هل فخور انك مصري

[من غير ليه]

هل انت فخور انك مصري ؟
سؤال غريب ممكن ناس تنتقدني وتقولي انتي بتقولي ايه انا فخور اني مصري طبعا
وناس تقولي لاءه اصلي مبحبش مصر
انا عن نفسي بحب مصر جدا لكن لما اسمع ان في فيلم مصري فيه حاجات مخالفة للحياء والدين ساعتها بتكسف اقوي وقول ياريتني مكنت مصرية بحس ان مصر فيها ناس كتير بتعمل حاجات غلط تخلي الواحد يحط راسه في الرمل وخاصة لما بشوف البرامج الاخبارية واللي بتعرض فضايح الشعب المصري اللي مش لاقي ياكل واللي مش لاقي يتعالج ده وصلت ان لو حادثة عربية عادية حصلت بيجيبوها في البرنامج كأن مصر هي الوحيدة اللي فيها حوادث

وفي نفس الوقت لما افتكر احمد زويل والشعراوي واحمد عرابي وا**** يعقوب ببقى فرحانة قوي اني مصرية
هو في فرق طبعا كونك بتحب البلد وانك تفتخر انك منها

اصلي طول عمري كنت عيشة بره ورجعت من كام سنة وحاسة اني مش مرتاحة في مصر ونفسي ارجع برة تاني كاني هافضل مغتربة طول عمري

[بروف انس]

طبعا انا فخور ان انا مصري وودي طبعا احسن حاجه افتخر بها وانا مش مسئول عن الاخطاء اللي بيعملها غيري من معدومي الضمير واذا كانت البلد مش في عزها ولا مجدها فاحنا ان شاء الله هنخليها احسن بلد رغم عن الحاقدين وايه هي مصر اساسا مصر مش نيل وارض مصر ناس

مش عارف ليه الموضوع بقي كل مش يلا مش مهم

[الطامحة للافضل]

انا طبعا فخورة انى مصرية كفى شرفا ان مصر اسمها فى كتاب رب العالمين وان شاء الله ححاول ارفع شان بلدى

[..Just Stop]

سلام عليكم
ارفع رأسك يا اخى انت فى بلد العجائب
الست نانسى قالت لو سألتك انت مصرى تقوللى ايه ( هقوللها علامة تعجب هفكر وارد عليكى )
الحكاية مش حكاية انا مصرى اولا
او شعارات فى حب مصر وكلام يفط وجرايد
اى واحد طبيعى انه يحب المكان اللى اتولد فيه واتربى فيه
بس حكاية انى افتحر او لا بتتوقف على حاجات
منا مشوفش البلد ضايعة وفيها فساد وبلاوى سوداء(سورى على اللفظ )
واقول انا فخور
انا افتخر لما الاقى المكان اللى انا فيه كويس
انما الاقيه بالمنظر دا طبعا مقدرش افتخر
فى حاجات معين بفتخر بيها انما لو بصينا لبلدنا بنظرة عامة
هنلاقيها ليس فيها مجال للفخر
وفى الوقت دا يحضرنى موقف من فيلم ( ...)
لما حسين فهمى سأل احمد السقا وقالله انت بتحب امك قالله اه
قالله ليه قاله علشان دى امى ولازم احبها
قالله يعنى مش علشان هيا اجمل ام فى الدنيا
ملخص الموقف
ان فى فرق بين الحب والفخر
شتان بين هذا وذاك بس لو اجتمع الحب مع الفخر
اكيد هتبقا الدنيا بمبى اوى
لكى الله يا مصر
دمتم فى رعاية الله

[_GUIDE_]

هل انت فخور انك مصري ؟

ساعات لما المنتخب بيكسب

[boy&وداعة&kind]

المشاركة الأصلية كتبت بواسطة من غير ليه

هل انت فخور انك مصري ؟

أولا أكيد كلنا بنحب مصر لأنها البلد اللى اتولدنا فيها وربنا زرع فينا حبها وده مش مجال للنقاش ومفيش شك فى كده
ثانيا بقى حكاية أنى أفتخر أنى مصرى بتكون أوقات يعنى لما أشوف عالم مصرى بياخد جايزة ولا فنان مصرى بيتكرم بره ولا المنتخب بيحقق فوز ببطولة ولا حاجة
وكما قال الزعيم مصطفى كامل (لو لم أكن مصريا لوددت أن أكون مصريا)
وقال أيضا(عم قول يارب)

[Kareem Ahmed]

انا مصرى و ابويا مصرى

[عاشق لغة الضاد]

انا شخصيا مش فخور لانى مصرى.......... ليه

لانى مقدرش فى بلدى اخلى ابنى (وكيل نيابة ) لان دا محجوز لناس بعينهم
لانى مقدرش فى بلدى اخلى ابنى (ضــــــابط ) لان دا محجوز لناس بعينهم
لانى مقدرش فى بلدى اخلى ابنى (فى وظيفة محترمة )لان دا محجوز لناس بعينهم
لانى حاسس انى مصر ملك ناس بعينهم وانا غريب مش مصرى مش مصرى مش مصرى

[BaNZeR]

احم

الموضوع ده مكرر

[عاشقـــ الانمى ـــة]

من الطبيعى اى انسان متبهدل فى مصر بيكرهها
وبيحاول يبعد عنها باى وسيلة حتى لو كانت هجرة غير شرعية
لانوا مفكر انوا هيشوف العز فى اى بلد تانية
بس بجد لو سافر بره
بيحن ليها ولاهله
ومستعد يعيش فيها
مهو كده هيشقى وكده هيشقى
ال ميحسش بحب مصر الناس ال متغربين بره
بيحسوا بحنين للوطن
انا قريبتى متغربة بره وعايشة مع جوزها فى انجلترا
بتكره اليوم ال وافقت فيه انها تتجوز وتعيش بره
هى نفسها ترجع مصر تحسن بالامان تبقى وسط اهلها
عايشة فى انجلترا
بعيدا عن بلاوى البلد
لو جينا للجانب المشرق فى الموضوع
هتلاقى مصر بلد الامن
مش هتلاقى عنصرية بين المسلمين والمسيحين
بعكس البلاد التانية
هتلاقى العنصرية موجودة فى اى بلد تانية
شوفت مرة مقولة للبابا شنودة لما اكنت بقرا عن مقالة مرة
مصر ليست وطناً نعيش فيه بل هى وطن يعيش بداخلنا غير قابلة للمزايدة عليها ولا بها
وياريت دايما نحاول نبص لل اقل مننا
هو دا عيبنا اننا دايما نبص لل اعلى مننا

[** ضي القمر **]

لا مش فخورة بيها
لان مصر كمان مش بتحافظ على ولادها وتخليهم يفتخرو بيها

لما كنت صغيرة كنت بحبها
بمكن علشان كنت لسة صغيرة وعبيطة
بس دلوقتى لا
هحبها ليه وانا بشوف شباب زى الفل وبشهادات عالية وتقديرات ممتازة مش لاقى شغل
هحبها ليه لما تخلى شباب زى دول يقول اعمل ايه يعنى اتاجر فى المخدرات ولا اروح اموت نفسى
لما بندموا على السنين اللى ضيعوها علشان الشهادات وفى الاخر يوم ميلاقى شغل بتبقى فى مطعم او محل
صحيح كان ايه لازمتها الشهدات بقى؟؟
زعلانة من مصر وزعلانة علشانها
بس مش فخورة بيها

[..Just Stop]

ساعات لما المنتخب بيكسب

وزى ما مصطفى كامل قال
لا يأس مع الحياة عم قول يارب

[hema nasr]

لو لم اكن مصري لوددت ان اكون مصرى

[يالا بينا]

الحمد لله على اني مصرية
عايزة اوضح لحضرتك حاجة:
لو كنت عايشة ف عصر غير ده كنت افتخرت بمصريتك.......
ليه؟
لانه كان هيكون عصر ازدهار ومصر فيه قمة ف كل حاجة.....
لكن دلوقتي الأوضاع عايزة شوية تظابيط....
في مشكلة مهمة......
مصر هي الارض والمعالم والعبق والتاريخ والمكانة عند ربنا
وليس الحكومة
رجاء انتبهوا للحكاية دي
لو في غلط ف الاوضاع
يبقى من عندنا.....

[طالبة حزينة]

موضوع كمييييييييل خالص

اولا اهلا بيكي معانا في المنتدى

اتمنى انك تكوني مبسوطة فيه

ويا رب كده يكتر من مشاكاتك ومواضيعك

بالنسبة للموضوع :-

طبعا طبعا انا فخورة وفرحانة اني مصرية

(مصرية وافتخر)

ده شعاري

لان مصر بصراحة متقدمة في كل حاجة

صحيح في سلبيات ولكن الكويس ملوش دعوه بغيرة من المش كويسين

مثلا يعني لما بيعلنوا عن مصر ويقولو البيت بيتك

يجيبوا الرقاصة كرمز لمصر

مثلا كلمة يحيا الفخراني مصر قبلة الفنانين العرب

يا ريتها ما كانت


وغيرة من الحاجات الى بتحزن بس و مع ذلك افتخر