ناوي على طب يبقى تعالى هنا

[كاريمان]

اه نسيت
القاهره ولا عين شمس
بصراحه بصراحه
القريبه منك
لانك تقريبا بتقضى معظم اليوم فى الكليه
بتنزل بدرى وبترجع متاخر
لو الاتنين قريبين او بعاد عنك
ف انا مقدرش اقولك على عين شمس حاجه لانى معرفش عنها غير اللى سمعته وكله كلام
لكن اقدر افيدك طبعا عن القاهره
وهاقولك مميزاتها وعيوبها على السواء
بس انت لو دخلت على الجروب هتلاقى ناس كانت فى عين شمس وحولت عندنا تقدر تسالهم عن الافضل و انت قرر بنفسك فى النهايه

[كاريمان]

هنتكلم النهارده عن


Biochemistry



ودى بقىبتناقش كيميا الجسم و التفاعلات اللي بتحصل جواه
وعليها 150 درجه

ورغم انها تعتبر من المواد االصغيره الا انها السهل الممتنع بكل ما فى الكلمه من معنى

ولازم تتذاكر اول ب اول





الماده دى تانى اهم مكان هتتصوروا فيه وهتعملوا فيه مقالب فى بعض واكتر مكان بعد الاناتومى هيدمرلك الطقم اللى بتحبه وحبكت معاك تلبسه يومها

ايوة اسمعوا صوت ضحكات شريرة متقطعه



المهم ندخل فى الموضوع

هتدرسوا فيها الاتى


carbohydrates

بتدرس تفاعلات الكربوهيدرات فى الجسم وازاى بتتكون

lipids

و بنعرف ايه هي الاحماض الدهنيه و الكوليسترول و دخوله في
مركبات كتيره زي الهورمونات و عمل كل هرمون منهم كمان البروتينات و اللي
بتتكون من احماض امينيه و ارتباطها لتكوين عديد الببتيد و اشكال البروتينات
المختلفه و وظائفها اما بقى المتعه اللي بجد هتبدأ مع دراسه الاحماض
النوويه
DNA & nucleic acid





جزء شبيه باللي درسناه في الثانوي بس مع
تفصيل اكتر , الجزء ده مهم جدا و لذيذ جدا في فهمه كمان في جزء ظريف و هو acid base balance

او التوازن بين الاحماض و القواعد و ازاي
الجسم بيحافظ على نسبه ثابته بينهم و الامراض اللي بتغير النسب دي دا فيما يتعلق
بالنظري عملي البيو
لذيذ جدا و سهل جدا لو اهتميت بحضور السكاشن بنعمل تجارب تخليك تقدر
تعرف المحلول اللي قدامك ده carbohydrates ولا protiens الخ...


طيب ايه الكتب ومصادر المذاكره بتاعتها ؟

هما 3

1. كتاب القسم " بيبقى ملون وورق فخم ..هكتفى بالتعليق عليه بكده"
   
   
2. كتاب دكتور رشيد " ودا بيكون اتنين كتاب فيه الداتا شو اللى دكتور رشيد بيعرضها وهو بيشرح ودا ناس كتير واللى بتحضر لدكتور رشيد بتجيبه بجانب كتاب القسم عشان تتابع مع الدكتور
   وفى كتاب شرح لكنه بيكون شرحه رائع لكن كتير جدا على اللى مطلوب منك تعرفه
   ودكتور رشيد هنتكلم ونحكى عنه كتير اوى لانه من اعظم الدكاتره اللى ممكن تقابلهم فى حياتك
   
   
3. ملازم دكتور عباس
   دكتور عباس دكتور شاطر وهو بيشرح فى السكشن مش فى المحاضرات ملازمه كويسه وناس كتير بتذاكر منها وبتجيب امتياز هى بالظبط زى ملازم الدروس ..بتجيب المفيد

اشهر الدكاتره


بص بقى

فى كام دكتور فى الكليه كده هما اعلام القصر العينى

مينفعش تدخل القصر ومتعرفهمش

ومينفعش متعرفهمش ومتحبهمش

دكتور رشيد بقى حاجه لوحده كده

ربنا يديه الصحه وطوله العمر يا رب







تخيل لما دكتور فى سنه ومركزه ينزل كل يوم فى الاسبوع الساعه 6:30 صباحا
عشان يدى محاضرات لاولى وتانيه
مجانا
وخارج الجدول الرسمى للكليه
دكتور رشيد بجانب علمه
هتتعلم تكون انسان بجد

حضرتك بقى بيبقى عندك مرتين او تلاته فى الاسبوع من 7:8 محاضره لدكتور رشيد فى مدرج 11
دى حاجه كده من بديهيات القصر
" وتسهيلا للى بيتهم بعيد او للى مش بيقدر ينزل لاى سبب كان
المحاضرات بتاعت السنتين اللى فاتوا متصورين فيديو
وان شاء الله محاضرات السنه كمان هتتصور "

دوس هنا كده
لينكات تهمك


بجانب ان فى جزء فى المنهج الدكتور بينزل يشرحه بنفسه حسب جدول المحاضرات



فى كمان دكتور عباس
الدكتور بيشرح فى الكورسات بس مش بينزل المدرج

فى دكاتره ممتازين بينزلوا المدرج
زى د/ عبد العزيز
د/ ايمان عبيه

[ayoya32]

عايزه حد يكلمني عن طب شبين

[رقية صقر]

انتى خلتينى احب طب القاهرة وووى يا رب الحقها
بس انا لما باجى اخش ع اللينكات مش بيرضى يدخلنى عليها بيقولى الصفحة غير متاحة مش عارفة ليه
ولو عايزة مثلا ف الرغبات ابدل بين القاهرة وعين شمس لانى كاتبة عين شمس الاول اعملها ازاى ؟؟

[كاريمان]

المشاركة الأصلية كتبت بواسطة ayoya32

عايزه حد يكلمني عن طب شبين

والله كان نفسى افيدك بس معنديش فاكره عن شبين خالص

بصى انا لقيت دا

عرف كليتك وساعد غيرك

ان شاء الله تلاقى حد من طب شبين

[كاريمان]

المشاركة الأصلية كتبت بواسطة رقية صقر

انتى خلتينى احب طب القاهرة وووى يا رب الحقها
بس انا لما باجى اخش ع اللينكات مش بيرضى يدخلنى عليها بيقولى الصفحة غير متاحة مش عارفة ليه
ولو عايزة مثلا ف الرغبات ابدل بين القاهرة وعين شمس لانى كاتبة عين شمس الاول اعملها ازاى ؟؟

ان شاء الله ربنا هيكتبلك الحاجه اللى هتسعدك ويكون لك الخير فيها

اللينكات مش عارفه
طب هاقولك
ادخلى هنا كدا وبعدين جربى ترجعى وتفتحيهم تانى

دفعه 2014/2020

لو مشتغلش برضه ابعتى لى وهاشوف المشكله فين

الرغبات تقدرى تعدليها زى ما تحبى
بتفتح موقع التنسيق تانى
وتكتبى رقم الجلوس والرقم السرى زى ما عملتى وانتى بتكتبى التنسيق
هتطلع القائمه اللى انتى عملتيها
اختارى تعديل القائمه

[كاريمان]

ازاى تذاكر
بص
فى الاول كده الماده دى بتبقى مش فاهم لها اول من اخر
هى فهم ولا حفظ وتركز على ايه وتسيب ايه
هى الاتنين
لازم فهم عشان تحفظ
وكتاب القسم بجد بقى حلو اوى
وبقوا يهتموا بالحاجات الكلينيكال ويحطوها فى مربعات صفرا كده مميزه
وحتى فى الامتحانات لما تسال ايه المهم الاجابه دايما ركز على المربعات الصفرا
بس البيو وتقريبا معظم المواد فيهم حاجه مشتركه
بيتنسوا
لكن البيو زايد حبتين الحكايه دى
عشان كده المراجعه مهمه جدا
ولو نص ساعه فى الاسبوع تراجع فيهم على السريع كده الحاجات القديمه المهمه


نظام السكشن
هتلبس البالطو تانى
بس المره دى ضرورى انك تلبسه مش للمنظره والتصوير
انت بتعمل تجارب بايدك
بتتعامل مع مواد كيميائيه ونار و"مقالب من صحابك " ومصيرك لو انت محظوظ شويه يقف دايما جنبك واحد بيمسك الانبوبه ويخليها ناحيتك برغم كل التحذيرات والتهديدات اللى بتقولها له
فى النهايه لو ملبستش البالطو على اخر السنه مش هتلاقى هدوم سليمه تلبسها

فى سكشن البايو انت بتعمل تجارب عشان تعرف دا كربوهيدرت ولا بروتين بتميز المواد عن بعضها

نظام الامتحان
بيكون فى امتحان ترم فى نهاية الترم الاول
وفى امتحانات لاعمال السنه
زى
end course exam
spring exam
وفى امتحانات اخر السنه
ودول امتحان عملى ..وهنا بيكون فى ماده مجهوله وبتعمل عليها تجارب عشان تعرف هى ايه
امتحان نظرى ..واى امتحان نظرى بيتقسم ل MCQ اللى هو اختر ما بين الاقواس
و كمانwritten ودى بقى بتتنوع ما بين فسر و اكتب نبذه مختصره عن و حول المركب الفلانى للمركب العلانى

وامتحان شفوى

اممممم
اعتقد دا كدا البايو تمام

[كاريمان]

HISTOLOGY

علم دراسه الانسجه
ماده صغيره ولذيذه
ب 150 درجه
هتقابل فيها دكتور ايمان صادق ودكتور منه
امهاتنا فى الكليه
الطيبه كلها

بترس هنا بقى انسجه الجسم
بتتكون من ايه وازاى بتشتغل
تركيبها
وشكلها تحت الميكرسكوب
والصبغات اللى بتحتاجها عشان تعرف تشوفها
عارف فى افلام الخيال العلمى
لما بياخدو خليه الوحش ولا الكائن الفضائى ويشوفها تحت الميكرسكوب
هى دى بفى الهستولوجى








الكتب
هو كتاب القسم مفيش غيره
ممكن حد من الدكاتره ينزل ملخص لجزء او تجميعه لجزء
بس فى الاول والاخر كتاب القسم

اشهر الدكاتره
د/ ايمان صادق ...وكانت رئيسه القسم لحد السنه اللى فاتت بس
د/ منه
د/ داليا المراكبى
د/ جيهان ...دكتورة سكر بكل ما فى الكلمه من معنى ...لو نزلت احضروا لها

ازاى تذاكرها
لازم تحضر المحاضرات
بجد ..مينفعش تعتمد على التسجيلات
الا لو هتتفرج على المحاضره فيديو ..وحتى دى لازم يبقى معاك الداتا شو اللى الدكتور بتشرح منها
الهستو ماده بتعتمد اعتماد كلى على اللى بتشوفه وعلى التفاصيل
ودى ممكن تكون الرخامه اللى فيه
تفاصيل تفاصيل every where
عشان كده لازم تتابع مع الدكاتره لانهم هيثبتولك المعلومه ويقولوا ايه المهم وايه اللى ممكن تعديه


نظام السكشن

سكشن الهستو يا سيدى بيبقى جزأين
الاول الدكتور بتشرح وترسم على البورد الرسومات اللى عليكم
" بالظبط زى ما سمعت رسومات عليكم
الهستو ليها كراسه عملى بتترسم
وبتتعلم كل سكشن
وبتتسلم يوم امتحان الشفوى وب 2.5 درجه تقريبا
ولغلطه اللى كتير بيعملها انه بينساها او يتاجهلها ويجى يحتاس فى الاخر
ارسم السكشن فى اسبوعه عشان الحاجه متتراكمش عليك "

بعد ما الدكتور تخلص
بيتقفل النور والشبابيك عشان الداتا شو
ايه الداتا شو
سينما حضرتك
بيتعرض الصور او الفيديوهات او اى حاجه الدكتور عايزاكم تعرفوها على البورد
وتوريكم الصور اللى انتم هتشوفوها تحت الميكرسكوب
بعد ما السكشن يخلص
بتروحوا وتتفرجوا على الميكرسكوبات اللى موجوده فى السكشن
وبتسالوا الدكتور بقى على اللى انتم عايزينه


نظام الامتحان

الهستو اكتر ماده هتمتحن فيها طول السنه
تقريبا كل اسبوعين امتحان
متتخضش
دى حاجه كويسه اوى
دا نظام كانت دكتور ايمان عملاه اسمه ال bonus
حاجه كده عامله زى المستوى الرفيع قبل ما يتلغى من عليكم
خدتها بتاخد درجات تعوض النقص اللى ممكن تنقصه
مخدتهاش عادى مش هتضرك فى حاجه
عشان كده دايما درجات الهستو احسن درجات

فى برضه امتحانات اعمال السنه
ودى بتكون اسمها الميد تيرم
بتمتحن اتنين فى الترم الاول
واتنين فى الترم التانى
" يارب يكون النظام دا زى ماهو "

فى امتحان الترم مع نهايه الترم الاول
وفى امتحانات الفاينال
برضه عملى
ودا بيكون كذا جزء
بشوف داتا شو وتقول هى ايه
وتشوف الميكرسكوب وتميز اللى موجود على الشريحه
وبيقولولك على رسمه ترسمها

فى امتحان النظرى
برضه MCQ & written

وامتحان الشفوى
عن طريق الكروت
بتدخل للدكتور وتسحب كارت او كارتين فيهم اسأله والدكتور اللى قدامك بيسألك فيهم
شفوى الهستو من احسن الشفوى اللى هتدخله فى الكليه


فى حاجه اخيره عايزة اقولها عن الهستو
اسال على على الجروب الرسمى للهستو بتاع دفعتك
دكتور منه بتعمل جروب رسمى تبع القسم بيكون عليه دكاتره القسم
الجروب دا فى تفاعل كبير جدا وفورى من الدكاتره
بينزلوا شرح وصور وفيديوهات وملخصات والحاجات المهمه واخبار القسم وامتحانات تجرب فيها نفسك
ويجاوبوا على اسئلتك
بجد قسم الهستو اكتر قسم هتحس فيه بالتفاعل المباشر مع كل الدكاتره بتوعه

[chalijaly]

مجهوووووووود ممتاز الله ينور عليكى يا دكتورة,,,

[كاريمان]

اللى متابع بقى
كده فاضل ماده واحده الاناتومى
وبعدين نفضى بقى للقصر بحكاويه

[soskadoll]

المشاركة الأصلية كتبت بواسطة كاريمان

اللى متابع بقى
كده فاضل ماده واحده الاناتومى
وبعدين نفضى بقى للقصر بحكاويه

شغل عالى اووى

[chalijaly]

يا دكتورة معلش هو الماجستير ياخد كام سنة...وازاى الواحد يلحق يحضر بدرى بدرى علشان ميضيعش عمره كله فى المستشفى والوحده
يعنى ينفع الواحد يخلص الامتياز ويحضر ماجستير بعديها على طول؟؟

[الاولى ان شاء الله]

ربنا يوفقنى وادخل طب واتكلم معاكى عن كل حاجة فى الجامعه
الى انا لسه مرحتهاش

[كاريمان]

المشاركة الأصلية كتبت بواسطة chalijaly

يا دكتورة معلش هو الماجستير ياخد كام سنة...وازاى الواحد يلحق يحضر بدرى بدرى علشان ميضيعش عمره كله فى المستشفى والوحده
يعنى ينفع الواحد يخلص الامتياز ويحضر ماجستير بعديها على طول؟؟

الماجستير اقل حاجه سنتين " وقريت فى جامعه ما ان اقصى حاجه 5 سنين "
معنديش فكره اكيده اذا كان ينفع تحضر الماجستير بعد الامتياز على طول ولا لأ ...هسال وارد عليك

[كاريمان]

المشاركة الأصلية كتبت بواسطة الاولى ان شاء الله

ربنا يوفقنى وادخل طب واتكلم معاكى عن كل حاجة فى الجامعه
الى انا لسه مرحتهاش

ان شاء الله ادعى انتى بس الدعاء بيغير الاقدار