يلا نكمل بقية النصائح

سيف-الاسلام · #1 26-09-2008, 09:57 PM

بسم الله الرحمن الرحيم
السلام عليكم ورحمة الله وبركاته

انا كتبت الموضوع ده كذا مرة والكهربا تقطع يضيع كل اللى انا كتبته فأنا هقسمهم.
ونبدأ نكمل المواد الشرعية أولاً.

خلصنا القرآن والتفسير.

ندخل على الفقه ونقول:
بسم الله نبدأ.
أحب أقول أولاً إن كتاب الاقناع اللى كانوا بيدرسوه قبل كده أسهل بكتير من كتاب شيخ الأزهر وفيه علم اكتر والواحد لو اتعلمه يطلع مفتى وفقيه...انما كتاب شيخ الازهر انشا وبس.
فربنا يعينكم عليه.
طبعاً علشان تجيب النهاية فى المواد الشرعية والعربية لازم تحفظ بالنص......علشان المصحح مش يبقى ليه حجة علشان ينقصك درجة ولا حاجة........فلازم تحفظ بالنص وتحطه فى الامتحان بالنص....يشوفه المصحح بالنص زى النموذج ما يقدرش يفتح بقه.......ويديك النهاية.
بس دا صعب فى كتاب شيخ الأزهر لأنه انشا لكن بإذن الله نكتبه برضوا بالنص.
هو الأزهر كده.
حفظ.
فهنجيب شوية ورق فلوسكاب زى التفسير:
ونكتب فى أول ورقة آراء الفقهاء فى الأحكام الشرعية........ونكتب كل الاحكام اللى اختلف فيها الفقهاء........انا عن نفسى جمعتهم فى تلت ورقات.........ولكن الورق ده ممكن يلخبطك أكتر لو انت مش حافظه حلو........تروح الامتحان رأى الشافعى.......كان أول رأى...لأ لأ كان التانى...وتبدأ تتلخبط....لكن علشان ما تتخلبطش تحفظ الورق ده بالنص زى القرآن كده وبالترتيب........وتيجى فى الامتحان عاوز رأى الشافعى.......ماتحاولش تجيب رأى الشافعى مرة واحدة........لأ تجيب الحكم من أوله بآرائه لغايت لما توصل للشافعى وتبدأ تكتب........ولو لقيت نفسك هتتلخبط فى الحكم نفسه.......ممكن تسمع لنفسك الورقة من اولها لآخرها......وما تخافوش وقت الامتحان فى المواد الشرعية بيبقى مكفى انك تفكر وتسمع لنفسك وكده............بس ما تخافش انت أصلاً لما تجمعهم وتبص عليهم مرة قبل الامتحان......هتدخل الامتحان تجاوب فوراً.........ومش هتتلخبط بإذن الله......

ونجيب ورقة تانية ونكتب فوق: الأحكام الشرعية.........هتلاقى عندك فى الكتاب الحكم الشرعى للمهر ........الحكم الشرعى للخطبة..........وهكذا.......وهتلاقى كاتب فيهم موضوع انشا مش حكم شرعى..........ففى طلاب يفهموا ان الكلام مختصره ان الحكم جائز......يروح يكتب فى الامتحان الحكم جائز أو سنة............يجى المصحح ممكن يحسبها صح وممكن يحسبها غلط..........فعلشان مش تخلى نفسك تحت قبضة المصحح.......فحتفظ الحكم الشرعى بالنص.........هيلاقيه زى النموذج.........مش هيعرف يعملك حاجة........لكن الحكم الشرعى طويل وفيه انشا كتير...............نعمل فيه ايه؟...
هنكتبه فى ورقة وهنكتبه عبارة عن نقاط ونرقمها.........ونعرف ان الحكم الشرعى للخطبة 9 نقاط مثلاً......ندخل الامتحان ما نكتبهمش مرقمين لأن فى الكتاب مش مرقم.......لكن فى دماغنا مرقم.........هنشيل الأرقام ونكتب......بعد لما نخلص كتابة.........نبص على ورقة الاجابة......نلاقيها نسخة طبق الأصل من الكتاب.....وكذلك المصحح هيلاقيها نسخة طبق الأصل من النموذج.......فهيديك النهاية وهو مغمض.........كده تبقى انحلت حكاية الانشا دى.

ونجيب ورقة تالتة ونكتب فوق: تتحفظ زى اسمك.........اكتب فوق كده......صحيح...اكتب كده....والورقة دى هنكتب فيها الأمور اللى بنتخلبط فيها أو نحس اننا هنساها أو الأمور اللى فيها انشا كتير أو دليل نحس اننا هنساه.......نكتبه فى الورقة دى.......علشان ليلة الامتحان مش هتفتكر انت كنت بتتلخبط فى ايه؟....فلما تعمل الورقة دى....ليلة الامتحان هتراجعها....وخلاص.

وممكن تجيب ورقة كمان وتكتب فيها التعريفات لو تحب.

وهتلاقى عندك فى كتاب الفقه درس رخم.........أخوك سيف كان بيكرهوا أوى بس على قد ما كان بيكرهه كان حافظه زى اسمه.........درس الحقوق الزوجية............فاوعى يصيبك يأس أو احباط من الدرس ده.........حاول تجمعه على قد ما تقدر.......وما تزعلش لو لقيته صعب لأنه صعب عند الناس كلها وكله بيشتكى منه.......فمش تديله اهتمام أوى بحيث انك تحبط لما تلاقيه صعب......اياك واليأس.

ملحوظة على كتاب الفقه: أخوك سيف كان بيركب مواصلات فى حدود نص ساعة كده.......فكان دايماً يمسك كتاب الفقه فى المواصلات........رايح جاى......يقرا فيه ويحفظ ويسمع لنفسه..........................لأن أخوك سيف من الناس اللى بيكرهوا الحفظ وما بيحفظوش بالساهل.......لكن لازم يحفظ......وكان مادة الفقه دى بيقول لأستاذه: أنا هسقط فى المادة دى.......والأستاذ يقله: دا انا ما شفتش حد بيحبها ويذاكرها قدك.....بس صحيح كانت عقدة بالنسبة لى.............لكن الحمد لله دخلت الامتحان وحليت حتى السؤال اللى كان خارج المنهج.........والحمد لله جبت النهاية.

نيجى بقا على كتاب الحديث:
كتاب الحديث من اسهل الكتب فى الشهادة الثانوية الأزهرية.......لكن أخوكم سيف ناقص فيه درجتين شفوى ظلماً.......وناقص درجتين تحريرى....هيموت سيف ويعرف راحوا فين الدرجتين دول.........وراح يعيد تصحيح.............لقى أمم هناك......وطبعاً ما عرفش يعمل حاجة فى وسطهم......فرجع وقال الحمد لله على المجموع اللى الواحد جابه.........ولو حد ظلمنى فأنا مسامحه وأحتسب ذلك عند ربى...........
المهم انه كتاب سهل جداً.....بس طويل شوية.........
دا بقا هتلخص فيه حاجتين بس:
هنيجى نكتب فى ورقة فلوسكاب: الرواة وهتلاقيهم شوية صغيرين.
بس هتيجى على أول حديث وهتلاقى ترجمة الراوى طويلة جداً..........اوعى تختصرها......انت أول على الجمهورية.......مش ينفع تختصر.............هاتها واعملها نقاط واحفظها.

ونجيب ورقة تانية ونكتب فيها: الاعتراضات والرد عليها.........ودى هنكتب فيها الحديث وتحته الاعتراض الموجه ليه والرد عليه.......وياريت اوعى تعدى أى اعتراض من غير ما تفهمه........اوعى تحفظ من غير ما تفهم..........كانوا عندنا الطلاب كلهم بيحفظوا اعتراض الحديث السادس عشر بتاع الاستخارة من غير ما يفهموه......ودخلوا فى الشفوى اتلخبطوا فيه.......فافهم الأول.

وباقى المادة احفظها وبس وهتلاقيها سهلة جداً..........بس طبعاً الاعرابات دى بتبقى فهم مش حفظ.........النحو لغة فهم للمعنى وليس حفظ..

خلصنا كتاب الحديث.........ندخل على التوحيد.....
التوحيد ده كتاب فيه حاجات كتير مش ليها لازمة ولازم تشطبها............وفى حاجات باين عليها مش ليها لازمة لكن فى الحقيقة هى ليها لازمة كبيرة جداً........المشكلة انى مش معايا الكتاب علشان اقوللكم لكن هحاول اجيبه علشان أقوللكم..........لكن اوعى تستهتر بمعانى الآيات وبالذات فى درس العدل والظلم.........دايماً بيجى يجبلك الآية ويقلك وجه أو اشرح أو بين فى ظل هذه الآية.........ويبقى قصده المعنى.........والمادة دى سهلة جداً لأنها كلها آيات وآيات سهلة وجميلة.........ولو ان المادة دى كان سيف بيقول عليها صعبة فى الاول لكن صدقونى والله سهلة جداً.............بس فيها حاجات انشا زى ما عودنا شيخ الازهر.......لكن تعال على نفسك واحفظها.............والمادة دى حل الامتحانات فيها مهم جداً جداً جداً جداً جداً جداً........لان الامتحان بيجى من الامتحانات اللى فاتت فى المادة دى بالذات.

لكن ملحوظة على المواد الشرعية كلها:
انت الحاجات اللى مش هتلخصها..............هتذاكرها من الكتاب بتاع المعهد...............تسمك الفقرة وتكتب فوقها كل الأسئلة اللى ممكن تيجى فى الفقرة دى......كل الصيغ......وبعدين تحفظ الفقرة..........وتدخل على اللى بعدها........وبعد لما تخلص الدرس......تخلى أى حد مهما كان........يسألك فى الأسئلة اللى فوق الفقرات......وانت تجاوب بانك تقول الفقرة كلها........تعمل حكاية الأسئلة دى فى كل المواد.......ولو تقدر مع ان سيف ما قدرش يعملها فى كل المواد.........لكن انت هتقدر..........لو تقدر بعد لما تخلص الدرس وتحط على كل فقرة أسئلتها...........تجيب كشكول وتكتب فيه اسم الدرس والأسئلة كلها ورا بعضها..........تبقى انت كده تمام.......بحيث تيجى ليلة الامتحان.......تمسك الكشكول وتقرا السؤال وتجاوب.......لما يقف سؤال قدامك تروح تذاكره تانى....وهكذا......فتدخل الامتحان وانت مطمن انك جاوبت كل الأسئلة اللى ممكن تيجى....أخوكم سيف عملها فى مادة التفسير وبس

أخوكم سيف كان بيذاكر فى المتوسط 7 ساعات فى اليوم............أيام يقلوا وأيام يزيدوا..........لكن الحمد لله عمرهم ما انعدموا خالص حتى يوم فرح أختى.........كنت بذاكر وجت ذاكرت معايا وشرحتلى فيزيا...........أختى بحبها موووووووووووووووووووووت...........المهم ان كان 4 ساعات من ساعات المذاكرة مواد شرعية.............ويجى ساعتين أو ساعة ونص حل واجب الدروس لأنى كنت بعتبره مذاكرة مع إن فى ناس يقول ده مش مذاكرة دا حل واجب......وساعة ولا ساعة ونص.............مذاكرة مواد تانية غير المواد الشرعية ومش حل واجب.....

وبإذن الله هحاول أقوللكم على الجدول بتاع سيف فى آخر الموضوعات.

ودلوقتى أسيبكم شوية وأرجعلكم مع اللغة العربية الرائعة الراقية.

والسلام عليكم ورحمة الله وبركاته

ghaia · #2 17-10-2008, 08:11 AM

مشكووووووور والله انا بحبك فى الله ومنتظر منك المزيد

محمود صلاح هاشم · #3 23-10-2008, 02:49 PM

والله أنا نفسي أشوفك وأسمع منك النصائح اللي زي العسل دي

أنا في ثانويه أزهريه

بالله عليك كمل المواد كلها

أنا منتظرها بفارغ الصبر

الله يكرمك لا تحرمنا منها

ياريت أعرف أتواصل معاك يا أخي

ربنا يكرمك
( ممنوع كنابه ارقام موبايلات)

وأنا بعيد عن النت
(ممنوع كتابه ايميلات)