الحقونى !

[hwary]

السلام عليكم و رحمة الله و بركاته


اولا انا مش عارف ان كنتو محل ثقة بجد ولا لا
سورى انا معرفكوش ولا جربتكو فى حاجة قبل كده


بس عموما انا عاوز اقول على مشكلتى لاى حد
و بعدين انتو متعرفونيش اصلا

انا حاسس ان انا لو قلت على المشكلة هرتاح
انا جربت اكتبها لنفسى بس التحسن مكنش كتير

من غير ما اطول

انا عرفت ان حضرتك اسمك ا/ نداء الجنة
و علشان كدة انا هكلم من هذا المنطلق مع العلم انى
مش متأكد من ده

(ان فيه استاة هتشوف ده)
ممكن يكون اللى هيشوف كلامى راجل
و خلى الشخصية سيدة
عشان نثق فيها


المهم
عشان مطولشى عليكى

انا اسمى عبد الله
مشكلتى
انا حددتها
وسميتها
الفراغ العاطفى
انا نفسى احب و اتحب بس المشكلة انا مش لاقى اللى احبها
يعنى هو انا محبتش
بس نفسى احب
اللى مزود المشكلة ان كل اللى حواليا ليه الجو بتاعه وكدة
وانا مليش بقى فانا قدامهم مسكين غلبان
و هم اساسا بيحبوش
واحد بيكلم بنت عشان عاوز يبقى له الجو بتاعه
وفيه واحد بيكلم بنت لحب الامتلاك مش اكتر
واللى بيكلم بنت عشان يغيظ صاحبه بس

انا طبعا معرفش اكلم معاهم لما يتكلمو عن البنات
لان انا مليش جو

انا مبقولهومش انهم مبيحبوش وان ده مش حب
عشان ميتقالش ان مواضيعهم شغلانى و ان انا نفسى ابقى
زيهم بس مش عارف و عشان كده بتحجج

بس فعلا مواضيعهم شغلانى
وكل لما افكر ان مرحلة الثانوية ممكن تعدى من غير ما احب وكدة
اتضايق اكتر

هو انا بجيب سبب المشكلة
لمشكلة تانية
ان انا كنت فاقد للثقة بالنفس
فى يوم من الايام
او فى اغلب الايام


و انا رجحت ده لحاجتين
التربية اللى انا اتربيتها مكانتش تدعم ثقتى
فى نفسى حتى امام قرايبى
و الحاجة التانية ان اسرتى اتعرضت لخسارة
مادية كبيرة ضيعتنا
ابويا كان تاجر كبير و معاه فلوس كتير و الحالة حلوة و زى الفل
بس اتجه لانه يزرع ارض
هيأجر ارض و يزرعها
الناس كلها و اولهم ماما تقوله يا عم كفايه كده
وخليك فى تجارتك اللى بتفهم فيها بس هو عنيد و اصر


فضلنا 6 سنين بحالهم بنخسر بس
ميخشش لينا مليم لحد ما خسرنا اللى ورانا و اللى قدمانا
و بعدين الحاج ابويا قعد سنتين عاطل و امى اللى بتصرف على البيت
مدرسة ابتدائى
بس بمساعدات قرايبنا المادية و بالذات خالاتى عدينا
و بعد كده ابويا بدأ يشتغل تانى

لكى ان تتخيلى احساس واحد كان فوق و بقى تحت
اولا كنت بلبس حلو و بقيت بلبس معفن
و لبس يا كبير يا صغير يا بايظ يا مقطع
المكانة الاجتماعية ابويا كان له برستيج جامد فى وسط مدينتنا الصغيرة
راح كل ده

بس الحمد لله عديت لبر الامان ودلوقتى مستورة و بقيت شاب شيك
و كويس بس
اثار الماضى تلاحقنى

اه وفيه حاجة عاوز اقولها
اصحابى اللى بيكلمو بنات دول تليفونات بس مفيش كلام
وش فى وش
احنا مدينتنا دى مش متحضرة اوى زى الريف مثلا
و انا مش متخيل ده
ان الحب فى التليفون بس

و فى حاجة عاوز اقولها
ان انا فى مدرسة لغات (حكوميه)
و متفوق جدا فى دراستى
كل سنة بطلع من الاوائل


ردى بسرعة

[مس رانيا حسن]

السلام عليكم ورحمة الله وبركاته
اولا احب اطمنك انا نداء الجنة
ثانيا فيه نقطوة احب أكدها لك مش لازم يعنى تحب وانت فى الثانوية
بالعكس حب الثانوية مش حب
تضييع وقت وعواطف سطحية ساذجة مؤقته
ليس وقتها
فالحب يتطلب النضج والاحساس بالمسئولية حتى يتحول الى زواج وعلاقة طبيعيه
نصيحتى لك ان تبتعد عن مثل هؤلاء الرفقاء
وحاول ان تصادق اشخاص جادين متفوقين مثلك
ان شاء الله ستجدهم
بالتوفيق ان شاء الله