Help,Help انا اتحبست

[هدهدسليمان]

بسم الله الرحمن الرحيم
السلام عليكم ورحمة الله وبركاته...


انا هدى فى اعدادى هندسة قنا هندسة كانت حلمى وكان حلمى تكون هندسة قنا فى الاول عشان قريبة وانزل البلد كل اسبوع وجديدة وكمان الدفعة كلها 170 طالب وطالبة.
المهم عشان ما اطولش عليكم بعد اسبوعين بدأت احس انى اتورطت عدد الدكاترة كله 3دكاترة والعميد
والمعيدين كلهم5, الكلية اقرب لمدرسة ثانوى متطوره شويه مش اوى يعنى هيئة التدريس الصغيرة دى هى اللى هتدينا وبتدى اللى قبلنا وهتدى اللى يجى بعدنا كل واحد بيحاول يدى تخصصات مش بتعته .
المهم انا قررت بعد نهاية الترم الاول انى هحول لقيت نفسى قدامى عقبات كتير ذى عدد الكلية الصغير وكمان
اننا شاغلين بنظام اسمه الساعات المعتمدةcredit hours وانه قسم مش موجود غير فى جامعة القاهره واسيوط وانه بمصروفات غالية .
امهم دلوقتى انى عايزه احول القاهرة (جامعة القاهرة) لانى بصراحة بدأت اشعر انى استنفذ نفسيا وطاقتى تبدد على الفاضى كان نفسى اوضح اكتر من كده لكن الحيطان ليها ودان وانا مش عيزه يحصلى اكتر من اللى حصلى.
فياريت لوحد عنده اى معلومة عن طريقة التحويل لهندسة القاهرة او ايه المطلو من اوراق او شروط وازاى تتحل مشكلة الساعات المعتمدة دى يعنى ممكن ابقى مش فى قسم المتميزين ده ولا لأ
وكمان نظام الاقسام فى هندسة القاهرة وتقديراتها مع العلم انه احنا فى اعدادى معندناش هندسة وصفية عشان محدش بقدر يشرحها.
ياريت لو حد عنده معلومة او نصيحة مهما تكون صغيرة يفيدنى بيها .
متبخلوش عليا لانى فعلا بمر بظروف نفسية صعبة فيها واللى هيساعدنى هادعيله فى قيام الليل.

[abdelRhman772007]

أعداد الطلبة الصغير ميزة و لا عيب ؟

تلات دكاترة و خمس معيدين بالكاد يملوا التخصصات الأربعة الأساسية صح و لا ايه ؟

أى كلية بتشتغل بنظام الساعات المعتمدة فى دراستها بس العاديةفى الكلية و كده

أما الساعات المعتمدة اللى التانية بتبقى على النت و فى الكلية و فيها التعليم عن بعد

بالنسبة للتحويل فهو على الأقل جيد جدًا للأقسام اللى مش موجودة عندكم

فغالبًا كله بيحول طيران القاهرة لأن عددها قليل و مجموعها قليل

و بيدبلر سنة عشان يخش قسم على مزاجه

ضيفى على كده الغربة واضح أنك لسة متعرفيش حاجة عنها

خصوصًا لو محدش تعرفيه و من بلدك معاكى

فى النهاية أقولك اعملى اللى عليكى و هاتى امتياز أو جيدجدًا و بعدين فكرى تحولى و لا لأ

وللعلم كلنا هذا الشخص المخنوق من كليته (يبقى أنت أكيد فى مصر)

بالتوفيق

[هدهدسليمان]

هى العدد الصغير سلاح ذو حدين
لكن احنا متضررين منه جدا لانه الدكاترة بيبقوا متابعين تصرفات اى واحد وبيدوه على دماغه
دا غير انه المحاضرات مبناخدوهاش غير على المواسم عشان الدكاترة دايما فىاجتماعات الجودة للرقى بالكلية طبعا!!!!
الطالب اللى يقدر يفتن عن زميله يتظبط فى اعمال السنة.
الطالب اللى يعمل ورق وفبركة ندوات ورحلات علميه باسماء الطلبة ويظبطها يبقى من الاوائل!!
الدكتور لما تعجبه بنت يطلبها وهو متجوز وعنده اولاد من سنها وان رفضت فهو مش هيسقطها لانه ازكى من كده لكنها تاخد المقبول المتين فى مادتين وايه ذنبى انى اتحمل الضغط دا كله
ودراسه مفيش
انا اتكلمت فى معلومة الدكتور قالها بتخالف نظريات ثابتة اتبهدلت فى المحاضرة
تصور الدكتور بيدينا ربع ساعة دراسه ان جه يعنى ونص ساعة تهزئ
يقولنا مينفعش معاكم غير (القباحة!!!)
سكشن الرسم بيتهيألى من اهم السكاشن لغاية دلوقتى منعرفش مين هيدينا رسم واتلغى مننا خمس سكاشن!!!
خدن فى القطاع سكشنين وبعدين امتحنونا فيهم ولما شكينا للدكتور وطالبنا بتأجيل الامتحان رفض لانه المحاضرة كافيه لو ركزنا ...دافى الرسم.
انا على فكره مقلتش كل حاجه.
ومتشكره ليك لردك لكن انا نفسى ابقى مهندسة مش فنى مستواه ضعيف

[abdelRhman772007]

خليكى أنتى كويسة و سيبكى من جماعة الكوسة

بالنسبة للدراسة لو حاجة واقفة مع حضرتك فى الدراسة حطى لها موضوع

و إن شاء الله الكل يساعد و عن نفسى مش هتأخر لو بايدى حاجة بإذن الله

و استحملى السنة ده و حاولى تجمعى سكور كويس يخليكى تحولى لو ده رغبتك

بس دلوقت حاولى تتناسى كره الكلية عشان ميأثرش على معلوماتك

و بالنسبة للسكاشن أحب أقولك القطاعات عندنا أصلاً سكشن و نص

و مسائل تقيلة جدًا و بنفس الرتم ده طول السنة فمش أنتم لوحدكم كده يعنى

و الكلية ملهاش علاقة بمستوى المهندس كونى نفسك بمعلوماتك و خبرتك و أخلاقك المهنية

لما تروحى تشتغلى فى مكان مش هيبروز شهادة هندسة قنا

مجال الهندسة واسع و مفتوح للجميع

فمش هتبقى إن شاء الله فنى و لا حاجة

و بفكرك أى حاجة واقفة فى المنهج يريت تحطيها و لو بدرسها أو عندى فكرة مش هتأخر

السلام عليكم

[BaNZeR]

على فكرة اسيوط اقربلك واحسنلك بكتير من هندسة القاهرة
مش دعايا لجامعتي
بس اسيوط جامعة دولية ومستواها مش اقل من جامعة القاهرة

التحويل زي ما قالوا بيفضل يكون التقدير اكبر من جيد جداً
والاولوية لتقليل نسبة الغربة
العكس ممكن يكون مسموح بيه لو في اماكن فاضية او العدد مش كبير يعني

وعامة الجامعات الجديدة في بيبقى مستواها الدراسي حلو في البداية
خاصة مع عدم وجود دكاترة كفاءة

[هدهدسليمان]

متشكرة ليكم جدا وانا هحاول اجيب تقدير كويس برغم انى ضامنه مقبولين اذا مشلتهمش يعنى لكن انا بعمل اللى على وكل انسان ربنا هيحاسبة على الظلم
وربنا يسترها لانى تقديرى الترم الاول جيد بسبب المادتين اللى قلت عليهم دلوقتى.. بالرغم انى كنت جايبة مادة امتياز وماده جيد جدا مرتفع و واحدة جيدمرتفع

[casper.eg]

بالنسبه لمشكلة المواد فدا عند الكل
احنا مخدناش وصفيه غير 3 سكاشن من اول التيرم وفاضل اسبوعين ع الفاينل
بس لباقي الحاجات اللي قلتيها ربنا معاكم
انا كنت زعلان في اول السنه
بس دلوقتي الحمدلله.

[a7med_zd_4]

بالنسبة لنظام الساعات المعتمده


موجود فى جامعات كتير ليست القاهرة واسيوط فقط

هذا النظام وزارة التعليم العالى هو افضل انظمة التعليم الجامعى الموجودة

لان العدد الطلبة صغير جدا فى الفرقة الواحد ( المستوى ) .

وكذالك الدكاترة بيكونوا على اعلى مستوى من التدريب

**************
الهندسة الوصفية من الافضل انك مش تدرسيها صعبة فى الفهم

[a7mad3ali]

امممممممممم هو انا في جامعه القاهره بس معنديش معلومات كتير اوي ممكن ابقي اسال واقولك
بس اللي اعرفه لغايه دلوقتي ان التحويل من جامعه لجامعه لازم يبقي لقسم مش موجود عندك في الكليه
وبالنسبه لتقديرات الاقسام عندنا فمش بيزيدوا عن جيد او عشان تبقي ضامنه يبقي في اول الجيد جدا يجيب كل الاقسام
بس معرفش ده بيبقي نفس التنسيق للي هيحول ولا ايه
وبالنسبه للساعات المعتمده فاحنا عندنا الساعات المعتمده وعندنا العادي وانتي براحتك تختاري اللي انتي عايزاه بس الساعات المعتمده مكلف جدا طبعا
بالنسبه بقي للوصفيه فحنا مش بناخد وصفيه يعني حكايه النقطه والمستقيم والمستوي وكل ده مش عندنا
لكن فيه حاجات خدناها سمعت انها من الوصفيه وهي تقاطع الاجسام وافراد الاسطح بس مش عارف ديه وصفيه ولا لاء لاننا معندناش ماده وصفيه عندنا كلها اسمها رسم هندسي
يارب اكون قدرت اساعد ولو في اي معلومات تانيه عايزه تعرفيها انا ممكن ابقي اسال واقولك لو مكنتش اعرف