برمجة " دروس البرمجة مع ++c " محمد القبانى

[msamido]

الحمد لله إنك قدرتى ترفعى الصور
وبالنسبة للكود الأول هو كده تمام معناه إن مفيش أخطاء وكده الدنيا زى الفل وعلشان تشوفى النتيجة بلاش تضغطى F9 جربى تختارى من القايمة debug وبعدين run
وإن شاء الله النتيجة تظهر قدامك مش محتاجه تروحى للمسار اللى فى السى

أما بالنسبة للكود التانى معلش الغلط عندى أنا كتبته غلط هو الكود مفروض يبقى كده

#include <iostream.h>
void main()
{
cout<<"annanoo";
int x;
cin>>x;
}

جربى ده وبردوه النتيجة هتبقى واحده فى الحالتين

بس عايز اقولك ان فى الصورة التانية الخطأ اللى حصل ده يعملنا حاجه
إن لما نعمل build للبرنامج وده بيحصل لما نضغط F9 لو فى أخطاء فى الكود بيقولنا عدد الأخطاء زى ما ظهر فى الشاشة بتاعتك وبيقولك إن عندنا خطأ واحد
بالضغط على أوك بيظهر صفحة فيها الاخطاء اللى موجوده جمبها علامة حمرا ووصف للخطأ اللى موجود وبالضغط عليها مرتين بيودينا على السطر اللى فيه الخطأ علشان نقدر نصححه

دى معلومة إضافية قدرنا نضيفها النهادره
شكرا ليكى وأتمنى تكونى استفدتى لحين ما أنزل الموضوع التانى قريبا أن شاء الله
.
.

[همس]

المشاركة الأصلية كتبت بواسطة msamido

#include <iostream.h>
void main()
{
cout<<"annanoo";
int x;
cin>>x;
}

.
.

انا عندي سؤال يا باشمهندس هو الكود دا يفرق ايه عن الكود التاني ؟؟

معلش انا هتعب حضرتك معايا وعارفة اني جاية متأخر بس انا ان شاء الله هدخل على الدرس التاني واتابع معاكم

اسفة للمرة الثانية

[msamido]

المشاركة الأصلية كتبت بواسطة همس المشاعر

جزاك الله خيرا يا باشمهندس

جزانا الله وإياكم إن شاء الله


بجد شرح رائع ووافي


يكفي ان حضرتك بدات معانا وانا عارفة ان شغلكم بجد متعب جدا

الحمد لله إن الشرح كويس وأتمنى بس إن شاء الله نستفيد كلنا من الكورس
بالنسبة للشغل مش عايز أقولك قد ايه متعب بس فى نفس الوقت قد ايه ممتع

جزاك الله خيرا على هذا الشرح

وانا بدات متأخر انا عارفة لان الدرس التاني نزل

بس نظرا لاني كان عندي ظروف

أهلا بيكى معانا ونتمنى تكون الظروف خير إن شاء الله

ودا تطبيقي لاول درس

التطبيق لأول درس تمام

لو متابعة الردود بقى يا همس هتشوفى إنى طلبت من الناس تبدأ تكتب اكتر من سطر والناس عملت شغل كويس بسم الله ما شاء الله شوفيها كده

المشاركة الأصلية كتبت بواسطة همس المشاعر

انا عندي سؤال يا باشمهندس هو الكود دا يفرق ايه عن الكود التاني ؟؟

هو طبعا الكود يفرق ومعناه يفرق لكن النتيجة واحده حتى الآن لكن الفرق هيوضح بإذن الله بعد الدرس التالت اللى هحاول أنزله حالاُ بإذن الله

معلش انا هتعب حضرتك معايا وعارفة اني جاية متأخر بس انا ان شاء الله هدخل على الدرس التاني واتابع معاكم

ولا تعب ولا حاجه يا همس أنا بإذن الله طول ما أنا موجود وعندى وقت على الأقل إنى ادخل المنتدى هتلاقينى بإذن الله وهجاوب على كل أسئلتكم إن شاء الله يلا تابعى معانا على ما انزل الدرس التالت

اسفة للمرة الثانية

مش عايز حكاية اسفه والكلام الفاضى ده
إحنا اخوات

[msamido]

بسم الله الرحمن الرحيم

النهارده إن شاء الله الدرس التالت وبإذن الله سينقسم إلى جزئين أساسين الجزء الأول ما يتعبرش جزء أوى يعنى بس خلينا نقول عليه جزء وهنتكلم فيه عن كيفية أستقبال data من اليوزر ؟
عارفين الأول يعنى إيه يوزر ؟؟؟
ومش قصدى طبعا اختبر قدرتكم اللغوية والاقى حد بيقولى يعنى مستخدم أنا قصدى اليوزر بتاعى كـ developer أنا كـ developer نتيجة شغلى بتكون مجازاً هنقول برنامج والبرنامج ده ليه مستخدمين هما دول الـ users اللى أنا قصدى عليهم
طبعا كلام عبيط اللى انا قولته ده !!!!
بس أنا قاصد اقوله علشان أقول إن أول حاجه وأهم حاجه لما أحب اعمل برنامج أعرف انا بعمله مين واليوزر اللى هيستخدمه مين وعايزه ازاى طبعا ده مش هيفرق معانا دلوقتى لأننا بنتمرن والبرامج اللى بنعملها كلها مجرد تعليم للبرمجة بس كده احنا اتفقنا على مفهوم اليوزر ووجوده فى البرنامج .
طيب نرجع بقى لكلامنا فى الجزء الأول وهو استقبال الـ data من الـ user
وده إجابة على سؤال ananno

*هل ينفع اني اخلي الرقمين اللي انا دخلتوهم في الاول مش متحديدين بحيث اللي يفتح البرنامج يدخل الرقمين اللي هوة عاوزهم و تطلع بقى النتائج؟؟؟؟؟؟؟؟؟!!!!!!

وكمان هيوضح سؤال همس بخصوص الفرق بين الكود ده

#include <iostream.h>
void main()
{
cout<<"annanoo";
int x;
cin>>x;
}

والكود الموجود فى أول درس .... رغاااى أنا مش كده ؟؟؟ يلا ما علينا

الأول هنقول إن زى ما فى جملة بتكتب على الشاشة وهى >>cout فى جملة بستقبل بيانات من الشاشة وهى <<cin .
طيب ازاى بقى نستعمل جملة <<cin دى ؟
أولا جملة <<cin دى معناها بتقول للـ compiler استنى استقبل داتا من اليوزر طبعا اليوزر بيتكب داتا وبيضغط انتر هنا بقى البرنامج بيبدأ يكمل كل ده كلام نظرى صح ؟؟
طيب يلا نشوف مثال عملى ونتكلم عليه زى ما اتعودنا
بس الاول قبل المثال خلينا نقول إن زى ما قلنا قبل كده إن كل syntax ليه الـ library بتاعته ... حد فاكر الكلام ده ولا إيه ؟؟؟
طيب الـ syntax اللى هو <<cin الـ library بتاعته إيه هى ؟؟
بردوه هى iostream.h يعنى مش هنحتاج نعمل include لأى library تانيه
نبدأ بقى فى المثال العملى

#include <iostream.h>
#include <conio.h>
void main()
{
cout<<"Enter The First no. : ";
  int x;
  cin>>x;
  cout<<"Enter The Second no. : ";
  int y;
  cin>>y;
  int z= x+y;
  cout<<"The Sum. is : " << z;
  getch();
}

نبتدى سطر بسطر زى ما اتعودنا طبعا فى حاجات كتير قولناها قبل كده بس نقول تانى والتكرار بيعلم
أول سطر زى ما قولنا قبل كده بنعرف الـ compiler إننا هنستخدم دوال من الـ library اللى اسمها iostream
طيب إيه بقى الدوال اللى استخدمناها فى البرنامج من الـ Library دى ؟؟؟
مش هقول علشان انا قولت قبل كده وده سؤال ومستنى اجابته
طيب والسطر التانى زى الأول بالظبط وبيقول إننا هنستخدم دوال من الـ library اللى اسمها conio.h والدالة اللى هنستخدمها من الـ library دى هى ()getch اوكش ؟؟
طبعا السطر التالت هو الـ Main method بتاعتنا وقولنا ان البرنامج هيدور عليها وتكون أول حاجه يبدأ يشغلها يدخل جواها بقى ونشوف اللى بعد كده أول حاجه بنقول لليوزر دخل الرقم الأول ودى جمله هتطبع على الشاشة زى ما احنا عارفين بما إننا كتبنا >>cout طيب وبعدين هيعمل ايه البرنامج هيعرف variable اسمه x من نوع int ومش هيديله قيمه .... فاكرين درس الـ variables طبعا وبعدين نيجى بقى لجملتنا الجديدة النهارده وهى :

cin>>x;

دى معناها بيقول للـ compiler استنى لما اليوزر يدخلك قيمة وتاخد القيمة دى تحطها فى الـ variable x وده معناه إن البرنامج هيقف هنا ومش هينفذ الكود اللى بعد كده يبقى النتيجة هتبقى ازاى لغاية دلوقتى ؟؟
هتبقى زى الصور دى

وهنا بقى مفروض اليوزر يدخل قيمة ويضغط انتر يبدأ الcompiler يكمل شغل وياخد القيمة اللى دخلها اليوزر يحطها فى الـ variable x ويشوف السطر اللى بعده
عادى جدا بيطبع على الشاشة دخلى الرقم التانى والسطر اللى بعده عادى بردوه بيعرف variable اسمه y من نوع int وملهوش قيمة وكذلك السطر اللى بعده خلاص بقى قديم هو كمان بيقول للـ compiler استنى من اليوزر قيمة وحطها فى الـ variable y ويقف الـ compiler مستنى حضرة سعادة اليوزر وتبقى النتيجة كده لغاية دلوقتى

وطبعا اليوزر يدخل القيمة التانيه ويضغط إنتر ويبدأ الكومبايلر يكمل شغل وياخد القيمة اللى اليوزر دخلها ويحطها فى الـ variable y ويشوف السطر اللى بعده وهوه بردوه سطر قديم بيعرف فيه variable جديد اسمه z من نوع int بردوه ويديله قيمة هى نتيجة جمع الـ x,y وينقل للسطر اللى بعده اللى بيقول اطبع على الشاشة نتيجة الجمع هى كذا والنتيجة النهائية هتكون كده

والسطر اللى بعده بقى بيقول استنى من اليوزر أى حرف يدخل أو أى تكة زرار علشان تنهى البرنامج
أعتقد كده الفرق واضح يا همس ؟؟؟
ولا مش واضح ؟؟
لو مش واضح قوليلى بس !!!

وانتهى كده الجزء الأول من درس النهارده
موضوع سهل وثلث وبسيط جدا جدا جدا صح ؟؟

الواجب بقى
نفس بتاع الدرس السابق لكن نخلى اليوزر يدخل الأرقام بنفسه ونطلعله نتيجة الجمع والطرح والضرب والقسمة ؟؟

نيجى بقى للجزء التانى إن شاء الله

بصراحه الجزء التانى طويل شوية ودلوقتى أنا نازل علشان هفطر بره يلا معلش هبقى وقت تانى إن شاء الله بس لغاية كده اعتبروا الدرس ده هو الجزء الأول بس وعايز اشوف الواجب إن شاء الله
.
.

[همس]

المشاركة الأصلية كتبت بواسطة msamido

*هل ينفع اني اخلي الرقمين اللي انا دخلتوهم في الاول مش متحديدين بحيث اللي يفتح البرنامج يدخل الرقمين اللي هوة عاوزهم و تطلع بقى النتائج؟؟؟؟؟؟؟؟؟!!!!!!

وكمان هيوضح سؤال همس بخصوص الفرق بين الكود ده
ربنا يكرمك يا باشمهندس ... فهمت الحمد لله

أعتقد كده الفرق واضح يا همس ؟؟؟
تماااااام واضح... جزاك الله خيرا تعبتك معايا
ولا مش واضح ؟؟
لو مش واضح قوليلى بس !!!

وانتهى كده الجزء الأول من درس النهارده
موضوع سهل وثلث وبسيط جدا جدا جدا صح ؟؟

سهل الحمد لله .. وكمان كل ما بدأت امشي .. بدأت افهم أكتر .. البرمجة بجد لذيذة جدا .. والواحد خد مقلب في نفسه وحاسس انه بقى مهندس برمجيات بجد

الواجب بقى
نفس بتاع الدرس السابق لكن نخلى اليوزر يدخل الأرقام بنفسه ونطلعله نتيجة الجمع والطرح والضرب والقسمة ؟؟

.

ودااااااااا تطبيق الواااااااااجب بتاع الدرس الثالث

جزاك الله خيرا على الشرح الأكثر من رائع

[msamido]

المشاركة الأصلية كتبت بواسطة همس المشاعر

دا تطبيقي لواجب الدرس التاني يا باشمهندس محمد

وجزاك الله خيرا على المجهوود الرائع الي بتبذله معانا

التطبيق تمام يا همس وربنا يوفقك بإذن الله

المشاركة الأصلية كتبت بواسطة همس المشاعر

ودااااااااا تطبيق الواااااااااجب بتاع الدرس الثالث

جزاك الله خيرا على الشرح الأكثر من رائع

وتطبيق الدرس التالت كمان تمام الحمد لله
ويا ستى براحتك خد مقلب زى ما انتى عايزه علشان بإذن الله فى يوم من الأيام هتبقى developer عظيمة بإذن الله بس فعلا بجد لازم تحبى البرمجة علشان تلاقى متعة فى شغلها لأنك لو معملتيش كده مش هتعرفى تعملى بيها أى حاجه .
طيب دلوقتى بقى يا همس ممكن توضحيلنا فهمتى الفرق بين الكودين إزاى يعنى تقوليلنا إيه اللى فهمتيه بالظبط علشان كلنا نستفيد وعلشان لو فى حاجه اضيفها بإذن الله.

[ananoo]

السلام عليكم و رحمة الله و بركاته

ايوة هوة ده الكلامكدة اقدر اقول للناس انا عملت برنامج

و الفضل طبعا يرجع لحضرتك

اولا: الواجب








ثانيا :برده الواجب

إيه بقى الدوال اللى استخدمناها فى البرنامج من الـ Library دى(اللي هية iostream) ؟؟؟


* الداله cout
* الداله cin


ثالثا: الفرق بين الكودين

انا بصراحة مش عرفة او بمعنى اصح مش فهمة الكود التاني يعني هة ايه علاقة int x باني اكتبananoo

بصراحة مش فهمة حاجة خااااالص


رابعا:
جزاك الله خيرا و جعله في ميزان حساناتك