مين معاه عـَلـَم أبيـض بخطيـن حـُمر زياده

[hazem_ayman]

خالييـّني أتكلم بلسان مـُشجع الدرجه التالته العادي ، فلنفترض إني مـُشجع درجة تالته عادي وبروُح مباريات الزمالك كلها،، تعالوا نحسب حاجه سوي مع بعض





المباراه في الدوري النهارده. و"الزمالك" حيلعب ،، يبقي لازم أسيب كل مشاغل حياتي وأفـَضي نفسي خالص وأروح أهتف وأشجع معشوقي الأول،،

وبعد ما صليت العصر،، نزلت من البيت "واخد الدُش" ولابس نضيف. وبالي مرتاح. عقلي مسترخي وروحي المعنويه زي الفل "أكيد طبعاً ما أنا بحبك يا زمالك"



سايق عربيتي،، نازل بدري جداً قبل ميعاد المباراه بحوالي 3 ساعات ،، ماهو علشان أقعد في مكان مناسب يبقي لازم أروُح بدري قبل المباراه بساعتين علي الأقل والسكه بتبقي زحمه قدامي يعني محتاج ساعه كمان علشان أوصل هناك ،، بس مش مهم لأن "الزمالك عائد" ده الكلام إللي سمعت الناس بتقوله،،

ووصلت هناك. لقيت التذكره حتكلفني في حدود الـ 10 جنيه وقول مع الأكل والشرب "ماهو ممنوع تدخل بقزازة ميه" ومع تكاليف المواصلات "بترول للسياره مثلاَ" والسجاير وشـِراء "عـَلـَم أبيض بخطين حـُمر" علشان أهتف بيه وشوية نثريات تانيه. قول بصرف معاها كمان 15 جنيه يعني المباراه بتكلفني حوالي 25 جنيه ،، "مش مهم ماهو المفروض إني أحب الزمالك"




--------------------------------------------------------------------------------






وبعدين بيقابلني عسكري أمن مركزي لحظة دخولي الإستاد مابيفهمش معني كلمة "بني آدمين" ضرب بخرازانه علشان "أمد" وأنا داخل ،، وزعيق وزق وشخـْط ونطر وإهانات،، " قلنا مش مهم ماهو بحب الزمالك"

قعدت في المدرج وسط آلاف غيري عاملين زيي . وعلشان دوري إني أرفع الروح المعنويه للاعبين يبقي المفروض حنجرتي ما تسكتش ولا لحظه من ساعة ما أدخل لحد ما الـ 90 دقيقه يخلصوا ،،

شويه "بيب بيب زمالك" وشويه أنده علي الـ 18 لاعيب إللي بيسخنوا كل واحد بإسمه علشان أحييه،، وشويه أهتف "يازمالك يا مدرسه لعب وفن وهندسه" وطبعاً بقول كده و"العـَلـَم الأبيض أبو خطين حـُمر" رايح جاي. شمال ويمين. وفوق وتحت. وإوعي وشك وإللي خايف يــّروح،، لما خلاص صوتي في طريقـُه إنه يروُح ،، "ولاحظ إن المباراه لسه ما بدأتش"




--------------------------------------------------------------------------------





وبدأت المباراه. أبص علي التشكيل ألاقي الدنيا "سـَلـَطـَه" اللاعب الباك اليمين بتاعنا بيلعب تحت راسين الحربه. والدفيندر مكانه بقي باك شمال والليبرو في خط النص واللاعب إللي كان مكسر الدنيا المباراه إللى فاتت قاعد علي الدكه. والناس الجديده المدفوع فيها الشىء الفولاني خارج الخدمه. وناس جايه من الكهف بقت أساسيه. لكن ألاقي عقلي الباطن زعق لي وقال " مالك إنت ومال التشكيل؟" إنت حتفهم أكتر من المدير الفني؟ إنت دورك تهتف وبس وماتسكتش ولا لحظه. صحيح ياعقلي الباطن إنت عندك حق. طيب انا حقوم بدوري أهه .. و"بيب بيب زمالك" وطـّوح ياعم في "العـَلـَم الأبيض أبو خطين حـُمر" طـّوح

وطبعاً ماننساش وقت المباراه لو لقينا الآداء زي الزفت والناس ألواح تلج في الملعب وبتتحرك بكل بلاهه وهي "بتهرش". مافيش مانع أواصل وصلة الحماس و"العـَلـَم الأبيض أبو خطين حـُمر" لسه بيتنطط في إيدي وأنا بقول " ألعب يازمــالك"،،

وأضرب بأيدي علي راسي مع كل فرصه بتروح. لما الصداع إبتدي يتمـّشي في دماغي من كتر الضرب،، "بس مش مهم الصداع ولا الضرب ولا الكلام الفاضي ده. ماهو أنا بحب الزمالك بقي" والزمالك محتاج لنا اليومين دول.

أشوف ريكاردو وجمال حمزه نازلين تلطيش إقلام في بعض "أقول لحظة شيطان وحتعدي". أخد بالي من عمرو الصفتي وهوا بيشاور بكل بجاحه وبنرفزه للجهاز الفني لما لما بينبه لغلط " أقول ماهو بيحب الزمالك وبيمـّوت نفسه والهولمان مش واخد باله"






ألاقي أجوجو اللاعب أبو 40 مليون. "وإللي عملنا له إستقبال ما يقلش عن إستقبال المسيو "بلاتر" رئيس الفيفا لما وصل للمطار ونيـّمنا له العيال علي الأرض"،، أشوفه وهوا بيضحك وبيعمل حركه قبيحه "بصباعه" لعبد الواحد السيد " أضحك علي نفسي وأقول أصحاب بقي وأهو بيهزروا مع بعض"،



يلفت نظري لاعب بيتمشي في الملعب كأنه علي البحر قدام الشاليه بتاعـُه في "بورتو مارينا" رغم إنه قابض في عقده ملايين. لكن أدور له علي عذر وأقول معذور ماهو زعلان و"مقموص" علشان لسه ماقبضش القسط بتاع الشهر ده ،،

أسرح شويه وأبص علي واحد إسمه "سوسته" وهوا بيهد في الناس إللي واقفين ورا

الله !!!! مش ده الدولي "هاني سعيد" ليبرو مصر الأول والدنيا كلها قامت ولسه ما قعدتش لحظة ما جه يوقــّع للزمالك؟ عقلي بيسألني مال مستواه "مهبب" كده ليه؟ لكن بلاقي هاتف من بعيد بيرد عليا ويقول لي إهدأ شويه ماهو زعلان علشان عاوز يحط بند في عقده علشان يخلع براحته في يناير بعد مالهف الـ 7مليون وإدارة الزمالك مش راضيه،،



--------------------------------------------------------------------------------



ولكني وبكل أمانه. لسه بطـّوح "العـَلـَم الأبيض أبو خطين حـُمر" بتاعي في الهوا ومعاه هتافي " بيب بيب زمالك" ماهي الصحه لسه فيها شويه. لكن مستوي تدخين السجاير زاد شويه. وإبتدأ معاها الصداع يزيد "حبـّه حبـًّه".

ورغم إني علي قد فـِهمي كمـُشجع عادي مش شايف لا خطه ولا تكتيك ولاجـُمـَل ولا آداء ولا حماس ولا حـِميَه ولا روح. وولا حاجه خالص. أقول لنفسي ولا يهمك المهم الـ 3 "بونط"،

بس فيه آيه؟ خط الوسط تايه. و"أيمن" مزاجـُه بايظ ، ومافيش جناحين وماحدش بيـّوصل كوره للمهاجمين. وكل لاعب بيلعب عالكيف والعمليه تلطيش في تلطيش. أقول لنفسي مش مهم . ده إرتباك وحيروح مع الوقت "اللعيبه معذوره ياجماعه الضغط النفسي عليهم جامد". بس الحناجر بتاعتنا كلنا مش ساكته. وإهتف ياعم إهتف. " وبيب بيب زمالك" والدنيا والعه في المدرجات والهتاف عالي وتشجيع وحماس وصريخ وأغاني وأناشيد ورقص وضحك وأمل وتمني و....

وأوبـــّا إنضربنا جون والنتيجه بقت واحد صفر.







صمت رهيب في المدرجات. صمت ممزوج بالدهشه علي صدمه علي عدم تصديق علي مش معقول ومعاهم شوية ذهول،،

وشاطت أعصابنا.. وبدأت بيننا النرفزه وسكتت الأناشيد وإنخفضت الأعلام. وكل واحد مش طايق إللي جنبه. والكل بقي مدير فني وبيحلل ليه الجون جه. والناس مش لاقيه حد يرد عليها فبدأو يمسكوا في بعض. وبدأ الخناق والشتايم واللعنات والكاميرا بتصـّور والدنيا بتتفرج علينا, ولكن ظهر العقلاء وبقينا نهدي الجو ونصبـّر نفسينا. لسه الوقت بدري والزمالك نادي كبير ويقدر يعـوّض الجون بإتنين. وهوا "محتاجنا دلوقت" . ياللا نهتف تاني ونقوم بدورنا إللى إحنا جينا هنا علشانه. والحناجر رجع ليها الروح . ومنين جت الصحه تاني " ماأعرفش"

" وبيب بيب زمالك " وشد حيلك يازمالك وإلعب يازمالك.

لكن "أبو العلا" لسه "بيتحنجل" علي كل كوره. و"مصطفي جعفر" بيعمل فاولات أكتر ما بيتنفس،، وبيقع بمعدل 5 مرات في الدقيقه يمكن يضحك علي الحكم ببنالتي. و"محمد عبد الله" عاوز يرقص الدنيا لوحده. و"أيمن" بيلعب "كور" طويله للي يلحق. واللعيبه بتهرب من بعض. وإللي معاه الكوره بيبقي في "حيص بيص" مش عارف يديها لمين.





و"المدير الفني" مش عاوز يعمل تغيير لأنه مش عارف يغيـّر مين ولا مين،، ومصمم يلعب برأس حربه واحد "منفي" تحت رحمة 3 مدافعين لوحده. وشايفين "المـُهاجم القديم" بتاعنا رافض يقوم "يسـّخن" علشان مايشيلش الليله. وإللي قام يسـّخن لاعيب كان في "الكهف" بقي له تقريباً 7 أو 8 شهور.




وأخيراً "أبو العلا" خارج .. والناس زعلانه منه هو خارج لأنه من الناس القديمه والمفروض إنه "إبن النادي" ومتربي هناك وأكتر واحد يخاف عليه. بيعاتبوه . بيلوموه. بيزعقوا ليـِه.



بص لنا وعمل لنا حركه قبيحه "بصباعه" وهوا خارج!!!!!



الله !!! طيب ليه؟ إحنا غلطنا في آيه؟ وذنبنا آيه؟ وقصـّرنا في آيه؟

طيب ... رجعنا للمباراه لكن الناس حواليا بقت تشتم الناس كلها. وكل لاعب أخد إللي فيه النصيب،، كبير وصغيـّر كويس أو وحـِش. إداره وفنيين.. وشاطت الأعصاب.



--------------------------------------------------------------------------------








وإنتهت المباراه وطبعاً خسرناها،،، والصداع النصفي يسيطر علي راسي. وعلبة السجاير خلصت مني.

وأنا عارف إن قدامي مشوار طويل علشان أوصل البيت "مهدود"

ماهو أنا قبل وطول المباراه بهتف وأشجع وبصرخ وبغني وبرفع الروح المعنويه للاعبين



دلوقت أنا سايق عربيتي راجع بيتي ،، بعد ما قعدت حوالي ساعه كامله أحاول أخرج بعربيتي من "الباركينج". وشكلها قدامي ساعه كمان من الزحمه علشان أوصل للبيت

متضايق ،، قرفان ،، عرقان ،، زهقان ،، مرهق ،،



مش شايف السكه صح قدامي.. لأن عقلي مشغول بشوية حاجات

وبدور علي إجابه لسؤال محيرني



أحنا غلطنا في آيه علشان يشاور لنا بصباعه وهو خارج؟



يمكن ماعرفناش نهتف صح ولا "العـَلـَم الأبيض أبو خطين حـُمر" بتاعي ماكانش باين كويس وسط إخواته من الأعلام أو يمكن التي شيرت بتاعتي ماكنتش "نضيفه" أو إحتمال علشان آثار "خرزانه" الراجل بتاع الأمن المركزي راحت من علي جسمي بسرعه ،، ولا من الجايز ماوصلش له إني صارف حوالي 25 جنيه علشان أشجعه. أو بالأكيد مايعرفش إن اليوم طار منه حوالي 7 ساعات علشان يلاقي حد يصقف له.



أكيد أنا إللي غلطان علشان ماقدرتش أبيـّن لمعشوقي نادي الزمالك إني بحبه



وبعد كل المعاناه من لحظة نزولي من البيت لحد ما رجعت. قعدت أحسبها،،



فات من وقت حياتي 6 أو 7 ساعات تقريباً "جمّ" من وقت حاجات تانيه عندي. ومعاهم كمان حوالي 25 جنيه مصروفات ... تمام؟

وماجبناش هنا سيرة إنه مفروض علشان الروح تدب في اللاعبين كلنا لازم نبقي لابسين "تي شيرت" الزمالك الأبيض علشان الشكل الجمالي والكل يبقي روح واحده. وأنا ماعنديش تي شيرت. يبقي لازم أشتري واحد أنا كمان علشان مايبقاش شكلي نشاز في المدرج. "نقول التي شيرت المحترم بـ10 جنيه بس" تمام؟



ونحلم ونقول الدوري منتظم، يعني الزمالك بيلعب تقريباً مباريتين في الإسبوع يعني 8 في الشهر تقريباً، ونضـِيف عليهم كمان مباريتين نقول بين وديه وبطولات. يعني تقريباً حروح الإستاد بصفتي مشجع بحب الزمالك 10 مرات في الشهر. نضربهم في 25 جنيه للمره الواحده . يبقي الإجمالي 250 جنيه في الشهر. ونعيد كلامنا تاني إللي قلناه "مش مهم ماهو المفروض إني بحب الزمالك" وطبعاً بحكم إني عايش في مصر وبشتغل في مصر والرواتب "إنتوا عارفينها" نقول إني بقبض مثلاً حوالي 400 جنيه في الشهر؟ يعني أكتر من " 50 % "من إيراد حياتي بيروح علشان أهتف وأشجع وأناصر وأحيي "الزمالك ولعيبة الزمالك". تمام؟



طيب ،،، أخد "دُش" بقي بسرعه لأني مرهق جداً من "بهدلة" طول النهار بس حصـَلي العشا الأول علشان صلاة الجماعه راحت مني وأنا في الإستاد ،، وعلشان ألحق أشوف القنوات الرياضيه حتقول آيه،،



--------------------------------------------------------------------------------





يا سلام ،،، ده فيه قرار طلع من إدارة النادي بعزل "مـُترجم" المدير الفني من توابع الهزيمه اليوم !!!!!

طيب اقلب علي قتاه تانيه ،،،

آيه الخبر الجديد ده أجوجو هرب ،، أيمن عبد العزيز هرب ،،، ممدوح عباس هرب ،،، مرتضي كسب القضيه ،،، حسن صقر رافض تنفيذ حكم المحكمه ،،،، طارق يحي "شالوه" ،،،، أحمد رمزي "جابوه" ،،،، المدير الفني طالع ألمانيـا أجـازه ،،،






أجوجو قفشوه سكران،،، جمال مش عاوز يمضي ،،، العابدي عاوز إستغناء ،،،



الله !!! ده كمان بيهاجموا جماهير الزمالك علشان شتمت،،،

الله الله الله !!!! ده بيقولوا إننا قلة متعصبه ولازم نقف جنب النادي وجنب اللاعبين وإحنا غلطانين علشان بنشتم!!!!







الله وأكبر ،،، ده كمان مدير الكوره بالنادي أصدر قرار بمنع الجماهير من حضور التدريبات علشان "بتشتم" اللاعبين في المرحله الحرجه دي والناس محتاجه تشجيع.



طيب أحسن حاجه إني أقوم أنام ،، وأهو بالمره قبل ما أنام أبقي أكلم أيمن عبد العزيز وأسأله "مزاجه بايظ ليه" رغم إني كنت بتابعه في تركيا وبقي له 10 سنين هناك عامل إسم جامد وكان مكسر الدنيا ودايماً بياخد مره علي الأقل كل شهر أحسن لاعب في الدوري التركي وكل الأنديه في كل موسم إنتقالات تتخانق عليه،، علشان أعرف من يوم ما جه الزمالك "إتعتول" ليه؟



ولكن قبل النوم وقبل الدش رجع لي السؤال مره تانيه بيلح في دماغي علشان عاوز إجابه



هوا ليه عمل لنا حركه قبيحه بصباعه وهوا خارج؟

أكيد أنا إللي غلطان علشان ماقدرتش أبيـّن لمعشوقي إني بحبه









ببص جنبي قبل ما أنام مالقيتش عـَلـَم الزمالك "العـَلـَم الأبيض أبو خطين حـُمر"،، راح فين ده؟

أنا عاوز "عـَلـَم" ضروري ،،، محتاج "عـَلـَم" ضروري ،،،

وكلمت أصحابي الزملكاويه كلهم وسألت



"مين معاه عـَلـَم أبيض بخطين حمر زياده "



ميزانيتي مش مستحمله أشتري واحد تاني. للأسف مالقيتش،،، لأن كل جماهير نادي الزمالك محتاجه الأعلام بتاعتهم



لأن "الزمالك" عنده مباراه وديه بعد كام يوم مع فريق "السنبلاوين"،، في فترة ما "الأهلي" بيلعب مباراه في الكاميرون علي نهائي أكبر بطوله في القاره

بس لازم كلنا نروُح مباراة "السنبلاوين" الوديه علشان نهتف ونشجـّع ونحمـّس لأنهم قالوا لي



مادام بتحب الزمالك والزمالك راجع تاني ومحتاج لنا كلنا،،



يبقي لازم نستحمل











للأسف الزمالك علـّمنا "كجمهور" إزاي "نـِحبـُه" ولكن اللاعبين "نسيـِت" إنها تحب إسم "الزمالك" ونسيـِت إنها تحبنا

[ีundertaker_2000]

والله موضوع جامد جدا وجميل جدا وانا نفسى اعرف الى بيحصل دا بيحصل ليه ؟ حاجه عجيبه والله ومرتضى منصور تقريبا حالف انه مينمش غير لما يمسك الزمالك ولا ايه ماعرفش والاعيبه موجوده فى الملعب ومش موجوده بتفكر فى الاحتراف والفلوس

ميرسى يا حازم على الموضوع

[أ/ عثمان ربيع]

شكرا علي الموضوع ..... دة فعلا وصف دقيق للي بيحصل

[!DreAmeR!]

اولا حركة اجوجو هذا الشخص التافه الذى اقل ما يقال عنه هو هذه الكلمة

لما شاور بصباعة قال ايه (بيهزر) مع عبدالواحد واخد بالك (بيهزر) يعنى ديه مصيبة ما بالك بيهزروا مع بعض كده امال لم يحصل شد فى الملعب ويشاور مثلا لاى جمهور الصباع نعمل ايه

قال ايه مفيش غرامة هتدفع ازاى يعنى مش فاهم انا اعرف ان اى لاعب لو اشار باى اشارة مخالفة سواء للاعب معاه فى الفريق او من فريق اخر او زى ما فى القانون (فى الملعب) ياخد ايقاف مع تغريمة

تقبل مرورى

[hazem_ayman]

والله هو الفروض كامن يغرموا المخرج انه جاب حاجة زى دى