جوابي الاخير ( عمرو حسن )

[smsmzeros]

جوابي ده الأخير ليكي
يامعاليكي
ياست الحسن
ياسبب الحزن والعلة
ياشجرة حسبتها ضله وطلعت نار
بداية القول : مساء الفل ع الأزهار على خدودك
مابنجرّحش
ومابنسمحش حد يقول كلام عنك
لذلك ثم أما بعد ،
أنا الطفل اللي كان ف عنيكي متشعبط
يشوفك روحه تتلخبط
وقلبه ابن الحرام يضعف ويستعبط
كإنك زار وانا الدرويش
كإنك غار وانا الحرافيش
كإنك كنتي قرش حشيش
دخل رئتيني وملاني
كإنك دار وانا اللي ماليش
سوا الدار اللي لمّاني
بغض الجرح مين خان مين
ومين قصّر مع التاني
وغض الطرفْ عن اسمك
وطعم خروجه ف لساني
أنا مليّت من القصة ومن لعبة خلاص لسه
لقيتك غيمة ف حياتي حسبتك مطره قمت جريت
وفجأة لقيت مفيش غير ليل
سحابة ضلمة كنتي انتي
اشوفك ف الوجع بنتي
واحسك ارضي وسفينتي
وشمس بتملا ليلي شروق
مافيش كام يوم لقيتني بافوق
واشوف القاتل الفعلي
لقيتك أرض ماتضمش سوى المطاريد
وانا عيل بيفتح إيد يشوفك خط على كفه
عنيا عيال اذا بصيتي يتدّفوا
حسبتك أم بتدوّر رحى الأحضان على عيالها
لقيتك ماسكة كاتم صوت
رصاصك فات وجع جواي
وهو ياحلوة يعني الموت
بيفرق شكله كان ازاي
وهو الجرح للستات ومش لينا ؟
ما فيه رجالة بتعيّط
وفيه رجالة بتفكّر ف عز الليل ف ناس باعوا
وفيه راجل اذا فات ف المحيط وجعه مابيساعه
وفيه عناوين بتتلخبط
وفيه بكره بيتشخبط
وفيه أطفال مايتولدوش ف مستقبل ماجاش قدام
وفيه زفة مابتقومشي
وفيه فرحة مابتدومشي
وفيه نغزة ف صميم الروح
ما دام ف القصة فيه دابح
أكيد ف القصة فيه مدبوح
ولو كان القتيل راجل
ف دمه بيبقي مش بالسهل
خسرتي معاه وجود الأهل
خسرتي الضهر والضمه
خسرتي الجمع واللمة
وبكره هتندمي لما
تحسي البرد من دونه
ياريتك شوفتي ف عيونه دموع الأب
أنا الشخص اللي كله ذنوب
لكن مليان حاجات تتحب
ــــــــــــــــــــــــــــــــــ
عملت حاجات لأول مرة بعملها
وكِملِت أغنيات بيكي
لأول مرة اكملها
اشِمِّك ريحه وانا ماشي وأقول ماشي
واكلّم ربنا عنك وجع وغروب
عكستي المشهد المكتوب
ماكانش الفيلم دي نهايته
كده الكاتب لعب ف النص
وفيه لزق ف حياتي وقص
وفيه تركيب لناس تانية
فيه مشهد خارجي مش محطوط
أنا وانتي
ومطرة بتغسل الشارع من الاحزان
حضنتيني زمان ومكان
وقولتيلي مافيش غيرك
نزلت ف لحظة على ركبي وانا ف ايديا كام وردة
ضحكتيلي
وطبطبتيلي علي خدي
كانك كنتي بتعدي على قلبي بروح حافية
مسكت الدمعه بالعافيه وضميتك ف عز البرد
لقيتني الفيلم بالكامل مافيش ولا لقطة ماسك ورد
طلع فيه حاجات بتتصور
بتتقصقص من المونتاج
وأول ما المطر لمسك
لقيتك دوبتي ف المكياج
عروسة حلاوة أو صورة
ملامح فازة مكسورة ف اخر جزء ف الذكرى
خسارة تكمّلي بكره
يا نور ساطع بيعمي العين ما بينوّرش
انا هافضل كده عيّل ومابيكبرش
وبكره يجوز تقابليني ف أي مكان
هاشوفك وقتها دخان
بقوة ست هاعشقها ف زمان تاني
ولمسة طفل يشبهني مايشبهكيش
انا جوايا كام ميّت وحابب اعيش
لا هاتحوّل
ولا هارجع من الأول
ولا هاكتب عشانك شعر
هبيعك دون نظر للسعر
مكانك وردة ماسقيتهاش ف دبلت من خريف موجوع
دموعي رصيد باحوش فيه لناس مستاهلة مني دموع
وحلمي معاكي م الأول
خطيئة لابد اكفّرها
رميتك طفل ببراءته
ندم على حاجة وكسرها
يا أسوأ حلو كان فيّا
يا أطيب شر ف النية
كسبت حاجات تسيء ليا
وجه الوقت اللي انا اخسرها .
اسمعها من هنا

[MHANDD]

روووووووووووووووووووووووووووووووعة

[smsmzeros]

المشاركة الأصلية كتبت بواسطة mhandd

روووووووووووووووووووووووووووووووعة

مرورك الاروع
شكرا ليك

[Mosa kmal]

بارك الله فيك

[smsmzeros]

المشاركة الأصلية كتبت بواسطة Mosa kmal

بارك الله فيك

آمين وبارك فحضرتك

[اسماء بلال م]

جميله دى تحفه مليانه مشاعر

[smsmzeros]

المشاركة الأصلية كتبت بواسطة اسماء بلال م

جميله دى تحفه مليانه مشاعر

شكرا كلك ذوق 😇

[المسافر للحنين]

قصيده جميله ومفرداتها سلسه
ومتماسكة البنيان

[smsmzeros]

المشاركة الأصلية كتبت بواسطة المسافر للحنين

قصيده جميله ومفرداتها سلسه
ومتماسكة البنيان

شكرا لك اسعدنى مرورك

[حكيم خالد الامير]

كما تعودنا منك في كل جديد
نجد اعذب الكلمات واجمل تعبير ..
تحياتي لك