مش عارفة ادخل بشرى ولا اسنان

[الطامحة للافضل]

يا جماعة انا محتارة اوى ما بينهم انا الصراحة بحب البشرى وعجبتنى مواده بس خايفه اضيع عمرى على مفيش اما الاسنان فحسيت ان الشغلانه كلها بتبقى متركزة على حاجة واحدة طول عمرى شغالة فيها وده ملل قاتل بس بابا قاللى ان مفيش حد بيحب يروح عند دكتورة اسنان وبيفضلوا الدكتور وماما اصلا دخلت طب وبتقوللى انها متعبة جدا ومحتاجة سنوات طويلة عقبال ما الواحد يبان فالصورة ويبقى ليه اسم انا الصراحة من وانا صغيرة عاوزة ادخل طب وخلاص لانى بلاقى ماما دايما بتحظى بنوع من الاحترام وكمان فيه ناس بيتصلوا بيها عشان تشتغل فى السعودية من غي ما تتصل بيهم يعنى واضح ان الفرص كبيرة بس بلاقى ناس بتاخد 300 جنيه فى الشهر ودى طبعا مهزلة بالنسبة للتعب اللى بيتعبوه فى الكليه انا الصراحة فى الاول اقتنعت باسنان وقولت ادام احياء خلاص بس وانا جاية بكتب الرغبات افتكرت نفسى بعد ست سبع سنين بشد فى سنان حد واحشى وقرفت صراحة وكتبت طب وبعدين حسيت انى ظلمت نفسى وحملت نفسى شقا بجد انا مش عارفة اعدل ولا اكمل من فضلكوا حد يقولى اعمل ايه؟

[واحدة وخلاص]

اقوللك ايه انا زيك هموت من الحيره بس انا كتبت طب وبعدين صيدله وبعدين اسنان وبابا بيقوللى احط الاسنان قبل الصيدله وانا شايقه ان الصيدله والاسنان كويسين بس فى ناس بيقولولى خساره المجموع ع الاسنان والصيدله ومش عارفه اعمل ايه

[الطامحة للافضل]

شكرا على مرورك والله بصى خلاص هما حيقفلوا التنسيق بتاع المرحلة الاولى يوم الجمعة الساعة سبعة فخلاص بس انا خايفه اندم اصلنا لو دخلنا طب حنيجى على سنة خمسة نلاقى صحباتنا اللى فى صيدلة واسنان خلصوا بصى انا عن نفسى زهقت من انى اسال الخلق رحت سالت ربهم واستخرته وان شاء الله مش حنندم انا خلاص بجد استقريت على بشرى والحمد لله بس انتى المهم تكونى متاكده انك بتحبى بشرى سيبك من المجموع المهم ميولك

[thedentistmod]

اسنااااااااااااااان
انا كنت جايب 99.15 من 3 سنين و دخلت اسنان و مش نادم

[dr:sniper]

صيدله

الا اذا كنتى عايزة لقب دكتورة


فى نظرى اسنا او صيدله

احسن للبنت بالذات

لانها 5 سنين بس وهتخلص

لكن الطب 6 سنين

غير الامتياز

وبعد ده كله ممارس عام

لازم 2 ماجستير

وشغل ربنا الاعلم بيه
لكن الصيدله 5 سنين وتخلصى نفسك وتفتحى صيدليه

وع العموم كل اللى يجيبه ربنا كويس

[الطامحة للافضل]

يا جماعة انا جتلى طب اسكندرية الحمد لله غاوية شقا هههههههههه