحة النفسية عند المذاكرة
بحس اني عايز اقوم اعمل اي حاجة تانية , او علي الاقل اجلس من غير مذاكرة
و انا اعلم اننا الان في مرحله حرجة نظرا لقرب الامتحانات , فهذه المشكلة تسبب ضياع وقتي بشكل غير عادي .
انا غير راضي عن ذلك , مع ذلك لا استطيع مقاومه هذا الشعور بالملل من اول دقيقة
ارجوكم افيدوني عشان انا تعبت والله

[asem 2010]

مش لوحدك والله يا احمد
الموضوع بقي ممكل قوي
انا من اول التيرم كل لما اجي اذاكر جغرافيا بقعد خمس دقائق وبقوم وعلي هذا الحال حتي الان مذاكرتش فيها ولا باب

[شروق الطلخاوى]

على فكرة دى عند كل الناس المشكلة دى
اما بتيجى تذاكر بتسرح فى حاجة تانية خالص
وتحس انك عايز تنام بس اما تقوم من على المذاكرة
تحس انك فايق وكل حاجة تمام
نصحتى ......... حس انك فى معركة انت والملل
ويا انت يا الملل فى المعركة دى......... وياريت
تستعين بالله قبل ما تذاكر

[mema66]

وانا والله كده
ياريت حد يشوفلنا حل
بقوم اتوضا واصلى برده
مافيش حااجه ببقى زهقانه

[just ag!rl]

الاحساس بالملل ده سببه حاجات كتير
بس اهمها عدم وجود هدف او وجود هدف غير واضح الرؤية
ياترى عندك هدف؟ ولو عندك ياترى بتفضل فاكره وحطه قدامك وبتعمل عشانه؟
طول ما انت فاكر هدفك وطول ما انت عايز تحققه عمرك ما حتشعر بالملل حتى لو المذاكرة ممله لانك ممكن تعمل اى حاجة فى سبيل هدفك
انا عارفة انك لازم يجى عليك وقت وتزهق بس لازم تقاوم الحكاية دى ....ازاى؟
اولا:- استعين بالله
ثانيا:- حط هدفك قدامك دايما
جرب الطريقة دى
غمض عينيك دقيقة و تخيل نفسك وانت حققت حلمك وتحس بكل حاجة فى الحلم وتسمع الاصوات وتشوف الالوان وتشعر بكل شئ فيه وبعد كده تفتح عينيك وتقول لنفسك ...( انا حقدر اوصل لهدفى وكل يوم بيعدى بيقربنى اكتر من هدفى)
وتبدأ تذاكر
وكل ما تسرح او تحس بملل افتكر الحلم اللى انت عيشته فى خيالك وانك لازم تخليه حقيقة
ساعتها حتحس انك بتعمل حاجة كبيرة اوى عشان تحقق هدفك وحيهون عليك كل التعب
وربنا يوفقكم جميعا

[alighalel]

السلام عليكم ورحمة الله وبركاتة
اخوانى من واقع خبرتى مع المذاكرة خذو هذة النصائح
اولا يجب ان تضع هدفك نصب عينك دائما اثناء المذاكرة
ثانيا يجب ان تكون هناك منافسة بينك وبين احد زملائك فى القسم فهذا سيجعلك اكثر اصرار لكى تهزمة
ثالثا المذاكرة تعود بمعنى اليوم ذاكر ساعة بكرة اعصر على نفسك لمونة وذاكر ساعتين بعد بكرة اعصر على نفسك لمونتين وذاكر ثلاث ساعات الى ان تجد نفسك تعودت على المذاكرة

وفى النهاية ادعولى علشان امتحانى قرب ومش عارف اذاكر برضةانا بتكلم جد



تقبلو تحياتى

[a7mad 3abdo]

شكرا علي المرور الطيب , و شكرا علي الحلول دي
بس للاسف ما فيش اصدقاء ممكن تتنافس معاهم
من الاخر : كل الاصدقاء اللي اعرفها فاشلين , و ان لم يكن فيهم فاشل فيكون حقود او حسود و غير قابل للمنافسه اصلا
الواحد منهم لما يشوفك بتذاكر او بتجاوب كويس يحسد فيك و يحقد عليك
الواحد اصلا مش عايز يسمع حكاية المنافسة بين الاصدقاء دي خالص
انا لا انتقد ردك بس هو دا الحال معايا , ممكن يكون الحال دا مختلف مع ناس تانية
شكرا و في انتظار المزيد من ردودكم

[يالا بينا]

شوف يا عم أحمد

أنا هاقولك على حل سحري .. بس تنفذه .. وتقولي النتيجة .. تمام؟

ورقة وقلم يالا أول حاجة

ها
جبتهم ؟

جميل جدا ..
اسأل نفسك سؤال : " أنا باتعلم ليه ؟"

يالا اكتب في الورقة السؤال والإجابة ...

ها
معايا؟

طيب ايه امنتيتك في الحياة؟

برده السؤال تكتبه وتكتب إجابته

متابع؟

ممتاز جدا


لو عايز توصل لهدفك اللي انت كتبته دا ... تعمل ايه؟
اقولك انا بقى..

هتاخد الورقة اللي احنا عملناها مع بعض دي
تمام؟

وتشوف المكان اللي بتذاكر فيه فين
تمام؟

وتعلقها قدامك



ونتقابل لما تنفذ الكلام دا

ويارب نسمع عنك كل خير

[شهد22]

اللهم إني نشرت عهدك وكتابك، اللهم فاجعل نظري فيه عبادة وقراءتي تفكراً وفكري اعتباراً، واجعلني ممن اتعظ ببيان مواعظك فيه واجتنب معاصيك، ولا تطبع عند قراءتي كتابك على قلبي ولا على سمعي، ولا تجعل على بصري غشاوة، ولا تجعل قراءتي قراءة لا تدبر فيها، بل اجعلني أتدبر آياته وأحكامه آخذاً بشرائع دينك، ولا تجعل نظري فيه غفلة ولا قراءتي هذرمة، إنك أنت الرؤف الرحيم