كل سنة وأنتِ طيبة يا مصر

[أ/رضا عطيه]

رغم ان الناس واحشاني
مش عايز اقابل حد
مش باعمل شيء علشاني
عايز اضحك بس بجد
وقعت من جيبى الخارطة
والكنز هناك فى الكوخ
حب الأحلام بقى ورطة
والغابة وحوش ومسوخ
أقدر لكن مش عايز
أوصل من غير عصافير
مجنون ...يمكن أو جايز
موصوف لحاجات بتطير
ثابت والكون مهتز
وحريرى بيصنع قز
والله ما كنت اتعز
لو كنت هنا وموجود
جوايا حروب ومدافع
مش هاكسب بس هادافع
ومعايا لكن مش دافع
غير فى جناين وورود
أنا مش كسلان اقوم اجي
الماتش ما يلزمنيش
باعمل مهزوم بمزاجي
وباغيب عشان اقدر اعيش
على كتفى نسور
تتحول لفراخ لو حد جعان
أنضف م الصينى وأول
ما ابهت بانزف لمعان
دقنى بتكبر ... مش سنة
حلمى بيصغر.... ودا فرض
ودماغى دى بنت سهنة
دالقة السماوات ع الأرض
عيل أطول م الواقع
أقصر من طولة البال
مش نجم كبير ولا ساطع
ولا شايل حمل جبال
عيل متشال للعوزة
لو حال العالم مال


كلمة السر

بيحكمنى قانون الفرقة
ولاحد سامع بينا
حطونا فى أخر الطرقة
وبيحضروا التفجير لينا
خيل الحكومة اتجمع
وبيجهزوا الرصاصات
والحق عندهم اتشمع
والتكريم صار إهانات
ولو كل يوم ثورة
وربى ما أنا طالع تانى
طالما شعارتها مناوره
علشانهم مش علشانى
شلتك على راسى كتير
لحد ماوصلت لسابع أرض
لكنى فقدت التعبير
وأبو النصر مفروض فرض
قانون من زمن ولى
عنصريته فى كل حروفه
خرجنا وقلنا يلا
نمسح دمانا من كفوفه
لاطموحنا كان وزير
ولاحتى باش غفير
أحلامنا يتعدل قانون
خلانا لليأس أسير


واملنا
لانكمل محلك سر
ولانعيشها فى كلمة سر


كل سنة وانتى طيبة يامصر