°؛¤ّ,¸¸,ّ¤؛°`°؛¤ّ,¸ارتقِ على المنبر....فأنت الداعية°؛¤ّ,¸¸,ّ¤؛°`°؛¤ّ,¸

[دكتور محمود فتحي]

السلام عليكم ورحمة الله وبركاته

الف شكر يا شريف على دعوتى لهذا الموضوع القيم والذى اعتبره احد العلامات المميزة فى المنتدى واعتذر بشدة عن تأخري فى كتابة الخاطرة.
لقد عرفت بشأن هذا الموضوع الجميل قريبا جدا وندمت بشدة لاننى لم اعرف به منذ فترة واتابع الخواطر الموجودة به .
يمكن هااتكلم معاكم على طبيعتي جدا وبرضوا اعذرونى لانى هااتكلم باللغة العامية شوية لكن بجد انا باعتبر الخاطرة او الكلام اللى هااقوله من اهم الاشياء فى حياتي انا باشوف ان صلة الرحم هى اهم شيء فى الوجود طبعا انا نشأت فى اسرة مكونة من اب وام واربع بنات وانا الولد الوحيد وكنت اصغر واحد فى الاسرة وطبعا دلع شديد جدا مش فى الطفولة بس لا دة حتى مرحلة الجامعة والدلع تحول لانانية وبعد عن الجو الاسري يعنى علاقتى باخواتى البنات ووالدتى فى البيت كانت شبه منعدمة وفى مشاكل دائمة وكنت باشوف فى البيت شخص واحد بس واحب شخص واحد بس هو والدى ومش يعنيني اى حد بعد كدة . مش كان فيه اى تفاهم مع اخواتى البنات وطبعا كان وقتها احوالنا المالية ممتازة جدا لان والدى كان موظف كويس وكان بيتاجر برضوا وطبعا الولد الوحيد كل حاجة متاحه له بعد كدة كل حاجة بدأت سريعة جدا جدا والدي خسر كل الفلوس والشغل وتعب وفجأة مات الموت فى حد ذاته حقيقة لا مفر منها لكن المفاجاة كانت غير متوقعة نهائيا لانه كان معايا وكان ماشي عادي فجأة لقيت نفسي فى مواجهة مع الموت ومات والدى وترك وراه تركة كبيرة من الديون واسرة المفروض انى اكون محله فيها وطبعا انا غير مهيأ نفسيا لاى حاجة على فكرة والدى توفى بعد ظهور نتيجة السنة النهائية فى الجامعة عندى بايام . مش عرفت كنت اعمل ايه الماديات ممكن تتعوض لكن المسئولية وحاجات كتير تانية صعب اوى انها تيجي بين يوم وليلة . ربنا الهمنى وروحت على قبر والدي فى نفس اليوم واول شيء شعرت ان ربنا وفقنى فيه انى مش بكيت دمعة واحدة امام اخواتى البنات او امي كان كل بكائي على قبره هو وفعلا بكيت لساعات ووعدته انى اكون الانسان اللى كان يحب يشوفه قبل ما يموت خاصة مع اهله واخواته البنات ومن يومها وانا فعلا اخ ووالد وصديق واتغيرت تماما ومن يومها فعلا نظرتى للدنيا اتغيرت اوى وحسيت بسعادة بجد انا عمرى ماحسيتها خاصة ان امي واخواتى كلهم راضيين عنى ودة من رضا ربنا سبحانه وتعالى ودلوقتى بجد اخواتى البنات بالذات رغم انى اصغرهم الا ان اى قرار مش ممكن ياخدوه الا بعد رايي معاهم والحمد لله اوى فى كدة . اتمنى انى مش اكون اطلت عليكم بس بجد كان نفسي اقول انى اى واحد عايز ينجح بجد فى الحياة وكل الناس تحبه وقبلهم طبعا ربنا يحبه لازم اهله يكونوا راضيين عنه . على فكرة نسيت اقول انى ودة بدعاء والدتى واخواتى قدرت اسدد ديون والدي واعمله شيء من ملايين افضاله عليا وعلى الاسرة كلها