المعهد المصرفى المصرى

[fatimaa]

السلام عليكم ورحمة الله وبركاته

لو سمحتم ان عايزة اعرف ايه حكاية التدريب فى المعهد ده .
يعنى هو بياخد من تقدير معين ولا ايه؟؟؟
والانترفيوووو بتاعه عامل ازاى؟
وهو بيدى شهادات معتمدة ولا لا؟
طيب انا سمعت انهم بيكونوا ليهم الاولوية فى انهم يتقبلوا فى البنك . الكلام ده صحيح؟
واللى عارف اى معلومات عنه يا ريت يفيدنا بيها
وشكرااااااااا

[realman0129]

بصي هو اللي انا اعرفه ان التدريب فيه بيبقي لسنه ثالثه ورابعه
انتي ممكن تشوفي اي بنك تاني السنه دي

التقديم في البنك الافريقي مفتوح لحد يوم 5/2
وبنك cip محتاجين ناس السنه دي من سنه تانيه وثالثه والتقديم شغال

وبعد الامتحانات في بنك مصر وبنك القاهره
وفي اخر شهر 5 في البنك العقاري
وhsbc للاسف التقديم فيه خلص

شوفي اي بنك من دول وان شاء الله هتعرفي تنزلي تدريب في اي واحد فيهم

[الأميـرمحمد]

المشاركة الأصلية كتبت بواسطة realman0129

بصي هو اللي انا اعرفه ان التدريب فيه بيبقي لسنه ثالثه ورابعه
انتي ممكن تشوفي اي بنك تاني السنه دي

التقديم في البنك الافريقي مفتوح لحد يوم 5/2
وبنك cip محتاجين ناس السنه دي من سنه تانيه وثالثه والتقديم شغال

وبعد الامتحانات في بنك مصر وبنك القاهره
وفي اخر شهر 5 في البنك العقاري
وhsbc للاسف التقديم فيه خلص

شوفي اي بنك من دول وان شاء الله هتعرفي تنزلي تدريب في اي واحد فيهم

السلام عليكم
جزلك الله خير ع الإفادة .. ..
هل سنه اولي ( انتساب ممكن ينزلوا تدريب ) ؟؟
وايه الشروط ؟؟
والتقديم فين ؟؟
منتظر الرد

[vampire1188]

لو سمحتم ان عايزة اعرف ايه حكاية التدريب فى المعهد ده

دا بكل بساطة عبارة عن معهد تابع للبنك المركزى المصرى

وبالظبط كدا تقدرى تقولى عليه هوا العتبة اللي بتدخلك على عالم البنوك وبتديكى خلفية عنه

طبعا فيه برامج كتيرة وشهادات كتيرة المعهد دا بيقدمها .. بس مش كلها متاحة للطلبة

اللى متاح للطلبة هوا برنامج واحد بس اسمه اساسيات العمل المصرفى

البرنامج دا قبل مابتقدمى فيه بيديكى اوبشن انك يا تدرسى عربى يا انجليش

وعشان كدا بيعملك انترفيو .. الانترفيو بيبقى بسيط جدا ومش محتاج يعنى

هوا بس بيبقى عشان يقدر يقيم مستواكى

هل انتى هاتقدرى تتأقلمى مع الانجليش كلغة دراسة فى الكورس او لأ

يعنى ماتقلقيش خالص .. انتى مش رايحة تقدمى فى شغل عشان تترفضى

غير كدا انتى داخلة بفلوسك .. مش نظام منحة والكلام دا يعنى

الــمــهــم

الكورس عموما بيديكى خلفية عن خط سير البنوك ماشي ازاي ونظام الحسابات وكل الحاجات دى

تمنه تقريبا 450 جنيه وممكن يكون زاد ووصل لـ 500 (مش متاكد بالظبط)

والبرنامج عموما مدة دراسته شهر .. والتقديم بيبقى فى اول شهر 6

كل اللى هاتعمليه انك هاتروحى للمقر الرئيسي بتاعهم فى مدينة نصر

بالمترو هاتنزلى محطة مبارك .. وهاتركبى اي حاجة رايحة مسجد رابعة العدوية

هاتنزلى هناك عند طيبة مول .. هاتلاقي المركز وراه على طول

هاتروحى تحجزى وتدفعى الفلوس وكل حاجة تماااام

انا بصراحة كنت ناوى آخده .. بس المشكلة ان منحة الـ iTi دي معطلة الدنيا كلها عندى

لا عارف انزل ترينينج ولا عارف اعمل اى حاجة تانية

ودا بيأكد اكتر واكتر ان منحة الـ iTi دي منحة تقيلة

لان مافيش منحة تعطلك عن انك تاخدى اى كورسات جانبية وتبقى منحة تعبانه

[fatimaa]

الف شكر يا جماعه . وجزاكم الله خيرا

[الأميـرمحمد]

السلام عليكم ؛

جزاك الله خير يا فامبير ؛

كل كورس مدينااا عنه فكرة

بس هل الكورس دا لو درسته انجلش هيبقي افضل من العربي ؟؟

وهل بيساعد في الشغل بعد التخرج إن شاء الله ؟؟

و مدة الدراسة قد ايه ؟؟

ومعلش يا فامبير ؛

عاوز ادرس icdl في الصيف ويكون معتمد من الجامعة

ما هو افضل مكان ؟؟

معلش هتعبك معايااااا ؛

[vampire1188]

بس هل الكورس دا لو درسته انجلش هيبقي افضل من العربي ؟؟

أكيد .. بس حتى لو انتا دخلته عربى فيه مصطلحات كتيرة لازم هاتدرسها بالانجليش برده

وهل بيساعد في الشغل بعد التخرج إن شاء الله ؟؟

هايساعد لو انتا حاطط فى دماغك انك عايز تشتغل فى بنك

لكن بقى لو سكتك ماشية فى موال الاتصالات والداتا بيز والحاجات دي يبقى مالوش لازمة

و مدة الدراسة قد ايه ؟؟

حوالى شهر

عاوز ادرس icdl في الصيف ويكون معتمد من الجامعة
ما هو افضل مكان ؟؟

عندك فى مركز البحوث مجانى .. بس بنظام selfstudy .. هاتدرسها مع نفسك وتخش تمتحن

فيه فى مركز خدمة المجتمع بـ 250 تقريباً ..

وفيه فى مركز الحساب العلمى فى كلية حاسبات بـ 450 وكل دول معتمدين من الجامعة

[الأميـرمحمد]

و الله مش عارف اشكرك ازاي يا فامبير ؛

بس يعني ايه الجملة دي ؟؟

لكن بقى لو سكتك ماشية فى موال الاتصالات والداتا بيز والحاجات دي يبقى مالوش لازمة

[vampire1188]

بس يعني ايه الجملة دي ؟؟

يعنى لازم انتا تبقى حاطط فى دماغك انتا عايز تبقى ماشي في طريق ايه

وعلى هذا الاساس تبتدى تاخد الكورسات المؤهلة للمجال اللى انتا عايز تشتغل فيه

اذا كان طريقك بورصة .. يبقى تروح على هيئة سوق المال او شركات السمسرة وتتدرب

او انك تاخد كورسات فى التحليل الفنى والاساسى ..

ولازم تكون متابع حركة السوق والاسهم عشان يبقى عندك خلفية

اذا كان طريقك بنوك واستثمار .. يبقى عليك وعلى كورسات الاتش ار والائتمان والمحاسبة

اذا كان طريقك اتصالات .. يبقى اتش ار وداتا بيز بالاضافة للمحاسبة برده

وهكذا يعنى .. فانتا المهم تحدد انتا دماغك رايحة فين وتمشى فى الطريق دا

[MIROO_2009]

السلام عليكم
لو سمحتوا انا اولى انتساب هل يبقى ليا تدريب ؟
طب لو ليا هل شرط اني ابقى جايبة تقدير؟
و اي بنك هو الاحسن؟
وشكرا

[vampire1188]

السلام عليكم
لو سمحتوا انا اولى انتساب هل يبقى ليا تدريب ؟

لو قصدك تبع الجامعة .. فا لأ سنة اولى مالهاش تدريب

لكن لو مع نفسك او ليكى واسطة فى بنك .. فا اه ينفع ونص وتلات تربع كمان

طب لو ليا هل شرط اني ابقى جايبة تقدير؟

لو تبع الجامعة يبقى جيد .. لو واسطة فى بنك ينفع بدون اي حاجة حتى لو عايدة السنة !!

و اي بنك هو الاحسن؟

ماتسأليش تقولي ايه الاحسن .. اسألى قولي انا هاستفيد منين وهل التدريب اصلا متاح ولا لأ

بنك مصر والقاهرة هما الاشهر .. بس كتير من صحابى بيقولولي مش حلو

بنك سوستيه جنرال nsgp .. غالباً بيبقى بواسطة

بنك hsbc و cib و abc .. دول احسنهم وافضلهم من كل حاجة

البنك الاهلى والبنك المركزى قفلوا حكاية التدريب دى خلاص .. يعنى غير متوافر اصلا فيهـا