شكلها باظت امتع الكتب التي قد يقرأها المصري في حياته

[sunsero2000]

شكلها باظت هو كتاب من امتع الكتب التي قد يقرأها المصري في حياته ... يحتوي الكتاب على العديد من الفصول مثل


" 100 شائعه مصرية
,كيف تعرف انكـ تربيت في بيت مصري
, وحياة العازب

أشهر 55 جملة ببيقولها الأب والأم في مصر (الحقيقة هم اكثر شوية)

وانا الحمد لله جهزت الكتاب على ملف ورد وهنزله على شكل حلقات

إذا كنت مصري و أحد أبناء جيلي فستعي ما أكتبه...

أنا إبن الجيل الذي تفتح وعيه على ماما نجوى وبقلظ وبابا ماجد عبد الرازق " السندباد" و"سينما الأطفال سينما" مع ماما عفاف الهلاوي .. وكانت الموسيقى المميزة لبرنامج " العلم والإيمان" مع د. مصطفى محمود تثير بداخلنا رهبة غير مفهومة .. سهرات التليفزيون نعرفها جيداً .. الأربعاء "اخترنا لك" والخميس مسرحية والجمعة فيلم أجنبي علي القناة الثانية والسبت" نادي السينما" والأثنين "تاكسي السهرة" وبعدها "فكر ثوان واكسب دقايق" .. يوم الجمعة "عالم الحيوان" يليه لقاء الشيخ الشعراواي يليه مباراة أو فيلم ومساء "العالم يغني" و"نافذة علي العالم" ..

أنا إبن جيل ألبوم "بم بم" و"أهلا أهلا كاراتيه" و"محلول معالجة الجفاف" و"لحظة من فضلك" و"دي زبالة يا جاهل" و"ذا بولد أند ذا بيوتيفيل" و"ياكلوا حلاوة ياكلوا جاتوه ياكلوا كل اللي يحبوه"..

أنا إبن جيل معركة البوسنة والهرسك واغتيال رئيس الجمهورية علي الهواء مباشرة وعاصفة الصحراء وخناقة الجوهري وطاهر أبو زيد وظهور معجزة التوأم حسام وإبراهيم حسن وشركات توظيف الأموال ووفاة ياسر عرفات .

أنا إبن جيل ظاهرة الغش الجماعي وبداية حوادث الإغتصاب بداية بفتاة المعادي .. وإدمان الهروين وظهور عبدة الشياطين وثورة الأمن المركزي وتكفير نصر أبو زيد ونوبل نجيب محفوظ

أنا إبن جيل خرج حبيس القناة الأولي والثانية وثلاث صحف مستنسخة من بعضها (للأمانة كانت الأخبار تتميز بزاوية عروس اليوم وتهنئة فاترينة الحاج حنفي.. والأهرام بصفحة الوفيات انتقل الي رحمة الله أو إلى الأمجاد السماوية – والجمهورية بملحقها الرياضي..وتان تان والعربي الصغير ومجلة ماجد وميكي وسمير.

إنا إبن الجيل الذي تلقي بعد الجامعة صدمة "المالتي ميديا" وفي وجهة فتشتت تركيزه وهو يرى العالم كله يضغط عليه فجأة بدون رحمة – بعد سنوات حرمان- من خلال الإنترنت والقنوات الفضائية فإضطر الي الإنبطاح أمام سطوة ثورة الاتصالات التي كان شعارها " العالم قرية صغيرة ".

أنا إبن جيل مواليد ما بعد نصر أكتوبر ..
جيل يحب البلد أحياناً لأنه يرى فيها أهله وأصدقائه ويكرهها أحياناً لأنه لا يرى طريقه فيها بوضوح...

[sunsero2000]

عظيمة يا مصر يا أرض اللوا...!

* لم يذكر السجن في القرآن الكريم إلا في مصر في سورة " يوسف "..

* في مصر فقط ..تجد شخصاً أقل منك في المستوى العلمي وحصل علي مجموع 50% فقط في الثانوية العامة لكنه بيتنطط عليك .. (دخل بيهم شرطة).

* في مصر فقط ..ينمو نبات البردي وورد النيل والجرجير والخبيزة والليف.

* في مصر فقط ..تأكل الحواوشي والشكشوكة والعجة والملوخية بالأرانب والمسقعة والكشري ومحشي الكرنب والكبدة الأسكندراني.

* في مصر فقط.. تعبر الكلام الشوارع بالطريقة نفسها التي يعبر بها الآدميون .. وليت البشر عندنا يعبرون بالطريقة نفسها .. لكن المواطن المصري يحب ان يعبر الشارع كطائر البطريق.

* في مصر فقط.. تنشب الصداقة سريعا وفي اقل من ثواني في إشارة مرور أو طابور في مصلحة حكومية أو في الأسانسير.

* في مصر فقط ..ملك فرعوني فنان بني لنفسه تمثالاً ضخما لا تشرق الشمس علي وجهه إلا مرتين في السنة .. يوم عيد تتويجه ويوم عيد ميلاده هو شخصياً (صبح .. صبح ياعم الحاج)

* في مصر فقط.. وزير (يسرطن ) الشعب ثم يرشحه الحزب الحاكم في إنتخابات مجلس الشعب.

* في مصر فقط.. ينادي وزراء التعليم بإلغاء مجانية التعليم .

* في مصر فقط .. الإختيارات السياسية المتاحة أمام المواطن هي التصويت بـ (نعم) أو (لأ).
* في مصر فقط .. يقدم الكشري ساخناً في أكياس بلاستيكية شفافة.

* في مصر فقط ..ادفع وبعدين اشتكي.

* في مصر فقط ..تم القضاء نهائياً على ظاهرة إدمان الهيروين بعد أن أصبح البانجو في متناول يد الجميع.
* في مصر فقط ..لا يتم وضع الملصقات إلا تحت لافته ممنوع لصق الإعلانات.

* في مصر فقط ..بولاقان (بولاق أبو العلا) و(بولاق الدكرور).

* في مصر فقط ..يوجد نوع من المسكنات علي هيئة مصطلحات يتم تقديمها للشعب بجرعات مكثفة مثل ا(التمثيل المشرف) (الشفافية) (إشادة البنك الدولي بمصر) و (أهمية الدور الذي يلعبه الشباب.. جيل المستقبل).

* في مصر فقط ..حالة من الشعور بالأمان الخفي تشعر بها ولا تراها .. بداية بهجرة أهل بيت النبي بعد حادثة كربلاء ألي القاهرة حيث وجدوا في رحابها أمن وكرم الضيافة .. نهاية بالزعيم الفلسطيني الراحل ياسر عرفات اللي قال في أحد حواراته الصحفية " لا أنام جيداً إلا في مصر".

* في مصر فقط كل عقدة ولها حلال ...

وللحديث بقية ....

**********************************************

ما سبق كان الحلقة الأولي من كتاب شكلها باظت للكاتب عمر طاهر

[sunsero2000]

مستنى بقه رايكم فى بدايه الكتاب

[بورسعيدى]

رهيب وعاجبنى جدا

ومنتظر البقية

شكررررا

[اوركيديا]

جميل جدا
شكله حلو الكتاب ده لما الواحد يبقى يدور عليه

يلا و متابعين
فى رعايه الله

[sunsero2000]

كيف تعرف إنك تسير في أحد شوارع القاهرة

* عندما تلقي نظرة عامة فتجد الجميع يسير متجهماً وعلى استعداد فطري للتورط في أي عراك (بس أنت شاور).

* عندما تقرأ على الميكروباصات والتاكسيات جملاً مكتوبة بخط اليد..هي خلاصة التجربة والحكمة الإنسانية مثل:
ياسلام لو الناس تبطل كلام
الحاسد ربنا يعينه
كل واحد عاجبه عقله
المجروحين يمسكوا يمين
ماحدش فاهم حاجة
الحلو حلو ولو صحي من النوم
لا افتخار ولا غنى دي من ربنا
العين صابتني ورب العرش نجاني

* عندما يسألك شخص عن أي شيء بصيغة دينية مثل "الساعة كام والله" أو " والنبي شارع طلعت حرب ازاي؟" فيجيبه أحد الأشخاص " على طول إن شاء الله".

* عندما تتوقف بسيارتك في الإشارة إلى جوار ميكروباص فتجد جميع الركاب ينظرون إليك في وقت واحد.. نظرة لا معني لها.

* عندما تجد شخص يتحدث في كابينة ميناتل في الشارع وتجد شخصا ًآخر (واقف في ودن اللي بيتكلم ) ويمسك بكارت ينتظر دوره .. ويتسلي بمتابعة من يتحدث..

* عندما ترى رجلاً طويلاً عريضاً يقف تحت أحد الكباري ووجهه للحائط وظهره للشارع .. بيعمل زي الناس.

* عندما يهتف السايس بقوة وثقة لسيارة ترجع للخلف قائلاً : تعالى .. تعالى... " وعينه تراقب سيارة أخرى يفكر صاحبها في الوقوف.. فيتركك وأنت في منتصف "الركنة" ويجري ناحية الأخرى والنتيجة معروفة طبعاً ... دوووم .. حااااااسب.

* عندما تبحث عن مصدر التلوث والعوادم والأدخنة الهائجة التي أصابت وجه العاصمة بشيخوخة مبكرة فتجد أن المصدر هو السيارات التابعة للحكومة .. أتوبيسات هيئة النقل العام ، شاحنات الأمن المركزي ، سيارات نقل المساجين ...بما يعنى أن الحكومة مدينة ولو بإعتذار وبوكيه ورد لمعظم مرضى الربو.

* عندما يسعى قائد سيارة لتجاوز السيارة التي أمامه بينما الإشارة كلها واقفه.

* عندما تعود إلى سيارتك فتجد مساحات الزجاج الأمامية مرفوعة – لتفهم أتوماتيكياً من هذه الإشارة أن شخصا ًما قام بتنظيف سياراتك وهذا يعني أنك ستدفع لشخص ما جنيه على الأقل قبل أن تخرج من موقعك .

* عندما تسأل عن العنوان وتحصل دوماً علي إجابة ليست " لا أعرف" .. دوماً هناك وصفة تقدمها لك ذاكرة رديئة أو مضلل كبير.

* عندما تجد أن الرجال دوماً هم الذين يتوقفون أمام فاترينات الملابس الداخلية الحريمي (لانجيري الوردة الحمرا).

* عندما تتم "كلبشة" سيارة لأنها تقف صفا ًثانياً بما يعني أنها تغلق الطريق أما سيارة أو أثنين تقفان صف أول وهكذا يقوم الكلابش الواحد بتعطيل ثلاث سيارات دفعة واحدة ( أرجوكم رجعوا الونش).

* عندما تصبح الإشارة حمراء فجأة فتتوقف السيارات المسرعة ببطء وتجد معظم قائديها يجذبون أحزمة الأمان بيد ويلقون الموبايل من اليد الأخري ويتحاشون النظر ناحية أمين الشرطة.

* عندما تجد عامل النظافة يكنس مطلع الكوبري المزدحم في أي وقت من العام وهو يبتسم لقائد كل سيارة يمر بها وهو يكنس الأسفلت رافعاُ يده بتحية " كل سنة وأنت طيب يا باشا" ثم يكنس له "كنستين" حول السيارة في إنتظار الجنيه.

* عندما ترى سيارة ترفرف منها الأعلام البيضاء على الرغم من هزائم نادي الزمالك المتتالية .. فتعرف أن أحد ركاب هذه السيارة في طريقه الي مطار القاهرة الدولي ومنه إلى السعودية لأداء فريضة الحج أو العمرة.

* عندما تشاهد أعمدة الإنارة مضاءة في وضح النهار وقد تألقت بنورها الأصفر مثل أكواب ينسون إيزيس أورجانيك .

* عندما تشاهد الأعمدة نفسها مطفأة ليلاً.

* عندما تتابع سيارة جمع القمامة وهي تخترق الشارع والقمامة التي جمعوها تتساقط منها يميناً ويساراً.

* عندما تقرأ أسماء الشوارع وما تعرفش مين الناس دي؟" ميدان لاظوغلي – شارع نوال – شارع ابن الوز عوام ..

* عندما تجد سيارة الدورية " الراكبة" – غالباً – "راكنة".

* عندما يتم إسناد مسئولية تنظيم المرور في شوارع وإشارات القاهرة لجنود بسطاء لم يسبق لهم أن عاشوا يوما ًواحداً في القاهرة .. العسكري من قريته إلى مركز التدريب الي إشارة قصر النيل.

* عندما تجد ولداً وبنتاً يجلسان في هدوء ورومانسية على مقاعد أقصر من سور الكورنيش الذي يحجب عنهما منظر النيل يعطيان ظهريهما للشارع .. وعلى الرغم من انك لا تري وجهيهما فإن "القعدة نفسها" تعطيك إنطباعا ان "البنت لاوية بوزها علي الولد".

* عندما تحتل عربة الفول المدمس مساحة أضعاف أضعاف حجمها بالطاولات المتراصة لتناول وجبة الفول من الوضع واقفا بطاولات الخبز البلدي الطازج الموضوعة علي الرصيف و"جرادل" غسل الأطباق "وفرشة" للبصل الأخضر بالركن المخصص لشرب الشاي المغلي ومكان "للترجيع".

* عندما يكون الإحتفال بالأهلي إجبارياً خاصة إذا كنت تمر بسيارتك من منطقة بها مظاهرة لجماهيره.

* عندما تجد سيارة ترجع إلى الخلف على كوبري أكتوبر لأن قائدها ( ما أخدش باله من نزلة عمرة).

* عندما تكون إشارة المرور (معمولة علشان الواحد يكسرها).

* عندما ترى "كوبري علوي" يقطع أحد الطرق السريعة فتعرف أنه في هذا المكان *** المئات علي مر السنين حتى اقتنعت الحكومة بأن أهل هذه المنطقة في حاجة الي الكوبري بجد.. المضحك ان سكان هذه المنطقة أصبحوا يعبرون الطريق من تحت الكوبري.

وللحديث بقية ...

[د. عمارة]

ايه الحلاوة دي
الكتاب أكثر من راااااائع
لأنه ببساطة
يحكي عن واقعنا المضحك المبكي
جزيل الشكر يا عزيزي
..

[أحمـدنجـم]

ضحكت أوي لغاية ما عيني دمعت .. وعيطت أوي لغاية ما وشي كرمش من كتر العياط فبصيت للمراية افتكرت إني من كتر الكرمشة بضحك .. فمش عارف اضحك ولا ابكي ولا ازقطط ولا ابوسك مش عارف ليه .. يا لطيف يا لطيف ...
شكراً جزيلاً .. موضوع راااااااااااااااااائع

[sunsero2000]

المشاركة الأصلية كتبت بواسطة على عليوه

ايه الحلاوة دي
الكتاب أكثر من راااااائع
لأنه ببساطة
يحكي عن واقعنا المضحك المبكي
جزيل الشكر يا عزيزي
..

al3fo wthanks 3la almror

[sunsero2000]

المشاركة الأصلية كتبت بواسطة نجم المشاعر

ضحكت أوي لغاية ما عيني دمعت .. وعيطت أوي لغاية ما وشي كرمش من كتر العياط فبصيت للمراية افتكرت إني من كتر الكرمشة بضحك .. فمش عارف اضحك ولا ابكي ولا ازقطط ولا ابوسك مش عارف ليه .. يا لطيف يا لطيف ...
شكراً جزيلاً .. موضوع راااااااااااااااااائع

nort elmodo3 ua aostaz ahmed wntzro almzeeeeeeeeeeeeeeeeeeeeeed

[مروه]

الموضوع اكثر من رائع
منتظرين الباقى
ومتابعيين
مشكووووووووووور

[sunsero2000]

المشاركة الأصلية كتبت بواسطة هاى

الموضوع اكثر من رائع
منتظرين الباقى
ومتابعيين
مشكووووووووووور

شرفتى الموضوع يا اخت هاى وشكرا على مرورك الكريم

[Free angel]

كتاب جميل جدااااااا

وللا سف هو ده الواقع

[عبقرينومان]

بتتكلموا عن كتاب شكلها باظت بتاع (عمر طاهر)

الكتاب عندي اشتريته من معرض الكتاب السابق

وكتاب جميل

وعمر اتشهر بالكتاب ده وبكتاب قهوة وشيكولاته وكتاب كابتن مصر

بس ما انصحش حد يقرأ كتاب كابتن مصر لانه

وشكرا للحلقات الجميلة دي

[sunsero2000]

إزاي تعرف إنك إتربيت في بيت مصري

أشهر 55 جملة ببيقولها الأب والأم في مصر (الحقيقة هم اكثر شوية)
أصبحنا بمرور الوقت نحفظ الجمل التي نسمعها في بيت الأسرة بإستمرار بل نتوقعها (وأهالينا يقولوا وإحنا نكمل لهم) .. وإسترجاع هذه المقولات يبعث في الوجدان قشعريرة مصحوبة بالكوميديا ويعمق محبة أهالينا في القلوب لأنهم تحملوا الكثير في سبيل أن تقف وأنت كبير فخوراً برأي الناس فيك " شكله إبن ناس.. ومتربي"..
هذه الجمل التي لا تقال الا في البيت المصري هي:
1. مش عايزة أسمع صوت (تدريب مبكر علي تقبل القمع والديكتاتورية اللذين ستواجههما طوال حياتك).
2. ماتردش عليا (نصيحة إذا التزمت بها ستكسب مديرك في العمل).
3. تقعد في أول صف قدام السبورة ( تعودك علي أن تكون في المقدمة دائماً).
4. لو مش فاهم حاجة .. إرفع إيدك وقول للأستاذ مش فاهم – ما تتكسفش (فاكرين المدرسين زي اللي كانوا أيامهم).
5. اللي بيشيل قربة مخرومة بتخر عليه لوحده.
6. ومالها الكتب بتاعة الوزارة.
7. بص كويس وانت بتعدي الشارع.
8. متأخرش بعد المدرسة وتقعد تصيع مع أصحابك (نصيحة ستحقق لك قدراً من السعادة الزوجية فيما بعد إذا تعودت أن تكون
رجلاً من الشغل للبيت ).
9. إفرد ضهرك.
10. ما تعليش صوتك.
11. بلاش لعب في الشارع
12. يا إبني اللي ذاكر ذاكر خلاص.. قوم نام.
13. بلاش لعب بالمقص .. بيجيب الفقر.
14. يا بني كلم خالتك العيانة إسأل عليها.
15. إوعى حد غريب يديلك حاجة تاكلها ولا تشربها وتاخدها منه.
16. النوم لحد الضهر بيجيب الفقر.
17. اوعي تكدب عليا تاني مرة
18. لازم تاكل سلطة..
19. لو شفت خناقة مالكش دعوة بيها.
20. عيب .. لازم تحترم اللي أكبر منك..
21. كلمنا لما توصل..
22. مافيش مذاكرة علي المزيكا.. أو .. بتذاكر إزاي والبتاع ده شغال جنبك.
23. ما تمشيش حافي في السقعة دي.
24. صليت العصر؟.
25. ربنا يهديك ..
26. اطفيء التليفزيون وقوم ذاكر
27. اوعي تقول لحد هات لي حاجة.
28. أقفل صدرك.
29. بلاش وقفة الشبابيك والبلكونات.
30. كل علي مهلك وأمضع كويس وماتاكلش وانت واقف وكل من قدامك وما تحفش .
31. كفاية رغي في التليفونات.
32. ما تقعدش قدام المروحة وانت مستحمي.
33. المسلسل مش هينفعك .. قوم.
34. وانت فاكر احنا مستنيك منك حاجة ؟.
35. لو فلحت ابقي تعالي اعمل بي بي علي قبري (إيه الخيال ده؟)
36. ما تلبسش القميص علي اللحم زي العيال الصايعه.
37. يا ابني انت مسطول والا ايه.
38. انت فاكرنا نايمين علي وداننا؟.
39. وطي المدعوق ده شوية.
40. قوم إقرا لك كلمتين ينفعوك.
41. ايه اللامبالاه والإستهتار اللي انت عايش فيهم دول.
42. انت فاكرنا لاقيين الفلوس دي في الشارع.
43. والله ما انت فالح .. وأدي دقني اهي.
44. ما تتكلمش بصوت عالي في الحمام.
45. ما تنامش الا لما تغسل سنانك.
46. ما تلزقش في التليفزيون كده .. نظرك حيضيع.
47. ضرب أمثلة تشجع علي الكفاح وأشهرها " أحد الأقارب اللي كان بيذاكر علي لمبة جاز أو علي نور العامود في الشارع ونجح
وخد الدكتوراه وسافر أمريكا".
48. سلم علي عمك كويس يا ولد.
49. يابني ما حدش بينفع حد.
50. ما تطلعش ايدك من شباك العربية.
51. قصة الغريق الكاذب اللي كل مرة يقول الحقوني .. لما غرق بجد.
52. التهديدات المخيفة شكلاً والكارتونية مضموناً .. حقطم رقبتك أو هاقطع ايك أو حقطع لك لسانك أو هادبحك دبح.
53. ربنا يرزقك بعيل يوريك اللي ورتهولي.
54. ما تطلعش علي الملاية النضيفة ورجليك متوسخة كده.
55. ما تقعدش عريان كده قدام اخواتك البنات.
56. حول القناة دي بلاش مسخرة وقلة أدب.
57. نسيت تشرب؟ نسيت تاكل؟ نسيت تقول هاتوا مصروفي ..نسيت تعكنن عليا؟.
58. طلع إيدك من جيبك وانت بتكلمني.
59. ياللا يابو كحكة حمرا.. إنت فاكر نفسك هتقعد تاكل معانا.
60. عايزة أبص ألاقيك قدامي دلوقتي فوراً .
61. ما تتشقاش في الفسحة وكل سندوتشاتك كلها.
62. أدي اللي انت فالح فيه.

وللحديث بقية ...
----------------------------------------------------------------------------------------------------------------------------------------------

الحقيقة أجمل ما في هذا الكلام إنك فعلاً بتتذكر بعض الجمل اللي كان أهلنا بيقولوها .. واللي كنا بنضحك عليها الآن ولما يكون فيه قاعدة عائلية بين الأخوات أو الأقارب نلاقي حد قال جملة منهم ونموت من الضحك ونترحم على آبائنا وأمهاتنا اللي استحملونا كتير واللي ياما عملنا فيهم وغلبناهم ..