بصراحة محتار بين علمى علوم او علمى رياضة ومش قادر اخد القرار

[ابوعمرة]

المشاركة الأصلية كتبت بواسطة أريــــ الجنة ــــد

أنا عايزة بس أصححلك نقطة انت فهمتها غلط ف كلامي ..
لما بقول المجتمع بيبص بصة احترام للدكاترة والمهندسين بقولك ان في ناس معتقدة انه مبيبصش لغيرهم نفس البصة .. يعني الموضوع كله اعتقادات خاطئة وقلتلك بردو ان مفيش حاجة اسمها كلية قمة .. انت اللي بتحدد تبقى قمة ف كليتك
تمام دي اول نقطة
تاني نقطة انا مبقولكش كلام (مرسل ومعسول) زي ما قلت , انا جربت وبقولك الكلام ده من واقع خبرتي ..
انا طالبة ف حاسبات ومعلومات لو تسمع عنها .. وبقولك اني كنت داخلة علمي رياضة من الأول عشان بحبه كعلم وشايفة نفسي متفوقة فيه .. وده مش معناه ابداً اني لو اتحطيت قدام مواد بيولوجية مثلاً او خاصة بعلمي علوم اني هرفض وأقولهم لأ ده مش اتجاهي
والدليل ان دلوأتي ف الكلية في مواد ملهاش اي علاقة بمجالنا زي مثلاً حقوق انسان او مواد بعيدة عن مجال البرمجة اللي هو المفروض مجالنا زي مثلاً مادة اسمها ألجورذم أو بروبابيليتيز ..
وبقولك كدا ليه بردو ؟؟
عشان أعرف ناس شخصياً دخلوا كليات معينة عشان يرضوا أهاليهم ولما اتحطوا قدام القطر انداسوا .. مقدروش يكملوا فيها .. ليه ؟؟ عشان مش حابين المجال ده او الكلية دي ..
ومش عيب ابداً انك تحدد انت متفوق ف ايه اكتر من التاني .. او شايف نفسك هتمشي ف ايه اكتر من التاني ..
فالقصد من كلامي انك تقيس الموضوع من كل الجوانب وبلاش تاخد كلام الناس اللي اكبر منك ع انه كلام معسول او مجرد كلام أحشي بيه موضوعي .. اوك ؟؟
ربنا يوفقك

اولا احب ان اعتذر اذا كنت اخطات فى حوارى مع حضرتك واسف برده لو كنت فهمت حضرتك غلط فى نقطة معينة ولكنى برده عايز اوضح بعض النقاط لحضرتك برغم ان خبرتى مش كبيرة ولسه يعتبر فى بداية المشوار ولكن برده احب اقول رايى فبالنسبة للنقطة الاولى اللى حضرتك اشرتى اليها فانا متفق معاكى تماما انها كلها اعتقادات خاطئة والمجتمع هو اللى افترضها ولكن بايدينا نغيرها لو حبينا ولكن بما ان الوقع دلوقتى يفرض علينا كده فلازم الواحد يتاقلم مع الوضع اللى هو فيه وبخصوص كليات القمة والقاع والكلام ده فاظن برده انها كلها اعتقادات وافتراضات المجتمع افترضها وصدقها وامن بيها لانه هو عايز كده واعتقد انه محدش يقدر يمشى ضد التيار فيعنى برده لازم اتاقلم على الوضع الحالى لحد ماربنا يفرجها والشعب يفهم انه مفيش كليات قمة ولاقاع وحكاية انى ابقى قمة فى كليتى انا هتفق مع حضرتك فى النقطة ديه لكن الكلاد ده مش فى بلدنا هنا وده اللى انا واثق منه وياريت حضرتك توضحى اكتر عشان افهم اكتر يعنى مثلا اللى انا فهمته فى انى ابقى قمة فى كليتى هو انى اجيب تقدير ويبقى ليا ترتيب على الدفعة وابقى متفوق فى دراستى عشان اتعين فى الجامعة ولكن للاسف ده مابيحصلش فى مصر والنماذج كتير ياما ناس بتبقى متفوقة فى كلياتها ومش بيرضوا يعينوهم عشان ابناء الدكاترة والواسطة والمحسوبية وغيره وغيره واظن حضرتك متفقة معايا فى كده وغير كده فى مثل بيقول مايبقاش ابنى على كتفى واروح ادور عليه يعنى يبقى قدامى الفرصة انى ادخل كلية قمة زى ما المجتمع بيفرض عليا وادخل كلية مش قد كده واقول هتفوق فيها وهبقى قمة فيها طبعا ده مش مستحيل ولكن اعتقد انه صعب ومش سهل تحقيقه ديه اول نقطة
تانى نقطة بالنسبة لكلية حاسبات ومعلومات فانا الحمدلله اعرفها وعلى دراية بيها واخو زميلى فيها فى جامعة عين شمس وتعتبر تانى كلية بعد الهندسة فى علمى رياضة وان كان فى مشاكل بينها وبين الهندسة على قسم حاسب الى ولكنى افضل حاسبات على قسم الحاسب فى هندسة لانى على ماعرف انكم بتبقوا اكتر دراية من بتاع هندسة فى حاجات كتير وبالنسبة لحكاية انى احدد انا متفوق فى ايه اكتر من ايه فانا بالفعل بعمل كده وعارف امكانياتى فى كل مادة وادائى فيها ايه ولكن المشكلة فى انى مثلا انا مش شايف نفسى مهندس مع انى شاطر فى الرياضة اكتر من الاحياء فى نفس الوقت بحلم اكون دكتور بس خايف من الاحياء وده مش معناه انى وحش فيها لكتى بصراجة بفضل عليها الرياضة وبحس فيها بمتعه اكتر على عكس الاحياء كلها حفظ ولكن برده الواحد كويس فيها ومعنديش مشكلة في ان ادرسها مادام هى الوسيلة لتحقيق الهدف ولكن اخاف مثلا التنسيق يجى عالى فى علمى علوم ومطولش حاجة او امتحان الاحياء يجى طويل ومخلصوش او مثلا يجى صعب وتقع منى كام نقطة اكون نسيتها فده بس اللى مقلقنى ومش مخلينى احدد وجهتى ايه بالظبط لانه فى مثل برده بيقول عصفور فى اليد ولا عشرة على الشجرة يعنى تبقى فرصتى فى الوصول لهندسة اكبر واروح ادور على طب فديه مش مريحانى وحكاية تحكم الاهل والكلام ده الحمدلله مش عندنا لان اهلى سايبين ليا مطلق الحرية فى اختيارى فمش مشكلة وبخصوص انى باخد كلام اللى اكبر منى على انه كلام معسول فحضرتك فهمتينى غلط انا قصدى فى العموم يعنى نكون اكثر واقعية لما نتكلم ونعرف ايه اللى احنا بنقوله وهل هو صح ولا غلط وموجود على ارض الواقع ولا لا بدل اللى احنا عمالين نسمعه فى التليفزيون من مشاريع وانجازات وكله كلام فى الهوى عشان كان احنا ورا فياريت نكون واقعيين اكتر مع نفسنا او مع غيرنا عشان نقدر نتقدم بجد وفى النهاية احب اشكر حضرتك على اهتمامك وادعو ربنا انه يوفقك ويوفقنا ويوفق الجميع باذن الله .........

[أريــــ الجنة ــــد]

بص هقولك حاجة صغيرة ..
عارف كلية علوم ؟ رغم انها مهمشة وكانت ف يوم من الأيام مجموعها اقل من كلية تربية .. وكانوا الناس بيفضلوا يدخلوا تربية على انهم يدخلوا علوم عشان مجموعها قليل وبتاع
بس من وجهة نظري .. المفروض انها تبقى فوق الطب كمان ..
دراساتهم شاملة وهما الأساس .. رغم ان مجتمعنا باصص للكلية ع انها حاجة صغيرة
اوك ده واقع مجتمعنا وبتقول ان لازم نتواكب معاه .. طب لحد امته ؟؟
مش لازم نبدأ بالتغير عشان نثبت للمجتمع ان نظرته غلط ونقوله مش هنخضع لتحكماتك ؟؟

اني اقصد انك تبقى قمة ف كليتك انك تذاكر اول بأول وتتفوق فيها و ع قدر الإمكان تجيب فيها تقدير كويس ع الدفعة .. وليه مش الأول ؟؟ تحط قدامك هدف وتوصله ..
مش شرط عشان تبقى معيد فيها .. مانت لما تتفوق ف دراستك هتتقن مجال عملك بعد كدا وهتعرف ايه الثغر اللي تخليك ناجح ف شغلك ..

و ع فكرة حتة ان ابناء الدكاترة والمعيدين هما اللي بيتعينوا مبقتش موجودة
متقلقش منها احنا تقريباً معندناش حد من ابناء الدكاترة متعين كمعيد .. كلهم ناس عادية كل اللي عملوه انهم حققوا تفوق دراسي كبير

وبعدين حاول متعقدش نفسك ومتخوفش نفسك بردو .. انا عارفة ان الطريق لسة ف اوله وعارفة ان هتقابلك صعوبات
بس بردو متفضلش حاططها قدام عينك .. حط قدام عينك انا لو نجحت هيحصل كزا وهعمل كزا وكزا

وسيبك بردو من نظرة المجتمع وإن اللي انا بفكر فيه ده مش ف بلدنا .. ابدأ بالتغيير

ومحصلش حاجة مزعلتش ولا حاجة .. حصل خير وبالتوفيق ليك ولكل زمايلك يارب

[THE CodeR]

'طيب هسألك سؤال مهم جداً:
ايه رأيك في واحد ضلّ طريقه وتاه في سفره ووجد نفسه عند مفترق طرق
وبيسال واحد بيقوله "ادخل أنهي طريق؟" وهو من الأساس مش عارف هو رايح فين
يبقى بالله عليك هيجاوبه ازاي؟
انتا الشخص ده دلوقت
خلينا نتفق على حبة حاجات :
أولاً : لازم تبقى عارف انتا عايز تعمل ايه في حياتك (بعيداً عن المجال العلمي)
ثانياً: لازم تكون عارف قدراتك ايه ، يعني مثلاً ممكن تكون بتحب الرياضيات زيي لكن إمكانياتك الذهنية مش عالية فيها وبالتالي مش هتقدر تحقق بيها انجاز كبير

طيب ايه الحل دلوقت؟؟
لازم نتفق الاول على حاجتين :
أولاً : متفكرش انك داخل كلية عشان تخرج تلاقي وظيفة ، ده رزق بيد الله تعالى ، ممكن تلاقي مهندس ومش لاقي شغل ودكتور قاعد على القهوة ، وممكن تلاقي خريج تجارة بياخد 3000 جنيه في الشهر أو اكتر
الكلية مش بترزق ربنا هو اللي بيرزق
ثانياً : لازم تعرف بلدك محتاجة ايه دلوقت عشان تتحرك وتتقدم ، لازم تدور وتعرف ايه هي مشاكلنا في الواقع ، يمكن مشكلتنا في ابحاث الغذاء والزراعة ، يمكن مشاكلنا في الادارة ، يمكن مشاكلنا في التطبيقات التقنية في حياتنا ، لازم تفكر في حلول تناسب قدراتك والقدرات اللي انتا عارف انك تقدر تكتسبها
يعني قول مثلاً: أنا شايف سلبيات كذا في قضية التعليم ، تتعالج بكذا كذا ، يبقى انا هدخل كلية كذا واقدم من خلالها حلول مناسبة ، او مثلاً مشكلتنا مثلاً في الطاقة يبقى لازم نعمل كذا وأنا ممكن ادخل كلية كذا عشان اساهم في حلها
لازم تعيش لاجل قضية
طالما في قضية قدام عينك مش هتحتار أبداً

اسأل الله لك التوفيق والسداد

[Luma Queen]

انا مش عارفة حضرتك كاتب الكلام امتي بس انا عندي نفس المشكلة بالظبط ف قولي بليييييز عملت اية وخرجت منها ازاي عشان انا تعبت من التفكير والله وعندي اصحابي بردو داخلين رياضة ف مشكلتي نسخة منك

[عبد المقصود مصطفى]

من رايي والله اى ولد يا جماعة ادخلوا رياضة علطول ...باذن الله مضمونة اسمعوها منى