أحمد زكى بدر معشوق الجماهير

[Observer]

جروب خاص..للمحبين

أحمد زكي بدر "معشوق الجماهير" علي الفيس بوك

إعجاب الشباب بلا حدود.. والثواب والعقاب.. أحلي سياسة





الإعجاب بالدكتور أحمد زكي بدر وزير التربية والتعليم فاق الوصف رغم توليه الوزارة منذ فترة
قصيرة. قامت مجموعة من الشباب بتكوين "جروب" علي الفيس بوك أطلقوا عليه "محبي الدكتور
أحمد زكي بدر" يشيدون فيها بسياسته ويطالبونه ببذل المزيد من الجهد والاستمرار في مكافحة
الفساد والإهمال ويستعرضون من خلالها المشاكل التي يعانون منها ويبدون آراءهم في سياسة
الوزير وقراراته وجولاته التي يقوم بها.

طالبوا الوزير بالاستمرار في عدم التستر علي أي مخالف وتطبيق سياسة الثواب والعقاب آملين أن
ينصلح حال التعليم عن قريب. يقول إسلام شعراوي طالب بجامعة القاهرة يا سيادة الوزير احنا
بجد محتاجنلك سواء تلاميذ ابتدائية أو إعدادية أو ثانوية أو طلاب جامعات.. بجد عايزينك تغير
مسار التعليم في بلدنا.. احنا بجد معاك ويا ريت تكون حضرتك معانا.. بجد فيه مشاكل كتير
أوي وأنا وزملائي كطلاب في الجامعات محتاجنلك.

وتعلق إيناس الزيني: معرفشي فيه ناس ضد طريقة حضرتك مع إنه أحياناً الشدة تكون مطلوبة
خاصة أن كل الحالات اللي زرتها تستاهل قراراتك الحاسمة موفق في خطاك طبعاً.

أما أحمد المصري فقال في تعليقه: سعادة الدكتور.. المشكلة الجذرية في التعليم هي الدروس
الخصوصية ومعظم المعلمين لا يأبهون بأي شيء علي الإطلاق سوي الحضور للمدرسة بغرض
جمع الطلبة للدروس الخصوصية وعلي ضوء ذلك ستجد الإهمال وعدم الدراسة بضمير.

وتؤكد نهي ناجي: أصل أحنا شعب ما يعجبوش العجب لو الراجل بقي حازم ومش بيسمع لكلام
أي حد وبيشوف بنفسه يتابع بنفسه ويعاقب بنفسه يبقي وحش ولو بقي قاعد في برج عال
وما يعرفشي اللي بيحصل وبيوصله أنه كله تمام وكله مية مية برضه مش عاجب.. المفروض
نقول الحمد لله أن راجل زي ده لسه موجود في الزمن الأغبر ده ونمسك فيه بأيدينا وأسنانا
ونشجعه وياريت الباقي يغيروا منه علشان حال البلد ينصلح.

وتقول: نظام الثانوية العامة والإعدادية والابتدائية ياريت لو كلامي هايوصل للوزير اللي أنا
بحترمه جداً الفاضل وزير التربية والتعليم إلغاء نظام البورتفوليو ده لأنه نظام فاشل من الدرجة
الأولي ومخلي الأهالي والأولاد تحت رقبة المدرس لو راضي عنا يدي للولاد درجات النشاط
اللي الأهالي بتعملها طبعا ولو الولد دمه تقيل علي قلب المدرس أو مش بياخد درس عنده يبقي
لا في درجات نشاط ولا سلوك ويبقي فاضل التلت اللي هو علي الامتحان التحريري.. ينفع كده.

القط والفار
وشخص آخر يقول: أحمد زكي بدر يمارس لعبة القط والفار مع مدارس الوزارة بعد اكتشافه
سرعة تبادل "ناضورجية التعليم" معلومات زياراته بالموبايل.

وآخر: أسلوب وزير التعليم بوليسي ويتوافق مع مبدأ أضرب المربوط يخاف السايب.

وثالث يحذر.. ابتدينا شغل التلويش اللي هيقول علي الوزير كلمة ملهاش لازمة هيعرف شغله كويس!!

وتقول نفين محمود: التربية تحتاج إلي الحزم وايضا العطف وأري أن هذا ما يفعله الدكتور زكي بدر
فهو يعاقب كل مقصر ويثيب كل مجيد ومطور لعمله.. أكيد أنا مدرسة وعارفه فعلاً الناس
مش هيتعدل حالها إلا كده للأسف.

يضيف حلمي: المدارس الخاصة يا سيادة الوزير بالله عليك أوعي تنساها.. ما شاء الله..
يا رب اكشف الوحشين كمان وكمان.. حسبي الله ونعم الوكيل.

ومحمد الصادق يبدي إعجابه بالوزير ويدعو له يارب تستمر دائماً.. الله الله الله هو ده الشغل
مش عشان بفلوسهم.. هافضل أقولك ربنا يقويك لغاية مانشوف النتيجة.. ومتنساش المدارس
الخاصة وبالذات القوميات..

يتساءل: هل يمكن للمسئولة عن المعمل بالمدرسة أن نقوم بتدريس مادة الماس لسنة أولي ابتدائي
قسم اللغات وتقوم بشرح المادة باللغة العربية هل ده يرضي ربنا؟ وهل يمكن للحاصل علي
بكالوريوس خدمة اجتماعية يقوم بتدريس مادة اللغة الانجليزية لسنة أولي ابتدائي اللي محتاجين
تأسيس لتأهيلهم للسنوات القادمة كل ده احنا بنعاني منه في مدارس حدائق المعادي.

يضيف: كلنا متفائلين بيك خير بعد اللي حصل في المدرسة اللي في حلوان.. ربنا يقويك علي الإصلاح.
. وياريت تعمل زيارة مفاجئة لمدرسة حدائق المعادي القومية علشان تشوف المهازل اللي احنا
وابنائنا بنعاني منها لأنها تعتبر اسوأ قومية علي مستوي القوميات الأخري وكل شيء
في هذه المدرسة يحتاج إعادة تنظيم.

ويقول آخر: يارب حضرتك تركز في التعليم علي الكيف مش الكم علشان نترحم من
كمية الكتب والكراسات والحشو الكثير ونركز علي المفيد.

ويبدي أحد المحبين مخاوفه من الإحاطة بالدكتور في أول تعديل وزاري بسبب
منهجه الإصلاحي ومحاربته للفساد ربنا يستر.

وتؤكد مي نوار أن الدكتور أحمد أحسن وزير علي الإطلاق.

وتقول منار سوفيان: هو ده الوزير اللي علي حق ربنا يباركلك عقبال كل الوزراء يبقوا كده..

ويضيف شريف: الله يبارك فيك يا دكتور وعقبال بقية الوزرا كده..

وآخر: من هنا نبث الحذر إلي جميع مدارس الجمهورية الجنرال في الطريق احذروا المفاجأة..
شائعات بوجوده في الصعيد وأقوال تفيد بأنه في الوجه البحري وآخرون يقولون أنه في الدلتا أو
القاهرة إنه بحق الشبح الأسود.

بدر في ضيافة هندسة عين شمس
تستضيف جمعية حربي بكلية الهندسة جامعة عين شمس مساء غد الدكتور أحمد زكي بدر
وزير التربية والتعليم.
قال المهندس محمد الهياتمي أمين الجمعية انه سيتم تكريم بدر لأنه من خريجي الكلية
عام 1978 شعبة حاسبات وشارك في تأسيس الجمعية عام .1998

http://www.algomhuria.net.eg/algomhu...s/detail00.asp

[Abo Ziad]

كلام جميل جدا

[أ/ سعيد موسى]

صديقى العزيز ا/محمد فوزى هل تعرف السبب الذى جعل كثير من الناس تعجب بالوزير !!!!!!
شوية فلسفة بس فكر جيدا
مالذى جعل منظمه حماس ومنظمة فتح ي***ون بعضهم ؟؟؟؟؟؟
عندما لم يستطيعوا النغلب على اسرائيل قاموا بتفريغ الغضب بداخلهم على بعضهم البعض!!!
طب مادخل هذا وحب الناس للوزير بص ياسيدى الناس تعبانه وبداخلهم غضب لاسباب متعدده ايه الحل ؟؟؟ يخرجوا بفرحه هيستيرية لمجرد فوز فى كرة القدم !!! طب لايوجد كورة ما العمل انقلب الناس على بعضهم البعض ( الناس ضد الشرطه وضد فواتير الكهربا والتليفونات والمدرسين وضد سائقى الميكروباص ) ( ملحوظة-- وايضا المدرسين ضد الباقى وهكذا ) مجرد وجدوا وزير يقوم بعقاب فرحوا بالوزير وتصديقا على كلامى احمد رشدى وزير الداخليه السابق كان محبوبا من الشعب لماذا ؟؟ لانه عاقب رجال الشرطة
لقد شاهدت كثيرا من البرامج اغلب المذيعين فرحانين بهذا العقاب كانه يوجد تار مع المدرسين لماذا ؟؟؟؟؟
اغلب الصحف تصف الوزير بانه احسن وزير تعليم لمجرد انه عاقب مجموعه من المدرسين الم اقل لك نحن بحاجة لوزير للاخلاق ياصديقى العزيز

[Observer]

وجهة نظر مختلفة استاذ سعيد
وبصراحة تحمل كثيراً من عوامل الإقناع
ولكن ألا يستحق هذا الرجل ولو بعضاً من هذا الحب
على أساس عمله ورضا الناس عن سياسته
وليس لاعتبارات نفسية اخرى ؟!

تحية اليك صديقى العزيز

[Eslam 2050]

انا عجبانى وجهه نظرك

[doc.honeybunny]

معشوق الجماهير ايه ده ظالم اما يعتمد جدول ثانوية زي ده ايه هو في ايه

[أ/ سعيد موسى]

المشاركة الأصلية كتبت بواسطة mohamad fawzy

وجهة نظر مختلفة استاذ سعيد
وبصراحة تحمل كثيراً من عوامل الإقناع
ولكن ألا يستحق هذا الرجل ولو بعضاً من هذا الحب
على أساس عمله ورضا الناس عن سياسته
وليس لاعتبارات نفسية اخرى ؟!

تحية اليك صديقى العزيز

صديقى العزيز ليس معنى كلامى اننى ضد او مع الوزير انا ضد الفرحه العارمه لكثير من الناس ضد المدرسين !!
وأظن الوقت غير كافى للحكم على الوزير ليس الا