يوميات مواطن

[أ/رضا عطيه]

السيدة وصحباتها

الأستاذة أو الدكتورة أو المهندسة أو حتى فيلسوفة هذا الزمان

السيده الفاضلة تعبت من المذاكرة مع أولادها

فقررت تعمل جروب من صحباتها وتروح تقابل وزير التعليم باسم أولياء الأمور ---

حقها مفيش كلام

لكن لما يكون من اقتراحاتهم إلغاء التاريخ الفرعونى كاملا والتاريخ الإسلامى كاملا

وبس تبدأ دراسة التلاميذ للتاريخ من زمن محمد على باشا حتى اليوم

ومتلاقيش مذيعة تقول لها لأ--يبقى الوضع مش طبيعى ولا إيه؟

لما السياح ييجوا من أخر الدنيا ومعاهم ولادهم ويزوروا الأهرامات

والمعابد والأثار والقلاع ويعرفوا تاريخنا وأثار أجدادنا

وولادنا مايعرفوش عنها حاجة يبقى احنا بنعمل إيه؟

لما الدنيا كلها تعرف من هو مينا وخوفو ورمسيس وصلاح الدين وقطز

وأولادنا فى مصر مايعرفوش عنهم حاجة يبقى احنا بنعمل إيه؟

والمبرر الذى أضافوه أن كل هذه المعلومات متوفره على الإنترنت !!!!!!!

هو فيه حاجة مش متوفرة على الإنترنت وبأكثر من صيغة

إحنا بنعمل فى نفسنا كدا ليه وليه؟

وهو التاريخ ناوى يسيبنا ولا احنا اللى عايزين نسيبه

كان ممكن نطالب بالتخفيف والتنسيق -- وكلنا معاكم

لكن الإلغاء ونترك دراسة التاريخ لطلبة الكليات والمعاهد المتخصصة الذين لايتخطوا 2أو3%

دا مش طب عايز التخصص - داشعب عايز يعرف تاريخه