هي الحكايه ماشيه ازاي.. (( وجهه نظر ))

[أ/رضا عطيه]

المشاركة الأصلية كتبت بواسطة المصري أشرف

ليه كده يامستر / رضا .. مارئيس الجمهوريه وضيوفه يقضوها
وكل واحد سندوتشين من عند البغل بتاع المحله ..
كده ماشي يارجب ...
أنا مش هاقول يروحوا محمد أحمد .. ولا حسني في إسكندريه
والله يارجب .. هاكتب لك قايمه مطاعم في طنطا .. لو الريس
حب ياخد ضيوفه ويعزمهم في المطاعم دي .. ميزانيه مصر مش
هاتكفي .. بس الصراحه .. هايكلوا أكل مش هايلاقوه في مصر كلها
خد مثلا ياحبيبي يارجب :
----------------------------------------
الوطنية الجميل تدخل بنص الفرخة اللطيف مع تلت مشكل وبامية باللحمة ورزك المعمر والسلطات وتطلع ع القهوة تضرب معسل
ابو عمر شرحه باضافة بعض التفاصيل المهمة
يعني نص الفرخة ينزلك فاهيتا مكسيكانو مع سكيلت ودخان لطيف كدا يسطلك اصلا
والرز المعمر يبقى باللحمة طبعا
والملوخية باللحمة
وورق العنب هناك غريب عجيب
والبشاميل هناك زي الزبدة ووشها مش احمر زفر زي ما ستات البيوت بتعملها حاجة كدا استيك
الميزة في ابو عمر ان اكله كله سمنة بلدي وزبدة فلاحي وقشطة... هاتموت يعني
ابو عمر هاينزلك شاي بالنعناع كدا متعرفش هو بدوي ولا لبناني ولا راكية ولا ايه بس هو لطيف جدا
اما زين فدا بيعمل شوية كفتة مشوية مع ورقة لحمة ويا سلام بقى على الموزة لما تبقى متعصجة ونازلة بالمرق
لو ممعاكش فلوس كتير ممكن تروح لرسلان بس تلحقه في اول اليوم او بعد المغرب
واحلى حاجة هناك البط والشاي بالقرنفل
في مطعم اكل لبناني بس انا مش فاكره
كاتشب يا جماعة فدا بتاع الحاجات اللطيفة
البيتزا الجميلة مع ساندوتش الشانجهاي اللطيف بس زود المشروم هاتبقى حاجة لطيفة
بما اننا ذكرنا المشروم
اعظم مشروم ممكن تاكله في حياتك هايبقى في ستريو
ولو عاوز تاكله مع طبق حلو
هايبقى ستيكة تي بون مع فريش مشروم ونصيحتي زود عليها جريلد شريمب ومش محتاجين نقول ينزل معاهم ايه غير سباجيتي ريد
يستحسن تسخن بواحد تاكو والسلطات تبقى السيزر فراخ او الجريك سلاط حاجة عظيمة عظيمة
في كذا مطعم زي استريو بس هو اطعمهم وانسبهم في السعر والنظافة واعظمهم في الخدمة
في ادامز وبورتوبيلو وفريسكي
بما ان سيرة فريسكي حضرت
فللناس اللي بتحب الباستاري
هناك الارابياتا اعظم عظمات الباستا في طنطا
تليها باستا اوليه الا اوليو
نسيت اقولكم على الشريب سوب في ستريو
يا اسيادنا احنا نسينا سبكترا هو مستواه حلو وقعدته برجوازية
وفي حاجات كتير حلوة عنده خصوصا الفرايد
بس غاالبا بيسترخصوا في اللحوم واطباق االلحوم عندهم غالية جدا - دي تجربتي مع الريب اي عندهم -
بالنسبة للكشري
أحسن 3 بيعملوا كشري في الشرق الاوسط هم
مديح
مديح
مديح
كشري عظيم يا جماعة وعدسه اصفر مش زي بتوع القاهرة بعدسهم البني الرخيص اللي بيطلع ريحة بعد نص ساعة
الصلصة تحسها طماطم بس اي والله والرز ابيض ابيض مش رمادي
باختصار كشري بيجوع
ينفع تتعامل معاه على انه مخللات او مقبلات فتاكل كشري تاني برده بعدها
لهاليبو في المرتبة اللي بعده وتحديدا اللي في شارع البحر
بس لهاليبو اللي عند السيد البدوي بيعمل رز بلبن حلو
ولهاليبو اللي في الشارع البحر بيعمل فطيرة كاسترد خطيرة
بالنسبة للساندوتشات
فاحلى سندوتش اكلته في طنطا كان عكا - في البدايات -
حاجة مفتخرة الحقيقة
الطابية بالنسبة لاسعاره فهو حاجة فخيمة طبعا
وهكذا بطوط اسعاره متناسبه مع نسبة جودة او ردائة الاكل بس بلا شك اكلهم طعم وريحته حلوة
الحواوشي عند الوطنيه عظيم تاكل وتعيط من الحلو وتتنحر
بالنسبة للسمك
فالموضوع صعب شوية
الطنطاوية مش بتوع سمك بس عاملين مجهود لا بأس به
خلينا نرتبهم شوية
ريد سي حاجة مفتخرة وبيحرص قدر الامكان انه حاجته تبقى طازة
بعده القبطان رهبة السمك والريحة والخدمة والديكور
فالجميل للاسماك كميات بالنسبه لغيره
الاخطبوط - بس دا قفل تقريبا -
البورسعيدي اول ما فتح كان بيعمل احلى شوربة سي فود بس خلاص تقريبا بيودع
الحوت دا محل شوي صحيح بس بيشوي ويتبل السمك تتبيلة مفتخرة
احنا مش حلوين في الاسماك زي البورسعيده والاسكندرانية الحقيقة يعني
الفول والطعمية
مفيش عربية فول في طنطا بتعمل اكل وحش
كلهم حلوين وحرشين ومبيعرفوش يعملوا طعمية
باستثناء واحد عزمني عنده المصري وحسام فهمي
مبيعرفش يعمل اي حاجة واكله وحش وعيشه بايت ومعندوش بصل
الجعان زمان كان مبدع فول وطعمية
طعمية الجعان دي مميزة لدرجة لي صديق في الكلية كان بياكل من عنده 10 طعمية في الطقة الواحدة وهو مستريح عادي جدا
ابو دشيش يا اسيادنا بيعمل طعمية غنوج حاجة مفتخرة
لحد فترة معينة كان ارخص ساندوتش فول او طعمية في مصر بس الخلاص الدولار بقى ب700 جنيه
هو احنا بنستورد فول!؟
لو هاتحلي في طنطا فانت مش محتاج تتوه وتسأل
ستريو بيعملوا شيز كيك عظيمة - بس تقيلة وجبنتها دسمة -
و شوكلت فلوتس كيك مع هوت شوكلت هاتبقى حاجة استيك الحقيقة
كافينو نفس الحكاية بيعملوا سينابون لطيفة
وميركاتو بيعملوا تيرمايسو عظيمة وسينابونهم وشيزكيكهم حلو برده
الريد فلفيت دي انا مش مستلطفها بالدرجة الكافية بس اشطة حلوة
يعني هي في ذاتها مش مستقلة ومحددة كدا وحافظة مقامها
لا دا كل واحد بيعملها بمزاجه ومحدش عارفلها مسكة اصلا.
الشبيحة بقى بتوع الضرب
شعبولا وتلوث وعواد
تروح تضرب 4 كفتة و3 كبدة من عند اي واحد فيهم
تاكل وتتنحر زي سيد قشطة كدا
وبالنسبة للجماعة السوريين الجمال فشخ
عندك الدمشقي في دوران النادي
واكلة سوري في علي مبارك
دول اسياد الشاورمة
بعدهم اسطنبول
اما طربوش دا فتروح تاكل عنده لما تاخد علاوة 500 جنيه ولا حاجة
الساندوتش ب30 بس مفتخر الحقيقة
كل القصة انت محتاج تضرب 3 سندوتشات.
اما بالنسبة للكوارع والسمين والمصمطة دي
فماجد طشطش دا عظيم يا جماعة
عنده شربة كوارع تاكلها تعيط على طول
والتقاطيع والتحابيش والمشكل مع نص الفرخة التمام وتلت الكبدة يختاااااي
مطاعم طنطا لن يكفيها الخبر في حصر ولا في قصد وصفها وطعامة اكلها وحلاوة قعدتها ولا اي حاجة
طنطا غير يا اسيادنا والله
أم محمد
ده لو مزاجنجي وبتعرف تاكل بجد
وإنت علي الزراعي طنطا / إسكندريه
وعند كفر الزيات .. هاتشم ريحه أكل نسينا ريحته
من زمان .. يلا .. ليت الشباب يعود يوما

---------------------------------------------------------
منك لله جوعتنا علي الصبح يارجب .. إنت عشان تروح المطاعم دي
مش محتاج مرتب الشهر .. مرتب السنه كلها .. ومش هايكفي

هههههههههههههههههههههههه

فيه مطاعم محتاج سلفه من البنك الأهلى دلوقتى

ماهو اللى معاه بيصرف واللى مامعهوش بيلعن الحكومة والدولة اللى منعاه يصرف زيهم

نحن نتصارع من أجل المساواه فى الصرف

لكن لو قلبنا القاعدة وقلنا نتتبارى فى الترشيدوالتوفير - الطرفين هيقولوا لك منيييييييييين؟

الدولة عايزه تجوعنا ولا إيه؟

فكرتنى يامستر أشرف

أيام الخطوبة حبيب أعمل زى المخاطيب الجداد واعمل رحلة انتحارية وزياره لمدينة طنطا بيسموها فى علم الوشوشة (المخاطيب رايحين يتفسحوا )

لفينا طنطا من شرقها لغربها لحد ماخلاص هنقع م الجوع

فقلت لها نتغذى سمك فى أحسن مطعم فى طنطا مش هقول اسمه ولكنه فى مدخل ميدان السيد البدوى

دخلنا وطلبنا ومن كتر الجوع زودنا

فى هذا المطعم على مايعملوا السمك المطلوب بيقدموا لك شوية سمك زغنطوط تقزقز فيهم على مالسمك المطلوب يجهز

لكن الجوع خلانا نزلنا بلا رحمة وعبال ماجه السمك الكبير كنا شبعنا

وسمعت صوت بيقوللى نلف لك السمك يا أستاذ -- قلت له خلاص احنا اتغدينا وشكرا

بعد كدا وبعد الزواج كانت أى زيارة لنفس المكان بنبه أولا -- احنا هنصبر لحد ماتجيبوا كله مع بعضه

الصبر هينجينا من مقالب القزقزة ههههههههههه

شكرا جزيلا