عايز مدرس بس يكون باله طويل !

[stoneKane]

السلام عليكم انا مبعرفش احل الاسئله اللى من النوعيه دى ( كون القضايا الاتيه مع ذكر السبب) قضية مهمله و تركيبيه و شرطيه متصله ايه المطلوب منى بالظبط وعلى اى اساس هكون القضايا دى وفيه نوعيه تانيه من الاسئله وهى

كون قياسا صحيحا من الشكل الاول يستغرق اكبر عدد من حدوده

اذا صدقت القضيه "" معظم الفلاسفه مصلحون "" فما حكم القضيه التى تقابلها بالتداخل مع التعليل

يا ريت حد يفهمنى ايه المطلوب منى فى كل الاسئله دى

[Ahmed-Magdi]

يامان مش ينفع تدخل امتحان من غير ماتكون مزاكر الفصل الرابع كويس جداً لأنه اساسي في الامتحان

وبردو الفصل الخامس الي فيه الحدود المستغرقة وكون قياس ده سؤال اجباري

راجع مزكرات الفصل الرابع والخامَس في أسرع وقت لأن الحاجات دي لما مش بتتزاكر من اول السنة

بتلاقي صعوبة في فهمها و صمها قبل الامتحان بكام يوم والمنطق كلو نفس الكلام

ربنا يوَفقك وحآول تنجز

[d.b]

ياريت اقدر اساعد بس انا هقول الحل اللى بحلة فى الدرس

اول حاجة بتكتب القاعدة وهى
كل الاحكام ياتى عكسها
ماعدا التقابل بالتضاد
تكون المتقابلة معها بالتضاد غير معروف
دة اولا ولازم تكتبها فى اى مسالة

بعد كدة بتحدد نوع القضية
سواء ك.م
ك.س
ج.م
ج.س

وبتشوف هى صادقة ولا كاذبة
وبعد كدة ترسم المربع
وتشتغل عادى

اما بالنسبة للتعليل
بيكون بالشكل دة
ولازم تحفظ احكام التناقض والتضاد والتداخل و الدخول تحت التضاد

[d.b]

بصراحة ان مش عارفة اكمل شرح ازاى بس انا هقولك اجابة المسالة بتاعتك ويارب اكون ساعدتك
فى المسالة بتاعتك بتنزل بالقاعدة وبترسم المربع
وعندك هنا فى المربع
هتكون ك.م قضية صادقة
ك.س كاذبة
ج.م صادفة
ج.س كاذبة
وبيكون التعليل كالتالى
اولا التناقض
حكمة لا يكذبان معا ولا يصدقان معا
ج.م قضية اصلية حكمها صادقة تتقابل بالتناقض مع ك.س وحكمها كاذبة
ثانيا الدخول تحت التضاد
لا يكذبان معا وقد يصدقان معا
ج.م قضية اصلية حكمها صادفة تتقابل بالدخول تحت التضاد مع ح.س حكمها صادقة
التداخل ملوش قانون
فبتقول ج.م قضية اصلية حكمها صادقة تتقابل بالتداخل مع ك.م


وياريب اكون ساعدتك واى استفسار انا موجودة

[totti_pop_2008]

كلام db صح

[stoneKane]

شكرا جدا ليكوا انا مذاكر الفصل الرابع والخامس بس التطبيق بتاعهم مش عارف اعمله بس عرفته الحمد لله بعد كلام db شكرا ليكى بجد

[نهي نوير خميس]

بالنسبة لتحديد القضايا المهملة(القضية التي ليس لها سور)
مثال:الفاكهة شتوية(لم نحدد سور لها)لكنها قضية جزئية موجبة لأن ليست كل الفاكهة شتوية
مثال2:الإنسان فنان،،الخضروات مفيدة
بالنسبة للقضايا التركيبية: هي القضايا التي يكون محمولها(الخبر)مستمد من الواقع الخارجي (أي قضية تاريخية أو من العلوم الطبيعية أو المجتمع أو من البيئة قضايا تركيبية)
مثال:أحمس طارد الهكسوس//نيوتن مكتشف الجاذبية
مثال2:الحديد معدن يتمدد بالحرارة

[نهي نوير خميس]

القضية الشرطية المتصلة هي التي تتكون من قضيتين بسيطتين تربطهما أداة شرط(إذا)
وسميت متصلة لأن تحقق المعني في القضية الأولي يؤدي إلي تحقق المعني في القضية الثانية
مثال:إذا ذاكرت دروسك تنجح في الإمتحان

أما بالنسبة لسؤال القياس(كون قياسا صحيحا من الشكل الاول يستغرق اكبر عدد من حدوده)
الكليات تستغرق موضوعها والسوالب تستغرق محمولها
القياس كما يأتي
كل العرب ليسوا مصريين
كل الناس عرب
_________________
كل الناس ليسوا مصريين
المستغرق(العرب،المصريين،الناس)

[d.b]

لا شكر على واجب ياجماعة
دى اقل حاجة واى حد عايز حاجة انا موجودة

[هانى المنفلوطى]

الى صديقى
احب اقولك قاعدة
اى جملة تبدأ ب (إذا) تصبح قضية مركبة شرطية متصلة
اى جملة تبدأ ب (إما ....... أو........) تصبح قضية مركبة شرطية منفصلة
اى جملة خبرية من غير الادوات السابقة تصبح بسيطة حملية مطلقة الحكم
وبعدين لقيت فيها سور من الاسوار اللى تعرفك هى ( ك.م - ك.س - ج.م - ج.س ) تعرف تحدد كمها وكيفها
لو لم تجد ما يحدد الكم والكيف تبقى مهملة وتحدد كلية او جزئية حسب المعنى
ولو بتبدأ بأسم شخص اعرف انها كلية دائما ( شخصية )
وذلك بدون تلخبط نفسك او اسئلة التعقيد

[موجه . ريم]

بالنسبة لموضوع القياس عندما يطلب منك قياس نستغرق فيه اكبر عدد من حدوده . أكثر من( كل ؛ ليس) بس تحتفظ بقواعد القياس . مثـــــــــــــــــــــال
كل العرب ليسوا مصريين
كل الناس عرب
كل الناس ليسوا مصريين

اما عندما يطلب منك قياس نستغرق فيه اقل عدد من حدوده قلل من (كل وليس) بس تحتفظ بقواعد القياس . مثــــــــــــــــــال
كل العرب مصريين
بعض الناس عرب_
بعض الناس مصريين
مع أطيب تحياتى : أ. حمادة كامل . معلم علم نفس وفلسفة . بالفيوم